1 Reyes 16 - Dios Iwene

¹ Ja̧danö, jo̧ba Basama israel la'aka luwo̧ ö̧jonö, Isabenö Jo̧ma iteda yöawi̧ weinobe Janani itji̧ Jehu mikwo̧nö, Basanö lȩebakwa̧ wenema, ja̧danö yöawajökwe, Jehuma Basanö yöawinobe.

² Baikwö laebobe Isabenö Jo̧ Basanö yöa̧li̧ma: —Basa, ökwöma mikwawö̧kö̧ nijiso̧pja bo̧ kwö̧jinajayonö, ötjö Isabenö Jo̧ma ökwönö kabebö chujunijatö, chömöledö israel jojodötjö inesö la'aka luwo̧ bakibanö, jö̧tö? Jejenö kabebö chujuniökwe, ötjönö ösödö, ötiwanö israel jojodönö jwekebobö jö̧ka̧linobe Basa, jo̧kwaijayonö sulabenö Jeroboan ja̧inadanö ja̧köbajabe, ja̧danö jo̧ba ja̧inadanö chömöledö israel jojodö sulabenö ja̧tjobö weköbajabe. Jejenö chömöledö sulabenö ja̧tjobö weköbi̧ma, jwiinö chödameakwinö ja̧köbajabe Basa,

³ jadanö jejenö chödameakwobetjö̧, ökwöla jwiinö ubö loi̧danö, jwiinö ökwö Basanö söbebö lotakwo̧sa ökwönöbi, kwömöledönöbi. Jau Basa, Jeroboan ömöledönö baledinadanö, ökwö kwömöledönöbi baledobö wetakwo̧sa, baikwö yöta̧la:

⁴ Basa ömöledönö otiwanö o̧tjöma o̧tjökakwedö, comunidad okwatjö Basa ömöledötjö ö'wö babibajadönö, a̧wi̧lidö tjukwakwawö̧, ja̧danö mejenö ö'wö babibajadönö, mö kö̧ba̧ladö bo̧lö̧ tjukwakwawö̧, —jö̧ba̧lö Isabenö Jo̧ yöawi̧ yöawinobe Jehuma.

⁵ Jobekwö ja'yubenö laebobe Basa webö ö̧jina wenema. Ju'wibi nöinö ja̧bö ö̧jinobe Basama, jadanö ja̧ otidina wenebi, ujulu i̧sȩbina wenebi, Israel jojodö la'aka tjuluwedö tjö̧jina wȩyukwa'ye mikwa'yenö laebobe.

⁶ Ja̧danö, Basama ö'wö baibinobe, ja̧danö ö'wö babibajo̧nö tjo̧tjinobe Tirsa comunidadnö. Ja̧danö, la'aka luwo̧ ö̧jinemi, Basa itji̧ Elama inesö la'aka luwo̧ baibinobe.

⁷ Jwiinö sulabenö ja̧bö ö̧jinobe Basama, Isabenö Jo̧ jwiinö jo̧banö ödameakwawenanö baibanö. Isabenö Jo̧ öba a'otjö Basa sulabenö jaina wenema, baikwö laebobe: Jwaikwöda Jeroboanbi, Jeroboan ömöledöbi sulabenö ja̧bö tjö̧jinadanö, bakwainö sulabenö ja̧inobe Basama, ja̧danö ju'wibi, lȩlöinö edökönö, okobe deinö Jeroboan ömöledönö kwabawö loinobe Basama. Jejenö sulabenö jaiökwe, jwiinö jo̧banö ödameakwinobe Isabenö Jo̧ma, ja̧danö iteda yöawi̧ yöawinobe iteda yöawi̧ yöbawo̧ Jehu mikwo̧nö, —Basa sulabenö jabö ö̧jinobetjö̧, Basanöbi, ömöledönöbi lȩebakwo̧ Isabenö Jo̧ma, —jö̧ba̧lö.

Ela Israel la'aka luwo̧ ö̧jina jawa

⁸ Juda la'aka luwo̧ Asa ida̧ökö veintiseis o̧biya baledibanö la'aka luwo̧ ö̧jenama, Basa itji̧ Ela mikwo̧ma Israel la'aka luwo̧ baibinobe, jadanö Tirsa comunidadnö ja̧nö, dötölataja o̧biya baledibanö Israel jojodönö webö ö̧jinobe Elama.

