1 Reyes 7 - Dios Iwene

Salomon iteda eju otidina jawa

¹ Iteda eju comunidadbi otidinobe Salomonma, ja̧danö a̧li̧nösamutjö wa̧pötakwa o̧biya baledibanö otidö ö̧jinobe.

² Bakweju, Libano niji teboseju ötjabeju otidinobe, wayobekwö cuarenta y cinco metro jenanö, ja̧danö jakwölakwö veintitres metro jenanö, jadanö möakwö catorce metro jenanö. O̧do okwi'ijuma, isa'banö tjujuninobe, ö'wejemu jawa ö'biya, jadanö bakwa'bakwena, quince okwi'iju tjujuninobe. Ja̧danö, mö jakwölakwö jawa obobi tjöwaninobe, cedro jawa obo.

³ Möbi cedrotjö tjotidinobe, bakwa'bakwena quince jawa obo wi̧nobe, okobe jwiinö mö jawa obobiyama, cuarenta y cinco baibanö.

^4-5 Ventanabi otidinobe, jakwölakwöbi, jakwölakwöbi. Möakwö bajalenö, wapö'bakwa baibanö, isa'banö otidinobe ventanama, jakwölakwöbi, jakwölakwöbi tjöbadekwawöte i̧sȩkwi̧danö. Ja̧danö okobe jwiinö ventanabi, apjudebi, otiwanö 'do̧'do̧kwi̧ ji̧nö baibanö tjotidinobe.

⁶ Ja̧danö jelejubi otidinobe, Okwi'iju Jȩko̧ jö̧ba̧lö ötjabejuma. Jejuma wayobekwö veintitres metro jenanö, ja̧danö jakwölakwö catorce metro jenanö otidinobe. O̧do badeibö, okwi'ijubi ujuninobe, ja̧danö möbi öwaninobe.

⁷ Ja̧danö jeleju Lȩekwa Yöawakwaweju ötjabejubi otidinobe, inesö la'aka luwo̧ iteaka jȩjuma, jobe ba̧nö, lȩekwa yöawakobetjö. Jeju otiweju baibanö, okobe jwiinö tjöekwemitenia, nijitjö möakwö bajalenö cedro ötebiyanö pöchö tjotidinobe.

⁸ Iteda ejubi otidinobe, Lȩekwa Yöawakwaweju o̧pekwöchobe. Jeju iteda ejubi Lȩekwa Yöawakwejudanö cedro ötebiyatjö otiwanö otidinobe. Ju'wibi, jeleju bakwaiseju otidinobe, ilekwo bajibanö eminoko Faraon itjiju jeju baibanö.

⁹ Okobe jwiinö ja otidinama, nöinö mikwawi̧ inawiyatjö tjotidinobe. Ja̧ inawiya tjödakwa̧ abönö, otiwanö ba̧ja̧dajadö lötjinobe inawa löawakanö, bakwachobetenia otiwakobetjö̧. Okobe jwiinö Salomon itebo comunidad jejenö tjotidinobe, o̧do la'akabi, tjöekwemibi, a̧petu tjöekwemibi.

¹⁰ O̧do la'akama, nöinö mikwawi̧ inawiya öwiyawi̧tjö tjotidinobe, cuatro metro jenanö nöawatjöbi, tres metro jenanö nöawatjöbi.

¹¹ Ja̧danö o̧do tjöekwemibi nöinö mikwawi̧ inawiya, otiwanö ba̧ja̧dö lötjaja̧ inawiyatjöbi, cedro ötebiyatjöbi tjotidinobe.

¹² Ja̧danö, Isabenö Jo̧ eju tjöekwemi tjotidinadanö, jadanö Isabenö Jo̧ eju teachakwawȩko̧ tjöekwemi tjotidinadanö, bakwainö Salomon eju comunidad a̧petu tjöbebö tjotinobe, otiwanö lötjaja̧ inawiyakwöbi, cedro okwi'okwöbi. Möakwö wapötakwanö inawiya lödajadö, wame cedro okwi'o bakwa'o tjöwaninobe, möakwö bajalenö jejenö tjotidinobe, Dios eju tjöekwemi tjotidinadanö.

