1 Reyes 11 - Dios Iwene

Salomon ba̧jȩkwadö ilekwamunö emina jawa

¹ Salomonma ba̧jȩkwadö israel jojodöböködötjö ya̧dönö eminobe, ilekwamu batjibanö. Ajayinö, Egipto niji la'aka luwo̧ Faraon itjijunö eminobe, jo̧kwaijayonö jobujunödamaökö. Ju'wedönöbi moabitas jojodötjö ya̧dönöbi, amonitas jojodötjö ya̧dönöbi, edomitas jojodötjö ya̧dönöbi, sidonias jojodötjö ya̧dönöbi, hititas jojodötjö ya̧dönöbi ösödö eminobe Salomonma, ilekwamu batjibanö.

² Damötjö̧ Isabenö Jo̧ma israel jojodönö weinokobe, jobadö tjitebokwena jojodönö tjemoböma, —Jobadötjö ya̧dönö kwemaduwoko, ja̧danö ökwödötjö ya̧dönö tjemoböma weköbaduwoko. Jejenö jobadökwö bakibaduwitjö̧ma, ökwödö jwaikwöda Diosnö kwösödaduwi̧ kabatibö, idö tjösödawö̧nö kwösödaduwobö ötjibakwedö, —jö̧ba̧lö damötjö weinobe Diosma. Jo̧kwaijayonö, jejenö weinajayonö, a̧ja̧kwökönö, jobadö Dios weinököwö̧nö ile nibebö ösödinobe Salomonma.

³ Isabenö ba̧jȩkwadönö eminobe Salomonma, ju'wedö la'aka luwedö tji̧tji̧mu ya̧dötjö, setecientasbedönö eminobe, ilekwamu batjibanö, ja̧danö ju'wedöbi ömöayedödanöbedö ilekwamunö, trescientasbedönö eminobe. Ja̧danö, Dios ajayinö yöa̧linadanö baledinobe, jobadö Salomon ilekwamuma, jwaikwöda Diosnö ösödö ö̧ji̧ kaatibobö ötjibinobe.

⁴ Salomon pöe ö̧jenama, ilekwamuma jo̧ba ösödi̧ ötjibinobe, Diosnöda ösödi̧ kabatibö, jobadö tjösödawö̧nöbi ösödobö, sulabenö. Abe'do David jwaikwöda uluwo̧ Isabenö Jo̧ Diosnö ösödö ö̧jinadanöma ö̧jinokobe Salomonma, ju'wedö tjösödawö̧nöbi ösödinobe.

⁵ Diosnöda ösödökönö, Salomonma sidonio jojodö tjösödoko Astarte mikwujunö ösödinobe, jadanö amonitas jojodö tjösödökwe inesö sulabo̧ Molocnöbi ösödinobe.

⁶ Isabenö Jo̧ öba a'otjö, isabenö sulabenö ja̧inobe Salomonma, abe'do David ösödinadanö, jwaikwöda Isabenö Jo̧nöda ösödo jö̧a̧lijayonö, ju'wedö tjösödawö̧nöbi sulabenö ösödinobe.

⁷ Jwiinö sulabenö ja̧inobe Salomonma, Jerusalen comunidadtjö jawo̧ laebobekwö ja̧'o mösa'otjö, Salomonma moabitas jojodö tjösödökwe inesö sulabo̧ Quemosnö ösödakwawemi möemi otidinobe, ja̧danö ju'wibi amonitas jojodö tjösödökwe inesö sulabo̧ Molocnö ösödakwawemi möemi otidinobe.

⁸ Ju'wedö Salomon jelobetjö ichajadö ilekwamu tjösödawö̧bi jadanö. Okobe deinö tjösödawö̧tenia ösödakwawemi otidinobe, ja̧danö ilekwamuma kwabö juwö tjiyinobe tjösödawö̧nö, ja̧danö omewi̧ jawa juwö tjösödinobe jobadönö.

^9-10 Jejenö ja̧iökwe, jwiinö ödameakwinobe Isabenö Jo̧ma, Salomonnöma. Damötjö Israel jojodö tjösödökwe Isabenö Jo̧ Diosma dötölatajanö öwawachö yöawinobe Salomonnö, ja̧danö jweinö jo̧banö weinobe, —Ju'wedö tjösödawö̧nö ösödökönö, jwaikwöda Diosnöda kwösödobö jo̧be, —jö̧ba̧lö. Jo̧kwaijayonö jejenö öwawachö weinajayonö, pöe baibenama, a̧ja̧kwökönö, Diosnö otiwanö ösödi̧ kaatibinobe Salomonma, jadanö kaatibiökwe, jwiinö ödameakwinobe Diosma.

