1 Pedro 1 - Dios Iwene

Pedro dokwa jö̧ba̧lö wȩyudö aebina wene

¹ Dokwa chömöledö, ötjöma Jesucristo webawo̧ Pedro mikwo̧sa. Ötjöma böja kwialusöja wȩyudö wetaduwakwö, ökwödö Dios omudawö ujuninawö̧ mölejȩ jojodönö. Jau chömöledö, ina böjȩnö kwö̧jaduwijayonö, mölejȩ jojodöja. Ja̧danö ökwödö jelobetenia ju̧kwadönö chiwȩyudobe, Ponto nijinö ju̧kwadönöbi, Galacia nijinö ju̧kwadönöbi, Capadocia nijinö ju̧kwadönöbi, Asia nijinö ju̧kwadönöbi, Bitinia nijinö ju̧kwadönöbi.

² Jau chömöledö, Dabe'do Dios ajayitjöda ökwödönö öwaisinadanö, Dios O̧'wo̧ Luwo̧da ökwödönö 'da̧batö ujuninobe, Jesucristo wei̧ ja̧bö kwö̧jaduwakobetjö̧, ja̧danö Jesucristo ökwösobunö ökwödönö dichö loobö. Ökwödö Dios öwaisawö̧nö böja kwialusöja chiwȩyudobe ötjö Pedroma chömöledö. Böja wȩyudö jamatö, yötawaduwakwö chömöledö: Dios ajayitjö bajalekwönönö ökwödönö lȩlö̧jinö iyobö chösöda. Ja̧danö ajayitjö bajalekwönönö ökwödönö pjaatobö chösöda, kwo̧'wo̧ luwo̧ ösöwachibanö kwö̧jaduwobö.

Isabenö Dios otiwanö iyakwawö̧sa jö̧ba̧lö Pedro yöawina wene

³ Dösödaduwo Diosnö, Duluwo̧ Jesucristo Abe'donö chömöledö, jo̧bama isabenö lȩlö̧jinö edö ökwödönö pjaatinobetjö̧. Jau chömöledö, Jesucristo wobajaletjö tjeachajinobetjö̧, ökwödönö 'yayinö bötjachibadö badibanö pjaatinobe. Jo̧kwajabetjö̧, babema isabenö inesö ja̧kwawa jawa do̧'wo̧ wana̧lö te'ada̧ladösa,

⁴ isabenö mölejȩbe dö̧jakwedösa, jö̧ba̧lö, ja̧danö isabenö Dios iteda i̧tji̧munö iyakwa̧ demakwedösa jö̧ba̧lö. Jau chömöledö, ja̧ Dios ökwödönö iyakwa̧ma, la'akatjöda suli̧ waekwökö ji̧, ja̧danö suli̧ jwöachökö ji̧, ja̧danö 'dö̧ibajökö ji̧. Ja̧danö, Diosma ja̧ ökwödönö iyakwa̧ma mölejȩbe ujuninobe, jobe dichibena ökwödönö iyobö.

⁵ Jau chömöledö, Dios yöawi̧ kwösödaduwiökwe, Diosma ökwödönö tjöbeba̧lönö ite'ada̧lobe, ja̧danö jejenö ite'ada̧lakwo̧, 'dö̧ibaji̧ möle kwö̧jibinaduwa wene i̧sebenanö kabatö. Jau chömöledö, ja̧ möle baibenama, ökwödö iteda i̧tji̧munö otiwa jawa iyakobe, ja̧danö jejenö iyö, kwö̧jibinaduwa wene öwaetjöda i̧sebakobe.

⁶ Ja̧ wene omukwatö, kwo̧'wo̧ luwo̧ ösöwachibanö ja̧döja chömöledö, babe usula emawö kwö̧jaduwijayonö. Jau chömöledö, babema isabenö ja'yubenö lekwe usula emawö nöinö kwöbaledaduwena,

⁷ ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

⁸ Jau chömöledö, ökwödöma la'akatjöda Jesúsnö edinöködöja, ¿jö̧tö? Jo̧kwaijayonö, la'akatjöda Jesúsnö kwedinaduwököjayonö, jo̧banö ile nibebö ösödadöja, ja̧danö jo̧bama kwedaduwökökwejayonö, jo̧ba yöawi̧ ösödadöja, isabenö jö̧a̧li̧danö ja̧akwo̧ jö̧ba̧lö. Jejenö ösödö, kwo̧'wo̧ luwo̧duwi ösöwachibanö ja̧döja. Chömöledö, isabenö jwiinö kwo̧'wo̧ luwo̧ ösöwachibanö ja̧döja, ja̧danö jejenö kwo̧'wo̧ ösöwachibanö kwö̧jaduwi̧ma böjȩ jojodö tjomukwati̧tjö bajalekwönönö kwo̧'wo̧ ösöwachibanö kwö̧jaduwobe, kwo̧'wo̧ luwo̧ ösöwachibanö kwö̧jaduwi̧ma Diostjöda ichobetjö̧.

