1 Reyes 4 - Dios Iwene

Salomon ömöayedötjö la'aka luwedö tjimi wȩyukwa'ye

¹ La'aka luwo̧ Salomonma okobe deinö israel jojodötjö inesö la'aka luwo ö̧jinobe,

² ja̧danö jo̧ba ömöayedötjö la'aka luwedöma, bidö: Sadoc itji̧ Azarias mikwo̧ma, Diostjö jojodötjö ö'weje pjabato̧ ö̧jinobe.

³ Sisa itji̧mu, Elijorefbi, Ahiasbi ja̧ möle baledi̧ jawa wȩyukwa luwedö tjö̧jinobe. Ajilud itji̧ Josafat mikwo̧ma, baledi̧ jawa tjiwȩyudina teada̧lakwawa luwo̧ ö̧jinobe.

⁴ Joyada itji̧ Benaias mikwo̧ma, ölakwabikwawa jojodötjö la'aka luwo̧ ö̧jinobe. Sadocbi, Abiatarbi Diostjö jojodötjö ö'weje pjabatadö tjö̧jinobe.

⁵ Natan itji̧ Azarias mikwo̧ma, gobernadorbedötjö la'aka luwo̧ ö̧jinobe. Natan itji Zabud mikwo̧ma, Diostjö jojodötjö ö'weje pjabato̧ ö̧jinobe, jadanö ju'wibi la'aka luwo̧ waisanö omukwatobö pjabato̧ ö̧jinobe.

⁶ Abisar mikwo̧ma, Salomon eju jawa la'aka luwo̧ ö̧jinobe. Abda itji̧ Adoniran mikwo̧ma, tjotidobö wetjawö̧nö tjotidawa jawa la'aka luwo̧ ö̧jinobe.

⁷ Ja̧danö, Salomon ömöayedötjö, a̧li̧nösamutjö du̧ju̧taja gobernadorbedö tjö̧jinobe, israel niji jelobekwena luwedöma. Jobadötjö bakwo̧kwena, jawo̧ bakwo̧kwena tjitebotjö la'aka luwo̧ Salomonbi, ejunö ju̧kwadöbi tjukwakwa̧ tjiyobö ji̧nobe.

⁸ Jobadö gobernadorbedö tjimibiya wȩyukwöja baikwö laebobe: Ben Jur mikwo̧ma, Efrainsaso nijitjö mösa'iju jȩmi niji̧ la'aka luwo̧ ö̧jinobe.

⁹ Ben Decar mikwo̧ma, Macaz comunidadbi, Salbin comunidadbi, Bet Semes comunidadbi, Elo Bet Janan comunidadbi la'aka luwo̧ ö̧jinobe.

¹⁰ Ben Jesed mikwoma, Arubot comunidadbi, Soco comunidadbi, Hefer nijibi la'aka luwo̧ ö̧jinobe.

¹¹ Salomon itjiju Tafat mikwuju jilekwe Ben Abinadab mikwo̧ma, Nafot Dor comunidad la'aka luwo̧ ö̧jinobe.

¹² Ajilud itji̧ Bana mikwo̧ma, Tanac comunidadbi, Meguido comunidadbi, okobe jwiinö Saretan ö'öbö Betsean ötjabobe niji̧bi, Jezrel wabekotjö a̧li̧kwö Betsean comunidadtjö, Abel Mejola comunidadbe baibanö nijibi, Jocmean comunidad tupakwö baibanö nijibi la'aka luwo̧ ö̧jinobe.

¹³ Ben Gueber mikwo̧ma, Ramot de Galaad la'aka luwo̧ ö̧jinobe. Ju'wibi Galaad nijitjö Manasesmine itji̧ Yair itebo comunidadbiya, jö̧ba̧lö ötjabobe niji la'aka luwo̧ ö̧jinobe, ja̧danö Basan nijitjö, Argob ötjabobe niji̧bi la'aka luwo̧ ö̧jinobe. Jobe Argob nijitjö, comunidadbiya 'diinö tjöbebö tjotidina comunidadbiya, broncetjö otikwa ö̧sö̧a'nö pje'datakwawa comunidadbiya ji̧nobe sesenta comunidadbiyama, jadano okobe jwiinö ja̧ niji la'aka luwo ö̧jinobe Ben Gueberma.