¹¹ Jo̧kwajabetjö̧, Isabenö Jo̧ma Salomonnö yöa̧linobe, baikwö: —Salomon, ökwönö yöbawö chujunijatö ökwöbi kwitji̧mubi israel la'aka luwedö tjö̧jakwa̧ma, baikwö weti̧ kwa̧ja̧kwaduwitjö̧ma, isabenö israel luwedö kwö̧jaduwakwedöja, jö̧ba̧lö. Jo̧kwaijayonö, weti̧ a̧ja̧kwökönö kwö̧jajabe Salomon, jo̧kwajabetjö̧ israel jojodö tjuluwedö kwö̧ja̧duwi̧ ökwödötjö 'dötebakwo̧sa, ja̧danö 'döbebajo̧, kwömöayedötjö jelo̧nö chiyakwo̧sa.

¹² Jo̧kwaijayonö, kwabe'do Davidminenö omukwatö, ina 'ya̧kalayima 'dötebökakwo̧sa, ökwö kwitji̧tjöda israel jojodö tjuluwedö kwö̧ja̧duwi̧ 'dötebakwo̧sa.

¹³ Jo̧kwaijayonö, jwiinöma ökwödötjö 'dötebökakwo̧sa, ina israel jojodötjö bakwaso luwedö kwö̧jaduwobö wetakwo̧sa, ötjö chömöayo̧mine Davidnö ösödö chomukwatobetjö, ja̧danö ötjö omudawö chujuninemi Jerusalen comunidad ösödö chomukwatobetjö, ökwödö David itji̧mu tupadanö jojodö ina bakwaso luwedö kwö̧jaduwobö wetakwo̧sa, —jö̧ba̧lö yöawinobe Isabenö Jo̧ma, Salomonnöma.

Salomon öpöjojodö jawa

¹⁴ Jemi ikenama, Isabenö Jo̧ma Salomon öpöjojodönö kabebö ujuninobe, Salomon wene ujuna̧lakobetjö̧. Jobadö Salomon öpöjojodötjö bakwo̧ma, Edom niji la'aka luwedö tjitji̧ tupadanö jojo Hadad mikwo̧.

¹⁵ Baikwö laebobe Hadad ö̧jina jawama: Damötjö Salomon abe'domine Davidma edomitas jojodökwö ölakwabikwawinobe, ja̧danö jobadönö ujuluwaja̧ ikenama, David ömöayo̧ ölakwabikwawa jojodötjö la'aka luwo̧ Joab mikwo̧ma ö'wö babibajadönö o̧tjö i̧'yinobe, ju'wedö ölakwabikwawö jojodökwö. Jobe ja̧nö, okobe deinö edomitas jojodötjö ömadönö kwabawö loinobe Joabma.

¹⁶ Jawo̧dö jelemutjö bakwo̧ ja̧wo̧dö baledibanö, Joabbi, israel jojodötjö ölakwabikwawa jojodöbi Edom nijinö tjö̧jibinobe, okobe deinö edomita jojodötjö ömadönö kwabawö lotjenanö kabatö.

¹⁷ Jo̧kwaijayonö, ju'wedö debö tji̧'yonö, Hadadma jobetjö döbibajö ö̧jibinobe. Ja̧ möle Hadadma ina tjemu ö̧jinobe, ja̧danö abe'do ömöayedö edomitas jojodötjö ju'wedökwö döibajinobe Egipto nijibe.

¹⁸ Dötjibajenama, Madian nijitjö latjebinobe, Paran nijibe, ja̧danö jobe ju'wedö jobe ju̧kwadökwö batjibinobe. Ikenama, bakobe jobadö Paran jojodökwö Egipto nijibe tji'yinobe, ja̧danö la'aka luwo̧ Faraon öba a'o tjichibinobe. Jejenö ichibiökwe, Faraonma Hadadnö pjaatinobe, ejubi jo̧banö iyinobe, ja̧danö kwakwawabi iyinobe, ja̧danö nijibi jo̧banö iyinobe.

