1 Reyes 1 - Dios Iwene

David pöe baibina jawa

¹ Israel jojodötjö inesö la'aka luwo̧ Davidma, jwiinö pöe baibinobe. Ja̧danö, pöe öwaekwenama, tuba'woi̧ jwibö, jwaikwöda tiyuwo̧da ö̧binobe. Tiyuwiawö̧, ömöayedöma nöinö sabana'wijunö tjuluwo̧nö jwatjebinobe, jo̧kwaijayonö ina jwaikwöda tiyuwo̧da ba̧nö tjö̧bawo̧ ö̧binobe.

² Jejenö ö̧biawö̧, jobanö pjatjatakwa̧ omukwatö yötja̧linobe Davidnö: —La'aka duluwo̧ David, dedemi bakwuju ina i̧so̧kwö jö̧kujunö disakwobö jo̧be, kwömöayuju bajibanö ökwönö jiteada̧lobö. Ja̧danö, kwömöayujudanö kwilekwo jö̧jobetjö̧, ökwökwö kwitea camapjonö abö, tuba'woi̧nö pjajatena, tiyuwo̧ kwö̧japji jö̧ba̧lö, —yötja̧linobe.

³ Yötja̧liökwe, ösödinobe Davidma, jo̧kwajabetjö̧ israel niji ba̧kwemeachibanö ömöayuju bajibakwujunö tjisakwinobe, möayuju jwiinö otiwujunö tjöbadekwajobö. Jejenö isakwajadö, Sunem comunidad jojosuju Abisag mikwujunö tjöbadekwajinobe, ja̧danö badekwajadö, la'aka luwo̧ David ö̧jobekwö öbibö tjichejebinobe.

⁴ Isabenö otiwuju jö̧jinobe Abisagma, ja̧danö David ömöayuju babibö, jo̧banö jiteada̧linobe. Jo̧kwaijayonö, ömöayujudanö ilekwo jö̧jijayonö, la'aka luwo̧ Davidma jobujunö ö̧jinokobe.

Adonias la'aka luwo̧ baibobö isakwina jawa

^5-7 Ja̧danö, ja̧ möle jenanö, baikwö baledinobe: David ilekwo Jaguit mikwuju jitji̧ Adonias mikwo̧ma, inesö la'aka luwo̧ baibobö omukwatinobe. Jo̧ba Adonias mikwo̧ma, David itji̧ Absolonnö 'yaebaja̧ ikena 'yaebinökwe, ja̧danö wamenö jwiinö otiwo̧ ö̧jinobe Adonias mikwo̧ma. Ju'wibi, abe'do David la'akatjöda jwebebö yöawinökökwe Adoniasnöma, la'akatjöda jo̧banö jwebebö, —Sulabenö ja̧köba, tajawedö jejenö ja̧köbobeda, —jö̧ba̧lö la'akatjöda abebö a̧ja̧kwö yöbawiainokobe. Ja̧danö, ötjöda inesö la'aka luwo̧ batibakwo̧sa jö̧ba̧lö, ölakwabikwawadö tjuluwo̧ Joabkwöbi, Diostjö jojodötjö ö'weje pjabato̧ Abiatarkwöbi yöa̧lakwawinobe, jo̧ba ömöayedö babibö, la'aka luwo̧ baibanö pjatjatobö. Ju'wibi, koluka eminobe, jadanö kabayudönö wa̧nö ölakwabikwawadönöbi, ömöayedö jo̧banö tjöbeba̧lö teada̧ladö cincuentabedönöbi weinobe, inesö la'aka luwo̧ kweachi̧danö kweachakobetjö̧.

⁸ Jo̧kwaijayonö, Abiatarbi, Joabbi Adoniasnö pjatjatinajayonö, Diostjö jojodötjö ö'weje pjabato̧ Sadocbi, Davidnö tjöbeba̧ladö la'aka tjuluwo Benaiasbi, Dios yöawi̧ yöbawo̧ Natanbi, Simibi, Reguibi, ju'wedö David ömöayedötjö inesö juluwadö ölakwabikwawadöbi, Adoniasnö pjatjatinokobe.

