1 Reyes 13 - Dios Iwene

¹ Ja̧danö, jobe iyobö ö̧jemi ja'ötjö, Isabenö Jo̧ weökwe Dios yöawi̧ yöbawo̧ bakwo̧ma Juda nijitjö ichajo̧ ichibinobe Betelbe, Jeroboan ina iyawöte badeibö ja̧nö, iyobö ö̧jemi ja'ötjö.

² Ja̧danö ichibajo̧, Isabenö Jo̧ yöawobö weaja̧ labinö jwöeba̧linobe, baikwö: —Baikwö yöawobe Isabenö Jo̧ma, böte iyawöte jawama: Ju'wi möle lekwe möle baledibaja̧ ikenama, David itji tupadanö jojo bakwo̧ Josias mikwo̧nö jemakobe, ja̧danö jo̧ba Josiasma, böte iyawöte wamenö juwö iyakobe, bötetjö otidadö tjiwe'ijuma. Jau, babe ö'weje pjabatadö böte iyawöte wamema, iyawa juwö iyawadö, jo̧kwaijayonö yadakwö Josiasma böte wame jojodö tjiwe'iju, bötenö juwö otidinadö tjiwe'iju ujuwakwo̧, —jö̧ba̧lö labinö jwöeba̧linobe.

³ Ja̧danö, ja̧ möle ju'wibi jwöbeba̧lö yöawinobe Dios yöawi̧ yöbawo̧ma, —Baikwö i̧sȩbö yötawaduwakwö, yötawaja̧ma, Isabenö Jo̧ Dios yöawaja̧da yötawajabe jö̧ba̧lö kwöwaisachibaduwakobetjö̧: Böte iyawötema ö'wejenö 'daakobe, jadanö tjiyaja̧ ökwölaso̧pja̧ma, nijakwö mebö tjoduwakobe. Jobekwö baledakwa̧ edö kwöwaisachibaduwakwedöja, yötawaja̧ma, Isabenö Jo̧ yöawi̧da yötawajabe, —jö̧ba̧lö jwöeba̧linobe.

⁴ La'aka luwo̧ Jeroboanma a̧ja̧kwinobe, Dios ömöayo̧ Betelnö ji̧ iyawöte jawa baledakwa̧ jwöbeba̧lö yöawaja̧ma, ja̧danö a̧ja̧kwajo̧, iyawöte badeibö ja̧nö Dios ömöayo̧ ö̧jobekwö debö i̧sebö weinobe ömöayedönö, —Itenö do̧bataduwinö, —jö̧ba̧lö. Jo̧kwaijayonö, jejenö debö i̧sebenama, Jeroboan ömamuma juluwanö kököbachibö 'diachibinobe, ömamu töekwökenanö.

⁵ Ja̧danö ju'wibi, iyawötema ö'wejenö 'dainobe, ja̧danö ökwölaso̧pjama iyawötetjö meinobe. Dios ömöayo̧ma Isabenö Jo̧ yöawi̧ yöawinobe, —Isabenö Jo̧ yöawi̧da yötawajabe jö̧ba̧lö kwöwaisachibaduwakwobetjö̧, baledakwa̧ yötawaduwakwö, iyawöte 'daakobe, —jö̧ba̧lö, jadanö yöawaja̧danö 'dainobe.

⁶ Ja̧danö, ömamu 'diinö baibiökwe, la'aka luwo̧ Jeroboanma Dios ömöayo̧nö aebinobe, —Ayö, kwuluwo Isabenö Jo̧ Diosnö akebobö atebakwö, chömamu yemidanö otiwachibanö pjaatakobetjö̧, —jö̧ba̧lö aebinobe. Ja̧danö, jejenö aebökwe, jo̧ba Dios ömöayo̧ma Isabenö Jo̧nö aebinobe, jadanö aebökwe, la'aka luwo̧ Jeroboan ömamu yemidanö otiwachibobö weinobe, jadanö yemidanö ajayinö ji̧nadanö baibinobe.

⁷ Jemi ikenama, la'aka luwo̧ Jeroboanma Dios yöawi̧ yöbawo̧nö aebinobe, —Ötjökwö chejube kwicho, jobetjö ö'wachö, ötjökwö kwukwobö, ja̧danö ju'wibi iyawa ökwönö chiyobö jö̧ta̧la, —jö̧ba̧lö.

