1 Reyes 21 - Dios Iwene

Acab ilekwo Nabot mikwo̧nö kwabö lojina jawa

¹ Bakwo̧ Jesrel comunidad jojo, Nabot mikwo̧ma, uba batjo ujuna̧linobe Jezrel comunidadtjö. Ja̧danö, ja̧yu ö'öbönö Samaria la'aka luwo̧ Acabma, iteda eju comunidad ujuna̧linobe.

² Acabma Nabot öbatjo edö ösödinobe, iteda ujuna̧lobö, ja̧danö Nabotnö yöa̧linobe: —Nabot, ökwö kwöbatjo ötjönö kwiyobö chösöda, cheju ö'öbösayuobetjö̧. Jau Nabot, jobetjö kwakwawa batjo baibanö chotidakobetjö̧ kwiyotjö. Ja̧yu ötjönö kwiyitjö̧ma balekwayu ja̧tjö bajalekwönönö otiwayu chiyakwo̧sa, ja̧danö jeleyu öpöjödö, platada chimidobö kwösöditjö̧ma, kwöbatjo mikwawi̧danö plata jawa chimidocha, —jö̧ba̧lö.

³ Yöa̧lökwe, —Chöbatjo chiyoböma jwiobe chuluwo̧, jayuma cha'dödötjö emajichayu batjo, jo̧kwajabetjö̧ Isabenö Jo̧ma weökena, cha'dödönö iyina niji iyö lotobö, chiyoböma jwia, —jö̧ba̧lö.

⁴ Jejenö, —Cha'dödötjö emajichayu batjo ökwönö chiyökö, —jö̧ba̧lö Nabot atadiökwe, o̧'wo suli̧nö ödameakwinobe Acabma, ja̧danö ejube ȩwa̧jinobe. Ja̧danö, öpöjödö 'di̧udabinö, kamapjonö bamatö, jelobekwö jalachibö, ukwobö öpöjödinobe.

⁵ Kwökönö ö̧jioko, ilekwo Jezabelma abȩko̧ tebachö abebö ja̧ja̧kwinobe, —Chilekwe, tajawedö kwo̧me suli̧nö kwukwobö kwöpöjödobeda? —jö̧ba̧lö.

⁶ Abebö ja̧ja̧kwökwe, —Jezrel jojo Nabotnö atebatö, –Kwöbatjo ubasayu mikwanö kwiyobö chösöda, ja̧danö jeleyuda kwösöditjö̧ma, balekwayu chiyena, –jö̧ba̧lö. Jo̧kwaijayonö atebökwe öpöjödatö, –Chöbatjo ubasayuma chiyökö, —jö̧ba̧lö.

⁷ Yöa̧lioko, —Ökwöma Israel niji la'aka luwo̧ja, jö̧tö? Iteayu kwujuna̧lobö kwösöditjö̧ma, kwujuna̧lobö jo̧be. A̧la̧ibö kwukwo, kwo̧'wo ösöwachibanö kwö̧jo. Ja̧danö ötjöma Nabot itea batjo ökwöda kwöbatjo baibanö chemakwujusa, —jö̧ba̧lö yöja̧linobe Jezabelma.

⁸ Ikenama Jezabelma Acab iminö kwiyalusöja wȩyudö wejinobe Nabot itebo comunidad la'aka luwedönö, jadanö wȩyudaju, Acab itea seyunö dojinobe.

⁹ Jezabel jiwȩyudinama baikwö laebobe: —Jojodö ö̧tö̧chö tjö̧jakwa̧ möle omudawö kwujunaduwo, ja̧danö ja̧ möle, Nabotnö kwujunaduwo, jojodö tjöba a'o.

¹⁰ Ikenama, jo̧ba a'o duju̧taja sulabedönö weköbaduwo, jo̧banö omöna yötja̧lakobetjö̧, –Bite sulabenö yöa̧laja̧ da̧ja̧kwijatö, Diosnöbi jwiinö sulabenö yöa̧linobe, ja̧danö inesö la'aka duluwo̧nöbi jwiinö sulabenö yöa̧linobe, –jö̧ba̧lö omöna yötja̧lobö weköbaduwo. Ikenama, jo̧ba sulabenö ja̧ina jobekwö yötjawobetjö̧, jo̧banö lȩbebö, inawiya ikwawö kwabö loköbaduwonö, —jö̧ba̧lö laebobe Jezabel ji̧wȩyudinama.

