1 Pedro 2 - Dios Iwene

¹ Ja̧danö, ja̧ wene ösödö Diosda i̧tji̧mu baibanö kwöbötjachinaduwobetjö̧, okobe jwiinö sulabenö ja̧awama kakatibaduwo chömöledö, okobe jwiinö omöna yöa̧lakwawabi, dötölatajanö yöa̧lakwawabi, ö'wiawinö edawabi, ju'wedönö sulabenö yöa̧lakwawabi.

² Jau chömöledö, ja̧ jawa kabatibö, balekwa̧da kwösödaduwo chömöledö. Wanedö yötawa, tjemu iya̧nö tjeminawö̧danö, kwo̧'wo̧ luwo̧ jawa lechedanö ji̧ma kwösödaduwo chömöledö, otiwanö kwöda̧peachaduwobö.

³ Jau chömöledö, ida̧ökö Duluwo̧nö waisachibinadöja, lȩlö̧jinö edö pjabato̧ jö̧ba̧lö, jo̧kwajabetjö̧ jejenö iwenetjö kwöda̧peachaduwobö kwösödaduwo.

^4-6 Jau chömöledö, isabenö duluwo̧nö waisachinadösa, lȩlö̧jinö pjabato̧ jö̧ba̧lö. Ökwödö Jesúsnö ösödadönö baikwö wanedö yötawa: Ökwödöma Dios eju inawiyadanö ichejekwadösa, ja̧danö Duluwo̧ Jesúsma Dios ejutjö inesö la'aka lödawawa inawadanöbo̧. Ja̧danö, ökwödö Jesúsnö ösödadöma, jo̧banö ösödö ichadösa, Diosma ökwödötjö iteda eju otidakobetjö̧. Jau chömöledö, Jesúsma isabenö ökwödö Dios ejubedötjö la'akadanöbo̧, Dios iwene laebi̧danö. Baikwö laebobe Dios iwene Jesúsnöma: Inawa nöinö mikwawawa omudawajo̧, Jerusalénnö chödobe, o̧dotjö inesö la'aka lödawawa baibanö, ja̧danö bakwo̧ jo̧ba inawadanöbo̧nö ösöditjö̧ma, waekwökena, jö̧ba̧lö laebobe Jesúsnöma. Jau chömöledö, kwöwaisaduwa, böjȩ jojodöma Jesúsnö öpöjödadö, mikwawö̧kö̧ jö̧ba̧lö, jo̧kwaijayonö jobadö tjöpöjödijayonö, Diosma Jesúsnöda omudawö ujuninobe, ökwödö iteda ejubedötjö la'aka ajayinö lödawawa inawadanö ö̧jobö. Jau chömöledö, Dios edemi isabenö mikwawo̧ Jesúsma, ja̧danö ökwödö Jesúsnö ösödadöbi jo̧banö jweinö domukwatobe, isabenö mikwawo̧ jö̧ba̧lö. Jau chömöledö, ökwödö Jesúsnö ösödadöma Dios ejubedösa, jo̧kwaijayonö ja̧damaökö, ju'wibi Diosma ökwödönö 'da̧batö ujuninobe, iteda wei̧ otidadö badibanö chömöledö. Jau chömöledö, Jesucristo ökwödönö pjaatinobetjö̧, babema Dios ösödi̧ iyawa jo̧banö iyadösa, do̧'wo̧ luwo̧ jawa iyawama.

⁷ Jau chömöledö, ökwödö Jesúsnö ösödadöma jweinö domukwatobe Duluwo̧nö, isabenö mikwawo̧ jö̧ba̧lö. Ja̧danö, jo̧banö dösödobetjö̧, isabenö ökwödönö pjabato̧ chömöledö. Jo̧kwaijayonö, öpöjödadöbi tjuju̧kwobe chömöledö, ja̧danö tjöpöjödiökwe, pjabatö̧kö̧ jobadönöma. Jau chömöledö, jobadönö baikwö laebobe Dios iwene: O̧do otidadö biwama sulabawa, mikwawököwa jö̧tja̧linawa inawama, la'aka lödawawa, ju'wi inawatjö bajalekwönönö mikwawawada baibinobe, jö̧ba̧lö laebobe.