Hiram mikwo̧ Dios eju jawa otidina

^13-14 Bakwo̧ broncetjö otikwa waiso̧, Hiram mikwo̧ Tiro comunidadnö ö̧jinobe, Neftali jojosuju jilekwenö wobekwinuju jitji̧ma. Jo̧ba abe'dominema, Tiro comunidadtjö broncetjö otidö ji̧na, jadanö Hirambi jwiinö waiso̧ ö̧jinobe, okobe jwiinö broncetjö otikwa jawa waisanö otidobö. Ja̧danö jejenö broncetjö otikwa waiso̧ ö̧jiökwe, Salomonma jo̧banö weinobe, Jerusalenbe ichobö, ja̧danö weiökwe ichinobe, ja̧danö okobe jwiinö Salomon wei̧ otidinobe.

¹⁵ Hiram otidina jawa baikwö laebobe: Okwi'o jwiinö nöa'o ji̧danö, broncetjö do'olataja o'oawi̧ otidinobe, möakwö nueve metro jenanö möa'o, jadanö jwiinö böa'o, söpödö ba̧ja̧döma, seis metro jenanö ja̧'o.

¹⁶ Ja̧danö, ja̧ okwi'iju wame jawabi otidinobe, wamenö tjujunobö. Ja̧ bakwa'okwena wame jawama, möakwö dos metro ja'ö otidinobe, bronce tubinö tobajadö isobu baibanö tjotidaja̧ broncenö.

¹⁷ Ja̧danö, ja wame jawama, otiwanö tjotidinobe, ka̧lenaso opjiyabi, ju'wi tjedobö tjösödi̧ jawabi nönö tjotidinobe. Bakwa'okwena, jelemutjö dötölatajanö jejenö tjöninobe.

¹⁸ Ja̧danö, jejenö otidenama, bakwa'okwena wame, wamenö söpödö dö'balataja granada waji̧ ichejekwi̧ o̧'wo jawa isa'banö otidinobe.

¹⁹ Ja̧ otidinama, baikwö ichejekwinö otidinobe: Bakwa'okwena wame jawa otidenama, o̧bubiya lirio ichejekwinö otidinobe, möakwö un metro ochenta centimetros jenanö.

²⁰ Ja̧danö, wame jawatjö dȩja̧pa̧ ichejekwi̧ teebe, bakwa'okwena doscientos granada wa̧ji̧ o̧'wo jawa isa'ba dö'balatajanö söpödö tjöninobe.

²¹ Jejenö otidajo̧, Dios eju teachakwawemi a'o a̧la̧pedö ujuninobe. A̧li̧kwö ujunaja'oma, Jaquin jö̧balö imidina'o, ja̧danö u'dakwö ujunaja'oma, Boaz jö̧ba̧lö imidina'o.

²² Ja̧danö, wamenö lirio o̧bubiya o̧'wo jawa tjöwaninobe. Jejenö wanö, broncetjö otikwa'o otidaja̧ma kaatakwawinobe.

²³ Ja̧danö ju'wibi otidinobe Hiramma. Bronce tubinö tobebö, isobu baibanö tobebajo̧, jwiinö jalapa̧ otidinobe, ja̧danö otidaja̧pa̧ma, Jwaibalawa, jö̧ba̧lö tjimidinobe. Ja̧ nöa̧pa̧ma, ö̧sȩko̧inö otidinobe, ösö'bötjö jakwölakwösö'böbe cuatro metro ja'ö ja̧la̧pa̧, ja̧danö möakwö dos metro ja'ö möa̧pa̧, ja̧danö söpödöma trece metro ja'ö ödöa̧pa̧ nöa̧pa̧ otidinobe.

²⁴ Ja̧pa̧ ösö'bö teebe, moli'i ja̧ye o̧'wo jawa isa'banö söpödö otidinobe, metrokwena veinte moli'i jawa ji̧nö. Ja̧ moli'i i̧chejekwi̧ jawa otidinama, ikena otidinokobe. Dȩja̧pa otikwemi ajayinö dadö otidenama, moli'i ichejekwi̧ o̧'wo jawabi dadö otidinobe, tubinö tobebajo̧ otidenama, ida̧ökö dȩja̧pa̧bi, moli'i o̧'wo jawabi pöaibakobetjö̧.

²⁵ Ja̧danö ja̧pa̧ wanawemi, baikwö otidinobe: Pakayadö a̧li̧nö̧sa̧mu du̧ju̧tajabedö tjo'wo jawa otidinobe, wamedukwa u'dakwö bajalenö eda̧ladönö, jadanö wamedukwa ja̧wo̧ meajobekwö eda̧ladönö, ja̧danö wamedukwa a̧likwö bajalenö eda̧ladönö, jadanö wamedukwa jawo̧ laebajobekwö eda̧ladönö otidinobe, ja̧danö jejenö otidajo̧, ja̧pa̧ nöa̧pa̧ma tjoma'anö öwaninobe.