¹¹ Jobekwö wȩyudö wejiawö̧, Jezabel weji̧danö ja̧tjinobe ja̧ comunidad luwedöbi, ju'wedö jojodöbi.

¹² Ju'wi möle ö̧töchö tjö̧jinobe, ja̧danö jojodö tjöba a'o Nabotnö tjujuninobe.

¹³ Ikenama du̧ju̧taja sulabedöma ichibö, öba a'o tjöbamatinobe, jadanö jojodö tjöba a'o yötja̧linobe Nabotnö, —Bite Nabotma jwiinö sulabenö yöa̧linobe Diosnöbi, inesö la'aka duluwo̧nöbi, —jö̧ba̧lö omöna yötjalinobe. Ikenama, Nabotnö tjötjebinobe comunidad apjude a'obe, ja̧danö comunidadtjö labebajadö, inawiya ikwawö lotjinobe Nabotnö.

¹⁴ Ikenama, ja̧ kabatajadö, Jezabelnö yötjawinobe, —Tjo̧wi, Nabotnö inawiya ikwawö lotjajabe, —jö̧ba̧lö.

¹⁵ Nabotnö inawiya ikwawö lotjaja̧ wene ja̧ja̧kwenama, jilekwe Acabnö yöja̧linobe, —Tjo̧wita. A̧laibö, Nabot ökwönö mikwanö iyobö öpöjödinayu batjo kwemajo. Jau, 'yaba̧lö̧kö̧ Jezrel jojo Nabotma, ö'wö baibajabe, jo̧kwajabetjö̧ wene jwiinö iteayu kwemobö jo̧be, —jö̧ba̧lö.

¹⁶ Ja̧danö, —Nabotma ö̧'wö baibajabe, —jö̧ba̧lö a̧ja̧kwajo̧, a̧la̧ibö Nabot öbatjobe i̧'yinobe Acabma, iteda öbatjo baibanö emakobetjö̧.

¹⁷ Ja̧danö, Isabenö Jo̧ma iteda yöawi̧ yöawinobe Eliasnö, baikwö:

¹⁸ —Elias, a̧la̧ibö 'ya̧wi, Samaria comunidad jojo, israel la'aka luwo̧ Acab ö̧jobekwö. Jo̧bama Nabot öbatjonö ö̧jobe, jobe iteda öbatjo baibanö emobö i̧'yajabe, jobe jo̧banö kwöbadekwajobö kwi̧'yo.

¹⁹ Ichibajo̧, baikwö yökawonö: –Isabenö Jo̧ ökwönö yöa̧li̧ma, baikwö laebobe: Biyu batjo luwo̧nö kwabö lobajo̧, kwöbatjo baibanö 'dökebaji̧? –jö̧ba̧lö yöka̧lonö. Ja̧danö tupakwö yökawonö: –Isabenö Jo̧ma baikwö yöawobe: -Acab, Nabotnö kwabö loköbaduwenama, a̧wi̧lidöma Nabot ökwösobu 'dȩtjinobe, jö̧tö? Ja̧danö, jobe Nabot ökwösobu 'dȩtjinemima, ökwöda kwökwösobubi 'dȩtjakwedö awi̧li̧döma, –jö̧ba̧lö yökawo Acabnö, —Eliasnö weinobe Diosma.

²⁰ Weökwe, i̧'yinobe Eliasma, ja̧danö ichibiökwe, Acabma Eliasnö edö yöa̧linobe, —Ökwö chöpöjojoma, ötjönö lubö kwöbadekwaji̧? —jö̧ba̧lö. Yöa̧lökwe, —Jau, ökwöma jwaikwöda Isabenö Jo̧ öba a'otjö sulabenö ja̧köbobö omukwato̧ja, jokwajabetjö̧ ökwönö isakwö chöbadekwajabe.

²¹ Baikwö yöawobe Isabenö Jo̧ma ökwönö: –Acab, tjowita. Ida̧ökö ökwönö lȩbebö, söbebö lotobö baibajabe, ja̧danö ökwönöbi söbebö lotocha, ja̧danö ju'wibi okobe deinö Israel nijinö ju̧kwadö ökwö yö̧ne kwömöledötjö ömadönö söbebö lotocha, tjömöayedöbedönöbi, tjömöayedöböködönöbi bakwainö okobe deinö söbebö lotocha.

