1 Reyes 12 - Dios Iwene

Israel jojodötjö domulataja jawasaso jojodö Salomon itji̧ Roboannö katjatibina wene

^1-3 Jemi ikenama, Nebat itji̧ Jeroboanma Salomon ö'wö baibaja̧ wene a̧jakwinobe. Ja̧ wene a̧jakwenama, israel nijinö deinöbe Jeroboanma, Salomon öba a'otjö döbibajo̧, ina Egipto nijinö ö̧jinobetjö̧. Ja̧danö, Salomon ö'wö baibaja̧ ikenama, ju'wedö israel jojodöma yöbawadönö wetjinobe, Jeroboan israel nijibe tjeachajobö. Ikenama, okobe deinö israel jojodötjö sasokwena jojodöma Siquen comunidadnö tjo̧ko̧kokwinobe ja̧danö Salomon itji̧ Roboanma jobe i̧'yinobe, jobetjö sasokwena jojodöma jobanö inesö la'aka tju̧luwo̧ baibanö tjujunakobetjö̧. Jejenö ichibiawö̧, Nebat itji̧ Jeroboanbi, ju'wedö israel jojodötjö ko̧ko̧kwadöbi Salomon itji̧ Roboan öba a'o ichibö yötja̧linobe:

⁴ —Roboan, kwabe'do Salomonma yelösöda ömökanö dotidobö webiyabina, döpöjödachibanö. Jo̧kwaijayonö, jo̧ba ömökinö weinadanö webökönö, weinatjö baikwönönö ejeanö dotidobö weköbitjö̧ma, ökwönö ösödö, kwömöayedö dö̧jakwedösa, —jö̧ba̧lö yötja̧linobe.

⁵ Yötja̧liökwe, —Ja̧ yöka̧laduwaja̧ chomukwatonö, da̧ja̧duwi, ja̧danö wapötakwa möle baledibajenama, chö̧jobekwö kwichaduwo, chatadakobetjö̧, —jö̧ba̧lö weinobe. Ja̧danö, jejenö webö loiawö̧, latjebinobe.

⁶ Jemi ikenama Roboanma abe'do Salomon waisanö omukwatobö pjabatinadö damönö abebö a̧ja̧kwinobe, —Ökwödöma dakwö kwomukwataduwa? Jojodö ötjönö yötja̧laja̧ma, dakwö chatadobö jo̧beda? —jö̧ba̧lö.

⁷ Abebö a̧ja̧kwawö̧, —Dedemi yötja̧laja̧ kwa̧ja̧kwobö otiwena, duluwo̧. Jau Roboan, dedemi babe möle, jobadö tjömöayo̧danö ja̧nö, jobadönö pjabatö dösölö̧jinö kwataditjö̧ma, isabenö tjösödakwo̧ja, ja̧danö jemi tupakwö ba̧kwȩlöjatebö ökwöda kwömöayedö tjo̧'wo ösöwanö tjö̧jakwedö, —jö̧ba̧lö tjatadinobe damöma.

⁸ Jejenö tjatadiökwe, waisanö yötja̧li̧ a̧jakwobö öpöjödinobe Roboanma. Yötja̧li̧ öpöjödö, ju'wedö iteda ömöayedö, jo̧bakwö da̧peachinadö waisanö omukwatobö pjabatadönö abebö a̧ja̧kwinobe,

⁹ —Ökwödö kwedaduwemi, idö –Kwabe'do ömökanö dotidobö weinadanö webökönö, baikwönönö ejeanö weköbobö adebakwö, –jö̧balö atjebaja̧ma, dakwö chatadobö jo̧beda? —jö̧ba̧lö.

