1 Reyes 18 - Dios Iwene

Elias yemidanö Acabnö yöawobö i̧'yina jawa

¹ Lekwe möle, döbalataja o̧biya baledibanö ojwiyo o̧binokobe Israel nijitjö. Jemi ikenama, wapöbakwa o̧ba ja'ö, Isabenö Jo̧ma iteda yöawi̧ yöawinobe Eliasnö, —Tjowita Elias, babe Acab ö̧jobekwö kwi̧'yo, ja̧danö Acab öba a'o kwöwawacho, ja̧danö jemi ikenama ojwiyo yemidanö o̧bobö wetocha, —jö̧ba̧lö.

² Weökwe, Acab öba a'o öwawachobö i̧'yinobe Eliasma. Ja̧ möle baledi̧ baikwö laebobe. Lekwe ojwiyo o̧bokobetjö, nöinö a̧wi̧chi̧ lö̧jinobe Samaria comunidadtjö.

³ Ja̧danö, kököachibiökwe, Acabma iteda ömöayo̧ Abdias mikwo̧nö jwöinobe, meje'ye jȩmi isakwakobetjö̧. Jo̧ba Abdiasma, Acab eju teada̧lakwawa luwo̧ ö̧jinobe, jo̧kwaijayonö Acab yö̧ne ömöayo̧so̧ ö̧jinayonö, otiwanö yebabinö Isabenö Jo̧nö ösödö ö̧jinobe Abdiasma. Baikwö laebobe Abdias Diosnö ösödi̧ i̧sȩbina wenema:

⁴ Acab ilekwo Jezabelma okobe deinö Isabenö Jo̧ yöawi̧ yöbawadönö kwabawö lojobö jö̧ja̧linobe, ja̧danö jobadönö kwabö lojenama, Abdiasma Dios yöawi̧ yöbawadötjö cienbedönö otojinobe. Inawa ötöliyanö jobadönö otojinobe, bakwölanö cincuentabedönö, ja̧danö jelölanö cincuentabedönö. Ikenama, jobe tojö junajo̧, tju̧kwabi, ojwiyobi ichejebö iyinobe jobadönö, Isabenö Jo̧nö yebabinö ösödobetjö̧.

⁵ Abdiasnö jwöbajo̧, jobanö weinobe Acabma: —Niji ba̧kwemeachibanö, meje'ye isakwö kwedacho Abdias, ojwese'doteniabebi, wabekoteniabebi kwebachö disakwo, meje'ye cha̧jwi̧mu tjukwakwa̧'ye döbadekwajakobetjö̧. Jejenö isakwö meje'ye döbadekwaitjö̧ma, okobe deinö chajwi̧mu kabayudöma debö tji̧'yökena, —jö̧ba̧lö.

⁶ Jemi ikenama, Acabbi, Abdiasbi tji̧'yakwemikwena omudawö junö, niji 'da̧bachakwawö tjujuninobe, ja̧danö Acab jelobekwö jo̧dawa'ye isakwö i̧'yonö, Abdiasma jelobekwö jodawa'ye isakwö i̧'yinobe.

⁷ Ja̧danö, Abdias i̧'yemi ja'ötjö, Eliasma jo̧bakwö öbadekwajinobe, ja̧danö Eliasnö edö öwaisachibinobe Abdiasma, ja̧danö nijakwö bȩbachibö abebö a̧ja̧kwinobe, —Chuluwo̧ Elias, isabenö ökwödaji̧?

⁸ —jö̧ba̧lö aebökwe, —Jau, Eliassa. Baikwö wetakwö, kwuluwo̧ Acab ö̧jobekwö 'ya̧nö yökawo, —Eliasma ichibajabe, —jö̧ba̧lö.

⁹ Jejenö weökwe, jwiinö yeabinobe Abdiasma, ja̧danö yebabinö jö̧a̧linobe Eliasnö: —Chuluwo̧ Elias, tajawedö ötjönö suli̧ kwöwaedotö jö̧ba̧lö, Acabnö jejenö yötawobö weköbökwesa? Ju'wi jaye sulabenö ja̧tiökwe, chuluwo̧ Acab ötjönö kwabö loobö kwisakwobeji̧?

