1 Pedro 3 - Dios Iwene

Tji̧lȩkwa̧munö juna̧ladönö Pedro yöawina wene

¹ Ja̧danö, ökwödö ya̧dötjö tji̧lȩkwa̧munö ba̧jadönö yötawa, Kwilekwe wei̧ a̧ja̧kwö kwö̧jaduwo, jö̧ba̧lö. Jau chömöledö, ökwödötjö ju'wedö tji̧lȩkwa̧muma Jesúsnö ösödöködö, jo̧kwaijayonö ina jobadö wetji̧bi kwa̧ja̧kwobö jo̧be, otiwanö kwilekwe wei̧ ja̧bö kwö̧ja̧duwi̧ edö, kwilekwe otiwanö omukwatakobetjö̧. Jau chömöledö, kwilekwema ajayinö otiwa jawa wene ösödököjayonö, otiwanö ja̧bö kwö̧jaduwi̧ edö, kwilekwema ösödena. Jau chömöledö, kwilekweduwi yöawakwawa tja̧ja̧kwököjayonö,

² bakwainö otiwanö ja̧bö kwö̧jaduwi̧ edö, ja̧danö Diosnö yebabinö ja̧bö kwö̧jaduwi̧ edö, jobadöbi bajaliyanö tjösödena.

³ Ja̧danö, ökwödö ya̧dö otiwanö kwotikwaduwobö jo̧be chömöledö. Jo̧kwaijayonö ja̧ otiwanö kwotikwaduwo yötawi̧ma, wame jawamaökö, tjöwö'ye otikwawa, ja̧danö sasiyu orotjö otikwayu nönakwawa, ja̧danö otiwado̧ 'duawakwawa jawama.

⁴ Ju'wida chömöledö ya̧dö inesö kwotikwaduwi̧ma, kwo̧'wo̧ luwo̧duwi jawada, dösölö̧jinö ja̧danö jwöjwöakwawa jwiinö ja̧kwawada. Jejenö tjotikwi̧ma, damö jawa jwöachökö ji̧ chömöledö, ja̧danö Dios edemi, inesö mikwawi̧ chömöledö.

⁵ Jau chömöledö, jejenö tjotikwinobe damötjö ji̧nadö jwaikwöda Diosnö tjo̧'wo̧ wana̧lö ji̧nadö ya̧döma, ja̧danö tjilekwekwena wei̧ a̧ja̧kwö tjö̧jinobe.

⁶ Sara mikwinujuma jejenö ji̧nuju chömöledö, jilekwe Abraham wei̧ ja̧ja̧kwinobe, chuluwo̧ja jö̧ba̧lö. Ja̧danö chömöledö, ökwödö ya̧dö yebabökönö jweinö ja̧bö kwö̧jaduwitjö̧ma, ökwödönö otiwanö omukwatö Sara ji̧tji̧mu tupadanö jojodö jö̧ba̧lö ötjabikobe ökwödönö.

⁷ Ja̧danö, ökwödö ömadötjö kwi̧lȩkwa̧munö ba̧jadönö yötawa, kwilekwokwö kwö̧jaduwi̧ma, dösölö̧jinö jabö kwö̧jaduwodönö. Ja̧danö, ya̧döma ömadö tjujuluwi̧danö juluwöködö jö̧ba̧lö kwöwaisaduwobetjö̧, kwilekwokwena otiwanö omukwatö kwite'ada̧laduwodönö chömöledö. Jau chömöledö, ökwödöma bakobe kwi̧lȩkwa̧muduwikwö Dios iyi̧ ja̧kwawa emadöja, jo̧kwajabetjö̧ jobadönö otiwanö omukwatö kwö̧jaduwo. Jau chömöledö, jobadönö sulabenö ja̧bö kwö̧jaduwitjö̧ma, jejenö sulabenö ja̧bö kwö̧jaduwi̧ma tjöekwemidanö ja̧kobe, Diosnö akebaduwi̧ Dios a̧ja̧kwökakobetjö̧. Jo̧kwajabetjö̧ otiwanö ja̧bö kwö̧jaduwodönö, jejenö tjöekwemi jwiakobetjö̧.

