1 Reyes 6 - Dios Iwene

Salomon Dios eju otidina jawa

¹ Ja̧ jawa ko̧ko̧dajo̧, Isabenö Jo̧ eju jamatö otidinobe Salomonma. Ja̧ Salomon jamatö otidina möle wȩyukwa'yema, baikwö laebobe: Damötjö Diosma israel jojodönö egipto nijitjö labebö ichejebinobe, idöda tjitebo israel nijinö tjö̧jobö, ja̧danö Egipto nijitjö latjebina möle ikena, cuatro cientos ochenta o̧biya baledaja̧ ikenama, ikena jawo̧ Zif ötjabökwe jawo̧nö, Isabenö Jo̧ eju jamatö otidinobe Salomonma. Ja̧ mölema, Salomonma ida̧ökö ö'wejemu jawa o̧biya baledibanö webö ö̧jinobe.

² Ja̧danö, Isabenö Jo̧ eju baibanö, Salomon otidinejuma, wayobekwö veintisiete metro jenanö otidinobe, ja̧danö jakwölakwö nueve metro jenanö otidinobe, ja̧danö möakwö trece metro ja'ö jenanö otidinobe.

³ Ja̧danö, o̧do teachakwawemitjö a̧petukwöchobe, o̧do ö'öbösȩko̧ tjotidinobe, teachakwawȩko̧ baibanö. Jȩko̧ma, o̧do jakwölakwö ji̧danö, nueve metro jenanö jakwölakwö otidinobe, jadanö apjudetjö a̧petukwöchobe bajalenö cuatro metro ja'ö wayobekwö otidinobe.

⁴ Ja̧danö o̧do tjöekwemima, ventana ji̧nö otidinobe, ja̧danö ja̧ ventanama, a̧petukwöchobe ja'yuwinö, okwakwöchobe jali̧nö otidinobe.

⁵ Ja̧danö, a̧dekwanö Dios eju ö'öbönö, jakwölakwöbi, jakwölakwöbi, okwasȩko̧ o̧pekwöbi, ö'öböseju pöa̧linö otidinobe a̧petukwöchobema. Jeju o̧do otidinama, möakwöma wa̧pötakwanö möeju baibanö otidinobe, ja̧danö okwa ȩkiju ji̧nö otidinobe.

⁶ Ja̧danö, jeju ö'öböseju tjotidenama, tjöekwemi isaju po̧tjebapji jö̧ba̧lö, nijakwöchobe tjöekwemima böinö tjotidinobe, 'dibatö otikwemi baibanö tjödenama, tjöekweminö wame ötöla jena tjöwanakobetjö. Ja̧danö, jejenö otidinobetjö, nijakwösȩko̧ma, dos metros ja'ö jalȩko̧ ji̧nobe, ja̧danö ikenasȩko̧ma, tres metros ja̧lȩko̧ ji̧nobe, ja̧danö mösȩko̧ma, tres metros ja'ö ja̧lȩko̧ ji̧nobe, tjöekwemi isaju jwiinö.

⁷ Ja̧danö, o̧do tjotidakwa̧ abönö, inawiya tjeminelö otiwanö jweinö löbö tjotidinobe, ja̧danö jwiinö otiwanö jelobetjö lötjinobetjö̧, ja'yubebi Dios ejutjö lötjobö jwiinobe. Jo̧kwajabetjö̧, jobe tjotidenama, martiyubi, picobi, ju'wi 'dii jawatjö otikwakabi ja'yubebi ökwöinokobe.

⁸ Ö'öböseju apjudema, a̧li̧kwöchobe bajale ji̧nobe, jadanö nijibesȩko̧ okwa, wi̧so̧winö nöchawaka ji̧nobe, ikenasȩkobe tjönöchobö, ja̧danö ikenasȩkotjö, mösȩkobe nöchawakabi ji̧nobe.

⁹ Ja̧danö, Salomon o̧do isaka otidö kaatenama, mö otidinobe. Ja̧ mö otidinama, cedro okwi'ijutjöbi, ösötetjöbi otidinobe.

¹⁰ Ja̧danö ö'öböseju otidinama, i̧sȩkokwena dos metro veinticinco centimetronö möakwö otidinobe, jadanö cedro okwi'ijunö Dios eju tjöekwemi dötewinö ji̧nobe. Jobekwö otidö kaatinobe, o̧dosakama.

