1 Reyes 19 - Dios Iwene

Elias döibajina wene

¹ Ejube ichibajo̧, Acabma ilekwo Jezabelnö yöawinobe Elias ja̧bö i̧sȩbaja̧ wenema, okobe deinö Baal yöawi̧ yöbadönö kwabö loaja̧ wenebi, ju'wi ja̧aja̧ wenebi.

² Ja̧danö, yöawioko, Jezabelma yöjawi̧ yöbawo̧nö wejinobe Eliasnö, —Isabenö kwabö loköbajawö̧ Baal yöawi̧ yöbawadödanö bakibanö ja̧takwujusa, isabenö itekwai möle babedajenö, ida̧ökö kwabö lotakwo̧ kwö̧jakwo̧ja Elias, ja̧danö jejenö ökwönö kwabö lotökötjö̧ma, isabenö chösödawö̧ diosbedö ötjönö lȩtjebobö ja̧kobe, isabenö kwabö lotakwujusa ökwönöma, —jö̧ba̧lö yöbawo̧nö wejinobe.

³ Yöjawi̧ a̧ja̧kwenama, yeaibinobe Eliasma, ja̧danö kwabö lojapji jö̧ba̧lö, ömöayo̧nö öbibö döibajinobe, Juda niji comunidad Bersebabe. Bersebabe ichibajo̧, ömöayo̧nö ujunibinobe Berseba comunidadnö,

⁴ ja̧danö jemi tupakwö jojodö deobe jo̧dawa'ye i̧'yinobe, bakwöta möle baledibanö. Möle baledibanö jojodö deobe kwebachajo̧, arbusto towi ösadalena öbamatinobe. Jobe bamatajo̧, ö'wö baibotö jö̧ba̧lö Isabenö Jo̧nö aebinobe, —Chuluwo̧ Isabenö Jo̧, tjo̧wita, chö̧ji̧ chöpöjödachibajabe, tjo̧wi ötjönö kwabö loköbobö atebakwö. Jau chuluwo̧, cha'dödö tjotiwi̧tjö bajalekwönönö otiwö̧kö̧sa ötjöma, ja̧danö ö'wö babibajadö tjö̧ji̧danö, ida̧ökö ötjöbi ö'wö batibobö chösöda, kwabö loköbotjö, —jö̧ba̧lö aebinobe.

⁵ Ikenama, jejenö abebajo̧, nijinö bamatö abibinobe. Jemi ikenama, abemi ja'ötjö, Dios weökwe angelma öwawachö, jo̧banö mabö iwiludinobe, ja̧danö wiludajo̧ Eliasnö weinobe, —A̧la̧ibö kwukwo, —jö̧ba̧lö.

⁶ Weökwe, wilubajo̧ edinobe Eliasma, ja̧danö uu pjeanö, ökwöla ubi̧ ö̧'iya wame pan balawobe edinobe, ja̧danö ojwiyosa̧pja̧ edinobe. Edajo̧, kwanöbi ukwinobe, jadanö owöbi owinobe. Ikenama, kwajo̧, yemidanö abibinobe.

⁷ Jemi ikenama, Isabenö Jo̧ weökwe angelma yemidanö tjebachajö ichibinobe, ja̧danö yemidanö Eliasnö mabö iwiludinobe, —Elias, a̧la̧ibö kwukwo, kwukwökötjö̧ma, ödö kwekachakwa̧ dakwö kwekachobö? Jo̧kwajabetjö̧ a̧la̧ibö kwukwo, —jö̧ba̧lö wiludö weinobe.

⁸ Weökwe, a̧la̧ibö ukwinobe, ja̧danö owinobe. Kwajo̧, ujuluwachibinobe, ja̧danö ja̧ ukwaja̧ jwiinö ujuluwachibanö pjaatobetjö̧, ja̧da kwajo̧ cuarenta mölebi, cuarenta yötebi baledibanö kweachinobe, Sinai mösa'o, Dios itea'o mösa'o ötjaba'obe ichibenanö kabatö.

