1 Reyes 22 - Dios Iwene

Acab Siria jojodökwö ölakwabikwawina jawa

¹ Wapötakwa o̧biya baledibanö, israel jojodöbi, siria jojodöbi ölakwabikwawökönö tjö̧jinobe.

² Ja̧danö, wapöbakwa o̧bama, Juda la'aka luwo Josafatma israel la'aka luwo̧ Acabnö edö i̧'yinobe.

³ Ja̧danö, Josafat Acabkwö ö̧jonö, Israel la'aka luwo̧ Acabma iteda ömöayedönö yöa̧linobe: —Chömöledö, kwöwaisaduwa, Ramot Galaad comunidadma, ökwödö israel jojodö ditebo comunidad, jö̧tö? Siria la'aka luwo̧ jobe weijayonö, isabenö ökwödöda ditebo comunidad, tajawedö lekwe ditebo comunidad Siria la'aka luwo̧tjö 'döbebökönö lekwe diteada̧lobeda? Isabenö 'dödebobö jo̧be, —jö̧ba̧lö.

⁴ Ja̧danö, Josafatnö abebö a̧ja̧kwinobe Acabma: —Ramot Galaad comunidadbe mebibö chi̧'yenama, ökwöbi pjabatö kwichakwa̧ji̧? —jö̧ba̧lö. Abebö a̧ja̧kwökwe, Josafatma israel la'aka luwo̧ Acabnö atadinobe, —Jau, isabenö pjatatocha, ökwöbi ötjöbi bakwaibedösa, ja̧danö ötjö chömöayedöbi, ökwö kwömöayedöbi baikwaibedö, ja̧danö chajwi̧mu kabayudöbi, kwajwimu kabayudöbi bakwaibedö, isabenö ökwönö pjatatakwo̧sa chömöledöso̧, —jö̧ba̧lö atadinobe.

⁵ Jemi ikenama, tupakwö yöa̧linobe Josafatma Acabnö, —Jobe di̧'yakwa̧ abönö, ökwönö ateba, abönö Isabenö Jo̧ yöawakwa̧ abebö da̧ja̧kwo, weojobö, weokojobö, —jö̧ba̧lö.

⁶ Aebökwe, israel la'aka luwo̧ Acabma Dios yöawi̧ yöbawadönö o̧ko̧kodinobe, cuatro cientos jenanö ba̧jȩkwadö yöbawadönö. Ko̧ko̧dajo̧, jobadönö abebö a̧ja̧kwinobe: —Dakwö weobeda Diosma, Ramot Galaadbe ölakwabikwawö chi̧'yobö jo̧beji̧? Ölakwabikwawö chi̧'yobö jwiobeji̧? —jö̧ba̧lö. Abebö a̧ja̧kwawö̧, —Jau, ölakwabikwawö kwi̧'yo, ja̧danö duluwo̧ Diosma ökwö la'aka duluwo̧ kwujuluwobö pjaatakwo̧, —jö̧ba̧lö tjatadinobe.

⁷ Jejenö yötja̧lijayonö, Josafatma ina abebö a̧ja̧kwinobe: —Jelo̧ Isabenö Jo̧ yöawi̧ yöbawo̧ma deenaji̧, jo̧banö abebö da̧ja̧kwoböma? —jö̧ba̧lö.

⁸ Abebö a̧ja̧kwökwe, Acabma atadinobe: —Ina bakwo̧ ö̧jobe, Isabenö Jo̧ yöawi̧ yöbawo̧ma. Jo̧kwaijayonö, jo̧banö chöpöjödökwe, kabatökönö sule sulabenö baledakwa̧da ötjönö yöawobetjö̧, jayubebi ötjönö otiwanö baledakwa̧ jawa yö̧bawö̧kö̧ jo̧bama, jo̧kwajabetjö̧ chöpöjödökwe jo̧banö. Jo̧ba Isabenö Jo̧ yöawi̧ yöbawo̧ma, Imla itji̧ Micaias mikwo̧, —jö̧ba̧lö atadinobe la'aka luwo̧ Acabma. Yöa̧liökwe, —La'aka luwo̧ Acab, jejenö yöka̧loböma sula, yöka̧loko jejenöma, —jö̧ba̧lö atadinobe Josafatma.