¹⁹ La'aka luwo̧ Faraonma nöinö ösödinobe Hadadnö, ja̧danö jo̧banö ösödobetjö̧, Faraon ilekwo Tapenes mikwuju jöjawujunö weinobe, Hadad ilekwo bajibanö.

²⁰ Ja̧danö, Tapenes jöjawujuma, Hadad itji̧nö jeminobe, Guenubat mikwo̧nö. Ja̧danö Faraon ilekwo Tapenesma jöjawuju jitji̧nö wejinobe, Faraon ejunö ja̧nö, Faraon a̧dekwanö itji̧mukwö waisachö ö̧dapeachobö. Jo̧kwajabetjö̧, Faraon a̧dekwanö itji̧mudanö, Hadad itji̧ Guenubatbi Faraon ejunö ö̧da̧peachinobe.

²¹ Jemi ikenama, lekwe möle baledibajenama, Egiptonö ja̧nö a̧ja̧kwinobe Hadadma, —Davidma ida̧ökö a'dödökwö babibö ö'wö baibajabe, ja̧danö ömöayo̧ ölakwabikwawa jojodötjö la'aka luwo̧ Joabbi ö'wö baibajabe, —jö̧ba̧lö a̧ja̧kwinobe Hadadma. Jejenö a̧ja̧kwajo̧, Hadadma Faraonnö aebinobe, —Weköbobö atebakwö, ötjöda chitebobe chȩwa̧jobö weköbobö, —jö̧ba̧lö.

²² Aebökwe, —Tajawedö kwȩwa̧jobö kwösödobeda? Betjöma taji jwiakwö, laekwa kwösödobeda?— jö̧ba̧lö yöa̧lökwe, —Ja̧maökö Faraon, ja'yubebi jwitököjayonö, yayonö a̧dekwanö chiteboobetjö̧ chȩwa̧jobö chösöda, weköbakwa̧ji̧? —jö̧ba̧lö aebinobe Hadadma, ja̧danö abebajo̧, Edom nijibe ȩwa̧jinobe, Salomon öpöjojo Edom niji la'aka luwo̧ baibanö.

²³ Ja̧danö jelo̧nöbi kabebö ujuninobe Isabenö Jo̧ma, Salomon öpöjojo baibanö, Rezon mikwo̧nö. Jo̧ba Rezonma, Eliada itji̧, ja̧danö ajayinö iteda uluwo̧, Soba comunidad la'aka luwo Hadad Ezer ö̧jelö döbibajina.

²⁴ Hadad Ezer ö̧jelö döbibajo̧, ju'wedö la'aka luwo̧nö öpöjödadönö o̧ko̧kodinobe, iteda ömöayedö batjibanö, ja̧danö jobadökwö jelobekwena naukwabinö tjölakwabikwawinobe. Jemi ikenama, Davidma Soba la'aka luwonö Hadad Ezernö ujuluwinobe, jadanö juluwajo̧ ölakwabikwawa jojodönö kwabawö loinobe. Jejenö balediökwe, Rezonma Damasco comunidadbe i̧'yinobe, ja̧danö ichibiawö̧, jobe ju̧kwadöma Rezonnö tjujuninobe, siria niji la'aka luwo̧ baibanö.

²⁵ Ja̧danö, Siria niji la'aka luwo̧ ja̧nö, Salomon la'aka luwo̧ ö̧jena baledibanö, jwiinö israel jojodönö öpöjödö, Salomon öpöjojo ö̧jinobe, ja̧danö Edom niji luwo̧ Hadad sulabenö ja̧bö ö̧ji̧danö, jobabi jwiinö sulabenö jabö ö̧jinobe.

²⁶ Ja̧danö Salomon öpöjojodötjö jelo̧ma Jeroboan mikwo̧. Jo̧ba Jeroboanma, Nebat itji̧, ja̧danö Efrainsaso comunidad Sereda jojo. Jeroboan ojo'doma, Zerua mikwuju, jilekwenö wobekwinujuma. Ajayinö Salomon ömöayo̧ ö̧jinajayonö, jo̧ba Jeroboanbi Salomon öpöjojo baibinobe.

