1 Pedro 4 - Dios Iwene

Jesúsnö kwösödaduwobetjö̧, ajayinö ja̧bö kwö̧jinaduwi̧tjö wainö ja̧bö kwö̧jaduwo jö̧ba̧lö Pedro yöawina wene

¹ Ja̧danö chömöledö, Cristoma mölejȩbe ȩwa̧jakwa̧ abönö iteba'otjö usula emawinobe, ¿jö̧tö? Jau chömöledö, jo̧bama usula emawinobe, jo̧kwaijayonö usula emawijayonö jwaikwöda otiwanö ja̧bö ö̧jinobe, ¿jö̧tö? Ja̧danö, jo̧ba jejenö usula emawö jwaikwöda otiwanö ja̧bö ö̧jinobetjö̧, ökwödö babe usula emawadöma jo̧ba omukwatinadanö domukwataduwo chömöledö. Wanedö yötawa: Jo̧ba omukwatinama 'dudawaduwo, jo̧ba otiwanö ja̧bö ö̧jinadanö ökwödöbi otiwanö ja̧bö dö̧jakobetjö̧. Jau chömöledö, ökwödö Cristonö dösödobetjö̧ usula emawadöma sulabenö ja̧bö dö̧jina ida̧ökö kabatibinadösa,

² tupakwö diteba'onö dö̧jakwa̧ma jojodö ösödö ja̧tji̧danö ja̧bökönö, Diosda ösödi̧danö ja̧bö dö̧jakobetjö̧.

³ Jau chömöledö, Jesúsnö kwösödaduwakwa̧ abönö ökwödöma ida̧ökö yelösöda lekwe möle böjȩ jojodö sulabenö ja̧bö tjö̧ji̧danö ja̧bö kwö̧jinaduwobe. Jo̧kwajabetjö̧ tupakwö jejenö ja̧bö kwö̧jaduwobö jwiobe, tjo̧wi̧ta jö̧ba̧lö. Jau chömöledö, ökwödöbi ajayinöma kwi̧lȩkwa̧muböködönö ösödö ji̧aköbinaduwobe, ja̧danö kwi̧lȩkwa̧muböködökwö sulabenö ja̧bö ji̧aköbinaduwobe, ja̧danö 'dukwachawö̧ ji̧aköbinaduwobe, ja̧danö ju'wedökwö ju'wedökwö 'da̧'da̧bakwawö alewiaköbinaduwobe, ja̧danö nio ojwiyo kwowa̧laduwobö pjiesta juniaköbinaduwobe, ja̧danö jwiinö sulabenö ja̧bö o̧'wo̧ jawa ösödö ji̧aköbinaduwobe ajayinöma. Jejenö ida̧ökö yelösöda lekwe ja̧bö kwö̧jinaduwobe chömöledö, jo̧kwajabetjö̧ tjo̧wi̧ta jö̧ba̧lö ja̧ jawa ja̧bökönö kwö̧jaduwo chömöledö.

⁴ Jejenö sulabenö ja̧awa ösödadö böjȩ jojodöma chömöledö, ja̧danö, ökwödö Jesúsnö ösödadöma jobadö sulabenö tjalewi̧danö ja̧bö kwö̧jaduwiököwö̧, Diosnö wajwibadöma ¿tajawedö ja̧böködöjö? jö̧ba̧lö ökwödönö sulabenö yötja̧lobe.

⁵ Jo̧kwaijayonö, jobadöma Dios öba a'o tjö̧jakwedö chömöledö, ja̧tjina otiwinojobö, sulinojobö jö̧ba̧lö yöawakobetjö̧. Jau chömöledö, ina yaba̧ladönöbi, wobinadönöbi ja̧tjina wene yöawakwo̧ Diosma, otiwinojobö sulinojobö jö̧ba̧lö.

⁶ Jau chömöledö, Diosma okobe deinö jojodönö yöawakwo̧ ja̧tjina otiwojobö sulojobö jö̧ba̧lö, ida̧ökö wobinadönöbi, ina yaba̧ladönöbi. Ja̧danö, jejenö yöawakwo̧obetjö̧, jojodö otiwa jawa wene tja̧ja̧kwobö ösödo̧, ja̧ wene a̧ja̧kwö ösödö tjö̧jibobö. Jo̧kwajabetjö̧ wobinadöbi damötjö otiwa jawa wene yötjawi̧ tja̧ja̧kwinobe chömöledö, jobadöbi ja̧ wene ösödö, tjiteba'otjö okobe deinö böjȩ jojodö Dios lȩebi̧tjö wotji̧danö wotjijayonö, tjo̧'wo̧ luwo̧nöda Dios ö̧ji̧danö tjö̧jakobetjö̧. Jau chömöledö, Diosda ja̧bö dö̧ji̧ otiwojobö sulojobö jö̧ba̧lö yöbawo̧ma, jo̧kwajabetjö̧ jo̧ba ösödi̧danöda ja̧bö dö̧jobö jo̧be.

Ja̧bö kwö̧jaduwobö Dios iyi̧ma, otiwanö ja̧bö kwö̧jaduwo jö̧ba̧lö Pedro yöawina wene

⁷ Ja̧danö chömöledö, 'dö̧ibaji̧ möle yöneawachibobe. Jo̧kwajabetjö̧, jweinö omukwatö eda̧lakwawö kwö̧jaduwo, ja̧danö waisanö omukwatö Diosnö abebö kwö̧jaduwo.

⁸ Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.