⁹ Ja̧danö, Israel luwo Acabma iteda ömöayedötjö bakwo̧nö weinobe, juluwanö Micaiasnö jwöobö, tjöba a'o ichibobö.

Micaias Acab ö'wö baibakwa̧ yöawina jawa

¹⁰ Israel la'aka luwo̧ Acabbi, Juda la'aka luwo̧ Josafatbi bakwonökwenö tjiteaka la'aka luwo̧ tjöbajitjakanö isakanö tjö̧binobe, Samaria comunidad tjeachakwawemi badeibö, trigo chabö loaweju jȩmima. Ja̧danö luwedö 'dubawajitjadanö, bakwo̧nökwena tjö̧kamiji̧do̧, la'aka luwedö 'dutjawa̧do̧ 'dubawö tjö̧jinobe. Jobe tjö̧bemi ja'ötjö, Dios yöawi̧ yöbawadöma, —Diosma isabenö pjaatakwo̧, —jö̧ba̧lö yöbawö tjö̧jinobe.

¹¹ Jobadötjö bakwo̧, Quenana itji̧ Sedequias mikwo̧ma, 'dii jawatjö pakaya ö'yekiya ichejekwi̧ jawa otidinobe, ja̧danö otidajo̧ yöawinobe, —Baikwö yöawobe Isabenö Jo̧ma, –Bi̧ya ö'yekiyanö siria jojodönö ölakwabikwawö tibatö loköbakwo̧ja, jwiinö siria jojodönö söbebö loköbenanö baibanö, —jö̧ba̧lö.

¹² Ja̧danö ju'wedö yöbawadöbi bakwainö yötjawinobe, —Isabenö Ramot Galaadbe 'ya̧nö mekibobö jo̧be, jadanö Isabenö Jo̧ma pjabatö iyakobe ökwö la'aka duluwo̧nö, Ramot Galaad comunidad juluwajo̧, siria jojodötjö 'dökebobö, —jö̧ba̧lö yöbawö tjö̧jinobe.

¹³ Ja̧danö, Acab ömöayo̧, Micaiasnö ichejebobö weajökwema Micaiasnö yöa̧linobe, —Okobe deinö ju'wedö Dios yöawi̧ yöbawadöma, bakwainö yöba̧lö, la'aka duluwo̧ ujuluwakwa̧ wene yöbawadö. Ökwöbi jobadö yötjawi̧danö yökawo Micaias, ökwöbi duluwo̧ ujuluwakwa̧ wene yökawo, —jö̧ba̧lö webö yöa̧linobe Micaiasnö.

¹⁴ Yöa̧lökwe, —Sule Isabenö Jo̧ yötawobö wei̧ jawada yötawakwo̧sa. Jau, chuluwo̧ Isabenö Jo̧ öba a'otjö isabenö yötawakwö, Isabenö Jo̧ yötawobö wei̧danöda yötawakwo̧sa, —jö̧ba̧lö atadinobe.

¹⁵ Ja̧danö, Micaias la'aka luwo̧ öba a'o ichibenama, la'aka luwo̧ Acabma jo̧banö abebö a̧ja̧kwinobe: —Micaias, Ramot Galaad comunidad mebibö dölakwabikwawobö jo̧beji̧? Dölakwabikwawoböma jwiobeji̧? —jö̧ba̧lö. Abebö a̧ja̧kwökwe, —Jau, mebibaji, Isabenö Joma ökwö la'aka luwo̧nö iyakobe, kwujuluwobö, —jö̧ba̧lö obö atadinobe Micaiasma.

¹⁶ Yöa̧lökwe, Acabma yöa̧linobe, —Omöna yöka̧loko Micaias, ba̧kwelöjatebö ökwönö webo̧sa, –Isabenö Jo̧ yöawi̧ yökawenama, jwaikwöda isabenö yöawaja̧ jawada yökawobö jo̧be, –jö̧ba̧lö, ja̧danö wetakwö, isabenö yöawaja̧ jawada yöbawitjö, —jö̧ba̧lö.

