1 Reyes 3 - Dios Iwene

Solomon Diosnö aebina jawa

¹ Jemi ikenama, Solomonma Egipto niji la'aka luwo̧ Faraonkwö bakobe pjabatakwawö tjö̧jakwa̧ wene yöbawö tjujuninobe. Ja̧danö, ja̧ pjabatakwawö tjö̧jakwa̧ wene yöbawö junö, Faraon itjijunö eminobe, ilekwo bajibanö, —Yö̧ne dömöledö dö̧jobetjö̧, bakobe pjabatakwawö dö̧jakwedösa, —jö̧ba̧lö. Jobujunö emajo̧, ilekwonö öibinobe, itebo comunidad Jerusalenbe, ju'wi imi David itebo comunidadbe. Ja̧danö, jobe tjö̧jinobe, Salomon iteda ö̧jakweju otiwejubi, Isabenö Jo̧ Dios ejubi, Jerusalen comunidad tjöekwemibi otidö kaatenanö baibanö.

^2-3 Salomon abe'do Davidma otiwanö Isabenö Jo̧nö ösödö ö̧jinobe, jadanö Diosnö ösödö ja̧nö, Dios wei̧danö a̧ja̧kwö ö̧jinobe. Salomonbi Isabenö Jo̧nö ösödinobe, jo̧kwajabetjö̧ abe'dömine i̧sȩbinadanö, Salomonbi Dios wei̧ a̧ja̧kwö ö̧jinobe. Jo̧kwaijayonö okobe jwiinö ju'wi jaye, abe'do David a̧ja̧kwi̧danö Dios wei̧ a̧ja̧kwijayonö, bakwöta jawa a̧ja̧kwökönö ö̧jinobe, —Bakwelöda kwabö juwö Diosnö kwiyaduwo, —jö̧ba̧lö weinajayonö, jelobe möemi iyawemitjö kwabö juwö Diosnö iyöbi, omewi̧ jawa juwöbi iyinobe. Ja̧ möle, ina Dios eju, Isabenö Jo̧nö otiwanö omukwatö tjösödobö otikwejuma ina tjotidinokobe, jobetjö israel jojodö Diosnö kwabö juwö tjösödobö. Jo̧kwajabetjö̧, Dios eju ina jwiobetjö̧, jelobekwena möemikwena israel jojodöma kwabö juwö tjiyinobe Diosnö, ja̧danö Salomonbi ju'wedö kwabö juwö tjiyi̧danö iyinobe.

⁴ Ju'wi möemitjö bajalekwönönö nöinö Diosnö iyawemima, Gabaon comunidadtjö ji̧nobe, jadanö la'aka luwo̧ Salomonbi jelö Diosnö iyobö 'yi̧ainobe. Jobetjö Salomonma milbedö Diosnö iyawedönö kwabö juwö, jwiinö ubinö iyawa baibanö iyinobe.

⁵ Ja̧danö, ju'wi yö̧te Salomon Gabaonnö ö̧jenama, Isabenö Jo̧ma Salomonnö öwawachibinobe, i̧'wi̧dinö. Öwawachajo̧, Diosma jo̧banö abebö a̧ja̧kwinobe, —Ökwönö chiyakwa̧ma, di̧ya jawa ökwönö chiyobö jö̧ka̧lobeda? —jö̧ba̧lö.

⁶ Abebö a̧ja̧kwökwe, Salomonma atadinobe, —Chuluwo̧ Dios, jwaikwöda kabatibökönö kwösödi̧ wene kwi̧sebijatö chabe'dominenö. Otiwanö isabenö wene ösödö, omajadenö jweinö omukwatö, weköbi̧ a̧ja̧kwö ja̧nö, ökwönö ösödö ö̧jinobe, ja̧danö balekwa mikwa, jwiinö otiwanö jo̧banö kwiyijatö chuluwo̧. Jau chuluwo, chabe'donö ösödö, ötjö jo̧ba itji̧da, israel jojodönö webö ba̧kwawakanö chö̧bobö weköbijatö, ja̧danö jejenö kwiyi̧tjö̧, babe möle israel jojodö la'aka tjuluwo̧ bo̧sa.

⁷ Jau chuluwo Isabenö Jo̧ Dios, ötjö kwömöayo̧nö kabebö kwujunajabe, Chabe'do David ö̧jinemi, ötjöbi la'aka luwo̧ chö̧bobö, jo̧kwaijayonö ina wajwibo̧sa, otiwanö chömöledö israel jojodönö öbibö chö̧jakwa̧ma. La'aka luwo̧ chö̧jijayonö, ina tjemudanö wajwibo̧sa chuluwo̧.

⁸ Jo̧kwajabetjö̧, ötjönö kwiyakwa̧, baikwö atebakwö chuluwo̧: Ötjö kwömöayo̧ma, ökwöda kwömöledö omudawö kwujuninawö̧ tjö̧'dade jo̧sa. Ökwöma kwömöledösaso ba̧jȩkwaso omudawö kwujunijatö chuluwo̧, tjö̧ba̧jadökenanö baibanö, ba̧jȩkwaso omudawö kwujunijatö chuluwo, ja̧danö tjö̧'dade ja̧nö, jobadötjö inesö la'aka luwo̧ chö̧bobö weköbajabe.