¹⁰ Kwuluwo̧ Isabenö Jo̧ Dios öba a'o ja̧nö, baikwö isabenö yötawakwö chuluwo̧, okobe deinö tjitebokwena jojodö ökwönö tjisakwobö weinobe chuluwo̧ Acabma, jadanö jelobetenia jojodöbi, la'aka luwedöbi, –Eliasma deobe baima, –jö̧ba̧lö yötja̧linobe. Tjitebokwena luwedö jobekwö yötja̧liökwe, chuluwo̧ Acabma jweinö yöbawö tjujunobö weinobe, –Eliasnö disakwijayonö, isabenö deobe ditebotjöma, isabenö jweinö yöbawa junadösa, omöna yöda̧lökö, –jö̧ba̧lö yöbawö tjujunobö weinobe.

¹¹ Ja̧danö, babema ötjönö weköbajabe, –Kwuluwo Acabnö yöbawaji, Eliasma bai ö̧jobe, –jö̧ba̧lö.

¹² Jejenö yötawoböma yetabi chuluwo, baikwö yöta̧la, Acabnö yöbawö chi̧'yaja̧ okobe, Isabenö Jo̧ o̧'wo luwo̧ma jelobekwö ökwönö öibakwo̧, wajwitobekwö. Ja̧danö, Acabnö yötawaja̧ okobe, ökwönö öbadekwajökötjö̧ma, –Omöna yöba̧lo̧ja, –jö̧ba̧lö ötjönö kwabö loakwo̧ Acabma. Jobekwö suli̧ kwöwaedokotjö chuluwo̧ Elias, ötjöma Isabenö Jo̧nö yebabinö ösödo̧chobetjö̧. Jau Elias, tjemubayo̧ chö̧jinemi baikwöma, bakwelöjatebö Diosnö ösödo̧sa, Acab ötjönö kwabö loobö kwisakwoko chuluwo̧.

¹³ —Isabenö Diosnö ösödo̧sa chuluwo̧, ökwönö yötjawinökiji̧ Isabenö Jo̧ yöawi̧ yöbawadönö pjatatina wenema? Jezabel Isabenö Jo̧ yöawi̧ yöbawadönö kwabawö lojinenama, Dios yöawi̧ yöbawadö cienbedönö pjabatö, inawa ötöla bakwölanö cincuentabedönö chotojijatö, ja̧danö jelölanö cincuentabedönö chotojijatö, jadanö tojajo̧, kwakwawabi, ojwiyobi jobadönö iyö pjatatijatö, ja̧ wene ökwönö yötjawinökiji̧?

¹⁴ Jejenö otiwanö Diosnö ösödö chö̧jijayonö, ötjönö suli̧ kwöwaedotö jö̧ba̧lö weköbobe, –Kwuluwo̧nö yöbawaji, Eliasma bai jo̧, –jö̧ba̧lö, ja̧danö jejenö yötawiökwe deköbenama, ötjönö kwabö loakwo̧, —jö̧ba̧lö yöa̧linobe Abdiasma yebabinö.

¹⁵ Yöa̧lökwe, —Chuluwo Isabenö Jo̧ okobe jwiinö juluwo̧ Diosma, 'ya̧balo̧ jo̧, jadanö jo̧ba öba a'o ja̧nö, isabenö yötawakwö, babe möleda Acab öba a'o chöwawachakwo̧sa, —jö̧ba̧lö atadö yöa̧linobe Eliasma.

¹⁶ Jejenö yöa̧lökwe, Acabnö öbadekwajobö i̧'yinobe Abdiasma, jadanö Elias jobe ö̧ji̧ wene yöawinobe. Yöawiökwe, Elias ö̧jobekwö i̧'yinobe Acabma, jo̧banö öbadekwajobö.

¹⁷ Ja̧danö, Eliasnö edenama, jo̧banö abebö a̧ja̧kwinobe Acabma, —Ökwöma isabenö israel jojodönö suli̧ waedo̧ Eliasköbiji̧? —jö̧ba̧lö.