⁸ Ja̧danö jelobe baikwö laebobe Dios iwene: Biwa inawama jojodö töbö metjakwawa baibanö ja̧kobe, jö̧ba̧lö laebobe. Jau chömöledö, jobadö Jesúsnö tjöpöjödijayonö, Diosma jo̧banöda ujuninobe inesö la'aka luwo̧ baibanö, ja̧danö jo̧banö öpöjödadöma Dios lȩebakwawö̧ tjö̧jobe. Jau chömöledö, Dios iwene tjöpöjödinobetjö̧, Jesúsnö öpöjödö töbö metjinobe, iteda iwene öpöjödadö töbö metjobö Dios omukwatö ujuninadanö.

⁹ Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

¹⁰ Ajayinöma Dios ömöledöbinöködö kwö̧jinaduwobe chömöledö, jo̧kwaijayonö Dios ömöledöbinöködö kwö̧jinaduwijayonö babema Diosda ömöledöja chömöledö. Ja̧danö ajayinöma Dios lȩlö̧jinö edököwö̧ kwö̧jinaduwajayonö, babema Dios lȩlö̧jinö edawö̧ja chömöledö. Jau chömöledö, Diosma isabenö otiwanö ökwödönö pjaatinobe, iteda ömöledö bakibaduwanö, jo̧kwajabetjö̧ isabenö jo̧ba iwene waisachö kwöda̧peachaduwobö kwisakwaduwo.

Dios ömöayedö kwö̧jaduwo jö̧ba̧lö Pedro yöawina wene

¹¹ Chösödawö̧ chömöledö, ökwödöma isabenö kwiteboduwi mölejȩbetjö ödö ja̧nö, lekwema böjȩnö jö̧ködöja. Jo̧kwajabetjö̧ ökwödönö budekwödanö atebaduwakwö, böjȩ jojodö sulabenö tjösödi̧ jawa ja̧bökönö kwö̧jaduwobö. Ja̧ sulabenö kwösödaduwi̧ jawama baikwö wanedö yötawa, kwo̧'wo̧ luwo̧duwinö ölakwabikwawobedanö ichejekwa, jo̧kwaijayonö ja̧ jawa ja̧bökönö kwö̧jaduwo.

¹² Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.

¹³ Chömöledö, inesö kwuluwo̧duwima bakwo̧da, Duluwo̧ Jesúsda, ¿jö̧tö? Jau chömöledö, jo̧bada inesö kwuluwo̧ma. Jo̧kwaijayonö ina böjȩnö kwö̧jaduwayi, okobe deinö böjȩtjö kwuluwedö wetji̧bi ja̧bö kwö̧jaduwobö ujuninobe. Jau chömöledö, luwedö la'aka tjuluwo̧ emperador ötjabökwe wei̧bi ja̧bö kwö̧jaduwo, böjȩtjö inesö duluwo̧ jö̧ba̧lö.

¹⁴ Ja̧danö, emperador ujuninawö̧ luwedö gobernador ötjabiwö̧ wetji̧bi ja̧bö kwö̧jaduwo. Jau chömöledö, jobadö luwedöma döpöjojodöböködö, ökwödönö pjatjato jö̧ba̧lö la'aka luwo̧ ujuninawö̧. Jau chömöledö, pjabatadö batjibanö emperadorma jobadönö ujuninobe, otiwanö ja̧badönö ösödö, otiwanö ja̧badöja jö̧ba̧lö yötjawobö, ja̧danö ju'wibi sulabenö ja̧badönö lȩtjebobö ujuninobe la'aka luwo̧ma. Jo̧kwajabetjö̧ jobadönö öpöjödökönö wetji̧ ja̧bö kwö̧jaduwo.