¹⁴ Ido itji̧ Ajinadab mikwo̧ma, Majanayin comunidad la'aka luwo̧ ö̧jinobe.

¹⁵ Salomon itjiju Basemat jilekwe Ajimaz mikwo̧ma, Neftalisaso niji la'aka luwo̧ ö̧jinobe.

¹⁶ Husay itji̧ Bana mikwo̧ma, Asersaso nijibi, Alot comunidadbi la'aka luwo̧ ö̧jinobe.

¹⁷ Paruaj itji̧ Josafat mikwo̧ma, Isacarsaso niji la'aka luwo̧ ö̧jinobe.

¹⁸ Ela itji̧ Simi mikwo̧ma, Benjaminsaso niji la'aka luwo̧ ö̧jinobe.

¹⁹ Uri itji̧ Gueber mikwo̧ma, Galaad niji la'aka luwo̧ ö̧jinobe. Okobe jwiinö Galaad nijitjö, damötjö̧ ji̧nadö Amorreo jojodötjö la'aka luwo̧ Sijon mikwo̧ weinemi nijibi, Basan la'aka luwo̧ Og mikwo̧ weinemi nijibi, okobe jwiinö Galaad nijitjö jobadö wetjinemi niji la'aka luwo̧ ö̧jinobe, jo̧ba Gueberda. Jobekwö laebobe Salomon ömöayedötjö gobernadorbedö tjimibiya wȩyukwa'yema.

Salomon nöinö juna̧lo̧ ö̧jina jawa

²⁰ Israel jojodötjö Judasaso jojodöbi, jelesotenia jojodöbi jwiinö tjö̧ba̧jȩkwachibinobe, jwaibalawa ö'öbönö ba̧pu so̧biapu ji̧danö, tjö̧ba̧jadökenanö baibanö tjö̧ba̧jȩkwachibinobe. Ja̧danö Salomon ö̧jina mölema, otiwanö tjo̧'wo ösöwanö tjö̧jinobe, owöbi, kwanöbi, tjo̧'wo ösöwachibanö tjö̧jinobe.

²¹ Ja̧danö, jwiinö jalobe webö ö̧jinobe Salomonma. Okobe jwiinö Eufrates ojwe ö'öbö tjitebotenia nijitjö, filisteo jojodö tjitebo baibanö nijibi, Egipto bakwachobe ichibanö nijibi, okobe deinö tjitebokwena jojodöma, Salomon ömöayedö tjö̧jinobe. Salomon ina 'yaba̧lo̧ ö̧jayi, okobe deinö ja̧ niji tjitebokwena luwedöma, Salomon ömöayedö ja̧nö, tjiteatjö Salomonnö midö tjö̧jinobe.

²² Ja̧danö, Salomon ejutjö, isabenö ba̧jȩkwadö tjö̧jinobe, ba̧jȩkwadötjobetjö̧, mölekwena seis mil kilo jenanö harinaso̧pja tjukwinobe, ja̧danö doce mil kilo jenanö trigo opösoi jawa tjukwinobe.

²³ Ju'wibi, paka̧yö̧ tjitjimu domulatabedö tjöekwemi okwa o̧tewadö batjibanö tjukwejebawönö tjukwinobe, ja̧danö meje'ye kwadö pakaya itji̧mu veintebedönö tjukwinobe, ja̧danö obejadötjö cienbedönöbi tjukwinobe, bakwöta mölekwena. Ju'wibi, nöinö yama itebiyabi, o̧tewadö batjibanö tjukwejebinawö̧ pji̧yu̧nöbi tjukwinobe, jwiinö ba̧jȩkwadötjobetjö̧.

²⁴ Jau, inesö jalobe Salomon webö ö̧jobetjö̧, ejutjö ömöayedö ju̧kwadöma jwiinö ba̧jȩkwadötjinobe. Okobe jwiinö Eufrates ojwetjö jawo̧ meajobekwö tjitebotenia niji la'aka luwo̧ ö̧jinobe, Tifsa comunidadtjö, Gaza comunidadbe ichibanö, ja̧danö okobe jwiinö webö ö̧jemi bakwachobetenia, wene jwiinö ölakwabikwawökönö tjö̧jinobe.