⁹ Jemi ikenama, Enroguel comunidad yöneawinö ji̧nawa Zojelet ötjabawa inawatjö, Adoniasma pakayadönöbi, obejadönöbi ju'wedö o̧tewadönöbi kwabö juwö Diosnö iyinobe, otiwanö inesö la'aka luwo̧ babibo̧sa, jö̧ba̧lö. Jadanö, öja̧wo̧dö ju'wedö David itji̧munöbi, David ömöayedö Judasaso jojodötjö la'aka luwedönöbi a̧debinobe, la'aka luwo̧ baibi̧ jawa ba'ali jo̧bakwö tjukwobö,

¹⁰ jo̧kwaijayonö Dios yöawi̧ yöbawo̧ Natannöbi, Benaiasnöbi, ju'wedö David ömöayedötjö inesö juluwadönöbi, öjawo̧ Salomonnöbi a̧debinokobe Adoniasma.

Kwitji̧ Adoniasma la'aka luwo̧ baibobö isakwo̧, jö̧ba̧lö Davidnö yötjawina jawa

¹¹ Jejenö baledobetjö̧, Dios yöawi̧ yöbawo̧ Natanma Salomon ojo'do Betsabenö yöalinobe: —La'aka duluwo̧ David wajwionö, itji̧ Adoniasma inesö la'aka luwo̧ baibajabe, ja̧ baledaja̧ wene kwa̧ja̧kwajökiji̧?

¹² Ja̧ baledi̧ma inesö labi̧ ökwönöbi, kwitji̧ Salomonnöbi Betsabe, jo̧kwajabetjö̧ otiwanö ja̧köbakwa̧ baikwö yötawakwö, ökwönöbi, kwitji̧nöbi kwabö lotjapji jö̧ba̧lö.

¹³ Babeda juluwanö kwilekwe La'aka Luwo David ö̧jobekwö kwi̧'yo, jadanö jo̧banö yöka̧lo baikwö: –Chuluwo chilekwe David, damötjö̧ ötjö kwömöayujunö yöbawö kwujuninobe, -Ö'wö batibaja̧ ikenama, kwitji̧ Salomonda chö̧jinemi inesö la'aka luwo̧ baibakwo̧, jo̧bada inesö la'aka luwo̧ iteakanö öbakwo̧, -jö̧ba̧lö yöbawö kwujunijatö, jö̧tö? Jo̧kwaijayonö jelo̧ Adoniasda inesö la'aka luwo̧ baibajabe, tajawedö jejenö baledobö weköbaja̧da? –jö̧ba̧lö yöka̧lo.

¹⁴ Ja̧danö, ina jo̧bakwö yöba̧lakwawö kwö̧jemi ja'ötjö, ötjöbi ichibö yötawakwo̧sa, isabenö yöka̧laja̧danö baledobe, jö̧ba̧lö, —weinobe Natanma.

¹⁵ La'aka luwo̧ Davidma jwiinö pöe ö̧jinobe, ja̧danö Abisagma jo̧banö te'ada̧lö jö̧jinobe abȩko̧nö. Natan weoko, Betsabema jilekwe David abȩko̧ tebachö ji̧'yinobe, jo̧bakwö yöja̧lakwawobö,

¹⁶ ja̧danö ichibaju, jilekwe David öba a'o juu nijakwö bȩbachibö jösödinobe, —La'aka chuluwo̧ja, —jö̧ba̧lö. Jejenö jichibiökwe, la'aka luwo̧ Davidma abebö a̧ja̧kwinobe, —Kwösödi̧ma di̧yada chilekwo? —jö̧ba̧lö.

¹⁷ Abebö a̧ja̧kwioko, —Chuluwo̧, damötjö ötjö kwömöayujunö yöbawö kwujunijatö, –Ö'wö batibenama, la'aka luwo̧ chö̧jemi isabenö kwitji̧ Salomonda la'aka luwo̧ baibanö ö̧jakwo̧, jo̧bada chiteaka inesö la'aka luwo̧ ö̧bakanö öbamatakwo̧, –jö̧ba̧lö yöbawö kwujunijatö.

¹⁸ Jejenö yöbawö kwujuninajayonö, baikwö yötawakwö chuluwo̧, wajwiköbonö, Adoniasma la'aka luwo̧ baibajabe.