¹⁷ Weökwe, Micaiasma atadö yöawinobe, —Chi̧'wididanö chedajabe israel jojodönö, israel jojodö mösa'ijunö tjipjelekwachobema. Jau, obejadö teada̧lo̧ debadö a̧dekwanö kwebachö tjö̧jidanö, jelobekwena kwetjachobekwö chedatö. Ikenama Isabenö Jo̧ yöa̧li̧ cha̧ja̧kwatö, –Bidö jojodöma la'aka tjuluwo̧ debadö, wene jwiinö tjejukwena tjȩwajo, –jö̧ba̧lö yöa̧lobe chi̧'wididanö cha̧ja̧kwatö, —jö̧ba̧lö yöawinobe Micaiasma.

¹⁸ Yöawiökwe, Israel luwo̧ Acabma Josafatnö yöa̧linobe, —Ökwönö yöta̧latö, –Jwaikwöda sulabenö baledakwa̧ jawada yöbawo̧ Micaiasma, otiwanö baledakwa̧ yöbawökönö, jwaikwöda wene jawada yöbawo̧, –jö̧ba̧lö yötawatö, jö̧tö? Yöta̧laja̧danö baibajabe, —jö̧balö yöawinobe Acabma Josafatnö.

¹⁹ Yöa̧liökwe, tupakwö yöawinobe Micaiasma: —Tupakwö Isabenö Jo̧ yöawi̧ kwa̧ja̧kwo: Chi̧'wi̧dinö chedatö, Isabenö Jo̧ iteaka la'aka luwo̧ ö̧bakanö ö̧bobema, ja̧danö okobe deinö mölejȩbe ju̧kwadö iteda ömöayedö ölakwabikwawadö angeledö öwaisobekwöchobebi, wajwiobekwöchobebi tjo̧ko̧ko̧kwobekwö chedatö.

²⁰ Ja̧danö, chedemi Isabenö Jo̧ abebö a̧ja̧kwobekwö cha̧ja̧kwatö, –Tida Acabnö omöna yöa̧lakwo̧, yöa̧li̧ ösödö, Ramot Galaad comunidad mebibö ölakwabikwawobö, jobe Ramot Galaadtjö Acab ö'wö baibakobetjö̧? –jö̧ba̧lö abebö a̧ja̧kwobekwö chedatö. Abebö a̧ja̧kwawö̧, ju'wedö baikwö, ju'wedö wainö yötja̧linobe,

²¹ ikenama bakwo̧ma Isabenö Jo̧ öba a'o ichibö jamatö, yöa̧linobe: –Ötjödasa Acabnö omöna yöta̧lakwo̧sa, omöna jawa wene ösödakobetjö̧, –jö̧ba̧lö yöa̧lobekwö chedatö. Yöa̧lökwe, –Dakwö ja̧köbakwa̧da, omöna wene ösödakobetjö̧? –jö̧ba̧lö Isabenö Jo̧ abebö a̧ja̧kwobekwö chedatö.

²² Abebö a̧ja̧kwökwe, –Acab ömöayedö, Dios yöawi̧ yöbawadökwö ichibö, Acabnö omöna yötja̧lobö wetocha, –jö̧ba̧lö Diosnö atadobekwö chedatö. Ja̧danö, atadökwe, –Jau, yöka̧laja̧danö ja̧baji. Acabnö omöna yöka̧lakwo̧ja, ja̧danö omöna yöka̧lajökwe, ösödakwo̧, –jö̧ba̧lö Dios yöa̧lobekwö chedatö.

²³ Jau Acab, Isabenö Jo̧ma omöna yöba̧lo̧nö weajabe, bidö kwömöayedö Dios yöawi̧ yöbawadönö okobe deinö omöna yötja̧lakobetjö̧, –Isabenö kwujuluwakwo̧ja, –jö̧ba̧lö omöna yötja̧lobö. Jo̧kwaijayonö isabenö baledakwa̧ma, isabenö kwöwaekwobö omudawö ujunajabe Isabenö Jo̧ma, —jö̧ba̧lö yöawinobe Micaiasma.