Otiwanö ja̧bö kwö̧jaduwijayonö usula kwemawaduwena jö̧ba̧lö Pedro yöawina wene

⁸ Ja̧danö, bajaleapo okobe deinö ökwödönö baikwö yötawa chömöledö: Bakwainö omukwatö, lȩlö̧jinö kwomukwatakwawaduwo. Jau chömöledö, kwömöledöduwinö ösödabikwawö kwö̧jaduwo, ja̧danö, Aaa, otiwo̧sa, jö̧ba̧lö omukwatökönö, dösölö̧jinö ja̧bö kwö̧jaduwo kwömöledöduwinö.

⁹ Ju'wedö ökwödönö sulabenö ja̧tjenama, balekwa mikwa sulabenöma ja̧köbaduwoko, ja̧danö ökwödönö sulabenö yötja̧lenama, balekwa mikwa jobadönö sulabenöma kwatadaduwoko. Jau chömöledö, jobadönö balekwa mikwa sulabenöma ja̧bökönö, Diosnö akebaduwo, jobadönö pjaatobö. Jau chömöledö, Diosma ökwödönö jwöinobe, okwödönö dösölö̧jinö pjaatobö, ja̧danö Dios ökwödönö jejenö pjaatobetjö̧, ja̧ omukwatö ju'wedönö pjabatö Diosnö akebaduwobö jo̧be.

¹⁰ Jau chömöledö, isabenö jwaikwöda otiwanö ja̧bö dö̧jobö jo̧be, Dios iwene jejenö laebobetjö̧, baikwö laebobe Dios iwene: Bakwo̧ o̧'wo̧ ösöwanö ö̧jobö jö̧a̧litjö̧ma, ja̧danö otiwanö ja̧kwawa ö̧jobö ösöditjö̧ma, sulabenöma yöa̧loko, ja̧danö omönama yöa̧loko.

¹¹ Sulabenö ja̧awa kabatibö, otiwanö ja̧obö jo̧be, ja̧danö jwaikwöda wene jwii̧ jawa isakwobö jo̧be.

¹² Jejenö ja̧obö jo̧be, Duluwo̧ma otiwanö ja̧badönö te'ada̧lö edo̧obetjö̧, ja̧danö jobadö atjebi̧ a̧ja̧kwobetjö̧. Jo̧kwaijayonö sulabenö ja̧badönö, Duluwo̧ma ölakwabikwawö ö̧jobe, jö̧ba̧lö laebobe Dios iwene. Jo̧kwajabetjö̧ chömöledö, isabenö otiwanö ja̧bö kwö̧jaduwobö jo̧be, Dabe'do Dios jejenö ja̧bö dö̧jobö weobetjö̧.

¹³ Ja̧danö chömöledö, ökwödöma jwaikwöda otiwanö ja̧köbaduwobö kwösödaduwitjö̧ma, ¿bakwo̧bi ökwödönö isabenö suli̧ öwaedenaji̧? Suli̧ waedokobe chömöledö.

^14-15 Jau chömöledö, isabenö otiwanö ja̧bö kwö̧jaduwobetjö̧, usula kwemawaduwena, jo̧kwaijayonö suli̧ waekwokobe, Diosma ökwödönö pjaatakobetjö̧. Jo̧kwajabetjö̧ kwomajadeduwinö Cristonö otiwanö omukwatö, Cristoma Duluwo̧ jö̧ba̧lö ösödö ja̧nö, ökwödönö suli̧ tjöwaedobö jö̧ba̧ladönö yekabiduwa, ja̧danö kwo̧'wo̧ tjo̧achaduwa chömöledö. Ja̧danö chömöledö, yebabökönö kwö̧jaduwiawö̧, ju'wedöma ökwödönö abebö tja̧ja̧kwena, ¿tajawedö yebaböködöjada?, ¿taji wene ösödadöjada? jö̧ba̧lö. Jo̧kwajabetjö̧ ökwödö Jesúsnö ösödadöma kwösödaduwi̧ jawa otiwanö kwöwaisaduwobö jo̧be, ju'wedö ökwödönö Cristonö kwösödaduwi̧ jawa labebö loköbaduwobö atjebenama, jweinö kwatadaduwakobetjö̧. Ja̧danö, jejenö abebö tja̧ja̧kwenama, dameakwöma kwatadaduwa chömöledö, jobadönö otiwanö omukwatö, dösölö̧jinö kwatadaduwodönö.