¹⁹ Jau, ba̧jȩkwadö pakayadönöbi, obejadönöbi, ju'wedö o̧tewadönöbi kwabö juwö iyajabe, ja̧danö okobe deinö ju'wedö ökwö inesö la'aka luwo̧ kwitji̧munö ba'ali tjujunobö a̧debajabe, ja̧danö ö'weje pjabato̧ Abiatarnöbi, ölakwabikwawa jojodö la'aka tjuluwo̧ Joabnöbi a̧debajabe, ichö tjukwobö. Jo̧kwaijayonö, ju'wedönö a̧debijayonö kwömöayo̧ kwitji̧ Salomonnö a̧debökötö, ichö jobadökwö ba'ali ujunoböma.

²⁰ Ja̧danö chuluwo̧ inesö la'aka luwo̧, jejenö balediawö̧, okobe deinö israel jojodöma ökwö yökawi̧ tjiteada̧lobe, kwö̧baja̧ ikenama, diteda la'aka luwo̧ baibakwojobö jö̧ba̧lö yökawakobetjö̧.

²¹ Ja̧danö, kwö̧baja̧ ikena la'aka luwo̧ baibakwo̧nö yökawökötjö̧ma, isabenö wene baibakobe chuluwo̧. Jau, chitji̧ Salomonda inesö la'aka luwo̧ baibakwo̧, jö̧ba̧lö yöbawö kwujuninajayonö, ö'wö bakibaja̧ ikena wainö baledena, Adoniasda la'aka luwo̧ ö̧bobetjö̧, ötjönöbi chitji̧ Salomonnöbi kwabö lotjena, –Bidöma la'aka luwo̧ Adonias öpöjojodö, —jö̧ba̧lö yöjawinobe Betsabema.

²² Jejenö la'aka luwo̧ Davidkwö yöja̧lakwawemi ja'ötjö, Dios yöawi̧ yöbawo̧ Natanma Davidnö yöawobö ichibinobe.

²³ Ichibiawö̧, la'aka luwo̧ David ömöayedöma Davidnö yötjawinobe, —Duluwo̧, Dios yöawi̧ yöbawo̧ Natanma ökwönö yöbawö ichajabe, —jö̧ba̧lö. Ja̧danö, Natan la'aka luwo̧ David öba a'o teachenama, öba nijakwö bȩa̧chibinobe, —Chuluwo̧ja, —jö̧ba̧lö.

²⁴ Ikenama, Natanma abebö a̧ja̧kwinobe Davidnö: —Chuluwo̧ inesö la'aka luwo̧, ökwöma yökawaji̧, –Chö̧baja̧ ikenama, chitji̧ Adoniasma inesö la'aka luwo̧ baibakwo̧, jo̧bada chiteaka inesö la'aka luwo̧ ö̧bakanö öbamatakwo̧, –jö̧ba̧lö yöka̧laji̧?

²⁵ Jobekwö yöka̧lajobedanö, kwitji̧ Adoniasma Enroguelbe i̧'yajabe, ja̧danö jobetjö ba̧jȩkwadö pakayadönöbi, obejadönöbi, ju'wedö o̧tewadönöbi kwabö juwö iyajabe, ja̧danö okobe deinö ökwö duluwo̧ itji̧munöbi, ölakwabikwawadö tjuluwedönöbi, ö'weje pjabato̧ Abiatarnöbi a̧debajabe. Ja̧danö jejenö a̧dabajawö̧, jo̧ba öba a'o kwanöbi, owöbi ba'ali tjujunobe, ja̧danö jo̧banö yötja̧lobe, –Lekwe möle Adonias duluwo̧ ö̧jobö dösöda, –jö̧ba̧lö.

²⁶ Jo̧kwaijayonö ju'wedönö a̧debajayonö, ötjö kwömöayo̧nöbi, ö'weje pjabato̧ Sadocnöbi, ökwönö tjöbeba̧lö teada̧ladötjö la'aka tjuluwo̧ Benaiasnöbi, kwitji̧ kwömöayo̧ Salomonnöbi a̧debökötö.

²⁷ Ja̧ baledaja̧ma, ökwöda weköbaji̧? Ökwödö kwömöayedönö, ökwö ikena la'aka luwo̧ öbamatakwo̧nö yökawököjayonö, jo̧ba Adoniasnö la'aka luwo̧ baibobö weköbaji̧? —jö̧ba̧lö abebö a̧ja̧kwinobe Davidnö.

