1 Pedro 5 - Dios Iwene

Jesúsnö ösödadönö te'ada̧lakwawa luwedönö Pedro yöawina wene

¹ Ja̧danö, ökwödönö baledi̧ jawa omukwatö, ökwödötjö Jesúsnö ösödadönö te'ada̧lakwawa luwedönö baikwö yötawa: Jesúsnö ösödadönö otiwanö kwite'ada̧laduwo chömöledö. Jau chömöledö, ötjö Pedroma bakobe ökwödökwö Jesúsnö ösödadönö te'ada̧lakwawa luwo̧sa chömöledö, ja̧danö ökwödönö yötawi̧ma isabenö waisanö yötawobe. Ötjöma Cristokwö ja̧nö jo̧ba usula emawina chedijatö chömöledö. Ja̧danö ju'wibi chöwaisa, Cristoma iteda dejatinö ujulu i̧sebenama, ötjöbi ja̧ ujulu chujuna̧lakobe jö̧ba̧lö.

² Jo̧kwajabetjö̧ bakobe ökwödökwö te'ada̧lakwawa luwo̧ ja̧nö, kwujuluwaduwachibanö baikwö yötawa ökwödö te'ada̧lakwawa luwedönö: Diosma Jesúsnö ösödadönö kwite'ada̧laduwobö ujuninobetjö̧, jobadönö te'ada̧lö kwö̧jaduwo chömöledö. Ja̧danö jejenö kwite'ada̧laduwenama, öpöjödinö, Aaa, wetjökwechobetjö̧ chite'ada̧lo jö̧ba̧lömaökö chömöledö, te'ada̧lakwawa ösödö kwite'ada̧laduwo. Ja̧danö, sule balada kwemaduwotö jö̧ba̧löma kwite'ada̧laduwoko chömöledö, isabenö pjakataduwobö ösödö, jobadönö kwite'ada̧laduwo chömöledö.

³ Ja̧danö labinö weba̧löma kwite'ada̧laduwoko, otiwanö ja̧bö kwi̧sebaduwodönö, jobadöma ja̧bö kwö̧jaduwi̧ edö bakwainö ja̧bö tjö̧jakobetjö̧.

⁴ Jejenö ja̧bö kwite'ada̧laduwo chömöledö, ja̧danö inesö la'aka te'ada̧lakwawa luwo̧ yemidanö ichenama, ökwödönö inesö otiwaka salöinö bötjawaka iyakobe chömöledö, la'akatjöda salöi̧ tiibököka.

⁵ Ja̧danö ökwödö te'ada̧lakwawa luwedötjö ina möayedödanö ju̧kwadöma damöbedönö kwa̧ja̧kwaduwo. Ja̧danö, okobe deinö ökwödönö baikwö yötawa, möayedödanö te'ada̧lakwawa luwedönöbi, damö te'ada̧lakwawa luwedönöbi: Te'ada̧lakwawa luwedö kwö̧jaduwijayonö, labinö webökönö bakwo̧nökwena pjabatakwawö kwö̧jaduwo, chömöledö tjömöayo̧danöbo̧sa jö̧ba̧lö. Jau chömöledö, jejenö omukwatö kwö̧jaduwobö jo̧be, Dios iwene baikwö laebobetjö̧: Diosma otiwadösa jö̧ba̧lö omukwatadönö ölakwabikwawö ö̧jobe, jo̧kwaijayonö otiwadösa jö̧ba̧lö omukwatöködönö lȩlö̧jinö pjabato̧, jö̧ba̧lö.

⁶ Ja̧danö, jejenö jo̧betjö̧, Diosda juluwo̧ma, ökwödöma sule jo̧ba ömöayedösa jö̧ba̧lö kwö̧jaduwo chömöledö, ja̧danö iteda omukwatö ujunina möle badekwachenama, jo̧bada ökwödönö kabebö ujunakobe, Bidöma otiwadö, jö̧ba̧lö.

