1 Reyes 20 - Dios Iwene

Israel jojodö siria jojodökwö tjölakwabikwawina jawa

¹ Ja̧danö, Siria niji la'aka luwo̧ Ben-adadma, iteda ömöayedö ölakwabikwawa jojodönö o̧ko̧kodinobe, israel jojodönö ölakwabikwawö ö̧jakobetjö̧. Ju'wedö tjitebokwena la'aka luwedö treinta y dosbedö la'aka luwedöma, Ben-adad ömöayedö tjö̧jinobe, jadanö jobadöbi, tjömöayedö ölakwabikwawa jojodöbi, tjajwimu kabayudönöbi öbibö, tjiteaka kolukiya ichejebö, Ben-adadkwö tji'yinobe Samariabe. Samariabe ichibajadö, comunidad tjötjösawinobe, jadanö comunidad tjujuluwobö metjibinobe.

² Ja̧danö, Ben-adadma ömöayedö yöbawadönö weinobe, israel la'aka luwo̧, Samaria comunidadnö jo̧ Acabnö yötja̧lobö, baikwö:

³ —Duluwo̧ Ben-adadma ökwönö weobe, –Kwitea platabi, orobi, ötjöda chitea baibanö kwiyotjö, ja̧danö kwilekwamutjö inesö otiwadönöbi, kwitjimutjö otiwadönöbi kwiyotjö, –jö̧ba̧lö webo̧ duluwo̧ Ben-adadma, —jö̧ba̧lö.

⁴ Yötja̧lökwe, Israel la'aka luwo̧ Acabma Ben-adad weaja̧ atadö yöa̧linobe, —Jau chuluwo̧ la'aka luwo̧, ötjöbi, okobe jwiinö chiteabi, okobe deinö chömöayedöbi, ökwöda kwiteabedösa, —jö̧ba̧lö.

⁵ Jemi ikenama, Ben-adad ömöayedö yemidanö ichibö yötja̧linobe, —Baikwö webo̧ Ben-adadma: –Ökwönö wetijatö, kwitea platabi, orobi, kwilekwamunöbi, kwitji̧munöbi ötjönö kwiyobö.

⁶ Jo̧kwaijayonö, babe wainö yöta̧lakwö: Itekwai, babedajayenö, chömöayedönö wetocha, kwejube tjichibobö, jadanö jobadöma kwejubi, kwömöayedö tjejuteniabi isakwö kwetjachakwedö, okobe jwiinö kwitea mikwawi̧ jawa tjöbadekwajobö, jadanö badekwajadö, emö tjȩwa̧jakwedö, —jö̧ba̧lö.

⁷ Jejenö yöa̧liökwe, Israel inesö la'aka luwo̧ma okobe deinö israel la'aka luwedö ö̧jobekwö tjichobö weinobe, ja̧danö Ben-adad weaja̧ yöbawö, jobadönö yöa̧linobe: —Chömöledö, Ben-adad wei̧ a̧ja̧kwö, omukwatö kwöwaisachibaduwo, Ben-adadma isabenö ökwödökwö wene ujuna̧lobö isakwo̧. Jau, ajayinö weinobe, chilekwamunöbi, chitji̧munöbi, chitea platabi, orobi jo̧banö chiyobö, ja̧danö wei̧tjö̧, chöpöjödijökötö, –Weköbaja̧danö chiyocha, –jö̧ba̧lö. Jobekwö chatadijayonö, wene isakwö tupakwönönö weajabe, —jö̧ba̧lö.

⁸ Yöa̧liawö̧, —'Yayi weaja̧ kwa̧ja̧kwoko, yöa̧laja̧danö jatjoböma weköboko, —jö̧ba̧lö tjatadinobe.

⁹ Tjatadiökwe, Ben-adad ömöayedö yöbawadönö weinobe, —Baikwö kwatadaduwo, chuluwo̧ la'aka luwo̧ Ben-adadnö: –Chuluwo̧, okobe jwiinö ajayinö weköbaja̧ma, öpöjödökönö weköbaja̧danö chiyakwo̧sa. Jo̧kwaijayonö, bajaleapo weköbaja̧ma, Jau jö̧ba̧lö chatadoböma jwia, —jö̧ba̧lö. Weawö̧, ȩwa̧bijö yötjawinobe tjuluwo̧ Ben-adadnö.