⁹ Jau chömöledö, isabenö jö̧a̧li̧danö ja̧akwo̧ jö̧ba̧lö Jesúsnö kwösödaduwobetjö̧, kwo̧'wo̧ luwo̧duwima isabenö ji̧binobe, Dios iyi̧ emadö bakibaduwanö. Jau chömöledö, 'dö̧ibaji̧ mölema Dabe'do Diosma isabenö otiwanö ökwödönö pjaatakobe, ja̧danö ja̧ wene omukwatö, babe usula kwemawaduwijayonö, kwo̧'wo̧ ösöwanö ja̧nö, Dabe'do Diosnö kwösödaduwobe.

^10-11 Jau chömöledö, Dios ökwödönö pjaati̧ma isabenö jwiinö otiwobe, baikwö yötawa: Dios yöawi̧ yöbawadöma Dios ökwödönö pjaatakwa̧ wene tjiwȩyudinobe, Dios mikwa jwiinö otiwa jawa iyö kwö̧jibaduwinö pjaatakwa̧ wenema, ¿jö̧tö? Jejenö tjiwȩyudenama, ja̧ tjiwȩyudi̧ jawa jwiinö otiwiawö̧, tupakwö tjöwaisachibobö jö̧tja̧linobe. Jau chömöledö, Cristo O̧'wo̧ Luwo̧ jobadö tjo̧'wo̧ luwo̧nö ja̧nö yöawinobe Cristo usula emawakwa̧ wenebi, usula emawaja̧ ikena Dios ujulu dejatinö ujuna̧lakwa̧ wenebi, ja̧danö yöawiawö̧, tinö badekwachakwa̧jö, dianö badekwachakwa̧jö jö̧ba̧lö tjomukwatinobe, ja̧ wenema isabenö otiwa jawa weneobetjö̧.

¹² Jejenö tjöwaisobö jö̧tja̧liökwe, Diosma jobadönö i̧sebinobe, tjiwȩyudi̧ma, damötjö ji̧nadö jawamaökö, ökwödö 'dö̧ibaji̧ möle ju̧kwadönö Dios pjaatakwa̧ weneda tjiwȩyudinobe jö̧ba̧lö. Jau chömöledö, ja̧ wenema, otiwa jawa wene Cristo dö̧jibinö pjaati̧ weneda, ja̧danö Dios iwene yöbawadöma ökwödönöbi ja̧ wene yötjawinobe chömöledö, a̧ja̧kwö kwösödaduwobö. Jau chömöledö, Diosma mölejȩbetjö iteda O̧'wo̧ Luwo̧nö weinobe, ja̧danö jo̧ba Dios O̧'wo̧ Luwo̧ ujulunö otiwa jawa wene yöbawadöma ja̧ wene ökwödönö yötjawinobe. Jau chömöledö, isabenö do̧'wo̧ ösöwanö Diosnö dösödobö jo̧be, isabenö otiwanö ökwödönö pjaatobetjö̧, ja̧danö isabenö otiwanö ökwödönö iyakwo̧obetjö̧. Jejenö isabenö otiwanö ökwödönö pjaatobetjö̧, ángelesdöbi edö, Ayö, Diosma dakwö iteda ömöledönö pjabato̧jö, jö̧ba̧lö tjöwaisobö jö̧ba̧ladö, ökwödönö pjaati̧ma yelösöda otiwanö pjaatobetjö̧.

Dios ösödi̧danö ja̧bö kwö̧jaduwo jö̧ba̧lö Pedro yöawina wene

¹³ Ja̧ wenema isabenö wene chömöledö, ja̧danö ja̧ wene omukwatö kwö̧jaduwo, otiwanö ja̧bö kwö̧jaduwakobetjö̧. Ja̧danö jweinö omukwatö jwaikwöda ja̧ Dios ökwödönö iyakwa̧ jawa kwo̧'wo̧ kwöwana̧laduwo chömöledö, isabenö Jesucristo yemidanö ichenama, Dios otiwanö iyakwawö̧sa jö̧ba̧lö.

¹⁴ Ja̧danö, Kwabe'do Dios wei̧ ja̧bö ja̧nö, ajayinö kwösödinaduwa ja̧böma kwö̧jaduwoko chömöledö, ina wajwibadö kwö̧jaduwayi kwösödinaduwama.