¹⁶ Ja̧danö, okobe jwiinö ja̧bö kwö̧jaduwi̧ma, kwomajadeduwinö otiwanö kwöwaisaduwi̧danö ja̧bö kwö̧jaduwo chömöledö. Ju'wedöma isabenö ökwödönö öpöjödö sulabenö yötja̧lena chömöledö, Cristonö ösödadöma sulabedö, sulabenö ja̧badö, jö̧ba̧lö. Jo̧kwaijayonö kwomajadeduwinö kwöwaisaduwi̧danö ja̧bö kwö̧jaduwitjö̧ma, ökwödönö sulabenö yöba̧ladöma taba lö̧jawö̧ tjö̧jakwedö, otiwanö ja̧bö kwö̧jaduwi̧ öwaetjöda öwawobetjö̧.

¹⁷ Ja̧danö chömöledö, otiwanö ja̧bö kwö̧jaduwijayonö, ina usula kwemawaduwena. Jejenö usula kwemawaduwobö Dios weitjö̧ma, sulökö chömöledö, jo̧kwaijayonö sulabenö ja̧bajadö usula kwemawaduwitjö̧ma sula, sulabenö ja̧köbaduwobetjö̧.

¹⁸ Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

^19-20 Ja̧danö, yabibajo̧, Duluwo̧ma ka̧lenadanö ba̧jadö damötjö debö 'yi̧nadö tjo̧'wo̧ luwo̧nö yöawinobe ujuluwaja̧ wenema. Jau chömöledö, damötjö Noé ö̧jinena ju̧kwadöma Dios yöawi̧ tjöpöjödinobe. Lekwe möle Noé isowi nöowi otidonö Diosma jobadönö ite'ada̧linobe, sulabenö tjomukwati̧ kabatibö tjöbalewachobö, jo̧kwaijayonö jwaikwöda tjöpöjödinobe, ¿jö̧tö? Jau chömöledö, sulabenö tjomukwati̧ kabatibö tjöbalewachiökökwe, Diosma ojwe okwatobö weinobe. Ja̧danö babema jobadö ojwetjö debö 'yi̧nadö tjo̧'wo̧ luwo̧ma ka̧lenadanö tjö̧bobe, Dios lȩebakwa̧ möle baibenanö kabatö. Jobadö ka̧lenadanö ba̧jadönö Duluwo̧ma ujuluwaja̧ wene yöawinobe. Jau chömöledö, Diosma jobadönö lȩebinobe, jo̧kwaijayonö jobadönö lȩebinajayonö jobadö tjö'da̧detjö jojodö jelemutjö wa̧medukwabedönö tjö̧jibinö pjaatinobe, Noénöbi, ömöledönöbi. Jobadönö ojwetjö tjö̧jibinö pjaatinobe,

²¹ ja̧danö jobadö ojwetjö tjö̧jibinama, babe ökwödö dö̧jibi̧ jawa ojwenö bu̧datakwawa jawa badekwachobe. Ja̧ dö̧jibi̧ma, ojwema diteba'otjö dusula dichö loobetjö̧ ji̧badösa jö̧ba̧löma yöta̧lökö chömöledö, baikwö yötawa: Diosnö abebadösa, domukwati̧ jawa dusula dichö loobö, ja̧danö Jesucristo woawatjö tjeachajinobetjö̧, dö̧jibinö pjabato̧ Diosma.

²² Ja̧danö, woawatjö tjebachajo̧, Cristoma mölejȩbe kaekwajinobe chömöledö, ja̧danö jobe Dios öwaisobekwöchobe inesö la'aka luwo̧ ö̧bena öbamatinobe. Ja̧danö chömöledö, okobe deinö ángelesdötjöbi, böjȩ luwedötjöbi, mölejȩbe luwedötjöbi la'aka tjuluwo̧ma jo̧bada, Cristoda. Ja̧danö chömöledö, babe usula kwemawaduwijayonö, kwo̧'wo̧ ösöwanö kwö̧jaduwena, baledajadö ökwödöbi Dioskwö dö̧jakwedösa jö̧ba̧lö.