⁷ Ja̧danö chömöledö, ökwödöwe, dakwö ja̧dakwajö jö̧ba̧lö yekabiduwenama, Diosnö abebö yekabiduwi̧ iyö loköbaduwo chömöledö, jo̧bama isabenö ökwödönö ösödö ite'ada̧lobetjö̧.

⁸ Jweinö omukwatö eda̧lö kwö̧jaduwo chömöledö, kwöpöjojo Awetjama, ökwödönö suli̧ öwaedobö isakwobetjö̧. Kwöpöjojonö baikwö wanedö yötawa chömöledö: Didiba nöbo̧ma tulubö kwebacho̧, ukwakwo̧nö isakwö, ¿jö̧tö? Ja̧danö, Awetjama ökwödönö suli̧ öwaedobö isakwo̧ chömöledö, jo̧kwajabetjö̧ jweinö omukwatö eda̧lö kwö̧jaduwobö jo̧be.

⁹ Dios yöawi̧ jwaikwöda ösödö ja̧nö, Awetjakwö ölakwabikwawö kwö̧jaduwo chömöledö. Jau chömöledö, usula emawö jo̧bakwö ölakwabikwawö kwö̧jaduwijayonö, kwo̧'wo̧ tjo̧kekwaduwa chömöledö, kwöwaisaduwobetjö̧, usula kwemawaduwi̧ma, sule ökwödöda jawamaökö, kwömöledö böjȩ bakwameachibanö ju̧kwadö Jesúsnö ösödadöbi ökwödö usula demawi̧danö, bakobe ökwödökwö usula emawadö jö̧ba̧lö.

¹⁰ Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.

¹¹ Isabenö otiwanö pjabato̧ Dabe'doma, jo̧bada ba̧kwȩlö̧jatebö, kabatökönö inesö la'aka luwo̧ ö̧jobö jo̧be chömöledö, jejenö otiwa. Jau chömöledö, usula kwemawaduwijayonö, 'diinö ja̧nö jwaikwöda Diosnö kwo̧'wo̧ wana̧lö kwö̧jaduwo, ökwödönö te'ada̧lo̧ jö̧ba̧lö.

Pedro bajaleapo yöawina jawa

¹² Chömöledö, Silvano mikwo̧ pjaatonö, ja'yubeda ökwödönö chiwȩyudajabe chömöledö. Silvanonö chöwaisökwe chömöledö, dömöledöso̧ otiwanö Dios wei̧ otidö jo̧ jö̧ba̧lö, ja̧danö ökwödönö chiwȩyudobö pjaatajabe. Omukwatö chiwȩyudi̧ma, baikwö yötawa chömöledö: Ökwödönö kwujuluwachibaduwanö pjatatobö chösöda. Ja̧danö ökwödönö baikwö yötawobö chösöda: Chömöledö, chöwaisa, Dios lȩlö̧jinö edö otiwa jawa iyi̧ wenema, kwösödaduwi̧ weneda, ja̧ wene ösödö 'diinö kwö̧jaduwobö jo̧be. Ja̧ wenema isabenö wene chömöledö, jo̧kwajabetjö̧ ökwödönö chiwȩyudajabe, jweinö kwomukwataduwakobetjö̧.

¹³ Babilonia ödabemi comunidadnö ju̧kwadötjö Jesúsnö ösödadö ko̧ko̧kwö ba̧jadöma, ökwödödanö Dios omudawö ujuninawö̧ chömöledö, ja̧danö jobadöma ökwödönö debawö dokwa jö̧ba̧lö atjebobe, ja̧danö chitji̧danöbo̧ Marcos mikwo̧bi, debawö dokwa jö̧ba̧lö aebobe ökwödönö.

¹⁴ Kwömöledöduwinö du̧batö kwösödaduwo chömöledö, Jesúsnö ösödadö ösödabikwawö du̧batö dösödi̧danö. Okobe deinö ökwödö Cristonö dötewadö kwo̧'wo̧ luwo̧ ösöwachibanö kwö̧jaduwobö chösöda. Biya̧data.