²⁴ Yöa̧liökwe, Sedequiasma yöne ichibö, Micaiasnö 'bȩinobe ibekasa'wonö, ja̧danö Micaiasnö yöa̧linobe: —Omöna. Isabenö Jo̧ yöawi̧ yöbawo̧sa, kwedemi ötjötjö labebö, ökwönöda yöawobeji̧, Isabenö Jo̧ o̧'wo luwo̧ma? Ömöna yöka̧la, —jö̧ba̧lö.

²⁵ Yöa̧lökwe, —Isabenö yötawakwö̧, isabenö kwöwaisachibakwo̧ja Isabenö Jo̧ma isabenö yötawaja̧danö yötawobö weajabe jö̧ba̧lö. Jau Sedequias, yötawaja̧danö baledenama, okwasȩko̧ okwa kwuju̧kwawobö tekachakwo̧ja, ja̧danö jenada kwöwaisachibakwo̧ja, –Ayö, isabenö jweinö yöbawina Micaiasma, –jö̧ba̧lö atadinobe Micaiasma.

²⁶ Jemi ikenama israel la'aka luwo̧ Acabma ömöayedönö weinobe, —Bite Micaiasnö do̧bataduwi, ja̧danö do̧batajadö, bemi comunidad la'aka luwo̧ Amonbi, chitji̧ Joas mikwo̧bi tjö̧jobekwö e'ewaduwinö.

²⁷ Tjöba a'o ichibajadö, weti̧ jobadönö yökawaduwo, baikwö: –Bite Micaiasnö ka̧lena kwödaduwo, ja̧danö sule ja'yubeda pan ukwobö, ja̧danö ojwiyo owobö kwiyaduwonö, ötjö Acab wene jwiinö Ramot Galaadbetjö chȩwa̧jenanö baibanö, –jö̧ba̧lö weti̧ yökawodönö, —jö̧ba̧lö weinobe Acabma.

²⁸ Jejenö weiökwe, Micaiasma yöa̧linobe—Isabenö yötawakwö, yöka̧laja̧danö wene jwiinö kwȩwa̧jitjö̧ma, öwawakobe, Isabenö Jo̧ yöawaja̧ma yöbawö̧kö̧sa, omöna weneda yöbawo̧sa jö̧ba̧lö öwawena, —jö̧ba̧lö. Ikenama jobe ju̧kwadönö yöawinobe Micaiasma: —Okobe deinö yötawaja̧ jawa kwomukwataduwo chömöledö, —jö̧ba̧lö.

Acab ö'wö baibina jawa

²⁹ Jemi ikenama, israel la'aka luwo̧ Acabbi, Juda la'aka luwo̧ Josafatbi Ramot Galaad comunidadbe tji̧'yinobe, Siria jojodökwö tjölakwabikwawobö.

³⁰ Ja̧danö, israel la'aka luwo̧ Acabma Josafatnö yöa̧linobe, —Dölakwabikwawenama, ötjöma jelo̧ la'aka luwo̧bö̧kö̧danö 'dubawö ölakwabikwawö chö̧jakwo̧sa, ja̧danö ökwöda inesö la'aka luwo̧ 'duawaji̧ado̧ 'dubawö kwö̧jakwo̧ja, –jö̧ba̧lö. Ja̧danö yöba̧lajo̧, tjölakwabikwawenama, jelo̧danö ichejekwö ölakwabikwawö ö̧jinobe israel la'aka luwo̧ Acabma.

³¹ Ja̧danö tjölakwabikwawakwa̧ abönö, Siria la'aka luwo̧ma iteda ömöayedö kolukiyanö ölakwabikwawadö tjuluwedö treinta y dosbedönö weinobe baikwö: —Bakwainö israel la'aka luwo̧nöda kwujuluwaduwobö kwisakwaduwo, ju'wedö jo̧kwadabedönöbi, la'aka luwedönöbi kwölakwabikwawaduwoböma kwisakwaduwoko, sule israel la'aka luwo̧nöda kwujuluwaduwobö kwisakwaduwo, —jö̧ba̧lö.