⁹ Ja̧danö, Sinai mösa'obe ichibajo̧, inawa ötöla okwa teachinobe Eliasma, ja̧danö ötöla okwa abinobe ja̧ yö̧te. Jemi ikenama, inawa ötölanö ö̧jemi ja'ötjö, Isabenö Jo̧ma iteda yöa̧li̧ yöa̧linobe Eliasnö, —Elias, tajawedö bai kwö̧jobeda? —jö̧ba̧lö.

Isabenö Jo̧ Eliasnö iteda ujulu i̧sȩbina jawa

¹⁰ Abebö a̧ja̧kwökwe, —Ötjöma jwaikwöda Isabenö Jo̧, okobe jwiinö juluwo̧ Diosnö ösödö ja̧nö, wei̧ a̧ja̧kwö jo̧sa. Jau chuluwo̧, ju'wedö chömöledö israel jojodö weköbi̧ a̧ja̧kwökönö katjatibijayonö, ja̧danö ökwönö iyawemi pjolo lotjijayonö, ja̧danö ökwö yökawi̧ yöbawadönö kwölöte'onö dȩdȩbö lotjijayonö, jwaikwöda ökwö weköbi̧ a̧ja̧kwö jo̧sa. Okobe deinö ökwö yökawi̧ yöbawadötjö, ji̧bo̧ma ötjödasa, ja̧danö babema ötjönöbi kwabö lotjobö isakwadö israel jojodöma, —jö̧ba̧lö atadinobe Eliasma.

¹¹ Atadökwe, Isabenö Jo̧ma Eliasnö weinobe, —Böla ötölatjö labebö, mösa'onö ja̧wi, jobe kwöba a'o chöbaledakobetjö̧ —jö̧ba̧lö. Weökwe, labebö mösa'önö ja̧nö edinobe Eliasma, jadanö Isabenö Jo̧ma iteda ujulunö, Elias öba a'o öbaledinobe. Isabenö Jo̧ abönö, jwa̧le'epjo jwiinö labinö jwa̧lȩ'ewinobe, mösa'o pjolachibenanö, ja̧danö inawiya 'dabö loenanö. Jo̧kwaijayonö, ja̧ inesö juluwapjo jwa̧le'epjoma, sule Isabenö Jo̧ i̧'yakwa̧ abönö jwa̧lȩ'epjo, iteda ö̧jima jwa̧lȩ'epjo okwa ö̧jinokobe. Jwa̧le'ewaja̧ ikenama, niji tjö̧awinobe, jo̧kwaijayonö ja̧ niji tjö̧awi̧bi, Isabenö Jo̧ inesö ö̧ji̧ma, niji tjö̧awi̧ okwa ö̧jinokobe.

¹² Ja̧danö niji tjö̧awaja̧ ikenama, ökwöla ubinobe, jo̧kwaijayonö Isabenö Jo̧ inesö ö̧ji̧ma, ökwöla okwa ö̧jinokobe. Jemi ikenama, bakwo̧ iwene tjo'omanö ökwöinobe.

¹³ Iwene ökwöi̧ a̧ja̧kwajo̧, Eliasma öba umuchekwinobe ö̧ka̧miji̧do̧ wamesa̧do̧nö, ja̧danö labebö, ötöla teachawemi a'o öjamatinobe. Ja̧danö, bakwo̧ iwene ökwöinobe, —Elias, tajawedö bai kwö̧jobeda? —jö̧ba̧lö.

¹⁴ Abebö a̧ja̧kwökwe, —Ötjöma jwaikwöda Isabenö Jo̧, okobe jwiinö juluwo̧ Diosnö ösödö ja̧nö, wei̧ a̧ja̧kwö jo̧sa. Jau chuluwo̧, ju'wedö chömöledö israel jojodö weköbi̧ a̧ja̧kwökönö katjatibijayonö, ja̧danö ökwönö iyawemi pjolo lotjijayonö, ja̧danö ökwö yökawi̧ yöbawadönö kwölöte'onö dȩdȩbö lotjijayonö, jwaikwöda ökwö weköbi̧ a̧ja̧kwö jo̧sa. Okobe deinö ökwö yökawi̧ yöbawadötjö, ji̧bo̧ma ötjödasa, ja̧danö babema ötjönöbi kwabö lotjobö isakwadö israel jojodöma, —jö̧ba̧lö atadinobe Eliasma.