¹⁰ Abebö a̧ja̧kwawö̧, jo̧bakwö da̧peachinadö waisanö omukwatobö pjabatadöma Roboannö tjatadinobe: —Baikwö kwatado, jobadö –Kwabe'do ömökanö dotidobö weidanö webökönö, ejeanö dotidobö adebakwö, –jö̧ba̧ladönöma, –Ötjö Roboanma, chabe'do Salomon ömöki̧nö kwotidaduwobö weitji̧ bajalekwönönö ömöki̧nö webo̧sa, baikwö yötawa:

¹¹ Chabe'doma ömökanö kwotidaduwobö weinobe, jokwaijayonö ötjöma ja̧tjö bajalekwönönö jwiinö ömökinö kwotidaduwobö wetakwo̧sa. Ja̧danö, chabe'do ökwödönö lȩebinatjö bajalekwönönö labinö lȩtebakwo̧sa, baikwö wanedö yötawa, Chabe'do ökwödönö lȩebenama, ba̧kwelöjatebö kwakwabajitjadanö ökwödönö kwakwainobe, jo̧kwaijayonö ötjö kwakwachakwa̧ma, itiyu ömadeba ji̧ kwakwaakanö ökwödönö kwakwachakwo̧sa, —jö̧ba̧lö kwatado, ejeanö weköbobö abebadönö, jö̧ba̧lö tjatadinobe Roboannö.

¹² Ajayinö jojodö Roboanö yötja̧lenama, —Wapötakwa möle baibenama, chö̧jobekwö kwichaduwo, chatadakwa̧ yötawakobetjö̧, —jö̧ba̧lö weinobe. Ja̧danö, wapötakwa möle baibenama, Nebat itji̧ Jeroboanbi ju'wedö israel jojodöbi Salomon itji̧ Roboan öba a'o tjichibinobe, atadakwa̧ tja̧ja̧kwobö.

¹³ Tjichibiökwe, labinö sulabenö atadinobe Roboanma. Damö waisanö, —Dösölö̧jinö kwatadodönö, —jö̧ba̧lö yötjalina öpöjödibö,

¹⁴ möayedödanöbedö waisanö omukwatobö pjabatö yötja̧linada ösödö, labinö yöa̧linobe jojodönö: —Chabe'doma ömöki̧ jawa kwotidaduwobö weinobe, jokwaijayonö ötjöma ja̧tjö bajalekwönönö ömöki̧nö kwotidaduwobö wetakwo̧sa. Ja̧danö ju'wibi, chabe'do ökwödönö lȩebitjö̧ bajalekwönönö labinö lȩtebakwo̧sa, baikwö wanedö yötawa, Chabe'do ökwödönö lȩebenama, ba̧kwelöjatebö kwakwabajitjadanö ökwödönö kwakwainobe, jo̧kwaijayonö ötjö kwakwachakwa̧ma, itiyu ömadeba ji̧ kwakwaakanö ökwödönö kwakwachakwo̧sa, —jö̧ba̧lö labinö atadinobe Roboanma.

¹⁵ Jobekwö jojodö yötja̧li̧ a̧ja̧kwökönö sulabenö atadinobe Roboanma, ja̧danö ja baledakwa̧ma, Isabenö Jo̧ Diostjöda ichinobe, damötjö̧ yöawi̧ yöbawo̧ Ahias yöawinadanö baledakobetjö̧. Damötjö silonita jojo Ahiasma Nebat itji̧ Jeroboannö yöawinobe, Dios Salomon itji̧ Roboantjö israel jojodö la'aka tjuluwo̧ ö̧ji̧ 'döebakwa̧ma, ja̧danö jejenö baledobö weinobe.

