1 Reyes 10 - Dios Iwene

Saba niji la'aka luwuju Salomon öba a'o jichibina jawa

¹ Ja̧danö, Saba niji inesö la'aka luwujuma Salomonnö ja̧ja̧kwinobe, —Isabenö Jo̧ pjaatökwe, jwiinö waisanö omukwato̧ Salomonma, —jö̧ba̧lö. Jejenö a̧ja̧kwaju, Salomon ö̧jobekwö israel nijibe jichinobe, waiyi̧ aekwa jo̧banö abebö ja̧ja̧kwobö, Salomon isabenö waisanö atadakwojobö jö̧balö.

² Jelobetjö ichaju, ba̧jȩkwadö jömöayedökwö jichibinobe Jerusalenbe, ja̧danö ju'wibi ja̧jwi̧mu kamellodö tjoma'anö nöinö orobi, omewi̧ jawabi, nöinö mikwawi̧ inawiyabi ichejebö jichibinobe. Ichibaju, Salomon öba a'o ji̧'yinobe Saba la'aka luwujuma, ja̧danö ichibaju, okobe jwiinö abebö ja̧ja̧kwobö jö̧ja̧li̧ jawa jo̧banö abebö ja̧ja̧kwinobe.

³ Abebö ja̧ja̧kwökwe, waekwökönö waisanö atadinobe Salomonma, jwiinö waiyi̧ jawabi abebö ja̧ja̧kwinajayonö, yayonö bakwöta jawabi wajwiinokobe Salomonma, okobe jwiinö otiwanö labebö lobö atadinobe.

⁴ Jejenö atadioko, Salomonö jöwaisachibinobe, —Isabenö jwiinö waisanö omukwato̧ bite Salomonma, —jö̧ba̧lö. Ju'wibi iteda eju comunidad baibanö otidinabi jedinobe,

⁵ ja̧danö tjukwȩko̧tjö tjukwi̧bi jedinobe, ja̧danö Salomon ömöayedö tjuluwo̧nö tjiteada̧li̧bi jedinobe, jadanö ömöayedö tjö̧ka̧misibi jedinobe, jadanö Salomon ömöayedö owakwa̧ iyawa luwedönöbi jedinobe, jadanö Isabenö Jo̧ ejutjö jwiinö ubinö iyawa baibanö iyi̧bi jedinobe. Jejenö edö, jö̧bajale jalaka baibanö jedinobe,

⁶ ja̧danö edaju, la'aka luwo̧ Salomonnö yöja̧linobe baikwö: —Ina ötjöda chitebonö chö̧jayi, ökwönö yötjawi̧ cha̧ja̧kwijatö, –Salomonma isabenö waisanö omukwato̧, ja̧danö inesö waisanö yöawakwawa jawa yöbawo̧, –jö̧ba̧lö yötjawi̧ cha̧ja̧kwijatö, jadanö isabenö jweinö yötjawinobe.

⁷ Ajayinö yötjawi̧ cha̧ja̧kwenama, yötjawi̧ chösödijökötö, –Omöna, jo̧bajayo̧ waiso̧ma deena, –jö̧ba̧lö. Baikwö ichibö, chöbajalenö chedenanö kabatö, jobekwö omöna, jö̧ba̧lö chomukwatijatö. Jo̧kwaijayonö, ida̧ökö edajusa, ja̧danö edaju baikwö yötawakwö, isabenö ökwönö yötjawinama, sule ja'önöda yötjawinobe, jö̧ba̧lö. Jau Salomon, waisanö kwomukwati̧bi, otiwanö wene jwiinö kwö̧ji̧bi, jwiinö yötjawinatjö bajalekwönönö jo̧ja.

⁸ Isabenö tjo'wo ösöwanö ja̧dö, kwöba a'otjö otidadö kwömöayedöma Salomon. Jobadöma kabatökönö kwöba a'o ja̧nö, waisanö omukwatö yökawi̧ a̧jakwadö, isabenö tjo̧wo ösöwanö ju̧kwadö kwömöayedöma.

⁹ Isabenö kwösödökwe Isabenö Jo̧ Diosnö dösödobö jo̧be, otiwanö ökwönö ösödö, israel jojodö la'aka tjuluwo̧ bakibanö kwöbamatobö ujuninobetjö̧. Jau Salomon, ba̧kwelöjatebö jwaikwöda israel jojodönö ile nibebö jo̧ Isabenö Jo̧ma, ja̧danö israel jojodönö ile niebobetjö̧, ökwönö 'da̧batö ujuninobe, israel jojodötjö inesö la'aka luwo̧ ja̧nö, jweinö otiwanö lȩekwa yökawakobetjö̧, —jö̧ba̧lö yöja̧linobe Saba niji la'aka luwujuma.

