1 Reyes 14 - Dios Iwene

Jeroboan itji̧ ö'wö baibina wene

¹ Ja̧danö, ja möle jenanö, Jeroboan itji̧ Abias mikwo̧ma nöinö 'dö̧a̧chinobe.

² Jejenö 'dö̧achiökwe, iteda ilekwonö weinobe Jeroboanma, —Jelujudanö jöbabiyawinö otikwi, ötjö Jeroboan chilekwo kwö̧ji̧ öwawökakobetjö̧. Ikenama, Silo comunidadbe kwi̧'yo, Dios yöawi̧ yöbawo̧ Ahiasnö abebö kwa̧ja̧kwobö. Jau chilekwo, damötjö̧ Dios yöawi̧ yöbawo̧ Ahiasda bemi niji la'aka luwo̧ batibakwa̧ yöbawinama, ja̧danö jo̧bama Silo comunidadnö ö̧jobe, jokwajabetjö̧ jobe abebö kwi̧'yo.

³ Ja̧danö, jobe kwi̧'yenama, pan öpji̧ya domulataja jawa ö̧pji̧yabi, pjei̧ tortabiyabi, wayo̧sa̧yubi e'ewö, jo̧banö iyö kwi̧'yo. Ja̧danö, abebö a̧ja̧kwö kwichiökwe, Ahiasma ökwönö yöawakwo̧, tjemunö baledakwa̧ wenema, —jö̧ba̧lö weinobe Jeroboanma.

⁴ Weoko, jilekwe weaja̧danö ja̧jinobe Jeroboan ilekwoma, ja̧danö Silo comunidadbe ji̧'yinobe, Ahias ejube. Ja̧ möle Ahiasma jwiinö pöe ö̧jinobe, jadanö jwiinö pöe ö̧jobetjö̧, ida̧ökö öbajale tjewawo̧ ö̧jinobe.

⁵ Jo̧kwaijayonö, jobujunö edö öwaisobö jwiijayonö, jichibakwa̧ abönö Isabenö Jo̧ma Ahiasnö yöawinobe, —Ahias, Jeroboan ilekwoma baikwö jichakwuju, jitji̧nö baledakwa̧ abebö ja̧ja̧kwobö, jitji̧ma nöinö 'dö̧achobetjö̧. Jo̧kwaijayonö, Jeroboan ilekwoda jö̧jijayonö, jelujudanö ichejekwö jichakwuju, ja̧danö baikwö yökawakwa̧ yötawakwö, —jö̧ba̧lö, Ahias jobujunö yöawakwa̧ yöawinobe Isabenö Jo̧ma.

⁶ Jemi ikenama, Ahias ejube ichibö tejachenama, kwejachi̧ ökwöi̧ a̧ja̧kwinobe Ahiasma, ja̧danö jobujunö yöa̧linobe: —Tebachi Jeroboan ilekwo. Tajawedö jelujusa i̧sȩkwö kwichaja̧da? Baikwö yötawakwö, 'dii̧ jawa wene ökwönö yötawobö Dios weökwesa.

⁷ Jau jojosuju, kwilekwe Jeroboan ö̧jobekwö da̧ji̧, ja̧danö jo̧banö baikwö yöbawaji: –Baikwö yöawobe israel jojodö tjösödökwe Isabenö Jo̧ Diosma, -Jojodö tjö̧'dadetjö ökwönö kabebö chujunijatö, ötjö chömöledö israel jojodötjö la'aka luwo̧ bakibanö.

⁸ David itji̧mu tupadanö jojodötjö 'dötebijatö, israel niji la'aka luwedö tjö̧jima, ja̧danö 'döbebajo̧, ökwönö chujunijatö, tjö̧jinemi ökwöda la'aka luwo̧ kwö̧jobö. Jo̧kwaijayonö, jejenö otiwanö ökwönö chiyinajayonö, chömöayo̧ Davidmine otiwanö ja̧bö ö̧ji̧nadanöma ja̧bö jö̧kö̧ja. Jau Jeroboan, Davidma weti̧ a̧ja̧kwö ö̧jinobe, ja̧danö jwaikwöda okobe jwiinö omajadenö ötjönö ösödö ja̧nö, jwaikwöda chösödi̧danö ja̧obö isakwinobe.