¹⁶ Salomon itji̧ Roboan jobekwö atadiawö̧, israel jojodöma tjöwaisachibinobe, —Roboanma adebi̧ a̧ja̧kwö̧kö̧, —jö̧ba̧lö. Ja̧danö, jejenö waisachibajadö, la'aka luwo̧ Roboannö tjatadinobe, —Yöda̧laja̧ a̧ja̧kwökönö sulabenö kwatadobetjö̧, dedemi la'aka luwo̧ Davidmine ömöledöböködösa. Jau, ökwödöma jo̧ba Isai itji̧ Davidtjö ja'yubebi emöködösa, ja̧danö kwömöayedö dö̧joböma jwibadösa, —jö̧ba̧lö tjatadinobe. Ikenama ju'wedö israel jojodönö jwöbö yötja̧linobe, —Ökwödö Israel jojodöma, okobe deinö dejukwena dȩwa̧jobö jobe. Bite David itji̧ tupadanö jojo Roboan, ökwödönö weobö jwibo̧, iteda ömöledönöda weobö jo̧be, ökwödö ömöledöböködönö weoböma jwibo̧, —jö̧ba̧lö yötja̧linobe. Ikenama, yöba̧lajadö, okobe deinö tjȩwa̧jinobe.

^17-18 Israel jojodö kabatibö tjȩwa̧jiökwe, Salomon itji̧ la'aka luwo̧ Roboanma iteda ömöayo̧ Adoniran mikwo̧nö weinobe, tjö̧jobekwö i̧'yobö. Jo̧ba Adoniranma, 'diinö otikwa weawa la'aka luwo̧ ö̧jinobe, ja̧danö ichibiawö̧, tjöpöjödinobe israel jojodöma, ja̧danö jo̧banö a̧ja̧kwökönö, inawiya ikwawö jo̧banö kwabö lotjinobe. Ja̧danö, jejenö Adonirannö kwabö lotjiökwe, juluwanö iteaka kolukanö a̧ji̧bö döibajinobe Roboanma, Jerusalenbe, jo̧banöbi kwabö lotjapji jö̧balö. Jobekwö laebobe israel jojodö Salomon itji̧ Roboannö katjatjibina wenema. Jo̧kwaijayonö, okobe deinö israel jojodöma katjatibinokobe Roboannö, Judasaso jojodöma ina jo̧banö tjösödinobe, ja̧danö jemi tupakwö Roboanma ina webö ö̧jinobe, israel jojodötjö judasaso comunidadtenia ju̧kwadönö.

¹⁹ Ja̧ möle jamatö, ju'wedö israel jojodö Judasaso jojodöböködöma David itji̧mu tupadanö jojodönö katjatibinobe, —David itji̧mu tupadanö jojodöma, duluwedöböködö, —jö̧ba̧lö, ja̧danö babe möle baibanö, ina David itji̧mu tupadanö jojodö wetjo jö̧ba̧löma weböködö.

²⁰ Ja̧danö, Salomon itji̧ Roboannö kabatibajadö, okobe deinö israel jojodötjö u'dakwö ju̧kwadöma Nebat itji̧ Jeroboannö tja̧ja̧kwinobe, —Egipto nijibetjö ȩwa̧jabe Jeroboanma, —jö̧ba̧lö, ja̧danö a̧ja̧kwajadö, jo̧banö jwötjinobe, ko̧ko̧kwö tjö̧jobe ichobö. Ikenama, Nebat itji̧ Jeroboannö 'da̧batö tjujuninobe, okobe deinö israel jojodötjö inesö la'aka luwo̧ ö̧jobö. Israel jojodötjö, sule Judasaso jojodöda David itji̧mu tupadanö jojodönö tjösödinobe, —David itji̧mu tupadanö jojodö tjömöayedösa, —jö̧ba̧lö.

Salomon itji̧ Roboan israel jojodönö ujuluwobö omukwatina wene

²¹ Döbibajo̧, Salomon itji̧ Roboan Jerusalen comunidadbe ȩwa̧jenama, iteda ömöayedö ölakwabikwawa jojodönö o̧ko̧kodinobe, israel jojodötjö jo̧banö kabatibajadönö tjölakwabikwawobö. Judasaso jojodötjöbi, benjaminsaso jojodötjöbi, ciento ochenta mil ölakwabikwawa waisadönö jwöbö o̧ko̧kodinobe, ju'wedö israel jojodönö mebibö tjujuluwobö, okobe deinö israel jojodöma yemidanö iteda, Salomon itji̧ Roboan ömöayedö tjö̧jakobetjö̧.