¹⁰ Ja̧danö, jejenö yöba̧laju, jichejebina jawatjö jiyinobe Salomonnö. Orotjö, cuatro mil kilo jenanö jiyinobe, ja̧danö nöinö mikwawi̧ inawiyabi jiyinobe, ja̧danö jwiinö nöinö mikwawi̧ omewi̧ jawabi jiyinobe. Isabenö nöinö omewi̧ jawa Salomonnö jiyinobe ja̧ mölema, ja̧ möletjö baikwö bajalenö, la'akatjöda nöinö omewi̧ jawa jichejebinajaye ichejeböködö jojodöma, isabenö yelösöda nöinö jichejebinobetjö̧.

^11-13 Ja̧danö, ba̧kwelöjatebö ju'wedö luwedönö a'dȩlökönö iyi̧danö, Saba niji la'aka luwujunöbi otiwanö iyinobe Salomonma, ja̧danö jemi tupakwö, okobe jwiinö ju'wi jaye Salomonnö ajebi̧ jawabi a̧'dȩlökönö iyinobe. Ikenama, ö̧jelö lajebinobe jö̧möayedökwö, jadanö jitebobe jȩwa̧jinobe. Ju'wibi, nöinö ju'wi teabi israel nijibe ichibinobe, Salomon la'aka luwo̧ öjenama. Tiro comunidad la'aka luwo̧ Hiram itea isowibiyanö, Ofir nijitjö nöinö oro tjichejebinobe, ja̧danö ju'wibi nöinö sandalo towi okwi'iju tjichejebinobe, ja̧danö nöinö mikwawi̧ inawiyabi tjichejebinobe. Ja̧danö, ja̧ tjichejebina towi okwi'ijutjö, Isabenö Jo̧ eju okwi'iju baibanö otidinobe, jadanö iteda eju okwi'iju baibanö otidinobe. Ja̧danö, ju'wibi lo̧awa jawa arpabi, lirabi, nöinö ja̧ sandalo towi ötebiyatjö otidinobe, lo̧awa luwedö lo̧tjakobetjö̧. Isabenö nöinö towi okwi'iju tjichejebinobe Salomon ö̧jenama, jemi ikenama baikwö bajalenö, la'akatjöda ja möle nöinö tjichejebinadanö, sandalo towi okwi'iju ichejeböködö israel nijibema.

Salomon nöinö ujuna̧lina jawa

¹⁴ O̧ba bakwabakwena, nöinö oro eminobe Salomonma, o̧ba bakwabakwena, veintidos mil kilo jenanö, oro eminobe Salomonma.

¹⁵ Ju'wibi, o̧ba bakwabakwena, Salomon ömöayedöma ba̧kwelöjatebö nöinö impuestos ötjabi̧ balada tjimidinobe, nöinö kwebachö tea iyabidöbi, ju'wedö tea iyabidöbi, arabe jojodötjö la'aka luwedöbi, israel nijitjö gobernadorbedöbi. Jo̧kwajabetjö̧ ju'wi emaja̧kwö, ömöayedö tjimidaja̧kwö, o̧ba bakwabakwena isabenö yelösöda nöinö oro eminobe Salomonma.

¹⁶ Ja̧danö, orotjö nöinö otidinobe Salomonma, tjöekwa öpibiya doscientos öpiawi̧ otidinobe. Ba̧kwapikwena, seis kilo ja'ö orotjö bȩbö otidinobe.

¹⁷ Ja̧danö ju'wibi, tjöekwa öpibiya pjei̧ öpibiyabi otidinobe, trecientos öpibiyama. Ba̧kwapikwena, kilo ja'ö orotjö bȩbö otidinobe. Ja̧danö, okobe jwiinö ja̧ tjöekwa öpibiya otidajo̧, otiweju Libano niji teboseju ötjabejunö ujuninobe.

¹⁸ Ja̧danö, ju'wibi, inesö la'aka luwo̧ ö̧baka wa̧kwawakabi otidinobe. Jakama, marfiltjö otidinobe, jadanö otidajo̧, wamenö bakwa̧i̧ oro pöebinobe.

¹⁹ Ja̧ wa̧kwawaka tjo̧ma'a pjaeba̧lemima, ö̧sö̧pöinö olewinö otididinobe, ja̧danö tjöja pjaeba̧lemibi ji̧nö otidinobe. Ja̧danö, bakwachakabi, bakwachakabi didiba o̧'wo jawa ji̧nö otidinobe. Ja̧danö, ja̧ka öba badeibö, nöchawemi, jelemutjö bakwöta jawa öliya ji̧nö otidinobe.

²⁰ Ja̧danö, ötöliya nönö ja̧ta̧ba̧lö nöchawemi otidinobe, bakwachobebi, bakwachobebi didiba o̧'wo jawa ji̧nö otidinobe, nöchawemi a̧li̧nösamutjö du̧ju̧taja didibadö tjo̧'wo jawa ji̧nö. Ja̧danö, ja̧ Salomon inesö la'aka luwo̧ iteaka otidinajayema, jwiinobe bö̧jetjöma, jelo̧ la'aka luwo̧ bakwo̧bi otidinadanö otidinokobe.