⁸ Jo̧kwaijayonö yöa̧liökwe, öpöjödinobe Dios yöawi̧ yöbawo̧ma, jadanö la'aka luwo̧ Jeroboannö atadö yöa̧linobe, —Ökwökwö chi̧'yoböma jwiobe, okobe jwiinö kwiteatjö ja'ö kwiyobö kwomukwatitjö̧bi, ökwökwö chi̧'yobö jwiena. Jau Jeroboan, la'akatjöda ökwökwö kwanöbi, owöbi chi̧'yoböma jwiobe, isabenö bemi nijinö chö̧jiboböma jwiobe, baikwö yötawa:

⁹ Isabenö Jo̧ma jweinö weinobe ötjönö, –Jobe ja̧ nijinö ja̧nö, kwanöbi kwukwoko, ja̧danö owöbi kwowoko, ja̧danö kwichinamanöbi kwȩwa̧joko, jelemanöda kwȩwa̧jo, –jö̧ba̧lö weinobe Isabenö Jo̧ma, jo̧kwajabetjö̧ chi̧'yökö ökwökwö, —jö̧ba̧lö atadinobe.

¹⁰ Ikenama, jejenö jö̧ba̧lajo̧, jalachibö ȩwa̧jinobe jelemabenö, Betelbe ichinökömanö.

Dios yöawi̧ yöbawo̧ Dios wei̧ a̧ja̧kwökönö, wainö ja̧ina wene

¹¹ Ja̧danö, ja̧ möle bakwo̧ pöema Betelnö ö̧jinobe, ajayinö Dios yöawi̧ yöbawö otidinama. Itji̧muma baledaja̧ tjedinobe, ja̧danö edejadö, tjȩwa̧jenama tjabe'donö yötjawinobe, okobe jwiinö ja̧ möle Dios yöawi̧ yöbawo̧ Beteltjö ja̧aja̧ wenebi, la'aka luwo̧nö yöawaja̧ jawabi.

¹² Yötjawiökwe, tjabe'doma abebö a̧ja̧kwinobe, —Dimanö ȩwa̧ja̧da, Dios yöawi̧ yöbawo̧ma? —jö̧ba̧lö. Abebö a̧ja̧kwawö̧, itji̧muma jo̧banö tji̧sȩbinobe, Judatjö ichajo̧ Dios yöawi̧ yöbawo̧ ȩwa̧ja̧ja manama.

¹³ Tji̧sebökwe, itjimunö weinobe, —Chajwi bulo oma'anö, wa̧kwawaka kwöwanaduwo, jo̧ba ökömanö lubö chi̧'yakobetjö̧, —jö̧ba̧lö. Weajawö̧, wanawaka tjöwaninobe ajwi oma'anö, jadanö tjöwanajö̧kwe oma'anö wamatö,

¹⁴ Dios yöawi̧ yöbawo̧ ökömanö lubö i̧'yinobe. Lubö 'ya̧jo̧, Dios yöawi̧ yöbawo̧nö öbadekwajinobe, encina towi teebe 'bo̧nö, ja̧danö badekwajo̧ jo̧banö abebö a̧ja̧kwinobe, —Ökwödaji̧, Dios ömöayo̧ Juda nijitjö ichajo̧ma? —jö̧ba̧lö. Abebö a̧ja̧kwökwe, —Jau, ötjödasa, —jö̧ba̧lö atadinobe.

¹⁵ Atadökwe, pöema a̧debinobe, —Chejube kwicho, chejutjö kwakwawa kwukwobö, —jö̧ba̧lö.

¹⁶ A̧debökwe, —Ökwökwö chi̧'yobö jwiobe, jadanö bemi nijinö chukwoböbi, chowoböbi jwiobe,

¹⁷ Isabenö Jo̧ma jweinö ötjönö weinobetjö̧, –Jobetjö kwökönö, ja̧danö owökönö, juluwanö kwȩwa̧jo, ja̧danö kwi̧'yina manabenö ȩwa̧jökönö, jelemabenö kwȩwa̧jo, –jö̧balö weinobetjö̧, ökwökwö chi̧'yoböma jwiobe, —jö̧ba̧lö atadinobe.