²⁶ Ja̧pa̧ dȩja̧pa̧ma, tjömamu ja̧lidanö böi̧nö otidinobe, jadanö dȩja̧pa̧ ösö'böma, lirio o̧bubiya ichejekwi̧nö otidinobe. Jwiinö nö̧a̧pa̧ baibanö otidinobe, su̧'bȩ baibenama, cuarenta y cuatro mil litro okwapa̧ baibanö.

²⁷ Ja̧danö ju'wi ö̧piyabi, domulataja ö̧pi̧ya otidinobe. Ja̧ domulataja jawa dȩja̧pa̧ wanawaökiya domulataja jawa ökiya broncetjö otidinobe Hiramma. Bakwakakwena, wayobekwö un metro ochenta jenanö, ja̧danö jakwölakwö un metro ochenta jenanö, ja̧danö möakwö un metro ja'ö jenanö otidinobe.

²⁸ Ja̧ wanawaökiya otikwama, baikwö laebobe: Isaka otidajadö, bakwachobekwena broncesöte jinobe, wanawakama isa'pjo baibanö.

²⁹ Ja̧danö, ja̧ ösötenö, didibadö tjo̧'wo jawabi, pakayadö tjo̧'wo jawabi, angeledö tjo̧'wo jawabi tjotidinobe. Ja̧danö didibadö, jadanö pakayadö tjöwamebi, tjiteebebi ösö̧pö̧ broncetjö tjotidinobe.

³⁰ Ja̧danö, ju'wibi bakwakakwena ö'wejemu jawa broncetjö otikwa kolukasa'o ji̧nobe, jadanö iso̧jwa̧bi broncetjö otikwa ji̧nobe. Ja̧danö isaka wamema, 'do̧'do̧kwetenia broncetjö otikwa wanawaö̧kiya jinobe, wame deja̧pa̧ tjö̧wanobö. Ja̧danö ja̧ wanawaö̧kiya ö'öbönö, ösö̧pö̧ tjotidinobe.

³¹ Ja̧danö ja̧ wanawaö̧kiya wamema, ösö̧pö̧danö tjotidinobe, jobe dȩja̧pa̧ tjö̧wanobö. Ja̧ deja̧pa̧ wanawemi ösö̧pö̧ma, isaka okwa veinticinco centimetro okwa bamatinobe, ja̧danö isakatjö möakwö metro ja'ö laebinobe. Ja̧danö, ja̧ ö'öbönö, ju'wi jaye o̧'wo jawa ji̧nö tjotidinobe, 'do̧'do̧kwi̧ ji̧nö otikwa jawama.

³² Ja̧danö isaka teebe, kolukasa'o ji̧nobe, bakwa'okwena, sesenta siete centimetro jenanö jala'o ji̧nobe, jadanö iso̧jwa̧ma isaka teebe dötewö ji̧nobe.

³³ Kolukasa'o otikwa, koluka tjölakwabikwawaka ichejekwa'o ichejekwi̧nö tjotidinobe, ja̧danö okobe jwiinö kolukasa'o jawama, bronce tubinö tobebö isobu baibanö tjotidinobe.

³⁴ Ja̧danö, isakakwena, bakwachobekwena doa̧lakwawemi otidinobe, ö'wejemu jawa ji̧nö. Ja̧ do̧'alakwemima, bakobe ju'wi isaka jawakwö tubinö totjebinobe.

³⁵ Ja̧danö isaka wame, ösö̧pö ji̧nö tjotidinobe, möakwö veintidos centimetro jenanö möpö̧ma. Ja̧danö, isakabi, ö'öbökwenasötebi, okobe jwiinö bakobe tubinö tobebö tjotidinobe.

³⁶ Ja̧danö, wametenia Hiramma angeledö tjo̧'wo jawabi, didiba o̧'wo jawabi, ö̧sö̧yö̧ o̧'wo jawabi ji̧nö otidinobe, ja̧danö ju'wibi wametenia ösö̧pö̧ ji̧nö otidinobe.

³⁷ Okobe jwiinö ja̧ domulataja jawa wanawaökiya jobekwö bakwainö otidinobe Hiramma. Okobe jwiinö bakwainö tubinö tobebö otidinobe, ja̧danö okobe jwiinö bakwainö öwawinobe.

