1 Reyes 17 - Dios Iwene

Elias Acabnö yöawina jawa, —Ojwiyo o̧bökakobe, —jö̧ba̧lö

¹ Ja̧danö, Galaad niji comunidad Tisbe jojo Elias mikwo̧ma, Acab öba a'o ichibö yöawinobe: —Israel jojodö tjösödökwe Isabenö Jo̧ Diosma isabenö jo̧, ja̧danö chuluwo Isabenö Jo̧ öba a'o ja̧nö, baikwö yötawakwö Acab, biya o̧biyama, ojwiyo o̧bökakobe, ja̧danö si̧li̧'idö tji'olibi tjoduwökakobe, ötjö Eliasma, –Babe ojwiyo o̧bakobe, –jö̧ba̧lö yötawenanö kabatö, —jö̧ba̧lö Acabnö yöawinobe Eliasma.

² Ikenama, jejenö yöawaja̧ ikenama, Isabenö Jo̧ma iteda yöawi̧ yöawinobe Eliasnö:

³ —Elias, belö Acab ö̧jelö lakebo Jordan ojwe tupakwö jawo̧ laebobekwö, ja̧danö Querit ojwe ö'öbö kwuju̧kwawo.

⁴ Jobe ja̧nö, ojwetjö ojwiyo kwowakwo̧ja, ja̧danö ötjöma bo̧lö̧nö wetajabe, kwukwakwa̧ ökwönö tjichejebobö, —jö̧ba̧lö.

⁵ Yöbawö weökwe, Isabenö Jo̧ yöawaja̧danö i̧'yinobe Eliasma, ja̧danö Jordan ojwetjö jawo̧ laebobekwö lö̧dö Querit ojwe ö'öbö ö̧jinobe.

⁶ Ja̧danö, jobe ö̧jonö, yȩayikwena bo̧lö̧ma panbi, itebiyabi tjichejebinobe, ja̧danö yi̧benakwena panbi, itebiyabi tjichejebinobe, Elias ukwobö, ja̧danö ojwetjö owö ö̧jinobe.

Sarepta jojosuju Eliasnö jiteada̧lina jawa

⁷ Jemi ikenama, israel nijitjö ojwiyo ja'yubebi o̧bokobetjö̧, Querit ojwema kököachibinobe.

⁸ Ja̧danö, ojwe kököachibenama, Isabenö Jo̧ma iteda yöawi̧ yöawinobe Eliasnö,

⁹ —Elias, a̧la̧ibö, Sidon niji comunidad Sarepta comunidadbe kwi̧'yo, ja̧danö jobe kwö̧jo. Jau Elias, jobe ju̧ju, jilekwenö wobekwinuju bakwujunö wetajabe, kwukwakwa̧ jiyobö, —jö̧ba̧lö.

¹⁰ Weökwe, Sareptabe i̧'yinobe Eliasma. Ja̧danö, comunidad apjudebe ichibenama, bakwuju jilekwenö wobekwinujunö edinobe, pjei̧ ö̧'iya imi isakwö ko̧ko̧dujunö. Jobujunö edö jwöinobe Eliasma, —Jojosuju, ökwönö ateba, i̧sa̧yunö ja'yubeda ojwiyo kwichejebobö atebakwö, chowobö, —jö̧ba̧lö.

¹¹ Aeboko, ojwiyo ichejebö ji̧'yinobe, ja̧danö ji̧'yemi ja'ötjö yemidanö jwöinobe, —Jojosuju, ju'wibi pan ja'yubenö kwichejebobö atebakwö, chukwobö, —jö̧ba̧lö.

¹² Aeboko, jatadinobe: —Kwuluwo̧ Isabenö Jo̧ Dios öba a'otjö, isabenö yötawakwö, pan jwibujusa ötjöma. I̧sa̧pjanö, sule ja'yubeda harinaso̧pja junalujusa, ja̧danö o̧tesa̧yunö, sule ja'yubeda o̧tema junalujusa. Jau, babema ja'yubeda pjei̧ ö̧'iya imi ko̧ko̧dö emujusa, ökwöla nötedö, ja̧ ja'yubeda chujuna̧li̧ chöbalobö, ötjöbi, chitji̧bi bajaleapo dukwakwa̧ dukwobö, ja̧danö jemi ikenama, ja kwajadö, du̧kwa jwibö ö'wö badibakwedösa, pan jwita ökwönö ichejebö chiyobö, —jö̧ba̧lö jatadinobe.