⁹ Jo̧ba ja̧bö ö̧jinadanö ja̧bö kwö̧jo jö̧ka̧linobe Jeroboan, jo̧kwaijayonö jejenö ja̧bökönö, jwaikwöda sulabenö ja̧köbajabe, okobe deinö ökwötjö ajayinö ji̧nadötjö bajalekwönönö jwiinö sulabenö jabo̧ja. Jau Jeroboan, ötjönö öpöjödö, kwösödakwawö̧nö kwotidinobe, 'dii jawatjö o̧'wo jawa kwösödakwawö̧nö kwotidajabe, ja̧danö jejenö ja̧bö chödameakwinö ja̧köbajabe.

¹⁰ Jo̧kwajabetjö̧, jejenö sulabenö jaköbitjö̧, jwiinö lȩtebakwawö̧ja, ökwönöbi, kwitji̧mu tupadanö jojodönöbi. Jau Jeroboan, kwitji̧mu tupadanö jojodö deinö söbebö lotakwawö̧ja, okobe deinö kwitji̧mu tupadanö jojodötjö ömadönö söbebö lotakwo̧sa, tjömöayedötjöbi, tjömöayedöböködötjöbi kwitji̧ tupadanö jojo bakwo̧bi ö̧jibökenanö baibanö. Jau Jeroboan, tjide'o jojodö jwodatö lotji̧danö, okobe deinö kwi̧tji̧mu tupadanö jojodönö jwodatö lotakwo̧sa, kwitji̧mu tupadanö jojodötjö ji̧bo̧ deinö.

¹¹ Jwiinö ökwödönö lȩtebobetjö̧, o̧tjöbi tjo̧tjökakwedö kwitji̧munö, baikwö yötawa: Kwömöledötjö comunidadnö janö ö'wö babibadö tjiteba'ijuma, a̧wi̧lidö tjukwakwawö̧, ja̧danö mejetjö ö'wö babibadö tjiteba'ijuma, bo̧lö̧ tjukwakwawö̧, –jö̧ba̧lö Isabenö Jo̧ yöawi̧ yökawo kwilekwe Jeroboannö. Jau jojosuju, Isabenö Jo̧ma ja̧ baledakwa̧ yöawajabe, jo̧kwajabetjö̧, isabenö jobekwö baledakobe.

¹² —Ja̧danö ökwö Jeroboan ilekwonö baikwö wetakwö, a̧la̧ibö kwejube kwȩwa̧jo̧. Ja̧danö, kwitebo comunidadbe kwichibenama, jenada ö'wö baibakwo̧ kwi̧tji̧ma.

¹³ Ja̧danö, kwi̧tji̧ ö'wö baibiawö̧, okobe deinö israel jojodöma o̧'wo tjo̧achö tjubudekwakwedö kwi̧tji̧nö, ja̧danö otiwanö jo̧banö tjo̧tjakwedö. Jau jojosuju, okobe deinö Jeroboan itji̧mutjö, sule jo̧ba kwitji̧nöda otiwanö tjo̧tja̧kwedö jojodöma, baikwö yötawa: Okobe deinö Jeroboan itji̧mutjö, sule jo̧banöda edö, –Bitema otiwo̧, –jö̧ba̧lö edö yöa̧lajabe israel jojodö tjösödökwe Isabenö Jo̧ Diosma, jokwajabetjö̧ jo̧banöda otiwanö o̧tjö tjo̧tjakwedö, okobe deinö ju'wedö tjiteba'ijuma, wainö nijinö bo̧bö wetjakwedö.

¹⁴ —Ju'wibi yötawakwö jojosuju, Isabenö Jo̧ma jelo̧nö israel la'aka luwo̧ baibanö kabebö ujunakwo̧, ja̧danö kabebö ujunajökwema, okobe deinö Jeroboan itji̧mu tupadanö jojodönö söbebö loakwo̧. Jau, babe möle Dios Jeroboannö lȩebakwa̧ma ida̧ökö jamatobe.

¹⁵ —Isabenö israel jojodönö lȩebakobe Isabenö Jo̧ma, baikwö wanedö yötawa: Ojwe okwa ja̧'ye isa'ye tjö̧awi̧danö tjö̧tjawakwedö israel jojodöma, Isabenö Jo̧ma jobadönö meibakobetjö̧. Jau, bemi niji inesö otiwemi niji israel jojodö tja'dödönö iyinobe Isabenö Jo̧ma, jo̧kwaijayonö jo̧banö ösödöködö israel jojodöma, jo̧banö kabatibö, Asera ötjabokonö ösödakwawa o'iju otidö tjösödajabe, Isabenö Jo̧ma jwiinö ödameakwenanö baibanö. Jo̧kwaiökwe, Isabenö Jo̧ma bemi niji otiwemi nijitjö 'yebö loakobe israel jojodönö, ja̧danö Eufrates ojwe tupakwönö tjipjelekwachibanö ikwö loakobe.