³² Ja̧danö, tjölakwabikwawonö, kolukiya luwedö Josafat la'aka luwo̧ 'duawajiado̧ 'duawobe tjedenama, —Isabenö biteda Israel la'aka luwo̧ jö̧ba̧lö, —jo̧bakwö tjölakwabikwawobö metjibinobe. Ja̧danö, jejenö metjibiökwe, jwöeba̧linobe Josafatma,

³³ ja̧danö jwöeba̧liawö̧, tjöwaisachibinobe, —Israel la'aka luwo̧bö̧kö̧, jelo̧da, —jö̧ba̧lö, ja̧danö jo̧banö mebibö katjatibinobe.

³⁴ Ja̧danö, tjölakwabikwawonö, 'böawa jojodötjö bakwo̧ a̧dekwanö 'böinobe, sule a̧dekwanö 'böböda. Ja̧danö, jejenö 'böenama, israel la'aka luwo̧ Acabnö öjamatekwinobe, tjöekwa̧do 'dieba jawa 'da̧de söibinö. Jejenö 'böökwe, iteda iteaka koluka jwebeba̧lo̧nö weinobe, —Inia tötinö 'diinö 'bötjajökwesa, jo̧kwajabetjö̧ jalachibö, dölakwabikwawelö labebitjö, —jö̧ba̧lö.

³⁵ Ja̧ möle baledibanö, 'diinö tjölakwabikwawinobe israel jojodöbi, siria jojodöbi, ja̧danö siria jojodö tjö̧jemi badeibö, la'aka luwo̧ Acabma iteaka kolukanö öwinobe. Acab ömöayedöma tjuluwo̧nö tjöbeba̧lö tjöwaninobe, meapji jö̧ba̧lö, ja̧danö jobe wanö, 'bötjökwe ökwösobu ku̧kwobetjö, ökwösobu okwinobe koluka okwa, ja̧danö yi̧ibena jenanö, ö'wö baibinobe Acabma.

³⁶ Ja̧danö, yöte baibena jenanö, ölakwabikwawadö jwötjinobe, —Tjo̧wita, okobe deinö tjitebokwena, tjitebo comunidadkwena tjȩwa̧jo, —jö̧ba̧lö.

³⁷ Jobekwö laebobe la'aka luwo̧ Acab ö'wö baibina wene, ja̧danö ö'wö babibajo̧nö tje'ewinobe Samaria comunidadbe, ja̧danö jobe Acabnö tjo̧tjinobe.

³⁸ Ja̧danö, Samaria o̧pesobube, tjilekwamuböködökwö 'da̧'da̧bakwawö ju̧kwadö ojwe tjibemi o̧pesobube tje'ewinobe, Acab itea kolukama, jobetjö tjidichobö. Ja̧danö jobe tjidichonö, a̧wi̧li̧dö ichibö, Acab ökwösobö 'detjinobe. Ja̧ a̧wi̧lidö Acab ökwösobö 'dȩtjakwa̧ yöawinobe Isabenö Jo̧ma, ja̧danö yöawinadanö baledinobe.

³⁹ Jobekwö ja'yubenö laebobe Acab israel jojodö la'aka tjuluwo ö̧jina jawama, ja̧danö ju'wibi nöinö ja̧bö ö̧jinobe. Ju'wi Acab ja̧bö ö̧jina jawa, marfiltjö otikweju otidina jawabi, ju'wi comunidadbiya otidina jawabi, ju'wi jawabi Israel jojodö la'aka tjuluwedö tjö̧jina wȩyukwa'ye mikwa'yenö laebobe.

⁴⁰ Ja̧danö, Acab ö'wö baibaja̧ ikenama, itji̧ Ocoziasma inesö la'aka luwo̧ baibinobe.

Josafat Juda la'aka luwo̧ ö̧jina jawa

⁴¹ Acab israel la'aka luwo̧ ö̧jayi, ida̧ökö ö'wejemu jawa o̧biya baledibanö webö ö̧jenama, Juda la'aka luwo̧ Asa itji̧ Josafat mikwo̧ma Juda la'aka luwo̧ baibinobe.

⁴² Josafatma treinta y cinco o̧biya junalo̧, la'aka luwo̧ baibinobe, ja̧danö veinticinco o̧biya baledibanö Jerusalen comunidadnö ja̧nö webö ö̧jinobe. Jo̧ba Josafat ojo'doma, Silji itjiju Azuba mikwuju.