²¹ Ja̧danö, okobe jwiinö Salomon itea dȩja̧'dijuma, bakwainö orotjö otikwa o̧'dijuda ujuna̧linobe, jadanö okobe jwiinö iteda eju, Libano niji teboseju ötjabejunö dȩja̧pi̧ya ujuna̧li̧bi, bakwainö orotjö otikwa ö̧piyada ujuna̧linobe. Ja̧ Salomon ö̧jina mölema, yelösöda nöinö tjujuna̧linobetjö̧, orotjöda tjotidinobe Salomon eju jawama, —Platama mikwawökö ji̧, —jö̧ba̧lö.

²² Isabenö jwiinö tea luwo̧ ö̧jinobe Salomonma. Ömöledöso̧ Hiram isowibiya nöinö itea ichejebinobe, ja̧danö ju'wibi iteda itea isowibiya owiyawi̧ ujuna̧linobe Salomonma, jwaibalawanö kweachowibiyama. Ja̧danö, tea emö, ja̧ isowibiyanö ödö kwetjachinobe Salomon ömöayedöma, ja̧danö emö kwebachajadö, o̧ba wapöbakwakwena tjitebokwö tjebachajö tjichibinobe, ja̧danö tjichibenama, nöinö orobi, platabi, marfilbi, wa̧wa̧lidönöbi, pavos real ötjabawö̧nöbi tjichejebinobe, isabenö nöinö ujuna̧linobe Salomonma.

²³ Ju'wedö bö̧jȩnö ju̧kwadötjö la'aka luwedö tjujuna̧li̧tjö bajalekwönönö, nöinö ujuna̧linobe Salomonma, jadanö jobadötjö bajalekwönönö, waisanö omukwato̧ ö̧jinobe.

²⁴ Diosma isabenö otiwanö pjaatinobe Salomonnö, inesö jwiinö waisanö omukwato̧ baibobö, ja̧danö jejenö pjaatiawö̧, bö̧jȩ ba̧kwemeachibanö ju̧kwadöma Salomon öba a'o tjichibobö tjösödinobe, Salomon waisanö omukwatö yöawi̧ tja̧ja̧kwakobetjö̧.

²⁵ Ja̧danö, o̧ba bakwabakwena, jelobetjö ichajadö Salomon öba a'o tjichibobö tjichenama, Salomonnö tjiyakwa̧ jawabi tjichejebinobe, platabi, orobi, kamiji̧do̧bi, ölakwabikwawa jawabi, omewi̧ jawabi, kabayudönöbi.

²⁶ Ja̧danö, ju'wibi eminobe Salomonma: Nöinö ölakwabikwawa kolukiyabi, ba̧jȩkwadö kabayudönöbi eminobe. Kolukiyama, mil cuatrocientos jenanö eminobe, jadanö kabayudönö doce milbedönö eminobe, ja̧danö emajo̧, iteda ö̧jemi Jerusalennöbi, ju'wi 'da̧batö ujunaja̧ comunidadnöbi ujuninobe.

²⁷ Ja̧ möle la'aka luwo̧ Salomonma yelösöda nöinö plata ichejebinobe, ja̧danö nöinö ichejebinobetjö̧, inawiya ba̧jȩkwi̧danö ba̧jȩkwinobe platama, platama ile seinö baibenanö kabatö. Ja̧danö ju'wibi, jwiinö nöinö cedro towi okwi'iju jelobetjö ichejebinobetjö̧, a̧dekwanö Juda niji ba̧ba̧lawobe pokwi̧ sicamoro towi okwi'iju ba̧jȩkwi̧danö, cedro okwi'ijubi ba̧jȩkwachibanö ichejebinobe. Ja̧ jawa nöinö mikwawijayonö, nöinö mikwawökö ji̧danö ichejekwinobe, Salomonma isabenö nöinö ujuna̧linobetjö̧.

^28-29 Ja̧danö Salomon kabayudönöbi, kolukiyabi emina labebö loawama, baikwö laebobe: La'aka luwo̧ Salomon ömöayedö midö emadöma, Egipto nijitjöbi, Coa nijitjöbi midö tjeminobe. Egipto nijitjö kolukiya emö, kolukakwena seiscientos plata ö̧pibiya tjimidinobe, ja̧danö kabayukwena, ciento cincuenta plata ö̧pibiya tjimidinobe. Jobekwö Salomon ömöayedö midö emadöma kabayudönöbi, kolukiyabi midö tjeminobe, tjuluwo̧ Salomon ujuna̧lobö, ja̧danö ju'wibi nöinö midö tjeminobe, yadakwö hititas jojodötjö la'aka luwedönöbi, siria jojodötjö la'aka luwedönöbi mikwanö tjiyakobetjö̧.