1 Reyes 15 - Dios Iwene

Abias Juda niji la'aka luwo̧ ö̧jina jawa

¹ Abe'do Roboan ö'wö baibaja̧ ikenama, Abias mikwo̧ma Juda niji la'aka luwo̧ baibinobe. Abias la'aka luwo̧ baibina mölema, baikwö laebobe: Nebat itji̧ Jeroboan Israel niji la'aka luwo̧ ö̧jayi, dieciocho o̧biya baledibanö ida̧ökö Israel luwo̧ ö̧jaja̧ ikenama, Juda niji la'aka luwo̧ baibinobe Abiasma.

² Jo̧ba Abias ojo'doma, Abisalon itjiju Maca mikwuju. Ja̧danö, la'aka luwo̧ babibajo̧, Jerusalentjö wapöbakwa o̧biya baledibanö Juda jojodönö webö ö̧jinobe.

³ Abias ö̧jinama, abe'do Roboan sulabenö ja̧inadanö sulabenö jainobe. A'dö David jwaikwöda ösödökwe Isabenö Jo̧ Diosnö ösödö ö̧jinadanöma ja̧bö ö̧jinokobe Abiasma.

⁴ Jo̧kwaijayonö, sulabenö ja̧bö ö̧jinajayonö, a'dömine Davidnö omukwatö, jo̧banö söbebö loinokobe Isabenö Jo̧ma. Sulabenö ja̧bö ö̧jijayonö, yayonö ö'wö baibaja̧ ikenama itji̧mu tupadanö jojodö ina Jerusalentjö luwedö tjö̧jobö weinobe, jadanö ju'wibi Jerusalen comunidad tjöbeba̧lö pjaatinobe Diosma, tjöpöjojodö söbebö lotjapji jö̧ba̧lö.

⁵ Abias a'dö Davidma, jwaikwöda Isabenö Jo̧ ösödi̧danö ja̧bö ö̧jinobe, jalachibökönö, ina 'ya̧a̧layima, jwaikwöda Isabenö Jo̧ wei̧ ja̧obö isakwinobe Davidma, sule bakwötanöda Dios weina a̧ja̧kwökönö jainobe Davidma, hitita jojo Urias ilekwo sulabenö 'döbebö emenama. Ju'wi David ja̧bö ö̧ji̧ma, jwaikwöda Isabenö Jo̧ wei̧ a̧ja̧kwö ö̧jinobe, ja̧danö jejenö a̧ja̧kwö ö̧jiökwe, ö̧'dö̧ Abiasnöbi lȩlö̧jinö edinobe Diosma.

⁶ Abias Juda la'aka luwo̧ ö̧jayima, ba̧kwelöjatebö israel la'aka luwo̧ Jeroboankwö ölakwabikwawö ö̧jinobe, ö'wö baibenanö kabatö.

⁷ Jobekwö laebobe Abias ja̧bö ö̧jina wȩyukwa'yema, ja̧danö ju'wibi nöinö ja̧inobe Abiasma. Okobe jwiinö ja ju'wi Abias ja̧bö ö̧jina wenema, jele'yenö laebobe, Juda jojodö la'aka tjuluwedö tjö̧jina wȩyukwa'ye mikwa'yenö laebobe. Abiasbi, Jeroboanbi ba̧kwelöjatebö ölakwabikwawö tjö̧jinobe,

⁸ ja̧danö Abiasma ö'wö baibinobe, ja̧danö ö'wö babibajo̧nö tjo̧tjinobe, David itebo comunidad ötjabena. Ja̧danö, Abias ö'wö baibaja̧ ikenama, ö̧jinemi itji̧ Asa mikwo̧ma Juda jojodötjö inesö la'aka luwo̧ baibinobe.

Asa Juda niji la'aka luwo̧ ö̧jina jawa

⁹ Jeroboan Israel la'aka luwo̧ ö̧jayi, ida̧ökö veinte o̧biya baledibanö la'aka luwo̧ ö̧jenama, Juda niji la'aka luwo̧ baibinobe Asama,

¹⁰ ja̧danö cuarenta y un o̧biya baledibanö, Jerusalen comunidadtjö webö ö̧jinobe. Asa a̧'do̧ma, Abisalon itjiju Maca mikwuju.