²⁸ Abebö a̧ja̧kwiökwe, La'aka luwo̧ Davidma weinobe ömöayedönö, —Betsabenö jwöbaduwi, tjebachajö chö̧jobekwö jichobö, —jö̧ba̧lö. Weoko, David öba a'o ichibö jöjamatinobe,

²⁹ ja̧danö la'aka luwo̧ Davidma jobujunö yöbawö junö yöa̧linobe: —Chilekwo, Isabenö Jo̧ma isabenö 'yaba̧lö jo̧, jo̧bama okobe jwiinö labi̧ jawa chöbaledinatjö chö̧ji̧binö pjabato̧, jadanö baikwö yöbawö junö yötawakwö: Jo̧ba Isabenö Jo̧ öba a'otjö, isabenö yötawakwö:

³⁰ Damötjö israel jojodö tjuluwo̧ Isabenö Jo̧ Dios öba a'otjö ökwönö yöbawö chujunijatö, –Isabenö kwitji̧ Salomonda chö̧baja̧ ikena inesö la'aka luwo ö̧bakwo̧ma, chiteaka la'aka luwo̧ ö̧binakanö, jo̧bada öbamatakwo̧, –jö̧balö yöbawö chujunijatö. Ja̧danö, babe möleda, ja̧ yöbawö chujunina badekwachinö wetakwo̧sa, —jö̧ba̧lö yöbawö ujuninobe.

³¹ Yöawoko, Betsabema jöba nijakwö bȩjachibinobe David öba a'otjö, jadanö ösödö yöja̧linobe, —Chuluwo la'aka luwo̧ David, lekwe möle inesö la'aka duluwo̧ kwö̧jobö chösöda, —jö̧ba̧lö.

³² Jemi ikenama, Davidma iteda ömöayedönö weinobe, —Jwököbaduwo ö'weje pjabato̧ Sadocnöbi, Dios yöawi̧ yöbawo̧ Natannöbi, tjöbeba̧lö teada̧ladö tjuluwo̧ Benaiasnöbi, chöba a'o tjichibobö, —jö̧ba̧lö. Jwöiawö̧, David öba a'o tjichibinobe,

³³ ja̧danö ichibajadönö weinobe: —Ötjö kwuluwo̧duwi chömöayedö la'aka luwedönö öbibö, chitji̧ Salomonnö chajwi kabayunö öwobö weköbaduwo, ja̧danö chajwi oma'anö öwonö, jobadönö ökibaduwo, Guijon ojwese'dobe.

³⁴ Jobe Guijon ojwese'dotjö, ö'weje pjabato̧ Sadocbi, Dios yöawi̧ yöbawo̧ Natanbi Salomon uunö o̧te totjebakobe, –Isabenö bite Salomonda israel jojodö la'aka tjuluwo̧ baibajabe, –jö̧ba̧lö. Ja̧danö trompeta, pjuköbaduwobö jakobe, –Lekwe möle Salomon la'aka duluwo̧ ö̧jobö dösöda, –jö̧ba̧lö.

³⁵ Ikenama, tjebachajö jo̧bakwö kwichaduwo baikwö, chiteaka la'aka luwo̧ ö̧binakanö öbamatakobetjö̧. Jau, jo̧bada chö̧binemi balekwo̧ baibanö, inesö la'aka luwo̧ baibanö öbamatakwo̧ma, –Salomonda israel niji jojodöbi, juda niji jojodöbi inesö la'aka tjuluwo̧ baibanö ö̧bakwo̧, –jö̧ba̧lö webö yötawinobetjö̧, —jö̧ba̧lö weinobe Davidma.

³⁶ Jejenö weiökwe, Benaiasma atadinobe, —Otiwa, ja̧danö ökwö la'aka chuluwo̧ kwösödökwe, duluwo̧ Isabenö Jo̧ Diosbi, yöka̧lala̧danö weobö chösöda.