⁹ Jemi ikenama, ömöayo̧ Zimri mikwo̧ma uluwo̧ Elanö kwabö loobö omukwatö ujuninobe. Ela ömöayedö kolukiyanö ölakwabikwawajadö tjuluwedö la'aka luwedöma duju̧taja tjö̧jinobe, Zimri mikwo̧ma jobadötjö ja'ö la'aka luwo̧ ö̧jinobe, ja̧danö jelo̧ ju'wedönö webö ö̧jinobe. Ja̧danö, baikwö laebobe Zimri Elanö kwabö loina wenema. Ju'wi möle Elama iteda ömöayo̧, eju teada̧lakwawa luwo̧ Arsa mikwo̧ ejunö ö̧jinobe, ja̧danö Arsa ejunö ja̧nö, nöinö o̧walinobe Elama, jwiinö 'dukwachökwe baibanö.

¹⁰ Ja̧danö, jejenö o̧walemi ja'ötjö, Zimrima o̧do okwa tebachö, Elanö kwabö loinobe, ja̧danö jo̧banö kwabö lobajo̧, la'aka luwo̧ ö̧jinemi la'aka luwo baibinobe Zimrima. Ja̧ baledina mölema, Juda la'aka luwo̧ Asa ida̧ökö veintisiete o̧biya la'aka luwo̧ ö̧jena baledinobe.

¹¹ Ja̧danö, la'aka luwo̧ babibö, inesö la'aka luwo̧ iteakanö öbamatenama, juluwanö okobe deinö Basa ömöledönö kwabawö loinobe Zimrima. Bakwo̧bi deinö, okobe deinö Basa yö̧ne ömöledötjö ömadö damönöbi, tjemunöbi, itji̧mu tupadanö jojodönöbi, ju'wedö yöne ömöledönöbi, ju'wedö ömöledönöbi kwabawö loinobe.

^12-13 Ja̧ jobadönö kwabawö loinama, Dios yöawi̧ yöbawo̧ Jehu yöawinadanö baledinobe. Isabenö Jo̧ iteda yöawi̧ yöawajökwe, Basanö lȩebakwa wene yöawinobe Jehuma, —Basabi, itji̧ Elabi, jwiinö sulabenö jabö tjö̧jajabe, ja̧danö israel jojodönö sulabenö ja̧tjobö wetjajabe. Idöda tjösödawö̧, o̧'wo jawa mikwawöködönö sulabenö tjösödobetjö̧, Israel jojodö tjösödökwe Isabenö Jo̧ Dios ödameakwobö sulabenö jatja̧jabe, jo̧kwajabetjö̧ tjömöledö deinö batjibanö jobadönö lȩebakwo̧, —jö̧ba̧lö yöawinobe Jehuma, ja̧danö yöawinadanö Zimrima jobadönö kwabawö loinobe.

¹⁴ Jobekwö ja'yubenö laebobe Ela la'aka luwo̧ ö̧jina wenema, ja̧danö okobe jwiinö ju'wi Ela otidina jawama, Israel jojodö la'aka tjuluwedö tjö̧jina wȩyukwa'yenö laebobe.

Zimri israel la'aka luwo̧ ö̧jina jawa

¹⁵ Juda la'aka luwo Asa ida̧ökö veintisiete o̧biya baledibanö la'aka luwo̧ ö̧jenama, Zimrima Israel la'aka luwo̧ baibinobe. Jadanö, Tirsa comunidadtjö webö ö̧jinobe Zimrima, jo̧kwaijayonö sule jelemutjö dötölataja möle baledibanö webö ö̧jinobe. Zimri uluwo Elanö kwabö lobajo̧, la'aka luwo̧ baibenama, israel jojodötjö ölakwabikwawa jojodöma Filisteo jojodö tjitebo comunidad Guibetontjö ölakwabikwawö tjö̧jinobe.

¹⁶ Ja̧danö, jobe tjö̧jemi ja'ötjö, yötjawi̧ tja̧ja̧kwinobe, Zimrima la'aka duluwo̧ Elanö sulabenö jaobö omukwatajo̧, jo̧banö kwabö loajabeta, jö̧ba̧lö tja̧ja̧kwinobe. Ja̧danö, jejenö a̧ja̧kwajadö, i̧ya̧da möle tjölakwabikwawelö okobe deinö jobe ju̧kwadö israel jojodöma, ölakwabikwawa jojodötjö la'aka luwo̧ Omrinö omudawö tjujuninobe, israel jojodötjö inesö la'aka luwo̧ baibanö.