¹⁰ Ikenama, yemidanö iteda yöa̧li̧ weinobe Acabnö: —Weti̧ kwa̧ja̧kwokobetjö̧, isabenö jwiinö kwitebo comunidad söbebö lodakwawö̧sa. Jau Acab, jwiinö söbebö lodobetjö̧, comunidad nijiso̧pja̧bi jwienanö baibanö, isabenö jwiinö söbebö lodakwedösa kwitebo comunidadma. Jejenö söbebö lodökötjö̧ma, chösödawö̧ diosbedö ötjönö lȩtjebobö ja̧kobe, —jö̧ba̧lö yöa̧li̧ yötjawinobe Acabnö.

¹¹ Yötja̧lökwe, Israel la'aka luwo̧ Acabma atadinobe, —Kwuluwo̧duwinö yökawaduwo, –Bakwo̧ ölakwabikwawakwa̧ abönö, ajayinö ölakwabikwawa jawa 'duawenama, ujuluwaja̧ wene yöawobö jwibo̧ ina ujuluwokobetjö̧, sule ölakwabikwawaja̧ ikena, ölakwabikwawa jawa 'yobekwajo̧da ujuluwaja̧ wene yöawobö jo̧be, —jö̧ba̧lö.

¹² Acab yöa̧la̧ja̧ Ben-adadnö yötjawenama, Ben-adadma ömöayedö la'aka luwedökwö, ejunö ja̧nö tjowa̧linobe. Ja̧danö, Acab yöa̧laja̧ a̧jakwajo̧, iteda ömöayedönö weinobe, —Tjo̧wi, Samaria comunidad medibakwa̧ jawa kwotidaduwo, juluwanö medibakobetjö̧, —jö̧ba̧lö. Ja̧danö, weaja̧danö tjölakwabikwawakwa̧ jawa tjotidinobe.

Isabenö Jo̧ israel jojodönö pjaatina jawa

¹³ Ja̧ baledemi ja'ötjö, Dios yöawi̧ yöbawadötjö bakwo̧ma, israel la'aka luwo̧ Acab öba a'o ichibö yöawinobe, —Baikwö yöawobe Isabenö Jo̧ma, –Idö inesö ba̧jȩkwadö ölakwabikwawadönö kwedobe, jö̧tö? Baikwö yötawakwö, babe möle jobadönö kwujuluwobö chiyakwo̧sa, ja̧danö jejenö chiyiökwe, ötjönö kwöwaisachibakwo̧ja, ötjöma Isabenö Jo̧sa, —jö̧ba̧lö, Dios yöawi̧ yöawinobe Acabnö.

¹⁴ Yöa̧lökwe, —Ökwödötjö didö tjölakwabikwawonö dujuluwobö pjaatakwa̧da? —jö̧ba̧lö Acab abebö a̧ja̧kwökwe, —Baikwö yöawobe Isabenö Jo̧ma, bakwasokwena la'aka luwedö tjömöayedö ölakwabikwawa jojodö ötjibonö, kwujuluwaduwakwedöja, —jö̧ba̧lö atadinobe Dios yöawi̧ yöbawo̧ma. Atadökwe, —Ja̧danö tida metjibobö weakwo̧ma? —jö̧ba̧lö abebö a̧ja̧kwinobe Acabma. Aebökwe, —Ökwö Acabda, —jö̧ba̧lö yöawinobe.

¹⁵ Yöawökwe, Acabma okobe deinö bakwasokwena la'aka luwedö tjömöayedönö o̧ko̧kodinobe, doscientos treinta y dosbedönö. Ja̧danö Acabma okobe deinö ju'wedö israel jojodötjö iteda ömöayedö ölakwabikwawa jojodönöbi o̧ko̧kodinobe, ja̧danö okobe deinö jobadöma, sule siete milbedöda tjö̧ba̧jekwinobe.

¹⁶ Ko̧ko̧kwajadö, doscientros treinta y dos luwedö ju'wedö siete milbedönö ötjibonö, möle ja'ö jawo̧ jweinö ö̧jena latjebinobe, Ben-adad ömöayedö inesö ba̧jekwadökwö tjölakwabikwawobö. Ja̧danö, latjebenama, Ben-adadbi ju'wedö iteda ömöayedö treinta y dosbedö la'aka luwedöbi, sabana'wotjö otikwejunö ja̧nö 'dukwachawö̧ batjibanö tjowa̧linobe.