²² Jo̧kwaijayonö, labebö tjölakwabikwawakwa̧ abönö, Diosma iteda yöawi̧ yöbawo̧ Semaias mikwo̧nö weinobe, baikwö:

²³ —Semaias, baikwö yökawo Salomon itji̧, Juda jojodötjö inesö la'aka luwo̧ Roboan mikwo̧nöbi, okobe deinö judasaso jojodönöbi, benjaminsaso jojodönöbi, ju'wedö jojodönöbi:

²⁴ –Isabenö Jo̧ Diosma baikwö weobe ökwödönö: -Kwömöledö israel jojodönö mebibö kwölakwabikwawaduwoko chömöledö. Okobe deinö bakwo̧nökwena kwejuduwibe kwȩwa̧jaduwo chömöledö, ötjö Isabenö Jo̧ Diosda katjatibakwa̧ wetinobetjö̧, —jö̧ba̧lö Semaias yöawobö weinobe Isabenö Jo̧ma. Ja̧danö, Isabenö Jo̧ yöawi̧ Semaias yöawiawö̧, otiwanö tja̧ja̧kwinobe, ja̧danö ölakwabikwawökönö, okobe deinö Isabenö Jo̧ tjȩwa̧jobö weinadanö, tjejukwena tjȩwa̧jinobe.

Nebat itji̧ Jeroboan la'aka luwo̧ ö̧jina jawa

²⁵ Israel jojodötjö inesö la'aka luwo̧ babibajo̧, efrain niji mösa'iju jȩmi comunidad Siquen 'diinö tjöbebö otidinobe Nebat itji̧ Jeroboanma, ja̧danö jobe ö̧jinobe, iteda webö ö̧jemi comunidad baibanö. Ikenama, ja'yubenö lekwajabetjö̧, jobetjö labebö, Peniel comunidadbe i̧'yinobe, ja̧danö Peniel comunidadbi 'diinö tjöbebö otidinobe.

Nebat itji̧ Jeroboan o̧'wo jawa otidina wene

^26-27 Dios ejuma juda niji comunidad Jerusalennö ji̧nobe, jo̧kwajabetjö̧ Diosnö tjiyobö baibenama, ba̧kwelöjatebö Jerusalenbe 'yi̧atjinobe israel jojodöma, Isabenö Jo̧ ejutjö tjiyobö. Ja̧danö, jejenö tji̧'yiökwe, Jeroboanma omukwatinobe, itedada: —Ayö, damötjö̧ David itji̧mu tupadanö jojodö tjömöayedö israel jojodönö 'dötebinajayonö, ötjönö kabatibö, tjebachajö ajayi tjuluwedökwö batjibena, ja̧danö okobe deinö israel jojodö tjuluwedö batjibena David itji̧mu tupadanö jojodöma. Jau, Isabenö Jo̧ ejuma, chöpöjojo David itji̧ tupadanö jojo Roboan itebo comunidad Jerusalennö jo̧be, ja̧danö chömöayedö israel jojodöma Diosnö iyö, ba̧kwelöjatebö Jerusalenbe Isabenö Jo̧ ejube tji̧'yitjö̧ma, la'aka tjuluwo̧ chö̧ji̧ma waekwena. Ba̧kwelöjatebö Jerusalenbe tji̧'yitjö̧ma, ja̧ niji la'aka luwo̧, ajayi tjuluwo̧ Salomon itji̧ Roboankwö yemidanö batjibobö tjomukwatena. Jejenö baleditjö̧ma, yemidanö Juda la'aka luwo̧ Roboankwö batjibakobetjö̧, ötjönö kabatibö kwabö lotjena. Jejenö baledapji jö̧ba̧lö, chömöayedö Jerusalenbe tji̧'yi̧ma katjatiboböma weto, —jö̧ba̧lö omukwatinobe Nebat itji̧ Jeroboanma.