^27-28 Baikwö baledinobe jo̧ba Jeroboan Salomon öpöjojo baibina wenema: Jeroboanma israel jojodötjö ölakwabikwawa juluwo̧ ö̧jinobe, ja̧danö waisanö 'diinö otido̧ ö̧jinobe. Salomonma otiwanö otido̧ ö̧ji̧ edinobe, jo̧kwajabetjö̧ Jerusalen tjöekwemibi, Milo ötjabemibi otidenama, Jeroboannö ujuninobe, okobe deinö Jeroboan ömöledösaso Efrain jojodötjö tjotidobö wetjawö̧ tjuluwo̧ ö̧jobö.

²⁹ Ja̧danö, ju'wi möle Jeroboan Jerusalentjö labebajo̧ kweachenama, Dios yöawi̧ yöbawo̧, Silo comunidad jojo Ahias mikwoma ju'wedö jojodö deinö jo̧banö öbadekwajinobe. Jo̧banö öbadekwajenama, Ahiasma kamijido̧ wamesa̧do̧ 'yayado̧ 'duawinobe,

³⁰ jadanö Jeroboannö badekwajo̧, wamesa̧do̧ 'duawa̧do̧ kȩebö loinobe, a̧li̧nösamutjö dödo̧lataja baibanö.

³¹ Ikenama kȩ'ebö lobajo̧, kȩ'ebö loaja̧ jawatjö domulataja jawa Jeroboannö iyö yöawinobe: —Kwitea baibanö bi̧do̧ kwemo, israel jojodö tjuluwo̧ Isabenö Jo̧ Diosma baikwö yöawobetjö̧: –Jeroboan, juluwanö Salomontjö 'dötebocha, okobe deinö israel jojodötjö inesö la'aka luwo̧ ö̧ji̧ma, ja̧danö 'döbebajo̧, ökwö Jeroboannö chiyakwo̧sa, israel jojodö ali̧nösamutjö dosolataja jojodötjö, domulataja jawasaso la'aka luwo̧ bakibanö.

³² Jo̧kwaijayonö, ju'wedö domulataja jawasaso Salomontjö 'dötebijayonö, ina bakwaso la'aka luwo̧ ö̧jobö wetocha. Jau, Salomon abe'do chömöayo̧mine Davidnö otiwanö omukwatö ösödo̧sa, ja̧danö okobe jwiinö israel niji sasokwena nijitjö ötjöda chitebo baibanö 'da̧batö chujuninemi Jerusalen comunidad otiwanö omukwato ösödo̧sa, jadanö ja omukwatö, ina bakwaso luwo̧ ö̧jobö wetakwo̧sa Salomonnö.

³³ Ja̧ Salomontjö 'dötebakwama, baikwö labebö lobö yötawakwö Jeroboan, Salomonbi, ömöledöbi ötjönö kabatibö, sidonio jojodö tjösödoko Astartenö bȩbachibö tjösödajabe, ja̧danö moabita jojodö tjösödökwe Quemosnö bȩbachibö tjösödajabe, jadanö amonitas jojodö tjösödökwe Molocnö bȩbachibö tjösödajabe, sulabenö. Jau Jeroboan, abe'do Davidma jwaikwöda ötjö chösödi̧danö ja̧nö, ja̧bö ö̧jobö weti̧bi, ju'wi weti̧bi otiwanö a̧ja̧kwö ö̧jinobe, ja̧danö Salomonbi a̧ja̧kwo jö̧a̧linobe, jokwaijayonö a̧ja̧kwö̧kö̧. Jo̧kwajabetjö̧, a̧jakwökönö sulabenö ja̧obetjö̧, la'aka luwo̧ ö̧ji̧ 'dötebocha.

³⁴ — –Jo̧kwaijayonö, la'aka luwo̧ ö̧ji̧ Salomontjö 'dötebijayonö, ina 'ya̧alayima 'dötebökakwo̧sa. Israel jojodö la'aka tjuluwo baibanö omudawö chujuninökwe, Salomon abe'do Davidma otiwanö weti̧ a̧ja̧kwö ji̧na, jadanö ja̧ weti̧ a̧ja̧kwö ö̧jina omukwatö, ina Salomon 'ya̧alayima la'aka luwo̧ ö̧jobö wetakwo̧sa.

³⁵ Jo̧kwaijayonö Salomon itji̧ la'aka luwo̧ baibenama, jo̧batjö domulataja jawasaso 'dötebakwo̧sa, ja̧danö 'döbebajo̧, ökwönö chiyakwo̧sa, domulataja jawasaso jojodötjö inesö la'aka luwo̧ kwö̧jobö̧.