¹⁷ Acab ömöayedö ölakwabikwawadö tjölakwabikwawobö latjebenama, bakwasokwena la'aka luwedö tjömöayedöma ju'wedötjö abönö latjebinobe, ja̧danö latjebobe tjedinobe Ben-adad ömöayedötjö eda̧ladöma. Edajadö, tjuluwo̧nö yötjawinobe, —Ju'wedö ömadöma, Samaria comunidadtjö latjebobe, —jö̧ba̧lö.

¹⁸ Yötjawökwe, —Jobadönö do̧bataduwi. Tjölakwabikwawobö tjichitjö̧bi, ölakwabikwawökönö tjichitjö̧bi, bakwainö jobadönö kwabawö lobökönö, ina 'yaba̧ladönö do̧kataduwodönö, —jö̧ba̧lö weinobe Ben-adadma.

¹⁹ Israel jojodö Samaria comunidadtjö latjebenama, bakwasokwena la'aka luwedö tjömöayedöma abönö latjebinobe, ja̧danö ju'wedö israel jojodötjö ölakwabikwawadöma, tjökömanö 'ya̧nö latjebinobe.

²⁰ Ja̧danö, labebajadö Siria jojodö tjö̧jobekwö ichibö metjibenama, okobe deinö bakwo̧nökwena siria jojodönö mebibö, tjöpöjojokwena kwabawö lotjinobe. Jejenö balediawö̧, ju'wedö siria jojodöma dötjibajinobe, jadanö israel jojodöma jobadönö mebibö lutjinobe. Ba̧jȩkwadö siria jojodönö kwabawö lotjinobe, jo̧kwaijayonö siria jojodötjö inesö la'aka luwo̧ Ben-adadma, ajwi kabayunö wanö, ju'wedö kabayunö wanö ölakwabikwawa jojodökwö döbibajö ö̧jibinobe.

²¹ Ja̧ möle israel la'aka luwo̧ Acabma jwiinö ujuluwinobe Siria jojodönö. Comunidadtjö ölakwabikwawobö labebajo̧, kabayudönö wanö ölakwabikwawadönöbi, kolukiyanö ölakwabikwawadönöbi söbebö loinobe, isabenö jwiinö ujuluwinobe siria jojodönö.

Isabenö Jo̧ yemidanö israel jojodö siria jojodönö tjujuluwobö pjatina jawa

²² Jemi ikenama, Dios yöawi̧ yöbawo̧ma Israel la'aka luwo̧ Acab öba a'o ichibö, jo̧banö yöbawö weinobe: —Babema kwujuluwachibanö kwotidobö jobe, ja̧danö yadakwö otiwanö kwölakwabikwawakwa̧ omukwatö kwujunobö jo̧be. Jau Acab, makösaba o̧ba baibenama, Siria la'aka luwo̧ma yemidanö ökwönö mebibö ölakwabikwawakobe, jo̧kwajabetjö̧ otiwanö kwölakwabikwawakwa̧ jawa omukwatö kwotido, —jö̧ba̧lö.

²³ Ja̧danö, Siria la'aka luwo̧ ömöayedötjö, waisanö omukwatobö pjabatadöma, tjuluwo̧nö yötja̧linobe, —Duluwo̧, dedemi israel jojodö tjösödökwe Diosma, mösa'iju jȩmi nijinö jo̧, ja̧danö mösa'iju jȩmi dölakwabikwawinobetjö̧, tjösödökwe Dios pjaatawö̧ ökwödönö tjujuluwinobe. Jo̧kwaijayonö, ba̧ba̧lawemi jobadökwö dölakwabikwawitjö̧ma, tjösödökwe Diosma jobetjö deena, ja̧danö pjaatobö jwiena. Jo̧kwajabetjö̧ ba̧ba̧lawobetjö dölakwabikwawitjö̧ma, isabenö israel jojodönö dujuluwena.

²⁴ Jo̧kwajabetjö̧, dedemi baikwö ja̧köbobö otiwena duluwo̧: Ajayinö kwömöayedö inesö la'aka luwedöda ölakwabikwawa jwebebadö tjö̧jinobe, jo̧kwaijayonö jobadö tjö̧jinemi, ölakwabikwawa jawa waisadö la'aka luwedönöda kwujuno, jwetjebonö tjömöayedö tjölakwabikwawakobetjö̧.