¹⁶ Jau jojosuju, kwilekwe Jeroboan sulabenö ja̧iökwe, jobekwö lȩebakobe Diosma israel jojodönö, kwilekwe isabenö jwiinö sulabenö ja̧inobetjö̧. Kwilekwe Jeroboanma Dios weökö jawa sulabenö ja̧inobe, ja̧danö ju'wibi iteda sulabenö ja̧aja̧danö ju'wedö israel jojodönöbi sulabenö Dios weökö jawa sulabenö ja̧tjobö weinobe, ja̧danö jejenö sulabenö ja̧tjiökwe, israel jojodönö le'dedö loakobe Isabenö Jo̧ma, —jö̧ba̧lö yöawinobe Ahiasma, Jeroboan ilekwonöma.

¹⁷ Jejenö yöawioko, Jeroboan ilekwoma a̧la̧ibö jȩwa̧jinobe, jitebo comunidad Tirsabe, ja̧danö jeju apjude tebachö, o̧do okwa jö̧jatenama, jȩnada ö'wö baibinobe jitji̧ma.

¹⁸ Ja̧danö, jejenö ö'wö baibiawö̧, okobe deinö israel jojodöma jo̧banö tjo̧tjinobe, ja̧danö o̧'wo tjo̧achö jo̧banö tjubudekwinobe. Isabenö Jo̧ ömöayo̧, iteda yöawi̧ yöbawo̧ Ahiasma ja̧ baledakwa̧ yöawinobe, ja̧danö isabenö yöawinadanö baledinobe.

¹⁹ Jobekwö laebobe ja'yubenö Jeroboan ja̧bö ö̧jina wenema. Ju'wibi nöinö ja̧inobe Jeroboanma, ja̧danö jabö ö̧jina wenema, jele'yenö laebobe, Jeroboan ölakwabikwawö ö̧jina wenebi, jojodönö webö ö̧jina wenebi. Ja̧ ö̧jina wenema, Israel jojodötjö la'aka luwedö tjö̧jina waekwacha'ye jö̧ba̧lö mikwa'yenö laebobe.

²⁰ Jeroboan israel jojodötjö inesö la'aka luwo̧ ö̧jinama, veintidos o̧biya baledibanö la'aka luwo̧ ö̧jinobe, ja̧danö veintidos o̧biya la'aka luwo̧ ja̧jo̧, ö'wö baibinobe. Jemi ikenama Jeroboan ö̧jinemi, itji̧ Nadab mikwoma israel jojodötjö la'aka luwo̧ baibinobe.

Salomon itji̧ Roboan Juda niji la'aka luwo̧ ö̧jina jawa

²¹ Salomon itji̧ Roboanma, Juda niji la'aka luwo̧ ö̧jinobe. Roboan la'aka luwo̧ ö̧jina wȩyukwa'yema, baikwö laebobe: Roboan ojo'doma, amonita jojosuju Noama mikwuju jö̧jinobe. Ja̧danö, inesö la'aka luwo̧ baibenama, cuarenta y un o̧biya ujuna̧linobe Roboanma, ja̧danö diecisiete o̧biya baledibanö Jerusalennö ja̧nö, Juda jojodönö webö ö̧jinobe. Okobe jwiinö israel niji sasokwena comunidadbiyatjö, Jerusalen comunidadda omudawö ujuninobe Isabenö Jo̧ma, iteda inesö ö̧ji̧ i̧sȩkwelö baibanö, ja̧danö ja̧ comunidadnö ja̧nö, juda jojodönö webö ö̧jinobe Roboanma.