¹⁵ Ikenama Isabenö Jo̧ma Eliasnö weinobe, —Kwichaja̧ mananö kwȩwa̧jo Elias, jadanö ȩwa̧jo̧, Damasco comunidad yöneawemi jojodö deobe kwi̧'yo. Jobe ichibajo̧, Jazael mikwo̧ uunö o̧te tokebo, Jazaelma Siria jojodötjö inesö la'aka luwo̧ baibakobetjö̧.

¹⁶ Ja̧danö ju'wibi, Nimsi itji̧ Jehu mikwo̧ uunö o̧te tokebo, Israel jojodötjö inesö la'aka luwo̧ baibakobetjö̧. Ja̧danö, ju'wibi Abel Mejola comunidad jojo Safat itji̧ Eliseo uunö o̧te tokebo, ökwö kwö̧jajemi, yötawi̧ yöbawo̧ ö̧jakobetjö̧.

¹⁷ Ja̧danö, baikwö yötawakwö Israel jojodönö lȩtebakwa̧ma, Siria luwo̧ ö̧jakwo̧ Jazaelma, ba̧jȩkwadönö kwabö loakwo̧, ja̧danö jo̧ba kwabö loaja̧tjö ju̧kwibajadönö, Jehuma kwabö loakwo̧, ja̧danö Jehu kwabö loaja̧tjö ju̧kwibajadönö Eliseoma kwabö loakwo̧.

¹⁸ Jo̧kwaijayonö lȩbebö kwabawö lotjobö wetijayonö, okobe deinö israel jojodönö kwabö lotjoböma wetökakwo̧sa, israel jojodötjö ina ötjönö ösödadö tjuju̧kwobetjö̧. Jau Elias, israel jojodötjö ina siete milbedö tju̧ju̧kwobe, Baalnö bȩbachibö ösödöködöma, ja̧danö Baal o̧'wo jawa du̧batö ösödöködöma, —jö̧ba̧lö weinobe Eliasnö.

¹⁹ Weökwe, jobetjö labebö ȩwa̧jinobe Eliasma, ja̧danö Safat itji̧ Eliseonö öbadekwajinobe, pakayadökwö batjo sobö otido̧nö. Ja̧yu Eliseo otidayunö, veinticuatro pakayadöma du̧ju̧tajakwena sobö tjotidinobe, ja̧danö Eliseoma bajaleapo otidadönö jwebebö sobö otidinobe. Eliseo ipjeanö baledö, Eliasma iteda ökamijido̧ wamesa̧do Eliseonö öwaninobe, —Dios omudawö ujunökweja, —jö̧ba̧lö, ja̧danö wanajo̧, tupakwö kweachinobe.

²⁰ Jejenö öwanajökwe, a̧jwi̧mu pakayadönö junibö, Elias ökömanö lubö ö'öakwawinobe Eliseoma, ja̧danö Eliaskwö ichibö aebinobe, —Chuluwo̧, ökwökwö chichakwa̧ abönö, –Tjo̧wi chi̧'ya, –jö̧ba̧lö chabe'donöbi, chojo'donöbi du̧batö chösödobö atebakwö, ja̧danö jemi ikenama kwömöayo̧ baibanö ökwökwö chichakwo̧sa, chichakwa̧ abönö jobekwö yötawobö weköbakwa̧ji̧? —jö̧ba̧lö. Aebökwe, —Jau, daji̧. Jo̧kwaijayonö kwo̧'wo jwibibökönuwi chi̧sȩbaja̧ma, isabenö yöka̧laja̧danö ötjökwö kwichobö jo̧be, —jö̧ba̧lö atadinobe.

²¹ Weökwe, Eliseoma tjebachajö, ajwi̧mu pakayadö du̧ju̧tajanö kwabö lobö, sobö otikwaka towi ösötebiya juwö, itebia söinobe. Jobe ju̧kwadö tjukwobö iyinobe, ja̧danö iyajawö̧, tjukwinobe. Ikenama a̧la̧ibö, Eliaskwö i̧'yinobe, ömöayo̧ baibanö.