³⁷ Jau chuluwo̧, Isabenö Jo̧ma isabenö ökwökwö ja̧nö, otiwanö pjabatö jo̧, jadanö ökwökwö janö pjaati̧danö, kwitji̧ Salomonkwö janö pjaatobö chösöda. Jau David, isabenö kwitji̧nö pjaatobö chösöda, ökwö kwujulutjö bajalekwönönö juluwo̧ baibenanö, kwitji̧ Salomonnö pjaatobö chösöda, —jö̧ba̧lö yöa̧linobe Benaiasma.

³⁸ Jemi ikenama, David weaja̧danö, ö'weje pjabato̧ Sadocbi, Dios yöawi̧ yöbawo̧ Natanbi, Benaiasbi, ömöayedö la'aka luwo̧nö tjöbeba̧lö teada̧ladöbi Salomonnö tjöwaninobe, inesö la'aka luwo̧ David ajwi kabayu oma'anö, jadanö jo̧banö öbibö tji̧'yinobe Guijon ojwese'dobe.

³⁹ Jobe ichibajadö, ö'weje pjabato̧ Sadocma, Dios ejutjö ichejebaja̧ o̧tȩsa̧yunö, Salomon uunö o̧te toebinobe, jadanö trompeta pjutjinobe, jadanö okobe deinö jobe ju̧kwadö jojodöma jwötjeba̧linobe, —Inesö la'aka duluwo̧ Salomon, lekwe möle duluwo̧ ö̧jobö dösöda, —jö̧ba̧lö.

⁴⁰ Ja̧danö, jobetjö tjebachajö, la'aka luwo̧ ejube ȩwa̧bijenama, okobe deinö jojodöma Salomon ökömanö lutjinobe. Jwiinö tjo'wo ösöwachibanö flauta pjuböbi, labinö tjo̧'wo ösöwachibanö jwöbeba̧löbi tjetjachajinobe, isabenö labinö ökwöinö tjetjachajinobe, nijibi tjö̧awenanö baibanö.

⁴¹ Ja̧ baledi̧ma, Adoniasbi, a̧debaja̧wö̧bi kwanö katjatajena, baledinobe. Ja̧danö trompeta pjutjobe a̧ja̧kwö, Adoniaskwö jo̧ Joabma abebö a̧ja̧kwinobe, —Comunidadtjö, tajawedö labinö ökwöobeda, —jö̧balö.

⁴² Ina abebö a̧ja̧kwemi ja'ötjö, ö'weje pjabato̧ Abiatar itji̧ Jonatan mikwo̧ma ichibinobe. Ichibiökwe, Adoniasma jo̧banö yöa̧linobe, —Tebachi chömöledöso̧, ökwöma isabenö otiwanö tjomukwatökweja, otiwa jawa wene yöbawö kwichaji̧? Yöbawi, —jö̧ba̧lö.

⁴³ Jo̧kwaijayonö, —Otiwa jawa wene yöbawö kwichaji̧, —jö̧ba̧lö abebö a̧ja̧kwiökwe, —Otiwa jawa wene yöbawö ichö̧kö̧sa. Inesö la'aka duluwo̧ Davidma, kwöjawo̧ Salomonnöda ujunajabe, inesö la'aka luwo̧ baibanö.

⁴⁴ Jau, la'aka luwo̧ Davidma, ö'weje pjabato̧ Sadocnöbi, Dios yöawi̧ yöbawo̧ Natannöbi, Benaiasnöbi, ömöayedö la'aka luwo̧nö tjöbeba̧lö teada̧ladönöbi weajabeta, Salomonkwö tji̧'yoböma. Weiawö̧, Salomonnö wetjatö, la'aka luwo̧ ajwi kabayunö öwobö,

⁴⁵ ja̧danö Guijon ojwese'dotjö Sadocbi, Natanbi Salomon uunö o̧te totjebajabeta, inesö la'aka luwo̧ baibanö. Ikenama jobetjö tjebachajö, David ejube tjo̧'wo ösöwachibanö nöchö tji̧'yajabe. Jejenö balediawö̧, okobe deinö comunidad jojodöma tjo̧'wo ösöwachibanö jwötjeba̧lobe, ja̧danö ja̧ baledi̧ ökwöi̧da kwa̧ja̧kwaduwajabe.