³⁸ Ja̧danö, dȩja̧piya wanawaökiya otidajo̧, ju'wibi domulataja jawa ö̧piya otidinobe, bakwakakwena bakwa̧pa̧. Bakwapa̧kwena, jakwölakwö un metro ochenta jenanö ja̧linobe, jadanö su̧'menö okwenama, ochocientos ochenta litro okwapa̧ ji̧nobe.

³⁹ Jejenö otidajo̧, bakwamu jawa Dios ejutjö a̧likwö bajalenö ujuninobe, jadanö bakwamu jawa u'dakwö bajalenö ujuninobe. Ja̧danö nöa̧pa̧, Jwaibalawa ötjaba̧pa̧ma, Dios ejutjö a̧li̧kwö ujuninobe, jawo̧ laebobekwö bajalenö.

⁴⁰ Ju'wibi nöinö dichawa ö̧piyabi, ju'wi dȩjapiyabi, palapibiyabi otidinobe Hiramma. Jejenö otidö kabatajo̧, okobe jwiinö Salomon jo̧banö weina jawa kaatakwawinobe, Isabenö Jo̧ eju jawa otidobö La'aka Luwo̧ Salomon weina jawama.

⁴¹ Ja̧ otidinama, bi̧ya: Broncetjö otikwa okwi'iju dö'olatajabi, wame jawa dȩja̧pa̧danö ichejekwi jawabi, ja̧ ba̧kwemeachibanö ji̧ kalena osijubi,

⁴² cuatrocientos granada waji̧ o̧'wo jawa, okwi'o wame jawa isa'ba dö'balatajanö otidina jawabi.

⁴³ Domulataja jawa dȩja̧piya wanawaökiyabi, dȩja̧piyabi,

⁴⁴ nöa̧pa̧ Jwaibalawa ötjaba̧pa̧bi, teebe wanawedö pakayadö a̧li̧nösamutjö du̧jutajabedönöbi,

⁴⁵ dichawa ö̧piyabi, ju'wi dȩja̧piyabi, palapibiyabi. Okobe jwiinö ja̧ jawama, La'aka Luwo̧ Salomonma Hiramnö weinobe, Isabenö Jo̧ eju jawa baibanö otidobö, jadanö okobe jwiinö ja̧ jawama, broncetjö otidajadö otiwanö 'do̧bö tjotidinobe, salöachibanö.

⁴⁶ Ja̧ jawa tjotidinenama, Salomon weawö̧, Jordan ojwe badeibö, Sucot comunidadbi, Saretan comunidadbi ö'wejenö tjotidinobe, nöinö lete'o jȩmima.

⁴⁷ Ja̧ bronce jawatjö tjotidinama, jwiinö nöinö tjotidinobe, jo̧kwajabetjö̧ dokwa ömökojobö jö̧ba̧lö tjönoböma weinokobe Salomonma, ja̧danö wajwitjobe, broncetjö tjotidinama, dokwa nöinö ömökobejö, jö̧ba̧lö.

⁴⁸ Ju'wibi okobe jwiinö Dios eju jawa, orotjö otikwa jawa otidinobe, Diosnö iyawötebi, mesasöte Diosnö iyawa pan wanawötebi,

⁴⁹ dȩju̧wa'yu o̧'di̧ju̧ ja̧ka okwasȩko̧ badeibö tjöwaisobekwöchobe ji̧ bakwamu jawa ökiyabi, wajwitjobekwö ji̧ bakwamu jawa ökiyabi. Jadanö o̧bubiya o̧'wo jawabi, dȩju̧wa'yubiyabi, isa̧wu̧ ubaja̧wu̧ pji̧bebö loawakabi,

⁵⁰ dȩja̧piyabi, dȩju̧wa'yu tiekwa jawabi, dȩju̧wa'yu jawa dȩja̧piyabi, ju'wi dȩja̧piyabi, omewinö ubi̧ jawa deja̧pi̧yabi, okwasȩko̧ apjude jawa visagrasbi, nöȩko̧ apjude jawa visagrasbi. Okobe jwiinö ja̧ jawa bakwa̧i̧ orotjö otidinobe Salomonma.

⁵¹ Ja̧danö, Isabenö Jo̧ eju otidö kabatajo̧, Dios itea baibanö iteda abe'do David 'da̧batö ujunina jawa, Isabenö Jo̧ ejutjö nöinö mikwawi̧ jawa junawemi okwa pjolatö teatinobe, platatjö otikwa jawabi, orotjö otikwa jawabi, ju'wi jawa abe'do 'da̧batö ujunina jawabi.