¹⁷ Jemi ikenama Omribi, okobe deinö israel jojodötjö ölakwabikwawa jojodöbi Guibetontjö labebö, Tirsa comunidadbe tji'yinobe, ja̧danö Tirsa comunidad tjötjösawinobe, Zimrinö tjujuluwobö.

¹⁸ Jejenö balediökwe, Zimrima edö öwaisachibinobe, chöpöjojo Omrima chitebo Tirsa comunidad ujuluwajabe, jö̧ba̧lö, jokwajabetjö̧ inesö la'aka luwo̧ eju okwa, 'diinö tjöekwemi okwa tebachö, o̧do juwö lobö, itedada juwawö loinobe.

¹⁹ Jobekwö Zimrinö baledobö weinobe Isabenö Jo̧ma, Zimri Isabenö Jo̧ öba a'otjö sulabenö jai̧nobetjö̧. Jau, Jeroboan sulabenö jainadanö baikwainö sulabenö jainobe Zimrima, ja̧danö jo̧babi Israel jojodönö weinobe, sulabenö ja̧bö tjö̧jobö.

²⁰ Jobekwö ja'yubenö laebobe Zimri la'aka luwo̧ ö̧jina wenema, ja̧danö okobe jwiinö ju'wi Zimri luwo̧ ö̧jena baledina jawabi, uluwo̧nö kwabö loina wenebi, Israel jojodö la'aka tjuluwedö tjö̧jina wȩyukwa'yenö laebobe.

Omri Israel la'aka luwo̧ ö̧jina jawa

²¹ Ja̧ möle, Ela ö'wö baibaja̧ ikenama, israel jojodötjö ja'öma, Guinat itji̧ Tibni mikwo̧nö tjösödinobe, —Tibnida inesö la'aka duluwo̧ ö̧jobö jo̧be, —jö̧ba̧lö. Ja̧danö ja'öma Omrinö tjösödinobe, —Omrida inesö la'aka duluwo̧ ö̧jobö jo̧be, —jö̧ba̧lö.

²² Jejenö wainökwena omukwatö, Tibninö ösödadökwö, Omrinö ösödadökwö tjölakwabikwawinobe, ja̧danö tjölakwabikwawenama, Omrinö ösödadöma Tibninö ösödadönö tjujuluwinobe, ja̧danö Tibninö kwabö lotjinobe. Jemi ikenama, okobe deinö Israel jojodötjö inesö la'aka luwo̧ baibinobe Omrima.

²³ Juda la'aka luwo Asa ida̧ökö treinta y uno o̧biya baledibanö la'aka luwo̧ ö̧jenama, Omrima okobe deinö Israel jojodötjö la'aka luwo̧ baibinobe, ja̧danö a̧linösamutjö dötölataja o̧biya baledibanö israel jojodönö webö ö̧jinobe. Jelemutjö bakwaba o̧biya baledibanö, Tirsa comunidadtjö webö ö̧jinobe Omrima.

²⁴ Jemi ikenama, Samaria mösa'o midö eminobe Omrima, ja̧danö emajo̧, ja'otjö iteda webö ö̧jemi comunidad otidinobe. Ajayinö ja̧'oma, Semer mikwo̧ itea'o mösa'o ji̧nobe, jadanö Omrima jo̧banö platatjö sesenta y seis kilo imidinobe, iteda itea mösa'o baibakobetjö̧. Ja̧danö, comunidad otidenama, mösa'o ajayi luwo̧ Semer mikwo̧ iminö imidinobe otidaja̧ comunidad, Samaria jö̧ba̧lö.

²⁵ Isabenö Jo̧ öba a'otjö, isabenö jwiinö sulabenö ja̧bö ö̧jinobe Omrima. Okobe deinö jo̧batjö ajayinö ji̧nadö la'aka luwedö sulabenö ja̧tjitjö̧ bajalekwönönö jwiinö sulabenö jainobe Omrima.

²⁶ Okobe jwiinö Jeroboan sulabenö jainadanö, Omribi sulabenö jabö ö̧jinobe, ja̧danö ömöayedö israel jojodönö sulabenö ja̧tjobö weinobe Omrima. Sulabenö ja̧tjobö Omri wei̧danö, israel jojodöma idöda tjösödawö̧ mikwawöködö o̧'wo jawanö ösödö tjö̧jinobe, ja̧danö jejenö o̧'wo jawanö sulabenö ösödö, Israel jojodö tjösödökwe Isabenö Jo̧ Dios ödameakwobö ja̧tjinobe.