^22-23 Ja̧danö, Roboan webö ö̧jonö, Isabenö Jo̧ öba a'otjö sulabenö ja̧tjinobe Juda jojodöma. Tja'dödö sulabenö ja̧tjinemi bajalekwönönö, jwiinö sulabenö ja̧tjinobe. Isabenö Jo̧ma israel jojodönö a̧'delanö omukwatö ile niebinobe, —Ötjö Isabenö Jo̧ Diosnöda tjösödo jö̧ba̧ladö, ju'wedö tjösödawö̧nö ösödökönö, ötjönöda tjösödo jö̧ba̧ladö, —jö̧ba̧lö. Jo̧kwaijayonö, jo̧banöda ösödökönö, möemitenia ösödakwawemi tjotidinobe, jadanö inawatjö o̧'wo jawanö ösödakwawa'iju tjotidinobe, ja̧danö Asera ötjabokonö ösödakwawa'iju tjotidinobe. Möemiteniabi, towi otiwowi teebeteniabi jobekwö sulabenö ja̧tjinobe, Isabenö Jo̧ jobadönö ödameakwenanö baibanö.

²⁴ Ja̧danö ju'wibi sulabenö ja̧tji̧nobe, tjösödawö̧nö ösödakwawejutjö ju'wedö ömadö, tjösödawö̧nö ösödadökwö 'da̧'da̧bö ja̧dö tjö̧jinobe, jobe tjitebo Juda nijinö. Jwiinö sulabenö jatjinobe Juda jojodöma, okobe deinö ja̧ nijinö ajayinö ji̧nadö, Isabenö Jo̧ israel jojodö tjöba a'otjö a'dewö loinawö̧ sulabenö ja̧tjinadanö sulabenö ja̧tjinobe, Roboan ömöayedö Juda jojodöma.

²⁵ Ja̧danö, Roboan bakwamu jawa o̧biya la'aka luwo̧ ö̧jaja̧ ikenama, baikwö baledinobe: Egipto niji la'aka luwo̧ Sisac mikwo̧ma Juda jojodönö ölakwabikwawö ichinobe, Jerusalenbe.

²⁶ Ja̧danö, juluwajo̧, Isabenö Jo̧ ejunö ji̧ mikwawi̧ jawabi, la'aka luwo̧ Roboan ejunö ji̧ mikwawi̧ jawabi 'döbebö eminobe. Okobe jwiinö jobe ji̧ mikwawi̧ jawa 'döbebö eminobe Sisacma, Salomon otidina tjöekwapibiya, orotjö otikwapibi eminobe.

²⁷ Jemi ikenama, ja̧ orotjö otikwa tjöekwapibiya emiökwe, Roboanma balekwapibiya broncetjö otidinobe, ja̧danö otidajo̧, ja̧ tjöekwapibiya, la'aka luwo̧ eju tjöbeba̧ladö tjuluwonö iyinobe, apjude teachakwawemi tjöbeba̧lö teada̧ladönöma.

²⁸ Ja̧danö, jemi tupawö la'aka luwo̧ Isabenö Jo̧ ejube i̧'yobö jö̧a̧lenama, jo̧banö tjöbeba̧lö teada̧ladöma ja tjöekwapibiya kwebatö, tjuluwokwö tji̧'yinobe, jadanö Dios ejutjö ȩwa̧jenama, yemidanö tjöbeba̧ladö tjö̧jeko̧nö tjödinobë.

²⁹ Jobekwö laebobe Roboan ja̧bö ö̧jina wȩyukwa'yema, ja̧danö ju'wibi nöinö ja̧inobe Roboanma. Okobe jwiinö ja ju'wi Roboan ja̧bö ö̧jina wenema, jele'yenö laebobe, Juda jojodötjö la'aka luwedö tjö̧jina wanekwacha'ye jö̧ba̧lö mikwa'yenö laebobe.

³⁰ Juda niji la'aka luwo̧ Roboanbi, Israel niji la'aka luwo̧ Jeroboanbi ina 'yatja̧layima, ba̧kwelöjatebö ölakwabikwawö tjö̧jinobe.

³¹ Ja̧danö, jemi ikenama, Roboanma ö'wö baibinobe, ja̧danö ö'wö babibajo̧nö tjo̧tjinobe a'dödökwö, Jerusalen comunidadtjö David itebo comunidad ötjabena jo̧banö tjo̧tji̧nobe. Jo̧ba Roboanma, amonita jojosuju Noama mikwuju jitji̧. Ja̧danö, Roboan ö'wö baibaja̧ ikenama, ö̧jinemi itji̧ Abias mikwo̧ma Juda jojodötjö inesö la'aka luwo̧ baibinobe.