¹¹ Ja̧danö, ja otidö kaatenama, Isabenö Jo̧ma Salomonnö yöa̧linobe,

¹² —Beju cheju baibanö kwotidejuma, baikwö yöta̧la: Ötjö ja̧bö kwö̧jaduwobö weti̧bi, ju'wi weti̧bi a̧ja̧kwö kwö̧jitjö̧ma, isabenö ökwönötjö kwabe'do Davidnö yöbawö chujunina jawa badekwachinö ja̧takwo̧sa.

¹³ Jau Salomon, bejunö ja̧nö israel jojodö tjö̧'da̧de chö̧jakwo̧sa, jadanö la'akatjöda le'dedö lotökakwosa ötjöda chömöledö israel jojodönö, —jö̧ba̧lö yöa̧linobe.

¹⁴ Ja̧danö, o̧dosaka kabatibajo̧, okwa jawabi otidinobe Salomonma.

¹⁵ Dios eju okwa, inawatjö otikwa tjöekweminö, cedro towisötenö pöchö otidinobe, niji̧tjö, möakwö mö towi okwi'ijube ichibanö. Ja̧danö o̧do okwa nijima, cipre towi ötebiyanö niji öpöchinobe.

¹⁶ Ja̧danö, okwa tjöekwemitjö, apjudekwö nueve metro jenanö, okwa tjöekwi̧ otidinobe, jemi o̧pe Dios ejutjö okwa sȩko̧, inesö 'da̧batö junawemi Dios iteapjo jȩko baibanö. Ja̧danö otidajo̧, nijitjö möakwö bajalenö cedro ötebiya pöchö otidinobe.

¹⁷ Ja̧danö okwasȩko̧tjö apjudekwö bajalenö, Dios ejutjö nöȩko̧, wayobekwö dieciocho metro jenanö nöȩko̧ ji̧nobe.

¹⁸ Okobe jwiinö Dios eju okwama, o̧do inawiya öwawökönö cedro ötebiya öpöchinobe. Ja̧danö, otiwachibanö, ju'wibi o̧bubiya ichejekwi̧ jawa cedro ötebiyatjö 'dȩbö tjotidinobe, ja̧danö moli'ija̧ye opobiya ichekwi̧ jawa 'dȩbö tjotidinobe. Jobe okwama, okobe jwiinö bakwainö cedro ötebiyatjö tjotidinobe, inawiyama ja'yubebi öwawökönö.

¹⁹ Ja̧danö Dios eju okwasȩko̧ jawabi otidinobe, Isabenö Jo̧ iteapjo junawemi baibanö. Jau, damötjö Moisesma Dios weinapjo otidinobe, Dios wei̧ wȩyukwaba döbalataja a̧ja̧pjoma, ja̧danö okwasȩko̧ tjotidinobe, ja̧pjo jȩko okwa tjujunakobetjö̧.

²⁰ Jȩko̧ okwasȩko̧ma, wayobekwöbi, jakwölakwöbi, möakwöbi, nueve metro jenanö otidinobe, tjöekwemi wamenö, bakwa̧i̧ oro pöebinobe, ja̧danö ju'wibi cedro ötebiyatjö otikwapjo Diosnö iyawapjobi, wamenö oro pöebinobe.

²¹ Okobe jwiinö ju'wi Dios eju okwa tjöekwemibi, oro pöebinobe Salomonma, ja̧danö ju'wibi orotjö otikwa kalenaso öninobe, okwasȩko̧ teachakwawemi badeibö.

²² Okobe jwiinö Dios eju okwabi, okwasȩko̧ ö'öbö ja̧pjo Diosnö iyawapjobi, wamenö oro pöebinobe.

²³ Ja̧danö, okwasȩko̧ okwa, olivo towi ötebiyatjö du̧ju̧taja angeledö querubines ötjabawö tjo'wo jawa otidinobe. Bakwo̧nökwena, cuatro metro ja'ö möbadönö batjibanö otidinobe.

²⁴ Ja̧danö tjö̧wa̧ja̧pama, baikwö otidinobe: Tjö̧wa̧ja̧pakwena, dos metros ja'ö jenanö otidinobe, ba̧kwa̧pa bajaletjö, jelepa bajalebe ichibanö cuatro metro ja'ö ödöinö otidinobe.

^25-26 Jobadö du̧ju̧taja querubines ötjabawö̧ tjo̧'wo̧ jawama, bakwainö otidinobe, möakwöbi, tjö̧wa̧ja̧pa jakwölakwöbi. Bakwo̧ öwa̧ja̧pama, cuatro metro ja'ö ödöinö otidinobe, jelo̧ öwa̧ja̧pa töa̧linö, jadanö jelo̧bi bakwainö cuatro metro ja'ö ödöinö otidinobe. Ja̧danö bakwainö cuatro metro ja'ö möbadönö otidinobe.