²⁵ Salomon israel jojodötjö la'aka tjuluwo̧ ö̧jayi, okobe deinö israel jojodötjö Judasaso jojodöbi, jelesotenia jojodöbi wene jwiinö tjö̧jinobe. U'da comunidad Dantjö, a̧li̧kwö comunidad Bersebabe ichibanö, okobe deinö bakwo̧nökwena, otiwanö tjitea higo towi wa̧ji̧tjöbi, ubasa'ba wa̧ji̧tjöbi otiwanö tjukwinobe.

²⁶ Ja̧danö ba̧jȩkwadö kabayudönö ajikwinobe Salomonma. Kabayudönö teada̧lakwejunö, kabayudö tjö̧jȩko̧ cuarenta mil ȩkiju ujuna̧linobe, ajwimu kolukiyanö töbeba̧ladönö tjiteada̧lobö, ja̧danö ju'wibi ölakwabikwawadö tjö̧wanawö̧ kabayudönö, doce milbedönö ajikwinobe.

²⁷ Ja̧danö, Salomon ömöayedötjö gobernadorbedöma, jawo̧kwena bakwo̧nökwena la'aka luwo̧ Salomonbi, okobe deinö ejunö kwadöbi tju̧kwa ichejebö iyiatjinobe, jadanö isabenö otiwanö nöinö tjiyobetjö̧, okobe deinö tjomeawachibanö tjukwinobe.

²⁸ Ja̧danö, sule jojodö tju̧kwakwa̧da tjichejebinokobe, okobe deinö bakwo̧nökwena, tjichejobö weinadanö, kabayudö tjukwakwa̧ meje'yebi, cebadabi ichejebiatjinobe.

Salomon waiso̧ ö̧jina jawa

²⁹ Ja̧danö, Diosma isabenö otiwanö pjaatinobe Salomonnö, isabenö waisanö omukwatobö, jadanö okwa jawa waisachibanö omukwatobö. Isabenö okobe jwiinö okwa jawama, waisachibanö otiwanö omukwatinobe Salomonma, öwaisi̧ma isabenö nöinö öwaisinobe, sobiapu ba̧jȩkwi̧danö.

³⁰ Okobe deinö jawo̧ laebobekwö ju̧kwadötjö, bajalekwönönö waisanö omukwato̧ ö̧jinobe Salomonma, ja̧danö okobe deinö Egipto nijitjö waisanö omukwatadö ötjabawö̧tjö, bajalekwönönö waisanö omukwato̧ ö̧jinobe.

³¹ Ezraita jojo Etan mikwo̧bi, Majol itji̧mu Heman mikwo̧bi, Calcol mikwo̧bi, Darda mikwo̧bi, okobe deinö yötja̧linawö̧, inesö waisanö omukwatadö, jö̧ba̧lö, jo̧kwaijayonö jobadötjöbi bajalekwönönö waisanö omukwato̧ ö̧jinobe Salomonma. Ja̧danö, jejenö waisanö omukwato̧ ö̧jiawö̧, okobe deinö israel niji ö'öbötenia tjitebotenia jojodöma, Salomonnö tja̧ja̧kwinobe, —Inesö jwiinö waisanö omukwato̧ma, Salomonda, —jö̧ba̧lö.

³² Ja̧danö, nöinö waisanö yöawakwawabi yöawinobe Salomonma, tres mil yöawakwawa jawa baibanö yöawinobe, ja̧danö ju'wibi lo̧awa jawa, mil cinco lo̧awa jawa lo̧inobe.

³³ Nöinö jojodö tjö̧ji jawa waisanö yöawinobe Salomonma. Inesö nöowi Libano nijinö pokwi̧ cedro towibiyabi, tjöekweminö pokwi̧ jawa hisopo ötjabi̧ jawabi waisanö yöawinobe, jadanö ju'wibi tebonö ju̧kwadönöbi, pji̧yunöbi, nijinö töbawadönöbi, ba̧i̧nöbi waisanö yöawinobe.

³⁴ Jwiinö waisanö yöawi̧awö̧, böjȩ ba̧kwemeachibanö ju̧kwadöma Salomon waisanö yöawi̧ tja̧ja̧kwobö tjichinobe. Bö̧jȩ ba̧kwemeachibanö ju̧kwadö la'aka luwedöma Salomonnö tja̧ja̧kwinobe, ja̧danö a̧ja̧kwajadö, tjömöayedönö wetjinobe, Salomon ö̧jobekwö 'ya̧nö, waisanö yöawi̧ jawa tjaja̧kwobö.