²⁷ Jobekwö ja'yubenö laebobe Omri webö ö̧jina wenema. Ju'wibi nöinö ja̧bö ö̧jinobe Omrima, jadanö ja̧ otidina wenebi, ujulu i̧sȩbina wenebi, Israel jojodö la'aka tjuluwedö tjö̧jina wȩyukwa'ye mikwa'yenö laebobe.

²⁸ Ja̧danö, Omrima ö'wö baibinobe, ja̧danö ö'wö babibajo̧nö tjo̧tjinobe, Samaria comunidadtjö. Ja̧danö, Omri la'aka luwo̧ ö̧jinemi, itji̧ Acabma Israel inesö la'aka luwo̧ baibinobe.

Acab Israel la'aka luwo̧ ö̧jina jawa

²⁹ Juda la'aka luwo Asa ida̧ökö treinta y ocho o̧biya baledibanö la'aka luwo̧ ö̧jenama, Omri itji̧ Acabma Israel la'aka luwo̧ baibinobe, ja̧danö veintidos o̧biya baledibanö, Samarianö janö, israel jojodönö webö ö̧jinobe Acabma.

³⁰ Jwiinö sulabenö ja̧bö ö̧jinobe Acabma, Isabenö Jo̧ öba a'otjö, okobe deinö jo̧batjö ajayinö ji̧nadö la'aka luwedö sulabenö ja̧tjinemi bajalekwönönö sulabenö ja̧inobe.

³¹ Jeroboan sulabenö ja̧i̧nadanö sulabenö jainobe Acabma, jo̧kwaijayonö ja̧damaökö, jemi bajalekwönönö jwiinö sulabenö jainobe Acabma, Jeroboan sulabenö jainama, sule ja'yubeda sulabenö jainobedanö ichejekwenanö baibanö. Baikwö laebobe Acab inesö sulabenö jaina wenema: Acabma sidonio jojodötjö la'aka luwo̧ Et Baal mikwo̧ itjiju Jezabel mikwujunö eminobe, ja̧danö jobujunö emajo̧, Acabma o̧'wo jawa tjösödökwe Baal wei̧ ja̧bö ö̧jobö isakwinobe, ja̧danö Baalnö bȩbachibö ösödinobe.

³² Baalnö ösödö, Baalnö ösödakwaweju otidinobe Samaria comunidadtjö, ja̧danö jejutjö Baalnö iyawötebi jobe otidinobe.

³³ Ju'wibi tjösödoko Asera ötjaboko jo̧'wo jawa otidö ösödinobe Acabma. Jobekwö jwiinö sulabenö ja̧bö ö̧jinobe Acabma, Isabenö Jo̧ jwiinö ödameakwawenanö baibanö. Acabtjö ajayinö ji̧nadö Israel la'aka luwedöbinadöma, Israel jojodö tjösödökwe Isabenö Jo̧ Dios ödameakwobö ja̧tjinobe, jo̧kwaijayonö okobe deinö jobadö ja̧tjinemi bajalekwönönö, Isabenö Jo̧ jwiinö ödameakwobö sulabenö ja̧inobe Acabda.

³⁴ Ja̧danö ju'wibi baledinobe Acab la'aka luwo̧ ö̧jenama. Damötjö, israel jojodö ajayinö tjitebo niji tebachö, Jerico comunidad söbebö lotjenama, Josue yöawinobe, —Bemi comunidad la'akatjöda tjotidobö jwiobe, baikwö yötawa: Bemi comunidad yemidanö tjotiditjö̧ma, otidakwo̧ comunidad la'aka jamatö otidenama, iteda itji̧ abönö pöema ö'wö baibakobe, ja̧danö otidö kabatö comunidad apjude ujunenama, itji̧ bajaleapo jojo ö'wö baibakobe, —jö̧ba̧lö. Ja̧danö, Acab luwo̧ ö̧jena, Betel comunidad jojo Jiel mikwo̧ma yemidanö otidinobe Jerico comunidadma, ja̧danö otidenama, Josue yöawinadanö badekwachinobe. Comunidad la'aka otidenama, Jiel itji̧ abönö pöe Abiran mikwo̧ma ö'wö baibinobe, ja̧danö otidö kabatö comunidad apjude ujunenama, Jiel itji bajaleapo jojo Segub mikwo̧ma ö'wö baibinobe, Josue damötjö lȩbebö yöawinadanö.