¹⁸ Jejenö atadiökwe, pöema yöa̧linobe, —Ökwö Dios yöawi̧ yöbawo̧ kwö̧ji̧danö, ötjöbi bakwaibo̧sa, ja̧danö Isabenö Jo̧ weökwe angelma ötjönö weajabe, –Dios yöawi̧ yöbawo̧nö kwa̧debo, kwejube ichibö kwanöbi ukwobö, jadanö owöbi owobö, –jö̧ba̧lö Isabenö Jo̧ weökwe angelma ötjönö weajabe, —jö̧ba̧lö yöa̧linobe pöema. Jo̧kwaijayonö, jejenö yöa̧li̧jayonö, omöna yöa̧linobe pöema.

¹⁹ Ja̧danö, jejenö omöna yöa̧liökwe, Dios yöawi̧ yöbawo̧ma pöe yöa̧li̧ ösödinobe, jadanö jo̧bakwö 'ya̧nö, ejutjö ukwinobe, ja̧danö owinobe.

²⁰ Jemi ikenama, baikwö baledinobe: Dios yöawi̧ yöbawo̧nö a̧debajo̧, jo̧bakwö mesasötetjö tjö̧bemi ja'ötjö, Isabenö Jo̧ma iteda yöawi̧ yöawinobe pöenö, damötjö Dios yöawi̧ yöbawö otidinanö,

²¹ ja̧danö yöawiökwe, Juda nijitjö ichajo̧ Dios yöawi̧ yöbawo̧nö jwöbö yöa̧linobe, —Ayö, baikwö yöawobe Isabenö Jo̧ma ökwönö, –Isabenö Jo̧ weina jawa a̧ja̧kwökönö, weinöködanö sulabenö ja̧köbajabe. Kwuluwo̧ Isabenö Jo̧ Diosma jweinö ökwönö weinajayonö, a̧ja̧kwökönö wainö sulabenö ja̧köbajabe.

²² Jau, ökwönö, -Ja̧ nijinö ja̧nö kwukwoko, ja̧danö kwowoko, -jö̧ba̧lö weinajayonö, yayonö tjebachajö baikwö ichö kwukwajabe, ja̧danö kwowajabe. Jo̧kwajabetjö̧, weti̧ a̧ja̧kwökönö wainö ja̧köbajobetjö̧, ökwönö tjo̧tjenama, kwa'dödönö tjo̧tjinemi tjo̧tjökakwo̧ja ökwönöma, jelobeda kwiteba'o tjo̧tja̧kwo̧ja, —jö̧ba̧lö Dios yöawaja̧ yöawinobe pöema.

²³ Jemi ikenama, Juda nijitjö ichajo̧ Dios yöawi̧ yöbawo̧ kwanö kaatibenama, ajwi bulu oma'anö wanawaka öwaninobe, ajwinö wanö ȩwa̧jakobetjö̧.

²⁴ Ja̧danö, jobetjö ȩwa̧jö, Juda nijibe ȩwa̧jemi ja'ötjö, didibama jo̧banö meibinobe, ja̧danö jo̧banö kwabö loinobe. Jo̧kwaijayonö, jo̧banö kwabö loijayonö, iteba'o ukwinokobe, ja̧danö bulunö meibinokobe didibama. Kwabö loajökwe, Dios yöawi̧ yöbawo̧ iteba'oma, mananö bi̧nobe, ja̧danö iteba'o ö'öbönö, didibabi, bulubi sule ja̧nöda ö'öbönö tjö̧jinobe.

²⁵ Jemi ikenama, jojodöma jobe tjöbaledinobe, ja̧danö iteba'o jobe bo̧be tjedinobe, ja̧danö didiba ö'öbö ö̧jobe tjedinobe. Ikenama, pöe ö̧jemi comunidad Betelbe tjichibinobe, ja̧danö ichibajadö, tjedaja̧ wene yötjawinobe.