⁹ Jo̧kwajabetjö̧, chomajadenö okwa jawa waisanö chomukwati̧nö pjakatobö atebakwö chuluwo̧, kwömöledö israel jojodönö otiwanö jwebebö, ötibakobetjö̧. Jau chuluwo̧, bakwo̧ iteda ujulunö, bidö inesö ba̧jȩkwadö kwömöledönö otiwanö jweebobö jwiena, jo̧kwajabetjö̧ waisanö chomukwatobö atebakwö, jobadönö jwebebö, otiwi̧ suli̧tjö böjö, otiwanö jobadönö jwetabakwa̧ chöwaisakobetjö̧, —jö̧ba̧lö aebinobe Salomonma.

¹⁰ Jejenö aebiökwe, Isabenö Jo̧ma ösödinobe, isabenö mikwawi̧ jawa abebo̧ Salomonma, jö̧balö.

¹¹ Ja̧danö aebaja̧ ösödö, jo̧banö yöa̧linobe Diosma: —Salomon, ökwöda kwösödi̧ jawa, lekwe ja̧kwawaö̧kö̧, nöinö teaö̧kö̧, kwöpöjojodö wotjakwa̧ö̧kö̧, ökwöda kwösödi̧ jawa abebökönö, okwa jawa waisanö omukwatö, jweinö lȩekwada kwöwaisobö akebajobetjö̧,

¹² akebaja̧danö chiyakwö. Jau Salomon, kwomajadenö okwa jawa jweinö waisanö kwomukwatobö chiyajabe. Isabenö waisanö kwomukwatobö chiyajobetjö̧, okobe deinö ökwötjö ajayinö ji̧nadötjö bajalekwönönö waisanö omukwato̧ kwö̧jakwo̧ja, ja̧danö debö kwi̧'yaja̧ okobe, bakwo̧bi ökwö waisanö kwomukwati̧danö omukwato̧ma deakobe.

¹³ Ja̧danö, ju'wibi akebajökö jawabi chiyakwö Salomon. Jwiinö noinö kwiteabi chiyakwö, ja̧danö okobe deinö otiwanö tjomukwatökwe kwö̧jobö chiyakwö Salomon. Jau, ina 'yaba̧lo̧ kwö̧jayi, ju'wedö la'aka luwedötjö bakwobi deakobe, ökwö kwujuna̧li̧danö nöinö juna̧lo̧ma, ja̧danö bakwo̧bi deakobe, ökwönö otiwanö tjomukwati̧danö otiwanö tjomukwatökwema.

¹⁴ Ja̧danö ju'wibi yötawakwö Salomon: Ja̧bö kwö̧jaduwobö weti̧bi, ju'wi weti̧bi kwabe'do David a̧ja̧kwö ö̧jinadanö, ökwöbi otiwanö a̧ja̧kwö kwö̧jitjö̧ma, lekwe möle kwö̧jobö chiyakwo̧sa, —jö̧ba̧lö yöawinobe Diosma, i̧'wi̧dinö.

¹⁵ Jemi ikenama, jejenö i̧'wi̧dinö edajo̧, wiluinobe Salomonma, ja̧danö wilubajo̧, öwaisachibinobe, —Aaa, chi̧'wi̧dinö Diosma ötjönö yöawajabeta, —jö̧ba̧lö. Ikenama Jerusalenbe ȩwa̧jinobe Salomonma, ja̧danö Isabenö Jo̧ wei̧ wȩyukwa öbiya döbölataja a̧ja̧pjo öba a'o ja̧nö, jwiinö ubinö iyawabi, Dioskwö ösökwö ja̧kwawa jawa iyawabi Diosnö iyinobe, jadanö ba'ali ujuninobe, okobe deinö ömöayedö tjukwobö.

Salomon waisanö omukwatakwawa i̧sȩbina jawa

¹⁶ Jemi ikenama, ju'wi möle ya̧dö duju̧taja, tji̧lȩkwamuböködökwö mikwanö 'da̧'da̧bakwawö ju̧kwadöma Salomon öba a'o ichibö tjö̧jinobe.

¹⁷ Ichibajadö, jobadötjö bakwuju yöjawinobe, —Chuluwo̧ la'aka luwo̧, ötjöbi, bisubi bakwejunö ju̧kwadösa. Ja̧danö, bakwejunö dö̧jonö, chitji̧nö 'yatebijatö ötjöma.

¹⁸ Jemi ikenama, wa̧pötakwa möle baledibaja̧ ikenama, isubi jitji̧nö 'yajebijatö. Ökwödöda dejunö dö̧jijatö, ju'wedö detjinobe, sule ökwödöda, ditji̧muda.