¹¹ Asa ja̧bö ö̧jinama, Isabenö Jo̧ ösödi̧ jawa ja̧bö ö̧jinobe, a'dö David Isabenö Jo̧ ösödi̧ jawa ja̧bö ö̧jinadanö.

¹² Dios ösödi̧danö jabö, Asama ösödakwawejubiyatjö ömadö 'da̧'da̧bakwawö otidadönö a'dewö loinobe, jadanö okobe jwiinö a'dödö o̧'wo jawa tjotidinawö̧nöbi söbebö loinobe.

¹³ Ju'wibi, Asa a̧'do̧ Maca mikwujuma ajayinö la'aka luwuju jö̧jinajayonö, inesö la'aka luwuju jö̧jemitjö jwibatö ujuninobe Macanö, inesö suli̧ jawa, tjösödoko Asera mikwujunö ösödakwawa'o sulabenö jotidinobetjö̧. Ja̧danö, ju'wibi jotidina Aseranö ösödakwawa'o jubö loinobe Asama, jadanö jubö lobajo̧, Cedron wabekotjö juwö loinobe.

¹⁴ Ja̧ jawa otiwanö söbebö loijayonö, okobe jwiinö möemitenia tjösödawö̧nö ösödakwawemitenia söbebö loinokobe Asama. Jo̧kwaijayonö, ja̧ jawa söbebö loinököjayonö, ina 'ya̧ba̧lö ö̧jayi, okobe jwiinö omajadenö jwaikwöda Isabenö Jo̧nö ösödö ö̧jinobe Asama, otiwanö.

¹⁵ Ja̧danö, Diosnö ösödö, abe'do 'da̧batö ujunina jawama Isabenö Jo̧ eju okwa teatinobe, Isabenö Jo̧ itea baibanö, ja̧danö iteda 'da̧batö ujunaja̧ jawa Dios ejunö teatinobe Asama, plata jawabi, oro jawabi, ju'wi dȩja̧piya jawabi.

Asa Israel la'aka luwo̧ Basakwö ölakwabikwawina wene

¹⁶ Juda niji la'aka luwo̧ Asabi, Israel niji la'aka luwo̧ Basabi kabatökönö ölakwabikwawö tjö̧jinobe.

¹⁷ Ju'wi möle Israel la'aka luwo̧ Basama Juda niji mebibö, Rama comunidad ujuluwinobe, ja̧danö juluwajo̧, Rama comunidad tjöbebö otidinobe, iteda ömöayedö ölakwabikwawa jojodö jobe ja̧nö tjötjeba̧lakobetjö̧. Jobe Ramatjö tjötjeba̧lobö jö̧a̧linobe, jojodö Juda la'aka luwo̧ Asa itebobe tetjachapji jö̧ba̧lö, ja̧danö Asa itebonö ju̧kwadö jobetjö latjebapji jö̧ba̧lö, jobe tjötjeba̧lobö weinobe.

¹⁸ Jejenö balediökwe, baikwö ja̧inobe Asama, iteda eju lödawȩko̧ okwa ji̧ orobi, platabi o̧ko̧kodinobe, jadanö okobe jwiinö Isabenö Jo̧ eju lödawȩko̧ ji̧ orobi, platabi o̧ko̧kodinobe, jadanö ko̧ko̧dajo̧ iteda ömöayedönö iyö weinobe, e'ewö tji̧'yobö Damasco comunidadbe, Siria niji la'aka luwo̧ Ben Adad itebo comunidadbe, jadanö ichibajadö, la'aka luwo̧ Ben Adadnö iyö Asa yöa̧li̧ jo̧banö yötja̧lobö baikwö:

¹⁹ —Chömöledöso̧ Ben Adad, ökwö kwabe'dobi, ötjö chabe'dobi, bakobe pjabatakwawö tjö̧jakwa̧ wene yöbawö tjujuninobe, jö̧tö? Ökwödöbi bakobe pjabatakwawö dö̧jobö chösöda chömöledöso̧, jo̧kwajabetjö bi̧ya platabi, orobi ökwönö iyawa baibanö chiyakwö. Jau chömöledöso̧, ökwönö ateba, Israel la'aka luwo̧ Basakwö yöbawö kwujunina kabatibö, otiwanö ötjönö pjakatobö, Basama ötjönö ölakwabikwawobetjö̧. Jau chömöledöso̧, Basanö mebibö kwölakwabikwawobö atebakwö, meköbiökwe ötjö chitebotjö labebö ȩwa̧jakobetjö̧, —jö̧ba̧lö yöa̧li̧ yöbawö, Ben Adadnö tjiyobö weinobe.

²⁰ La'aka luwo̧ Asa jejenö iyö yöa̧liökwe, a̧jakwinobe Ben Adadma, jo̧kwajabetjö̧ iteda ömöayedö ölakwabikwawa jojodötjö luwedönö weinobe, Israel niji mebibö tjölakwabikwawobö. Ja̧danö, jejenö tjölakwabikwawenama, Iyon comunidadbi, Dan comunidadbi, Abel Betmaca comunidadbi, okobe jwiinö Quineret nijibe, okobe jwiinö Neftalisaso nijibi tjujuluwinobe.

²¹ Rama comunidadnö ja̧nö, ja̧ baledaja̧ wene a̧ja̧kwinobe Basama, ja̧danö a̧ja̧kwenama, Rama comunidad tjöbebö otidi̧ kaatibinobe, ja̧danö jobetjö labebö, itebo comunidad Tirsabe ȩwa̧jinobe, ja̧danö jobe Tirsanö ö̧jinobe.

²² Basa jejenö ȩwa̧jiökwe, Asama weinobe okobe deinö Juda jojodönö, bakwobi ö̧ji̧bökönö, okobe deinö Rama comunidadbe tji̧'yobö, Rama comunidad tjöbebö tjotidina jawa inawiyabi, towi okwi'ijubi 'döbebö tje'ewobö. Ja̧danö, ja̧ 'döbebö tje'ewaja̧ jawanö, Benjaminsaso comunidad Guebabi, Mizpa comunidadbi 'diinö tjöbebö tjotidinobe.

²³ Jobekwö laebobe la'aka luwo̧ Asa webö ö̧jina wene, ja̧danö ju'wibi nöinö ja̧bö ö̧jinobe Asama. Okobe jwiinö ju'wi Asa ö̧jina wene, ujulu i̧sȩbina wenebi, ja̧bö ö̧jina wenebi, comunidadbiya otidinabi jele'yenö laebobe, Juda jojodö la'aka tjuluwedö tjö̧jina wȩyukwa'ye mikwa'yenö laebobe. Nöinö ja̧bö ö̧jinobe Asama, jokwaijayonö pöe waekwenama, ömasapiya nöinö 'dö̧a̧chinobe.

²⁴ Jemi ikenama, Asama ö'wö baibinobe, ja̧danö ö'wö babibajo̧nö tjo̧tjinobe a'dödökwö, a'dö David itebo comunidad ötjabena. Ja̧danö, la'aka luwo̧ ö̧binemi, Asa itji̧ Josafat mikwo̧ la'aka luwo̧ baibinobe.

Nadab mikwo̧ Israel niji la'aka luwo̧ ö̧jina jawa

²⁵ Jeroboan ö'wö baibaja̧ ikenama, itji̧ Nadabma Israel niji la'aka luwo̧ baibinobe. Juda niji la'aka luwo̧ Asa ida̧ökö dötölataja o̧biya baledibanö la'aka luwo̧ ö̧jenama, la'aka luwo̧ baibinobe Nadabma, ja̧danö dötölataja o̧biya baledibanö israel jojodönö webö ö̧jinobe.