²⁵ Ja̧danö, yemidanö ölakwabikwawadönö kwo̧ko̧kodo, belö tjö̧ba̧jȩkwinadanö, bakwainö tjö̧ba̧jȩkwinö kwo̧kwo̧kodo, kabayudönö wa̧nö ölakwabikwawadö tjö̧ba̧jȩkwinadanö, ja̧danö kolukiyabi ba̧jȩkwinadanö. Jemi ikenama, kwo̧ko̧ko̧daja̧ ikenama, yemidanö jobadönö dölakwabikwawobö di̧'yena, niji ba̧ba̧lawobema, ja̧danö baba̧lawobe dölakwabikwawobetjö̧, isabenö jobadönö dujuluwena, —jö̧ba̧lö yötja̧linobe. Yötja̧lökwe, ösödinobe tjuluwo̧ma, ja̧danö yötja̧laja̧danö weinobe.

²⁶ Ja̧danö, ikenasaba, o̧ba baibenama, Ben-adadma siria jojodötjö ölakwabikwawadönö o̧ko̧kodinobe, ja̧danö ko̧ko̧dajo̧, Afec comunidadbe tji̧'yinobe, israel jojodökwö tjölakwabikwawobö.

²⁷ Tjichibiawö̧, israel la'aka luwo̧ma israel jojodötjö ölakwabikwawa jojodönö o̧ko̧kodinobe, ja̧danö tjölakwabikwawakwa̧ jawa tjeminobe. Ikenama, Siria jojodökwö tjölakwabikwawobö latjebinobe israel jojodöma, jadanö tjö̧jemi badeibö ichibajadö, tjabakwemi tjujuninobe. Siria jojodö tjöba a'o ja̧nö, o̧bukwedöda tjö̧jinobe israel jojodöma, wanedö yöta̧la, tjabakwemima, sule chivodötjö dosolataja tjichejekwi̧danö tjichejekwinobe siria jojodö tjöba a'otjö, ja̧danö siria jojodöma, meje ba̧kwȩmeachibanö tjö̧jinobe.

²⁸ Ja̧danö, Dios yöawi̧ yöbawo̧ma Israel la'aka luwo̧ öba a'o ichibö, yöawinobe: —Baikwö yöawobe Isabenö Jo̧ma, –Siria jojodöma ötjönö yötja̧lajabe, -Isabenö Jo̧ma mösa'iju jȩmi nijinöda ja̧nö juluwo̧, wabekoemi deobe Isabenö Jo̧ma, jobetjö ujuluwökena, -jö̧ba̧lö yötja̧linobe. Jo̧kwajabetjö̧, jejenö yötja̧linobetjö̧, jobadönö kwujuluwobö chiyakwo̧sa, bidö inesö bajȩkwadönö kwujuluwobö chiyakwo̧sa, ötjönö kwöwaisachibakobetjö̧, isabenö ötjödasa Isabenö Jo̧ma, —jö̧ba̧lö Isabenö Jo̧ yöawi̧ yöawinobe Acabnö.

²⁹ Ja̧danö, jelemutjö bakwöta möle baledibanö, badekwakwawanö ölakwabikwawökönö tjö̧jinobe, israel ölakwabikwawa jojodöbi, siria ölakwabikwawa jojodöbi. Jadanö, jelemutjö dötölataja mölema, jamatö tjölakwabikwawinobe, ja̧danö israel jojodöma siria jojodönö tjujuluwinobe. Jwiinö tjujuluwinobe siria jojodönö, bakwöta möle, siria jojodötjö tjömasapiyanö kwebachö ölakwabikwawa jojodönö cien milbedönö kwabawö lotjinobe.

³⁰ Ja̧danö, jejenö kwabö lotjiawö̧, siria jojodötjö ji̧bajadöma Afec comunidadbe dötjibajinobe, tjöekwemi o̧pe tjö̧jibobö, jo̧kwaijayonö Afec comunidad tjöekwemi jobadönö kwaibinobe, ja̧danö veintisiete milbedönö 'dabebö loinobe. Siria la'aka luwo̧ Ben-adadbi Afec comunidadbe döibajinobe, jadanö comunidad okwa tebachajo̧, okwasȩko̧nö uju̧kwawinobe.