³⁶ Jo̧kwaijayonö jwiinö 'dötebökakwo̧sa, Salomon itji̧ la'aka luwo̧ ö̧ji̧ma, ina bakwaso la'aka luwo̧ ö̧jobö chujunibakwo̧sa. Jau, Jerusalen comunidad 'da̧batö chujunajabe, ötjö Isabenö Jo̧ chitebo comunidad baibanö, ja̧danö chömöayo̧mine David itji̧mu tupadanö jojodö ba̧kwelöjatebö jobe Jerusalentjö chöba a'otjö luwedö tjö̧jobö chösödobetjö̧, ina jobe bakwaso la'aka luwo̧ ö̧jobö wetakwo̧sa.

³⁷ — –Jau Jeroboan, Ökwönö 'da̧batö chujunocha, ju'wedö israel jojodötjö la'aka tjuluwo bakibanö, ökwö webö kwö̧jobö kwösödi̧danö, okobe jwiinö ja̧ niji webö kwö̧jakwo̧ja.

³⁸ Jejenö 'da̧batö chujunenama, baikwö wetakwö Jeroboan: Isabenö okobe jwiinö ökwönö weti̧ kwa̧ja̧kwobö ja̧kobe, -Baikwö ja̧bö kwö̧jo, -jö̧ba̧lö ökwönö weti̧ a̧ja̧kwö, chösödi̧danö ja̧bö kwö̧jo. Jau, chömöayo̧ David a̧ja̧kwö ö̧jinadanö, ökwöbi jwaikwöda ja̧bö kwö̧jobö weti̧bi, ju'wi weti̧bi kwa̧ja̧kwobö ja̧kobe, ja̧danö otiwanö a̧ja̧kwö kwö̧jitjö̧ma, isabenö ökwökwö ja̧nö otiwanö pjatatakwo̧sa. Jau Jeroboan, chömöayo̧ David otiwanö a̧ja̧kwö ö̧jitjö̧, itji̧mu tupadanö jojodöbi otiwanö luwedö 'diinö tjö̧jobö 'da̧batö chujunajabe, ja̧danö jo̧ba a̧ja̧kwinadanö ökwöbi a̧ja̧kwö kwö̧jitjö̧ma, bakwainö ökwönöbi pjatatakwo̧sa, kwitji̧mu ba̧kwelöjatebö israel luwedö 'diinö tjö̧jakobetjö̧.

³⁹ Jau Jeroboan, Salomon sulabenö a̧ja̧kwökönö ö̧ji̧tjö̧, babe David itji̧mu tupadanö jojojodö lȩbebö, usula tjemawinö wetocha. Jo̧kwaijayonö babe jobadönö lȩtebijayonö, bakobenö lȩtebökakwo̧sa, yadakwö yemidanö lȩlöjinö edö, jobadönö pjatatocha, —jö̧ba̧lö Dios Jeroboannö yöawi̧ yöawinobe Ahiasma.

⁴⁰ Jemi ikenama, Salomonma ja̧ baledaja̧ öwaisachibinobe, jadanö öwaisachibajo̧, Jeroboannö kwabö loobö isakwinobe. Jo̧kwaijayonö, Jeroboanma Salomon ö̧jelö döibajinobe, Egipto nijibe, jadanö Egipto la'aka luwo̧ Sisacma Jeroboannö tjöbeba̧lö pjaatinobe, Salomon ö'wö baibenanö kabatö.

Salomon ö'wö baibina wene

⁴¹ Bi'yenö laebi̧ jawabi, ju'wi jawabi ja̧bö ö̧jinobe Salomonma. Ja̧danö ju'wi ja̧bö ö̧jina jawama, otidina jawabi, waisanö lȩekwa yöawina jawabi, Salomon Ja̧bö Ö̧jina Wȩyukwa'ye ötjaba'yenö laebobe.

⁴² Cuarenta o̧biya baledibanö, Jerusalennö ja̧nö Salomonma okobe deinö israel jojodötjö inesö la'aka luwo̧ ö̧jinobe.

⁴³ Ikenama, Salomonma ö'wö baibinobe, jadanö ö'wö babibajo̧nö tjotjinobe, abe'do David imi laebelö, David itebo comunidad ötjabena. Ja̧danö, ö'wö baibaja̧ ikenama, Salomon itji̧ Roboan mikwo̧ma la'aka luwo̧ baibinobe.