¹⁸ Aebökwe, —Ötjöma la'akatjöda israel jojodönö suli̧ waedö̧kö̧sa, ökwöda israel jojodönö suli̧ waedo̧ma, ökwö Acabbi, ju'wedö kwabe'dö ömöledöbi. Jau, ökwödöma Isabenö Jo̧ wei̧ kabatibö, jelobekwö 'ya̧nö Baal ötjabawö̧nö sulabenö ösödö, jobadö wetji̧da ja̧bö̧ ja̧döja, ökwödaja Acab, israel jojodönö suli̧ waedo̧ma.

¹⁹ —Babema baikwö wetakwö: Ötjöma Carmelo mösa'o chö̧jocha, ja̧danö kwömöayedönö weköbo, okobe deinö israel jojodönö ko̧ko̧dö, öbibö tjichejebobö chö̧jobekwö, Carmelo mösa'obe. Jadanö ju'wibi kwilekwo Jezabel jitea mesasötetjö kwadönöbi kwichejebo, tjösödökwe Baal yöawi̧ yöbawadö cuatrociento cincuentabedönöbi, tjösödoko Asera yöjawi̧ yöbawadö cuatrocientosbedönöbi, —jö̧ba̧lö weinobe Eliasma, Acabnö.

Isabenö Jo̧ Diosda isabenö tjösödo jö̧tja̧lökwe Diosbo̧ma, jö̧ba̧lö Elias i̧sebina jawa

²⁰ Elias weaja̧danö weinobe Acabma, okobe deinö israel jojodönö Carmelo mösa'otjö tjo̧ko̧kokwobö weinobe, ja̧danö tjösödawö̧ o̧'wo jawa yötjawi̧ yöbawadönöbi Carmelo mösa'otjö tjo̧ko̧kokwobö weinobe.

²¹ Ja̧danö, israel jojodö Carmelobe tjichibiökwe, tjöba a'o yö̧ne ichibö, jojodönö yöa̧linobe Eliasma: —Chömöledö, ökwödöma lekwe möle kwösödaduwakwo̧nö omudawö junöködöja, –Isabenö dösödo jö̧da̧lökwema, ditejö, Isabenö Jo̧ö̧kö̧, Baal ötjabökweö̧kö̧, diteda isabenö dösödo jö̧da̧lökwema? –jö̧ba̧lö, lekwe möle kwösödaduwakwo̧nö omudawö junökönö ja̧döja. Isabenö kwösödaduwakwo̧nö omudawö kwujunaduwobö jo̧be chömöledö, baikwö yöta̧la: Isabenö Jo̧ mikwo̧da isabenö Diosbo̧ ö̧jitjö̧ma, jo̧banöda ösödö kwö̧jaduwo, ja̧danö Baal mikwo̧da isabenö Diosbo̧ ö̧jitjö̧ma, jo̧banöda ösödö kwö̧jaduwo. Kwösödaduwakwo̧nö omudawö kwujunaduwo chömöledö, —jö̧ba̧lö yöa̧linobe Eliasma. Jo̧kwaijayonö, jejenö yöa̧lijayonö, atadökönö, 'wi̧inöda tjö̧jinobe israel jojodöma.

²² Jemi ikenama, Eliasma jojodönö yöa̧linobe, —Chömöledö, Isabenö Jo̧ yöawi̧ yöbawadötjö, ötjöda chö̧jibajabe, ötjödasa ina Isabenö Jo̧ yöawi̧ yöbawo̧ jo̧dawo̧ma. Jo̧kwaijayonö, Baal yöawi̧ yöbawadöma, cuatrociento cincuentabedö tjö̧jobe.

²³ Ja̧danö, baikwö atebaduwakwö, isabenö Diosbo̧ma ditejö jö̧ba̧lö di̧sȩbakobetjö̧: Pakayadö du̧ju̧tajanö omudawö kwiyaduwo, Baalnöbi, Isabenö Jo̧nöbi kwabö juwö diyobö. Ja̧danö kwiyaduwajawö̧tjö, Baal yöawi̧ yöbawadöma abönö pakayaso̧ bakwo̧nö omudadö tjemakobe, ja̧danö kwabö bulatö, imi wame tjöwanakwedö, tjösödökwe Baalnö iyawa baibanö. Jo̧kwaijayonö, imi wame tjöwanijayonö, ökwöla tjönötedökakwedö. Ja̧danö ötjöma jelo̧ pakayaso̧nö kwabö bulatö, imi wame chöwanakwo̧sa̧, ja̧danö ötjöbi imi chönötedökakwo̧sa.