¹⁵ Jau chömöledö, kwöwaisaduwa, ju'wedö wajwibadöma, tjo̧'wo̧ jwibö ökwödö Jesúsnö ösödadönö sulabenö wanedö yötja̧lobe, Sulabenö ja̧badö, tjuluwo̧ wei̧ a̧ja̧kwöködö, jö̧ba̧lö, ¿jö̧tö? Jo̧kwaijayonö luwedö wetji̧ a̧ja̧kwö jwaikwöda otiwanö ja̧bö kwö̧jaduwitjö̧ma, jobadö sulabenö yöba̧ladöma ökwödönö sulabenö yöba̧lö katjatena. Jau chömöledö, jejenö luwedö wetji̧ a̧ja̧kwö jwaikwöda otiwanö ja̧bö kwö̧jaduwo chömöledö, Kwabe'do Diosma jejenö ja̧bö kwö̧jaduwobö ösödobetjö̧.

¹⁶ Jau chömöledö, kwöwaisaduwa, ju'wedö Cristonö ösödadöma yötja̧lena, Aaa, Cristonö chösödobetjö̧, ida̧ökö mölejȩ jojosa, böjȩ jojobö̧kö̧sa, jo̧kwajabetjö̧ luwedö wetji̧ cha̧ja̧kwobö jwibo̧sa, mölejȩ jojodö tjuluwedötjokobetjö̧, jö̧ba̧lö. Jau chömöledö, jejenö omukwatadö tjuju̧kwobe, ja̧danö jejenö omukwatö, sulabenö ja̧bö tjö̧jobe. Jobadö tjomukwati̧danöma kwomukwataduwa chömöledö. Isabenö yötja̧li̧danö, böjȩ luwedö tjömöayedöböködösa, jo̧kwaijayonö Dios ömöayedösa, ja̧danö jo̧bama ökwödönö weobe, luwedö wetji̧ ja̧bö dö̧jobö. Jau chömöledö, Dios ömöayedö ja̧nö, sulabenö ja̧bökönö jwaikwöda otiwanö ja̧bö kwö̧jaduwo.

¹⁷ Ja̧danö Dios ömöayedö ja̧nö, okobe deinö jojodönö otiwanö kwomukwataduwo. Kwömöledöduwi Jesúsnö ösödadönö ösödabikwawö kwö̧jaduwo. Diosnö yebabinö kwösödaduwo. La'aka luwo̧ emperador ötjabökwenö otiwanö omukwatö, wei̧ ja̧bö kwö̧jaduwo.

Jesús öpöjödökönö usula emawö ö̧jinadanö, ja̧bö kwö̧jaduwo jö̧ba̧lö Pedro yöawina wene

¹⁸ Ökwödötjö ju'wedö tjömöayedö baibanö midö tjeminawö̧nö baikwö yötawa: Kwuluwedöduwinö otiwanö omukwatö, duluwedö jö̧ba̧lö wetji̧ a̧ja̧kwö kwö̧jaduwo. Jau chömöledö, kwuluwedöduwitjö dösölö̧jinö ja̧badönö otiwanö omukwatö wetji̧ a̧ja̧kwö kwö̧jaduwo. Jo̧kwaijayonö jobadödamaökö, kwuluwedöduwitjö labinö weba̧ladönöbi otiwanö omukwatö wetji̧ a̧ja̧kwö kwö̧jaduwo.

¹⁹ Ja̧danö chömöledö, otiwanö wetji̧ kwa̧ja̧kwaduwijayonö isabenö kwuluwedöduwitjö ju'wedöma usula kwemawaduwinö sulabenö ja̧tjena ökwödönö. Jo̧kwaijayonö jejenö baleditjö̧ma kwo̧'wo̧ tjo̧kekwaduwa chömöledö, jwaikwöda Diosnö omukwatö, otiwanöda ja̧bö kwöbaledaduwo. Ja̧danö, jejenö kwöbaledaduwitjö̧ma, Diosma ökwödönö ösödakobe chömöledö, bidöma otiwanö ja̧bö ju̧kwadö jö̧ba̧lö.