⁹ Ja̧danö, öpöjödökönö, kwo̧'wo̧ ösöwanö kwejuduwinö tebatö kwite'ada̧laduwodönö kwömöledöduwinöma.

¹⁰ Diosma ökwödönö bakwo̧nökwena ja̧bö kwö̧jaduwobö iyinobe chömöledö, ¿jö̧tö? Jau chömöledö, ökwödönö bakwo̧nökwena iyinobe, jo̧kwajabetjö̧ ja̧ iyina jweinö omukwatö, ja̧bö kwö̧jaduwobö iyinadanö kwömöledöduwinö pjabatakwawö kwö̧jaduwo.

¹¹ Baikwö yötawa: Yöbawadöma, Dios yöawi̧ yötjawobö jo̧be, ja̧danö pjabatadöma, Dios ujulunö pjabatö tjö̧jobö jo̧be. Jejenö Dios iyinadanö ja̧bö kwö̧jaduwenama, Diosda ökwödönötjö pjaatobe jojodönö chömöledö. Ja̧danö Dios pjaati̧ edö okobe deinö Diosnö tjösödakobe, Jesucristo midawö woinobetjö̧ otiwanö pjabato̧ja jö̧ba̧lö. Jau chömöledö, Dabe'do Diosda ba̧kwȩlö̧jatebö dejatinö juluwo̧ma ja̧danö jo̧bada inesö la'aka luwo̧ma, babebi ba̧kwȩlö̧jateböbi, jejenö otiwa.

Ökwödö Jesúsnö ösödadöma usula demawakwedösa jö̧ba̧lö Pedro yöawina wene

¹² Chösödawö̧ chömöledö, kwöwaisaduwa, babe inia tjöbö usula kwemawaduwi̧ma, dakwö ja̧köbaduwojobö jö̧ba̧lö baledobe, ¿jö̧tö? Jau chömöledö, kwöwaisaduwa, isabenö Jesúsnö ösödadö usula demawobö jo̧be jö̧ba̧lö, jo̧kwajabetjö̧ jejenö baledenama, Ayö, biya̧ma ¿tajawedö baledobejö? jö̧ba̧lö omukwatöma kwo̧'wo̧ tjo̧kekwaduwa chömöledö.

¹³ Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

¹⁴ Jesúsnö ösödadö kwö̧jaduwobetjö̧ ökwödönö sulabenö yötja̧lena chömöledö. Jo̧kwaijayonö jejenö yötja̧liawö̧ kwo̧'wo̧ tjo̧achaduwoböma jwia, kwo̧'wo̧ ösöwanö kwö̧jaduwobö jo̧be chömöledö, Dios O̧'wo̧ Luwo̧ dejatinö juluwo̧ma ökwödönö pjabatö jo̧ jö̧ba̧lö.

¹⁵ Chömöledö, jelo̧nö kwabö lobajadö usula kwemawaduwitjö̧ma, ja̧danö ju'wi jaye naukwajadö usula kwemawaduwitjö̧ma, ja̧danö sulabenö ja̧bajadö usula kwemawaduwitjö̧ma, ja̧danö wene baibobö sulabenö yöba̧lajadö usula kwemawaduwitjö̧ma, ja̧ma taba lö̧ji̧ chömöledö, sulabenö ja̧köbaduwobetjö̧.

¹⁶ Jo̧kwaijayonö Cristonö kwösödaduwobetjö̧ usula kwemawaduwitjö̧ma, ja̧ma taba lö̧jökö ji̧ chömöledö. Jau chömöledö, Cristonö kwösödaduwobetjö̧ usula kwemawaduwenama, Diosnö kwösödaduwobö jo̧be, isabenö Cristonö chösödobetjö̧ usula emawo̧sa jö̧ba̧lö.

¹⁷ Jau chömöledö, isabenö usula demawobö jo̧be, 'dö̧ibaji̧ möle yöneawachibobetjö̧. Diosma jojodö ja̧tji̧ otiwinojobö sulinojobö jö̧ba̧lö tjo̧wi̧ jamatö yöawobö jo̧be, ja̧danö jejenö yöawakwa̧ma, iteda ömöledönö abönö yöawobö jo̧be. Ja̧danö chömöledö, ökwödö Dios lȩebi̧tjö ji̧badö jejenö usula demawobö ji̧tjö̧ma, ¡Ayö, Dios jawa otiwa jawa wene öpöjödadöwe! ¡Dios lȩebenama, jobadöma isabenö inesö labi̧ jawa tjemakwedöwe!

¹⁸ Dios iwene laebi̧danö jo̧be chömöledö, baikwö laebobe Dios iwenema: Sulabe jwibadöma Dios lȩebi̧tjö tjö̧jibijayonö usula emawö ju̧kwadö. Ja̧danö, jobadö ji̧badöma usula tjemawitjö̧ma, Diosnö öpöjödadönöma ¿dakwö baledakwa̧jö Diosnö öpöjödö sulabenö ja̧badönöma? ¡Jobadö usula tjemawitjö̧ bajalekwönönö nöinö usula tjemawakwedö! jö̧ba̧lö laebobe.

¹⁹ Jo̧kwajabetjö̧ chömöledö, Dios ökwödö usula kwemawaduwobö ösöditjö̧ma, Diosnö kwo̧'wo̧ wana̧lö usula emawö jwaikwöda otiwanö ja̧bö kwö̧jaduwo chömöledö, ökwödönö otidinama, jö̧a̧linadanö do̧'wo̧ luwo̧nö ite'ada̧lakwo̧ jö̧ba̧lö.