²⁴ Jejenö junajadö, ökwödö Baalnö ösödadönö kwösödaduwökwenö jwököbaduwo, –Duluwo̧ Baal, Diosbo̧ kwö̧ji̧ i̧sȩbö, bi̧ya diyaja̧ iyawa ökwöla kwönötedo, –jö̧ba̧lö. Ja̧danö, ötjöbi chösödökwe Isabenö Jo̧nö jwötocha, –Chuluwo̧ Isabenö Jo̧, Diosbo̧ kwö̧ji̧ i̧sȩbö, chiyaja̧ iyawa ökwöla kwönötedo, –jö̧ba̧lö. Bakwainö dösödökwekwena jwöbö adebakwedösa, ja̧danö adebökwe, ökwöla nötedo̧nö döwaisakwedösa, isabenö jo̧bada isabenö Diosbo̧ma, —jö̧ba̧lö. Yöa̧liawö̧, tjösödinobe israel jojodöma, —Isabenö otiwanö yöa̧lajabe Eliasma, jejenö tji̧seboböma otiwa, —jö̧ba̧lö.

²⁵ Ikenama Eliasma Baal yöawi̧ yöbawadönö weinobe, —Ökwödöma ba̧jȩkwadöja, jo̧kwajabetjö̧ ökwödöma abönö pakayadötjö bakwo̧nö omudawö kwemaduwo, ja̧danö iyawa baibanö kwotidaduwo. Ikenama kwösödaduwökwenö jwököbaduwo, jo̧kwaijayonö iyawa baibanö kwöwanaduwijayonö, ökwöla kwönötedaduwoko, —jö̧ba̧lö.

²⁶ Weawö̧, israel jojodö tjiyajökwe pakayaso̧nö emibö, iyawa baibanö tjotidinobe, jadanö yȩayi jamatö, möle ja'ö baibanö tjösödökwe Baalnö jwötjeba̧linobe, —Duluwo̧ Baal, adebökwe, kwatado, —jö̧ba̧lö. Jo̧kwaijayonö, lekwe jwötjeba̧lijayonö, Baal iwene ökwöinokobe, bakwo̧bi atadinokobe. Yȩayi baledibanö, tjösödökwe Baalnö iyawöte söpödö, dödöbö jwöbeba̧lö, tjösödökwe Baalnö atjeba̧linobe, atjebi̧ a̧ja̧kwö, ökwöla önötedobö.

²⁷ Ja̧danö, möle ja'ö baibenama, Eliasma jobadönö obö yöa̧linobe, —Kwösödaduwökwe Baalnö labinö jwököbaduwo. Kwösödaduwökwema isabenö diosbo̧, jö̧tö? Jo̧kwajabetjö̧ labinö jwökeba̧laduwo, ökwödönö a̧ja̧kwakobetjö̧. Babema omukwatö ö̧jenaö̧kö̧, 'yo'obö ö̧benaö̧kö̧, jelobe kwebachö ö̧jenaö̧kö̧, a̧ba̧lenaö̧kö̧, labinö jwökeba̧laduwo, jo̧banö kwiwiludaduwakobetjö̧, —jö̧ba̧lö Baal yöawi̧ yöbawadönö obö jwöinobe Eliasma.

²⁸ Jwöiawö̧, ajayitjö bajalekwönönö labinö jwötjeba̧linobe, ja̧danö ja̧bajitjadanö, kwölöte'onöbi, i̧sa̧pi̧nöbi tjosolekwinobe, tjökwösobu ku̧kwi̧nö, —Duluwo̧ Baal, adebi̧ kwa̧ja̧kwo, —jö̧ba̧lö.

²⁹ Möle ja'ö baledibanöbi, jemi tupakwöbi jobekwö tjo̧'wo jwibadö ja̧tji̧danö ja̧tjinobe, yi̧benakwö iyawa Diosnö iyatjenanö baibenanö, jo̧kwaijayonö Baal iwene ökwöinokobe, bakwo̧bi atadinokobe, ja̧danö bakwo̧bi a̧ja̧kwinokobe.