⁴³ Abe'do Asa Isabenö Jo̧ öba a'otjö otiwanö ja̧bö ö̧jinadanö, Josafatma bakwainö abe'do Asa ja̧bö ö̧jinadanö ja̧bö ö̧jinobe, Isabenö Jo̧ ösödi̧danö. Jo̧kwaijayonö, söbebö loinokobe Josafatma, möemitenia iyawemima, ja̧danö webö ö̧jonö, jojodöma ina jobetjö kwabö juwö iyöbi, omewi̧ jawa juwöbi ja̧bö tjö̧jinobe.

⁴⁴ Ja̧danö, Josafatma israel la'aka luwo̧kwö ölakwabikwawökönö, wene jwiinö ö̧jinobe.

⁴⁵ Jobekwö ja'yubenö laebobe Josafat Juda la'aka luwo̧ ö̧jina jawama. Ju'wibi nöinö ja̧bö ö̧jinobe Josafatma, ujulubi i̧sȩbinobe, ja̧danö ju'wedö tjöpöjojodökwö ölakwabikwawinobe. Okobe jwiinö ja̧ Josafat ja̧bö ö̧jina jawama, Juda jojodö la'aka tjuluwedö tjö̧jina wȩyukwa'ye mikwa'yenö laebobe.

⁴⁶ Josafat abe'do Asama Juda nijitjö ösödakwawejubiyatjö ömadö 'da̧'da̧bakwawö otidadönö a'dewö loinobe, ja̧danö Asa a'dewö loaja̧tjö ji̧binadönöma, Josafatda otiwanö a'dewö loinobe.

⁴⁷ Ja̧danö, Josafat webö ö̧jonö, Edom nijitjö inesö la'aka luwo̧ deinobe, Josafat ömöayo̧ gobernadorda Edom niji webö ö̧jinobe.

⁴⁸ Ja̧danö Josafatma isowibiya, tea emawa isowi owiyawi̧ otidinobe, Ofir nijibe kwebachö, oro tjemobö, jo̧kwaijayonö la'akatjöda Ofirbe tji̧'yinokobe, Ezion Guebertjö isowibiya 'dainobetjö̧.

⁴⁹ Ja̧danö Acab itji̧ Ocoziasma Josafatnö aebinobe, —Ötjö chömöayedö isowinö kwebachadö, ökwö kwömöayedö isowinö kwebachadökwö tji̧'yobö weköbo, bakobe tea emö kwetjachakobetjö̧, —jö̧ba̧lö. Jo̧kwaijayonö öpöjödinobe Josafatma, ja̧danö weinokobe.

⁵⁰ Ja̧danö, Josafatma ö'wö baibinobe, ja̧danö ö'wö babibajo̧nö tjo̧tjinobe, a'dö David itebo comunidad ötjabena. Ja̧danö, Josafat la'aka luwo̧ öjinemi, itji̧ Yoramma la'aka luwo̧ baibinobe.

Ocozias israel la'aka luwo̧ baibina jawa

⁵¹ Juda la'aka luwo̧ Josafat ö̧jayi, ida̧ökö diecisiete o̧biya baledibanö webö ö̧jenama, Acab itji̧ Ocoziasma israel la'aka luwo̧ baibinobe Samaria comunidadtjö, ja̧danö dötölataja o̧biya baledibanö israel jojodönö webö ö̧jinobe.

⁵² Ocoziasma sulabenö ja̧bö ö̧jinobe Isabenö Jo̧ öba a'otjö, abe'dobi, ojo'dobi sulabenö ja̧bö tjö̧jinadanö, ja̧danö Jeroboan, israel jojodö sulabenö ja̧tjobö webinadanö, Ocoziasbi sulabenö ja̧bö ö̧jinobe.

⁵³ Baal wei̧ a̧ja̧kwö, Baal ötjabökwe o̧'wo jawanö ösödö ö̧jinobe Ocoziasma. Abe'do Acab israel jojodö tjösödökwe Isabenö Jo̧ Dios ödameakwobö sulabenö jainadanö, Ocoziasbi Isabenö Jo̧ jo̧banö ödameakwobö sulabenö ja̧bö ö̧jinobe.