¹⁹ Jemi ikenama, baikwö baledijatö, jabemi ja'ötjö bulachibö, tjemunö 'dajebininobe, ö'wöchinö baibanö.

²⁰ Jejenö baledioko, wiluibö, yö̧te ja'ö ötjö kwömöayuju chabonö, chitji̧nö jönaukwinobe, ja̧danö isu jitji̧ ö'wöchajo̧nö chomukonö chapjö̧alobö jöwaninobe.

²¹ Jemi ikenama, yȩayi wilubaju, chi̧tjinö cho̧do'mi chojwobö jö̧ta̧lenama, ö'wö babibajo̧nöda chedatö. Jo̧kwaijayonö, yȩayi otiwanö jo̧banö chedenama, –Ayö, ötjö chitji̧maö̧kö̧, jeluju jitji̧nöda chujuna̧la, jelujuma chitji̧nö jönaukwajabeta, –jö̧balö chöwaisachibatö, —jö̧ba̧lö yöjawijatö Salomon öba a'otjö.

²² Jejenö yöja̧lioko, jelujuma atadö yöja̧linobe, —Omöna, ö'wö babibajo̧ma, ötjö chitji̧maökö, ötjö chitji̧ma ina 'yaba̧lo̧, ökwö kwitji̧da ö'wö baibajabe, —jö̧ba̧lö jatadinobe. Jatadioko, ajayinö yöba̧lajuma yöja̧linobe, —Ja̧maökö, ö'wö babibajo̧ma, ökwöda kwitji̧, 'yaba̧lo̧ma ötjöda chitji̧, —jö̧ba̧lö. Jejenö bakwujukwena la'aka luwo Salomonnö öba a'otjö jwöjwötjakwawinobe, —'Yaba̧lo̧ma ötjöda chitji̧, —jö̧ba̧lö.

²³ Jejenö yötja̧liökwe, la'aka luwo̧ Salomonma omukwatö yöa̧linobe, —Bakwuju yöba̧luju, –Bite 'yaba̧lo̧ma, ötjöda chitji̧, ö'wö baibibajo̧ma, ökwöda kwi̧tji̧, –jö̧ba̧lö, ja̧danö yöja̧lioko, jelujubi yöba̧luju, –Ja̧maökö, ö'wö babibajo̧ma ökwöda kwitji̧, ötjö chitji̧da ina 'yaba̧lo̧ma, –jö̧ba̧lö bakwainö yöba̧ladö, —jö̧a̧linobe Salomonma.

²⁴ Ikenama, jejenö omukwatö yöba̧lajo̧, ömöayedönö weinobe, —Kwölöte'o ichejebaduwi, —jö̧ba̧lö. Weawö̧, kwölöte'o tjichejebinobe.

²⁵ Ikenama, la'aka luwo̧ Salomonma ömöayo̧nö weinobe, —Ti itji̧jö jö̧ba̧lö wajwidobetjö̧, kwölöte'onö ina 'yabalo̧nö ö'wejenö bulatinö, ja̧danö bakwacho̧kwena bakwujunö, bakwacho̧kwena jelujunö kwiyo, bakwainö tjujuna̧lakobetjö̧, —jö̧ba̧lö.

²⁶ Jejenö weioko, tjemu a̧dekwanö ojo'doma, jwiinö jo̧'wo tjo̧achibinobe jitji̧nö, ja̧danö o̧'wo tjo̧achö yöja̧linobe, —Chuluwo, ja̧maökö, tjemunö kwabö lobökönö, wainö jelujunö kwiyo. Jau chuluwo̧, la'akatjöda kwabö loköboko, jelujunö kwiyo, —jö̧ba̧lö jo̧'wo tjo̧achö ajebinobe. Ja̧danö, jejenö yöja̧lonö, jelujuma yöja̧linobe, —Yöka̧laja̧ma jwea chuluwo̧, ö'wejenö kwubulato, ja̧danö ötjöbi, isujubi bakweminö ditji̧mu debadö dö̧jakwedösa, —jö̧ba̧lö yöja̧linobe.

²⁷ Jejenö yötja̧liökwe, la'aka luwo̧ Salomonma öwaisachibinobe, —Tjemu a̧dekwanö ojo'doma ajayinö yöba̧lajuda, —jö̧ba̧lö̧, ja̧danö waisachibajo̧, weinobe: —Tjemunö kwabö lobökönö, ajayinö yöba̧lajunö kwiyaduwo, jobujuda tjemu a̧dekwanö ojo'do ju̧ju, —jö̧ba̧lö weinobe.

²⁸ Jejenö waisanö omukwatö, lȩekwa yöawiawö̧, okobe deinö israel jojodöma tjaja̧kwinobe, jadanö a̧ja̧kwajadö, la'aka tjuluwo̧ Salomonö ösödö, otiwanö tjomukwatinobe jo̧banö, —Isabenö Diosda waisanö omukwatobö pjaatökwe, jweinö lȩekwa yöawobö waiso̧ duluwo̧ Salomonma, —jö̧ba̧lö.