³⁰ Jemi ikenama, Eliasma okobe deinö jojodönö yöa̧linobe, —Chömöledö, chö̧jobekwö yöne kwichaduwo, —jö̧ba̧lö. Yöa̧lawö̧, yöne tjichibinobe jojodöma. Jobe Carmelo mösa'otjö ji̧nobe, Diosnö iyawemi, pjolö lotjinemima, ja̧danö ja iyawemi yemidanö otidinobe Eliasma.

³¹ Iyawemi otidö, Eliasma a̧linösamutjö döbalataja inawiya eminobe, israel jojodötjö ajayinö ji̧na Jacob itji̧mu ömadö tjö̧ba̧jȩkwidanö. Damötjö̧ Isabenö Jo̧ Jacobnö iteda yöawi̧ yöawinobe, —Bemi tupakwö kwimima, Israel jö̧ba̧lö kwimikwakwo̧ja, —jö̧ba̧lö, jadanö joba israel ötjabökwe itji̧mu ömadö tjö̧ba̧jȩkwi̧danö, a̧li̧nösamutjö döbalataja inawiya eminobe Eliasma, Diosnö iyawemi otidobö.

³² Ja̧danö, ja̧ inawiyanö Isabenö Jo̧ Diosnö ösödö iyawemi otidinobe. Jemi ikenama, otidajo̧, iyawemi söpödö i̧sa̧la soinobe. Ja̧ soaja̧ma, ja'yubenö nöinö soinobe, soajemi ödebiyatjö quince litro jenanö a̧jibo jö̧a̧lenanö baibanö, soinobe.

³³ Ikenama iyawemi wame, imi öwaninobe, ja̧danö pakayaso̧nö bulatö, imi wame ubulataja̧ iteba'o öwaninobe.

³⁴ Ikenama, wanajo̧, jojodönö weinobe, —Ojwiyosapja̧, ö'wejemu jawa ö̧pjiya ichejebö, iyawa wamenö tokebaduwo, —jö̧ba̧lö. Weawö̧, ichejebö totjebinobe, ja̧danö ikenama weinobe, —Yemidanö ichejebö tobebaduwi, —jö̧balö. Weawö̧, yemidanö ichejebö totjebinobe, ikenama yemidanö weinobe, —Yemidanö, wapötakwanö baibanö ichejebö tobebaduwi, —jö̧ba̧lö. Weawö̧, wapötakwanö baibanö ojwiyo ichejebö totjebinobe.

³⁵ Jejenö totjebenama, iyawemitjö ojwiyo welachinobe, Elias i̧sa̧la soajena 'su'me baibenanö kabatö.

³⁶ Ja̧danö, jemi ikenama, yi̧benakwö iyajitjenanö jenanö, Dios yöawi̧ yöbawo̧ Eliasma iyawemi yöne ichibö, Diosnö aebinobe: —Chuluwo̧ Isabenö Jo̧, Abrahambi, Isaacbi, Israelbi tjösödinökwe Diosnö, baikwö atebakwö: Babe möleda kwi̧sȩbobö atebakwö, isabenö israel nijitjö Diosbo̧ja jö̧balö, ja̧danö isabenö ökwöda kwömöayo̧sa ötjö Eliasma, jö̧ba̧lö kwi̧sȩbobö atebakwö, ja̧danö babe jabö chi̧sebaja̧ma, ökwöda weköbitjö̧ ja̧bö chi̧sȩbajabe, jö̧ba̧lö kwi̧sȩbobö atebakwö.

³⁷ Jau chuluwo̧ Isabenö Jo̧, atebi̧ kwatadobö atebakwö, bidö jojodö ökwönö tjöwaisakobetjö, ökwö Isabenö Jo̧ma Diosbo̧ja jö̧ba̧lö tjöwaisachibakobetjö̧, ja̧danö yemidanö ökwönö tjösödobö öbibo̧ja, jö̧ba̧lö tjöwaisachibakobetjö̧, —jö̧ba̧lö aebinobe.

³⁸ Jejenö aebenama, Isabenö Jo̧ma mölejebetjö ökwöla weinobe, ja̧danö weaja̧ ökwölama jwiinö ubinö iyawabi, imibi, inawiyabi, nijiso̧pja̧bi, ojwiyobi jwiinö ubinobe, jwiinö baibenanö.