¹³ Jatadökwe, Elias yöa̧linobe: —Yebabökönui jojosuju, a̧wi̧chi̧tjö woköbaduwökakwedöja. Yöka̧laja̧danö, ja'yubenö pan kwöbalo. Baikwö wetakwö, ajayinöma pan ja'yuwapja̧ otidaju, ötjönö kwichejebo, chukwobö, ja̧danö jemi ikenama, ökwöbi, kwitji̧bi kwukwaduwakwa̧ kwotido.

¹⁴ Jau jojosuju, a̧wi̧chi̧tjö woköbaduwökakwedöja, israel jojodö tjösödökwe Isabenö Jo̧ Diosma baikwö yöawobetjö̧, –Harinaso̧pja 'dö̧ibökakobe, ja̧danö o̧tebi 'dö̧ibökakobe, Isabenö Jo̧ma yemidanö ojwiyo o̧bobö weenanö kabatö, —jö̧ba̧lö yöbawö weinobe Eliasma.

¹⁵ Weoko, Elias weaja̧danö ja̧jinobe, jadanö jobujubi, Eliasbi, ju'wedö jejunö ju̧kwadöbi, okobe deinö ja̧ jujuna̧litjö lekwe möle tjukwinobe.

¹⁶ Ja̧danö, Isabenö Jo̧ Eliasnötjö̧ yöawinadanö, lekwe möle tjukwonö, harinasopja̧ 'dö̧ibajinokobe, ja̧danö o̧tebi 'dö̧ibajinokobe.

Elias jilekwe wobekwinuju jitji̧nö woawatjö tjeatajina jawa

¹⁷ Jemi ikenama, ja̧ baledaja̧ ikenama, jobuju, o̧do luwuju jitji̧ 'dö̧achinobe, nöinö 'dö̧achinobe, ja̧danö ö'wö baibinobe tjemuma.

¹⁸ Jejenö ö'wö baibioko, Eliasnö yöja̧linobe, —Ökwö Dios ömöayo̧ma, tajawedö ötjönö suli̧ kwöwaedaja̧da? Sulabenö ja̧tinobetjö̧, ja̧ sulabenö ja̧tina i̧sȩbö, ötjönö lȩbebö chitji̧ ö'wö baibobö weköbaji̧? —jö̧ba̧lö.

¹⁹ Yöja̧lökwe, jobujunö atadö weinobe, —Kwitji̧nö iyitjö, —jö̧ba̧lö. Ja̧danö, ja̧pjö̧alökwe jitji̧nö emibö, mösȩko̧ ö̧lȩko̧be nöchö e'ewinobe tjemunö, ja̧danö iteda itea camapjonö öwaninobe.

²⁰ Ikenama, wanajo̧, Isabenö Jo̧nö jwöbö aebinobe, —Chuluwo̧ Isabenö Jo̧ Dios, beju jojosuju ötjönö teada̧lö, jejunö chö̧jobö iyujunö, tajawedö usula jemawi̧nö, jitji̧nö kwabö loköbaja̧da? —jö̧ba̧lö.

²¹ Ikenama, wapötakwanö tjemu öwame öwamatinobe Eliasma, ja̧danö Isabenö Jo̧nö aebinobe, —Chuluwo̧ Isabenö Jo̧ Dios, atebakwö, bite tjemu ö̧ji̧ma, yemidanö 'yaba̧lo̧ baibanö tjekatajobö atebakwö, —jö̧ba̧lö.

²² Jejenö aebökwe, Isabenö Jo̧ma Elias aebi̧ a̧ja̧kwinobe, ja̧danö tjemuma woawatjö tjeachajinobe.

²³ Ikenama Eliasma tjemunö öbibö mösȩko̧tjö yutuajinobe, nijibesȩkobe, jadanö ojo'donö iyö yöa̧linobe, —Edi jojosuju, 'yaba̧lo̧ kwitji̧ma, —jö̧balö.

²⁴ Jejenö iyoko yöja̧linobe Eliasnö, —Babema chöwaisa, isabenö Dios ömöayo̧ja ökwöma, ja̧danö ju'wibi chöwaisa, ökwö yökawi̧ma, Isabenö Jo̧ yöawi̧da yöbawo̧ja, —jö̧ba̧lö yöja̧linobe.