³¹ Ja̧danö, jobe uju̧kwawemi, waisanö omukwatobö pjabatadöma tjuluwo̧ Ben-adadnö yötja̧linobe, —Duluwo̧, ökwödöma da̧ja̧kwajabe, israel jojodötjö la'aka luwedönö, tjöpöjojodönö lȩlö̧inö edadötö, jö̧ba̧lö. Jo̧kwajabetjö̧ baikwö adebakwö, ökwödönö weköbo, budekwadö 'dutjawa̧do̧, a̧do epju̧yunö kalukaa̧do̧ 'dubawö, jadanö duunö a̧la̧chi'bo di̧batö, israel la'aka luwo̧ öjobekwö di̧'yobö, –Ökwönö iyawadösa, kwömöayedö badibanö, –jö̧ba̧lö. Dedemi jejenö i̧sȩbö di̧'yitjö̧ma, ökwönö lȩlö̧jinö edena, ja̧danö ökwönö kwabö loökena, —jö̧ba̧lö tjuluwo̧ Ben-adadnö yötjalinobe.

³² Yötja̧lökwe, weinobe, ja̧danö a̧do̧ epju̧yunö kalukaa̧do̧ 'dubawö, jadanö tjuunö a̧la̧chi'bo di̧batö, israel la'aka luwo̧ öjobekwö tji̧'yinobe, ja̧danö öba a'o ichibajadö atjebinobe, —Kwömöayo̧ Ben-adadma ökwönö abebo̧, –Ötjönö kwabö lobökönö, ina 'yata̧lobö webitjö, —jö̧ba̧lö. Yötja̧lökwe, —Ben-adadma ina 'yaa̧lobeji̧? Jo̧bama chöja̧wo̧danöbo̧, ina 'ya̧alitjö̧ma otiwa, —jö̧ba̧lö atadinobe Acabma.

³³ Atadiawö, tjomukwatinobe Ben-adad ömöayedöma, —Isabenö duluwo̧nö lȩlöjinö edakwo̧, —jö̧ba̧lö, jokwajabetjö̧ yötja̧linobe, —Jau, kwöjawo̧danöbo̧ Ben-adadma ina 'yaba̧lo̧, —jö̧ba̧lö. Jö̧tja̧lökwe, —Chö̧jobekwö ichejebaduwinö, —jö̧ba̧lö weinobe, ja̧danö tjichejebenama, itea koluka teachobö weinobe.

³⁴ Jejenö lȩlöjinö ediökwe, Ben-adadma Acabnö yöa̧linobe, —Acab, chabe'do kwabe'dokwö ölakwabikwawö 'döebina comunidadbiyama, ökwönö tjetatakwo̧sa. Ja̧danö ju'wibi yötawakwö, damötjö chabe'doma ökwödö siria jojodö ditea iyawemi otidinobe, kwitebo comunidad Samariatjöma, jö̧tö? Ötjö chitebo comunidad Damascotjö ökwöbi kwotidobö wetena, jobetjö ökwödö israel jojodö kwiteaduwi mikwanö kwiyaduwakobetjö̧, —jö̧ba̧lö yöa̧linobe. Yöa̧liökwe, ösödinobe Acabma, ja̧danö bakobe pjabatakwawö tjö̧jakwa̧ wene yöbawö tjujuninobe, Acabbi, Ben-adadbi. Ikenama, Ben-adad ȩwa̧jobö webö loinobe, ja̧danö wene jwiinö itebobe ȩwa̧jinobe.

Dios yöawi̧ yöbawo̧ Dios lȩebakwa̧ Acabnö yöawina jawa

³⁵ Ja̧danö, Isabenö Jo̧ weökwe, Dios yöawi̧ yöbawadötjö bakwoma ömöledöso̧nö weinobe, —Isabenö Jo̧ma weobe, inia tjöbo̧ batibanö labinö ötjönö kwaköbo, —jö̧ba̧lö. Jo̧kwaijayonö, weökwe, ömöledösonö kwaobö öpöjödinobe.