⁴⁶ Ju'wi baledaja̧bi yötawakwö, Salomonma ida̧ökö inesö la'aka luwo̧ iteakanö öbamatajabe,

⁴⁷ ja̧danö duluwo̧ la'aka luwo̧ David ömöayedötjö la'aka luwedöma, ida̧ökö David öba a'o ichibö yötja̧lajabe, –Kwitji̧ma otiwanö duluwo̧ baibajabe, ja̧danö kwuluwo Dios isabenö jo̧banö pjaatobö dösöda, ja̧danö ökwönö tja̧ja̧kwinatjö bajalekwönönö, okobe deinö kwitji̧ Salomonnö tjaja̧kwobö dösöda, ja̧danö ökwö kwujulutjö bajalekwönönö, juluwo̧ baibanö Salomonnö pjaatobö dösöda, –jö̧ba̧lö yöba̧lö tjichibajabeta. Ja̧danö, ju'wibi, la'aka luwo̧ Davidma, camapjonö ba̧nö, Salomonnö ösödö bȩachibajabeta,

⁴⁸ ja̧danö yöa̧latö baikwö: –Isabenö israel jojodö dösödökwe Isabenö Jo̧ Diosnö dösödobö jo̧be, otiwanö pjabato̧, jö̧ba̧lö. Jau, babe möle otiwanö chö̧baja̧ ikena la'aka luwo̧nö, chiteaka la'aka luwo̧ chö̧binakanö öbamatobö weajabe, ja̧danö ja̧ baledi̧ma, wotakwa̧ abönö cho̧'wo ösöwachibanö chedajabe, –jö̧ba̧lö ösödö yöa̧latö Davidma, ja̧ baledaja̧ weneda yöbawö chichajabe, —jö̧ba̧lö atadinobe Jonatanma.

⁴⁹ Jonatan jejenö yöa̧liawö, jwiinö yetjaibinobe, Adonias a̧debajawö̧ jo̧bakwö ba'ali junajadöma. Okobe deinö a̧la̧ibö, tjipjelekwachinö latjebinobe.

⁵⁰ Adoniasbi yeaibinobe, —Chöjawo̧ Salomonma ötjönö ölabena, —jö̧ba̧lö, jo̧kwajabetjö̧ a̧la̧ibö, Dios ejube i̧'yinobe, jadanö Diosnö iyawötenö ji̧ ö'yekiyanö do̧a̧linobe, —Diosnö iyawötenö chö̧jiawö̧, ötjönö kwabö lotjökena, —jö̧ba̧lö.

⁵¹ Jejenö ja̧iawö̧, ju'wedö yötjawinobe Salomonnö, —Kwöpöe Adoniasma ökwönö yeabobe Salomon. Jau, Diosnö iyawötebe 'ya̧nö, iyawöte ö'yekiya do̧a̧lajabe, ja̧danö do̧ba̧lajo̧, yöa̧lajabe, –Inesö la'aka luwo̧ Salomon, ötjö iteda ömöayo̧nö dösölöjinö ö̧jakwa̧ wene yöbawö ujunobö chösöda, la'akatjöda ötjö jo̧ba ömöayo̧nö kwölöte'onö kwabö loökakwo̧, jö̧ba̧lö yöbawö ujunobö chösöda, –jö̧ba̧lö yöa̧lajabe, —jö̧ba̧lö Salomonnö yötja̧linobe.

⁵² Jejenö yötja̧liökwe, Salomonma atadinobe: —Isabenö yötawaduwakwö, Adoniasma isabenö chömöayo̧ otiwo̧ ö̧jitjö̧ma, isabenö ja'yubebi sulabenö ja̧tökakwo̧sa jo̧banöma. Jo̧kwaijayonö, chömöayo̧ sulabo̧ ja̧nö, sulabenö jaitjö̧ma, isabenö ö'wö baibakwo̧, —jö̧ba̧lö atadinobe.

⁵³ Yöba̧lajo̧, la'aka luwo Salomonma iteda ömöayedönö weinobe, Diosnö iyawötenö ö̧jelö Adoniasnö tjichejebobö, ja̧danö Salomon öba a'o ichibö, bȩachibinobe, —Chuluwoja, —jö̧ba̧lö. Ichibiökwe, —Kwejube da̧ji̧ chöpöe, —jö̧ba̧lö webö loinobe Salomonma.