²⁰ Jau chömöledö, kwöwaisaduwa, sulabenö ja̧bö kwö̧jaduwitjö̧ma Diosma otiwanö omukwatökena ökwödönö, ¿jö̧tö? Ja̧danö, sulabenö ja̧köbaduwiökwe kwuluwo̧ ökwödönö kwakwaitjö̧ma, kwo̧'wo̧ 'dibachibö kwöbaledaduwi̧ mikwawökena, Dios otiwanö ökwödönö omukwatobö. Jo̧kwaijayonö otiwanö ja̧bajadö usula emawö kwöbaledaduwenama, Diosma edö otiwanö omukwatobe ökwödönö chömöledö, chi̧tji̧muma weti̧danö ja̧bö tjö̧jobetjö̧ usula emawadö jö̧ba̧lö.

²¹ Jau chömöledö, kwöwaisaduwa, Diosma jejenö kwo̧'wo̧ 'dibachibö usula kwemawaduwobö ösödo̧, jejenö otiwanö ja̧bajadö usula kwemawaduwo jö̧ba̧lö Diosma ökwödönö jwöinobetjö̧. Jau chömöledö, Cristobi ökwödönö pjabatö usula emawinobe, ja̧danö Duluwo̧ jejenö usula emawinobetjö̧, ökwödö jo̧ba ömöayedöbi usula emawö kwö̧jaduwobö jo̧be. Jau chömöledö, Cristoma sulabenö ja̧bökönö usula emawinobe, ja̧danö otiwanö ja̧köbaduwakwa̧ i̧sebinobe, jo̧ba ja̧inadanö ökwödöbi ja̧bö kwö̧jaduwakobetjö̧.

²² Jo̧bama usula emawijayonö la'akatjöda sulabenö ja̧inokobe, ja̧danö la'akatjöda omöna yöa̧linokobe.

²³ Jo̧banö sulabenö yötja̧lenama, balekwa mikwa sulabenöma atadinokobe, ja̧danö usula emawenama, usula emawinö ja̧badönö yebeabinöma yöa̧linokobe. Jau chömöledö, Cristoma jwaikwöda Diosnö, inesö jojodö ja̧tji̧ otiwojobö sulojobö jö̧ba̧lö yöbawo̧nö o̧'wo̧ wana̧lö ite'ada̧linobe, jo̧bada bajaliyanö yöawakwo̧ jö̧ba̧lö. Ökwödöbi jo̧ba omukwatinadanö kwomukwataduwo chömöledö, ja̧danö usula kwemawaduwenabi jwaikwöda otiwanö ja̧bö kwöbaledaduwo, Cristo ökwödönö i̧sebinadanö.

²⁴ Jau chömöledö, Cristoma isabenö ökwödönö pjabatö usula emawinobe. Ökwödö sulabenö ja̧dobetjö̧ Dios lȩebi̧tjö demo jö̧da̧linobe chömöledö, jo̧kwaijayonö ökwödö demawo jö̧da̧linama, jo̧bada dusula emawö towisa'onö ö̧linobe. Jejenö midawö woinobe, ökwödöma suli̧ ujulutjö ji̧bö, otiwanö ja̧bö dö̧jakobetjö̧. Jau chömöledö, kwakwatji̧tjö jo̧bada usula emawinobetjö̧, ökwödöma kwö'wöchaduwi̧tjö ji̧binadöja.

²⁵ Jau chömöledö, ajayinöma ökwödöma o̧bȩja̧dö le'dewinadödanö kwebachinadöja, jo̧kwaijayonö ökwödönö te'ada̧lo̧ Jesúskwö, kwo̧'wo̧ luwo̧duwinö tjöbeba̧lö te'ada̧lo̧kwö tjekachajinaduwobe.