³⁶ Jejenö öpöjödiökwe, yöawinobe Dios yöawi̧ yöbawo̧ma, —Isabenö Jo̧ ötjönö kwaköbobö wei̧ kwa̧ja̧kwokobetjö̧, isabenö lȩebakwo̧ ökwönö, chö̧jelö lakebenama, didibama juluwanö kwabö loakwo̧ja, —jö̧ba̧lö. Ja̧danö, yöa̧laja̧danö baledinobe, ö̧jelö laebenama, didibama juluwanö jobanö öbadekwajinobe, ja̧danö jo̧banö kwabö loinobe.

³⁷ Ja̧danö, jȩlo̧nö badekwajo̧, bakwainö weinobe Dios yöawi̧ yöbawo̧ma, —Isabenö Jo̧ma weobe, inia tjöbo̧ batibanö labinö ötjönö kwaköbobö, —jö̧ba̧lö weinobe. Weökwe, otiwanö a̧ja̧kwinobe, ja̧danö labinö jo̧banö kwainobe, Dios yöawi̧ yöbawo̧ inia tjöbo̧ baibanö.

³⁸ Jemi ikenama Dios yöawi yöbawo̧ iniya tjöbo̧ma öba möchekwa̧do̧ 'duawinobe, jo̧banö tjöwaisapji jö̧ba̧lö, ja̧danö 'dubawajo̧, la'aka luwo̧ Acab öbaledakwa̧ mana ö'öböbe i̧'yinobe, la'aka luwo̧ öbaledakwa̧ itea'da̧lobö.

³⁹ Ja̧danö, la'aka luwo̧ öbaledenama, la'aka luwo̧ Acabnö jwöinobe Dios yöawi̧ yöbawo̧ma, —Chuluwo̧ la'aka luwo̧, labinö tjölakwabikwawenama, ötjöma tjölakwabikwawobe chichibijatö, ja̧danö bakwo̧ma döpöjojodötjö bakwo̧ do̧tja̧tajökwenö ichejebö, ötjönö weinobe, –Bite döibapji jö̧ba̧lö, otiwanö teada̧linö. Kwiteada̧lonö bite döibaitjö̧ma, wene kwujuna̧lakwo̧ja. Jau, deitjö̧ma, plata jawa treinta y cuatro kilo kwimidobö ja̧kobe, ja̧danö kwimidökötjö̧ma, ökwönö kwabö lotjakwo̧ja, —jö̧ba̧lö weinobe.

⁴⁰ Ja̧danö, jo̧banö chiteada̧lonö, ju'wibi, ju'wibi chotidijatö, ja̧danö ja̧ chotidonö, deijatö, ¡ötjöwe! —jö̧ba̧lö yöalinobe. Yöa̧lökwe, la'aka luwo̧ Acabma atadinobe, —Ökwöda yöbawö kwisȩbajabe, yöka̧laja̧danö isabenö wene juna̧lo̧ja, jö̧ba̧lö. Yöka̧laja̧danö isabenö ökwönö baledobö jo̧be, —jö̧ba̧lö.

⁴¹ Yöa̧liökwe, Dios yöawi̧ yöbawo̧ma juluwanö umu'dukwaja̧do̧ 'yoekwinobe, jadanö Israel la'aka luwo̧ma jo̧banö edö öwaisinobe, —Bitema Dios yöawi̧ yöbawadötjö bakwo̧, —jö̧ba̧lö.

⁴² Jemi ikenama Dios yöawi̧ yöbawo̧ jo̧banö yöawinobe, —Baikwö yöbawo̧ Isabenö Jo̧ma ökwönö, –Ötjöma omudawö chujunijatö, Ben-adadma isabenö ö'wö baiböbö jo̧be, –jö̧ba̧lö, jo̧kwaijayonö, jejenö omudawö chujuninajayonö, jo̧banö kwabö lobökönö, ejatö loköbajabe. Jo̧kwajabetjö̧, jo̧ba ö'wö baibo jö̧a̧linemi, ökwöda ö'wö bakibobö ja̧kobe, ja̧danö jo̧ba ömöledö usula tjemawo jö̧tja̧linemi, ökwöda kwömöledöda usula tjemawakwedö, —jö̧ba̧lö.

⁴³ Jejenö yöa̧liökwe, israel la'aka luwo̧ma dameakwö, o̧'wo sulinö ewa̧jinobe, itebo comunidad Samariabe.