^28-29 Jobekwö omukwatajo̧, iteda ömöayedö waisanö omukwatobö pjabatadökwö yöa̧lakwawinobe, ja̧akwa̧ öwaisachibobö. Ikenama, yöba̧lakwawajadö, Jeroboanma du̧ju̧taja pakaya itji̧mu tjo̧'wo jawa otidinobe, ja̧danö otidajo̧ bakwo̧nö u'dakwö ji̧ comunidad Dannö ujuninobe, ja̧danö a̧li̧kwö ji̧ comunidad Betelnö jelo̧nö ujuninobe. Jejenö junajo̧, ömöayedö israel jojodönö yöawinobe, —Chömöledö israel jojodö, isabenö waiyobe ökwödönö Diosnö kwiyaduwobö baibenama, ba̧kwelöjatebö ödö Jerusalen comunidadbe kwi̧'yaduwoböma. Jo̧kwajabetjö̧, ödöobetjö̧, ökwödönö pjabatö bidö ökwödö israel jojodö dösödawö̧nö tjo̧'wo jawa chotidajabe. Jau chömöledö, bidöma, ökwödö dösödawö̧, damötjö Egipto nijitjö ladebinö baikwö ditebobe dichibanö ichejebinadö tjo'wo jawa, jo̧kwajabetjö babema tjöba a'otjö, bemi ditebonöda otiwanö kwiyaduwobö jo̧be. Jau chömöledö, Diosnö kwiyaduwobö baibenama, Jerusalenbe 'yökönö, bidö tjo'wo jawa chotidajawö̧tjö bakwo̧ öba a'o ichiböda, otiwanö kwiyaduwena, —jö̧ba̧lö yöawinobe Jeroboanma.

³⁰ Jobekwö israel jojodö sulabenö ja̧tjobö weinobe Jeroboanma, ja̧danö weawö̧, sulabenö ja̧tjinobe israel jojodöma, Betelbebi, Danbebi tji̧'yinobe, otidinawö̧ pakaya itji̧mu tjo̧'wo jawanö tjösödobö.

³¹ Ja̧danö, o̧'wo jawa otidajo̧, möemitjö o̧'wo jawa ösödakwawejubiya otidinobe Jeroboanma, ja̧danö tjösödawö̧tjö, jojodötjö ö'weje pjabatadönö 'da̧batö ujuninobe, Levisaso jojodöböködönöma.

³² Ja̧danö, Juda nijitjö löwötenö ja̧kwawa ba'ali juniatji̧danö, jelemutjö wamedukwa jawo̧nö, a̧li̧samutjö bakwamu jawa mölenö ba'ali tjujunobö weinobe Jeroboanma. Ja̧danö, Betel comunidadtjö, iyawöte wame iteda otidinawö̧ o̧'wo jawa öba a'o, iyawa iyinobe Jeroboanma. Ja̧danö, ju'wibi jobe Beteltjö ju'wedönö 'da̧batö ujuninobe, möemi iyawemitenia otidadö, ö'weje pjabatadönö, iyawemi tjotidakobetjö̧.

Dios yöawi̧ yöbawo̧ Juda nijitjö ichö Jeroboannö yöawina jawa

³³ Jeroboanma iteda omajadenö omudawö ujuninobe, jelemutjö wamedukwa jawo̧nö, a̧li̧samutjö bakwamu jawa mölenö ba'ali junawa möle ja̧kobe jö̧ba̧lö, ja̧danö ja̧ möle israel jojodö ba'ali tjujunobö weinobe. Jadanö, ja̧ möle Jeroboanma otidinöte Betel comunidadnö ji̧ iyawötebe i̧'yinobe, jobetjö iyawa o̧'wo jawanö iyobö.