²² Jau Acab, chödameakwinö jaköbajabe, jadanö israel jojodö sulabenö ja̧tjobö weköbajabe, jo̧kwajabetjö ökwönö lȩbebö söbebö lotocha, baikwö yötawa: Ökwötjö ajayinö ji̧nadö la'aka luwedö Jereboanbi, Basabi tjömöledö deinö batjibanö lȩtebinadanö, ökwötjö tupadanö jojodönöbi söbebö lotocha, ji̧bo̧ bakwo̧bi deinö, —jö̧ba̧lö Dios yöawi̧ yöawinobe Eliasma.

²³ Tupakwö yöawinobe Eliasma: —Ja̧danö baikwö yöawobe Isabenö Jo̧ma, kwilekwo Jezabelnö: –Jezrel comunidad tjöekwemi a̧petukwöchobema, awi̧li̧döma Jezabel jiteba'o tjukwakwedö.

²⁴ Ja̧danö ökwö Acab kwitji̧mu tupadanö jojodönö baledakwa̧ma, baikwö yötawa: Comunidad okwa ö'wö babibajadönö, a̧wi̧li̧dö tjukwakwawö̧, ja̧danö mejetjö ö'wö babibajadönö, bo̧lö tjukwakwawö̧, —jö̧ba̧lö Dios yöawi̧ yöawinobe Eliasma, Acabnö.

²⁵ Isabenö jwaikwöda sulabenö ja̧bö ji̧na Acabma. Jo̧batjö ajayinö ji̧nadö la'aka luwedötjö bajalekwönönö jwaikwöda Isabenö Jo̧ öpöjödi̧ jawa ja̧obö isakwinobe. Ilekwo Jezabelma tupakwönönö sulabenö ja̧obö webö jö̧jinobe, ja̧danö weji̧danö jwaikwöda sulabenö ja̧bö ö̧jinobe Acabma.

²⁶ Jau, jwaikwöda Isabenö Jo̧ öpöjödi̧ jawa ja̧obö isakwobetjö̧, Isabenö Jo̧ damötjö israel jojodö tjöba a'otjö a'dewö loinawö̧ amorreos jojodö ja̧bö tjö̧jinadanö sulabenö ja̧inobe Acabma. Jobadöma inesö sulabedö o̧'wo jawa ösödö tjö̧jinobe, ja̧danö Acabbi jwiinö sulabenö ja̧bö, o̧'wo jawa ösödinobe.

²⁷ Elias Dios yöawi̧ yöawiökwe, o̧'wo tjo̧ekwinobe Acabma. A̧ja̧kwajo̧, ökamiji̧do̧ kȩ'ekwö loinobe, ja̧danö kamiji̧do̧ epju̧yunö kalukaa̧do̧ 'dubawö, u̧kwa kwökönö ö̧tö̧chö ö̧jinobe. Yöte abenabi kamijido̧ epju̧yunö kalukaa̧do̧ 'dubawö abinobe, ja̧danö kweachenama, o̧'wo tjo̧achö kweachinobe, —Isabenö Dios öba a'otjö sulabenö ja̧binasa, —jö̧ba̧lö.

²⁸ Ja̧danö, jejenö Isabenö Jo̧ öba a'otjö i̧sȩbiökwe, Isabenö Jo̧ma Eliasnö yöawinobe:

²⁹ —Chöba a'otjö Acab –Mikwawö̧kö̧sa, –jö̧ba̧lö i̧sebaja̧ kwedaji̧? Baikwö yötawakwö, lȩtebakwa yötawajökwe, chöba a'otjö, –Mikwawö̧kö̧sa, –jö̧ba̧lö, o̧'wo tjo̧achi̧ i̧sȩbö jo̧, ja̧danö jejenö ö̧jobetjö̧, iteda ina 'ya̧alayima ömöledönö lȩtebökakwo̧sa, itji̧da la'aka luwo̧ ö̧jenada, okobe deinö ömöledönö söbebö lobö lȩtebocha, —jö̧ba̧lö yöawinobe Isabenö Jo̧ma, Eliasnö.