³⁹ Ja̧ baledi̧ edö, jojodöma tjöba nijakwö bȩba̧chibö nijakwö metjinobe, jadanö jwötjeba̧linobe, —Isabenö Jo̧ Diosda, Diosbo̧ma, Isabenö Jo̧ Diosda, Diosbo̧ma, —jö̧ba̧lö Diosnö ösödö jwötjeba̧linobe.

⁴⁰ Ja̧danö, Eliasma jojodönö weinobe, —Okobe deinö Baal yöawi̧ yöbawadönö do̧bataduwi, jobadötjö bakwo̧bi döibapji jö̧ba̧lö, okobe deinö jobadönö do̧bataduwidönö, —jö̧ba̧lö. Weawö̧, jobadönö do̧tja̧tinobe, ja̧danö jemi ikenama Eliasma jobadönö öbibö i̧'yinobe Quison ojwebe, ja̧danö jobe ojwetjö, okobe deinö jobadö Baal yöawi̧ yöbawadönö kwabawö loinobe.

Isabenö Jo̧ ojwiyo o̧bobö weina jawa

⁴¹ Jemi ikenama, Eliasma Acabnö weinobe, —Ida̧ökö ojwiyo labinö o̧bakwa̧ ökwöi̧ cha̧ja̧kwa, jo̧kwajabetjö̧ ba'ali kwukwajo, ja̧danö kwowajo, —jö̧ba̧lö.

⁴² Weökwe, ba'ali ukwobö, ja̧danö owobö i̧'yinobe Acabma, ja̧danö Acab ba'ali ukwonö, Eliasma Carmelo mösa'o wa̧pekwa'obe önöchinobe, ja̧danö nijinö, u̧yu̧kijunö ja̧nö, öba nijakwö, öba u̧yu̧ju̧kijunö waneba̧lö bȩachibinobe, Diosnö abebö.

⁴³ Ja̧danö, Eliasma iteda ömöayo̧nö weinobe, —Jwaibalawa lo̧bekwö kwedobö 'ya̧wi, —jö̧ba̧lö. 'Ya̧nö edajo̧, tjebachajö yöawinobe Eliasnö, —Jwia, chedökö, —jö̧ba̧lö yöawinobe. Yöawökwe, yemidanö edö i̧'yobö weinobe, jelemutjö dötölatajanö baibanö.

⁴⁴ Ja̧danö jelemutjö dötölatajanö edö 'ya̧jo̧, tjeachajenama, Eliasnö yöawinobe, —Ojwiyo'wo ja'yuwa'wo jwaibalawatjö kaamobe chedatö, jojo ömamu ja'yuwi̧danö ja'yuwa'woda chedajabe, —jö̧ba̧lö. Yöawökwe, —Acabnö yöbawaji, –Juluwanö kwitea koluka jawa kwotido, juluwanö a̧ji̧bö kwȩwa̧jakobetjö̧. Jau Acab, juluwanö kwȩwa̧jobö jo̧be, ojwiyo nöinö o̧biökwe, kwejube kwichibobö jwiapji jö̧ba̧lö, —yöawobö weinobe.

⁴⁵ Jemi ikenama ja'yubenö lekwajabetjö, mölejȩma ojwiyotjö jwiinö yȩatibinobe mölejema, ja̧danö jwa̧le'epjo labinö jwa̧le'ewinobe, ja̧danö ojwiyo nöobu o̧binobe. Ja̧danö, ojwiyo o̧biökwe, juluwanö eju comunidad Jezrelbe ö'öbakwawö i̧'yinobe Acabma, kolukanö.

⁴⁶ Jo̧kwaijayonö, juluwanö ö'öakwawijayonö, ö'öakwawi̧tjö bajalekwönönö juluwanö ö'öakwawinobe Eliasma. Juluwanö mebökönö ö'öakwawakobetjö, Eliasma ö̧kamijido̧ di̧atinobe, ja̧danö di̧batajo̧, ö'öakwawinobe Eliasma Jezrelbe. Ja̧danö Isabenö Jo̧ ujuluwachibanö pjaatiökwe, Acab ichibakwa̧ abönö Jezrel comunidadbe ichibinobe Eliasma.