²⁷ Querubines o̧'wo jawa otidajo̧, Dios ejutjö inesö okwasȩko̧ okwa ujuninobe, baikwö: Jȩko̧ma, jakwölakwö nueve metro jali̧nobe, ja̧danö o̧'wo jawama, bakwo̧nökwena cuatro metro ja'ö jakwölakwö jalinobe. Jo̧kwajabetjö bakwo̧ öwaja̧pa̧ debatö tjöekwemi junekwinö ji̧nobe, ja̧danö badeibö jelo̧ öwa̧ja̧pa̧ debatö bakwachobe tjöekwemi junekwinö ö̧jinobe, ja̧danö i̧sȩko̧ ja'ö, bakwo̧ öwa̧ja̧pa jelo̧ öwa̧ja̧pa debatö töa̧linö tjö̧jinobe.

²⁸ Ja̧danö, olivo ötebiyatjö jobadönö otidajo̧, wamenö oro pöebinobe.

²⁹ Ja̧danö, okwasȩko̧ tjöekwemibi, jelȩko̧ nöȩko̧ tjöekwemibi, ba̧kwemeachibanö 'dȩbö otidinobe angeledö querubines ötjabawö̧ o̧'wo jawabi, ö̧sö̧yö o̧'wo jawabi, o̧bubiya o̧'wo jawabi otidinobe.

³⁰ Ja̧danö, okwasȩko̧bi, jelȩko̧bi, niji ötebiya wamenö oro pöebinobe.

³¹ Ja̧danö, okwasȩko̧ apjudebi otidinobe, olivo towi ötebiyatjö. Ja̧danö, apjude ö'öbösa'obi, wamesa'obi, bakwamu jawa 'do̧'do̧kwitenia ji̧nö otidinobe.

³² Okwasȩko̧ apjudema, dödelataja otidinobe, jadanö wamenö 'dȩbö otidinobe querubines o̧'wo jawabi, ö̧sö̧yö̧ o̧'wo jawabi, o̧bubiya o̧'wo jawabi ji̧nö otidinobe, jadanö ja̧ wamenö, oro pöebinobe.

³³ Ja̧danö nöȩko̧ apjudebi olivo towi ötebiyatjö otidinobe, jo̧kwaijayonö ja̧ apjude ö'öbösa'obi, wamesa'obi bakwamu 'do̧'do̧kwitenia ji̧nö otidinokobe, ö'wejemu jawa 'do̧'do̧kwitenia ji̧nö otidinobe.

³⁴ Ja̧danö, apjude dödelataja cipre towi ötebiyatjö otidinobe bakwachobe bakwade do̧la̧cha̧linö ji̧nö, ja̧danö jelekwöchobe jeledebi do̧la̧cha̧linö ji̧nö̧. Ja̧danö, apjudekwena, ö'wejenö do̧lacha̧linö ji̧nö otidinobe.

³⁵ Ja̧danö, apjude wamenö, 'dȩbö otidinobe querubines o̧'wo jawabi, ö̧sö̧yö̧ o̧'wo jawabi, o̧bubiya o̧'wo jawabi ji̧nö, jadanö ja̧ wamenö, oro pöebinobe, oro 'da̧jö̧ki̧nö.

³⁶ Ja̧danö Dios eju otidajadö, a̧petu tjöekwemi tjotidinobe. Ja̧ tjöekwemi, otiwanö lötjaja̧ inawiyakwöbi, cedro towi okwi'ijukwöbi tjotidinobe. Jejenö tjotidinama, baikwö tjotidinobe, möakwö wapötakwanö inawiya lödajadö, wame cedro okwi'o bakwa'o tjöwaninobe, möakwö bajalenö jejenö tjotidinobe.

³⁷ Lekwe möle ja̧ Isabenö Jo̧ eju otidö tjö̧jinobe. Salomon la'aka luwo baibaja̧ ikena, ö'wejemu jawa o̧batjö Zif ötjabökwe jawo̧nö, jamatö o̧do la'aka tjödinobe.

³⁸ Ja̧danö, la'aka luwo̧ baibaja̧ ikena, a̧li̧nösa̧mutjö bakwaba o̧batjö, Bul ötjabökwe jawo̧nö, otidö katjatinobe. Bakwainö tjotidakwa̧ omudawö junö, tjotidakwa̧ tjiwȩyudinadanö, bakwainö otidö katjatinobe. Ja̧danö, ja̧ otikwama, jelemutjö dötölataja o̧biya baledibanö tjotidinobe, bajaliyanö katjatakwawenanö baibanö.