²⁶ Ja̧danö, pöe ajayinö Dios yöawi̧ yöbawinama yötjawi̧ a̧ja̧kwinobe, ja̧danö a̧ja̧kwenama, yöa̧linobe, —Tjedajökwema, Dios yöawi̧ yöbawo̧, Isabenö Jo̧ wei̧ a̧ja̧kwökönö wainö ja̧bajo̧ma. Isabenö Jo̧ wei a̧ja̧kwökönö sulabenö ja̧iökwe, jo̧banö iyö loajabe, didiba jo̧banö mebibö kwabö loobö. Jau, Isabenö Jo̧ jo̧banö baledakwa̧ yöawaja̧danö baledajabe, —jö̧ba̧lö yöa̧linobe pöema.

²⁷ Ikenama pöema iteda itji̧munö weinobe, ajwi bulu oma'anö wanawaka tjöwanobö, ja̧danö tjabe'do weawö̧, weaja̧danö ja̧tjinobe.

²⁸ Ikenama, ajwi bulu oma'a wanö, Dios yöawi̧ yöbawo̧ iteba'o isakwö i̧'yinobe, ja̧danö iteba'o mananö bo̧be öbadekwajinobe, ja̧danö didibabi, bulubi ö'öbö tjö̧jobe öbadekwajinobe. Didiba jojonö kwabö loajayonö, iteba'o ukwinokobe, jadanö ju'wibi bulunö meibinokobe.

²⁹ Ikenama, badekwajo̧, Dios yöawi̧ yöbawina pöema iteba'o kabebö öwaninobe bulu oma'anö, ja̧danö iteda öjemi comunidad Betelbe tjeatajinobe Judatjö ichajo̧ iteba'oma, jobetjö jo̧banö ubudekwobö, jadanö iteba'o o̧tjobö.

³⁰ Iteba'o ichejebajo̧, iteda ömöledö tjöwobiakonö bȩna ödinobe, jadanö jo̧banö ubudekwinobe, —Chö̧jawo̧we, cho̧'wo tjo̧acha bite chömöledöso̧ Dios yöawi̧ yöbawo̧nö, —jö̧ba̧lö.

³¹ Jemi ikenama, jo̧banö o̧tja̧ja̧ ikenama, iteda itji̧munö weinobe, —Ötjöbi ö'wö batibenama, bite Dios yöawi̧ yöbawo̧ iteba'o ö'öbönö ötjönö kwo̧tjaduwobö chösöda, ötjö chiwe'iju jo̧ba iwe'iju ö'öbönö kwödaduwobö chösöda.

³² Jau chitji̧mu, Isabenö Jo̧ weökwe, Betel comunidadnö ji̧ iyawöte baledakwa̧ yöawinobe, ja̧danö israel nijitjö u'dakwö jȩmi niji ba̧kwemeachibanö möemitenia ösödakwawejubiya baledakwa̧ yöawinobe. Ötjöma chöwaisa, jejenö yöawinama, jweinö yöawinobe jö̧ba̧lö, isabenö yöawinadanö baledakobe. Ja̧danö ja wene chösödobetjö̧, ötjönö kwo̧tja̧duwenama, bite iteba'okwö ötjö chiteba'obi kwo̧tja̧duwobö chösöda, —jö̧ba̧lö iteda itji̧munö weinobe.

³³ Jobekwö laebobe Dios yöawi̧ yöbawo̧ Jeroboannö lȩbebö yöawina wenema. Jo̧kwaijayonö, jweinö yöawinajayonö, a̧ja̧kwinokobe Jeroboanma, ina jwaikwöda sulabenö ja̧bö ö̧jinobe. Dios weina a̧ja̧kwökönö, jo̧kwadabedönö Diostjö jojodötjö ö'weje pjabatadö batjibanö ujuninobe, okobe deinö ö'weje pjabatadö batjibobö jö̧ba̧ladönö 'da̧batö ujuninobe, möemiteniatjö kwabö juwö Diosnö tjiyobö. Jwiinö sulabenö ja̧inobe Jeroboanma, Dios wei̧ a̧ja̧kwökönö.

³⁴ Ja̧danö, jejenö sulabenö ja̧iökwe, Diosma jo̧banö lȩebinobe. Jeroboan itji̧mu tupadanö jojodö israel luwedö tjö̧jo jö̧tja̧lijayonö, luwedö tjö̧joböma weinokobe Diosma, jwiinö okobe deinö Jeroboan itji̧mu tupadanö jojodönö söbebö loinobe Diosma, ji̧bo̧ bakwo̧bi deinö.