²⁶ Jo̧ba Nadabma sulabenö ja̧bö ö̧jinobe, Isabenö Jo̧ öba a'otjöma, iteda abe'do sulabenö ja̧bö ö̧jinadanö, jobabi sulabenö ja̧inobe, ja̧danö ju'wibi abe'do sulabenö jainadanö, ömöayedö israel jojodönö sulabenö ja̧tjobö weinobe.

²⁷ Ja̧danö, Isacarsaso jojo bakwo̧, Ahias itji̧ Basa mikwo̧ma, omukwatö ujuninobe, Nadabnö suli̧ öwaedakwa̧ma, ja̧danö omukwatö ujunaja̧danö, Nadabnö kwabö loinobe. Baikwö baledinobe Nadabnö kwabö loinama: Nadabbi, okobe deinö ömöayedö ölakwabikwawa jojodöbi, Filisteo jojodökwö tjölakwabikwawinobe, ja̧danö filisteo jojodö tjitebo comunidad Guibeton tjujuluwotö jö̧ba̧lö, tjösawibö tjö̧jinobe. Ja̧danö, jejenö tjösawö tjö̧jemi ja'ötjö, Basama Nadabnö kwabö loinobe,

²⁸ ja̧danö kwabö lobajo̧, Nadab ö̧binemi Basada la'aka luwo̧ baibinobe. Ja̧ baledina mölema, Juda la'aka luwo̧ Asa ida̧ökö wapötakwa o̧biya la'aka luwo̧ ö̧jaja̧ ikenama baledinobe.

^29-30 Ja̧danö, inesö la'aka luwo̧ baibaja̧ ikenama, juluwanö okobe deinö Jeroboan ömöledönö kwabawö loinobe Basama, okobe deinö Jeroboan ömöledötjö ina 'yaba̧ladönö kwabawö loinobe, ji̧bo̧ bakwo̧bi deinö. Ja̧danö, ja̧ jobadönö kwabawö loinama, Dios yöawi̧ yöbawo̧, Silonita jojo Ahias yöawinadanö baledinobe. Jeroboanma jwiinö sulabenö ja̧bö ö̧jinobe, ja̧danö ju'wibi, ömöayedö Israel jojodönö sulabenö ja̧tjobö weinobe, isabenö jwaikwöda Israel jojodö tjösödökwe Isabenö Jo̧ Dios öpöjödi̧ jawa sulabenö ja̧inobe, Isabenö Jo̧ma jwiinö Jeroboannö ödameakwawenanö baibanö. Ja̧danö, jejenö sulabenö ja̧iökwe, Jeroboannö lȩbebö Isabenö Jo̧ma weinobe, okobe deinö Jeroboan ömöledönö Basa kwabawö loobö.

³¹ Jobekwö laebobe Nadab ö̧jina wenema. Ju'wibi nöinö ja̧inobe Nadabma, jadanö ja̧ jabö ö̧jina wenema, Israel jojodö la'aka tjuluwedö tjö̧jina wȩyukwa'ye mikwa'yenö laebobe.

Basa israel niji la'aka luwo̧ ö̧jina wene

^32-33 Juda niji la'aka luwo̧ Asa ida̧ökö wapötakwa o̧biya baledibanö la'aka luwo̧ ö̧jenama, Ahias itji̧ Basa mikwo̧ma Israel niji la'aka luwo̧ baibinobe, ja̧danö Tirsa comunidadnö ja̧nö, veinticuatro o̧biya baledibanö israel jojodönö webö ö̧jinobe. Ja̧danö, Basama israel niji la'aka luwo̧ öjonö, kabatökönö Juda la'aka luwo̧ Asakwö ölakwabikwawö ö̧jinobe.

³⁴ Ja̧danö, Isabenö Jo̧ öba a'otjö sulabenö ja̧bö ö̧jinobe Basama, Jeroboan ja̧bö ö̧jinadanö sulabenö ja̧inobe, ja̧danö ju'wibi Jeroboan ja̧inadanö, Basabi israel jojodö sulabenö ja̧tjobö weinobe.