¹⁵ Jau chömöledö, ökwödönö jwöbina Diosma sulabe jwibo̧, ¿jö̧tö? Jo̧kwajabetjö̧, ökwödöbi okobe jwiinö ja̧bö kwö̧ja̧duwi̧ sulabenö ja̧bökönö kwö̧jaduwo chömöledö.

¹⁶ Jau chömöledö, jejenö ja̧bö kwö̧jaduwo, Kwabe'do Dios jejenö ja̧bö kwöjaduwobö weinobetjö̧. Baikwö laebobe Dios iwene, Dios wei̧ma: Ötjöma sulabe jwibo̧chobetjö̧, ökwödöbi sulabe jwibadö ja̧duwi, jö̧ba̧lö laebobe.

¹⁷ Jau chömöledö, kwöwaisaduwa, Diosma jweinö bakwo̧nökwena lȩbebo̧ jojodönö, ja̧tji̧ mikwa baibanö, ¿jö̧tö? Ja̧danö, ökwödöma jo̧ba Diosnö, Dabe'do, jö̧ba̧lö öbabidöja chömöledö, ¿jö̧tö? Jo̧kwajabetjö̧ Dabe'doma sulabe öpöjödo̧ jö̧ba̧lö kwöwaisaduwobetjö̧, ina kwiteboduwi mölejȩbetjö ödö kwö̧jaduwayi, Diosnö yebabinö omukwatö, sulabenö kwösödinaduwa jawa ja̧bökönö kwö̧jaduwo chömöledö.

¹⁸ Jau chömöledö, kwöwaisaduwa, Diosma ja̧ suli̧ jawatjö kwö̧jibaduwinö midö eminobe jö̧ba̧lö, jo̧kwajabetjö̧ ja̧ jawa ja̧bökönö kwö̧jaduwo. Jau chömöledö, kwa'dödöminetjö sule mikwa jwii̧ ja̧awada kweminaduwobe, jo̧kwaijayonö Diosma ja̧tjö kwö̧jibaduwinö midö eminawö̧ja chömöledö. Ja̧danö, tupakwö mikwa jwiakwa̧ jawanöma, platanöbi, oronöbi midö eminokobe chömöledö,

¹⁹ inesö mikwawi̧ jawanö, obeja sulabe jwibo̧danöbo̧ Cristo ökwösobunöda ökwödönö midö eminobe.

²⁰ Ina böjȩ otidapji, Diosma omukwatö ujuninobe Cristoda dö̧jibinö pjaatobö chömöledö, ja̧danö babe ökwödö 'dö̧ibaji̧ möle ju̧kwadönö i̧sebinobe, jo̧banö ösödö kwö̧jibaduwobö.

²¹ Ja̧danö, Cristo ökwödönö pjaatinobetjö̧, Diosnö ösödadöja chömöledö. Jau chömöledö, Diosda Cristonö wobajaletjö tjeachajinö ja̧binama, ja̧danö jo̧banö dejatinö ujulu iyinama, jo̧kwajabetjö̧ Cristonö kwösödaduwenama, Dios yöawi̧ ösödadöja, ja̧danö Diosnö kwo̧'wo̧ wana̧ladöja. Jau chömöledö, Dabe'do Diosma isabenö otiwanö pjaatinobe sulabetjö dö̧jibobö, jo̧kwajabetjö̧ ja̧ pjaatina omukwatö sulabenö ja̧bökönö dö̧jobö jo̧be.

²² Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

²³ bakwo̧da i̧tji̧muköbaduwobetjö̧. Jau chömöledö, Dios iwenema yaba̧lö ji̧, ja̧danö 'dö̧ibajökö ji̧, ja̧danö ja̧ wene ösödö, 'yayinö kwöbötjachinaduwobe chömöledö. Ja̧danö chömöledö, 'yayinö kwöbötjachinaduwenama, woba jojodö tji̧tji̧mu baibanöma kwöbötjachinaduwokobe, wobö̧kö̧ jo̧ Dios i̧tji̧muda bötjachinadöja.

²⁴ Jau chömöledö, böjȩ jojodöma lekwema jö̧ködö, Dios iwene laebi̧danö, baikwö laebobe Dios iwenema: Okobe deinö böjȩ jojodöma, meje'yedanö ichejekwadö, ja̧danö tjotikwi̧ma, o̧bubiya otikwi̧danö ichejekwobe. Meje'yema wobö kököachibobe, ja̧danö o̧bubiama kököbachö tjoduwobe,

²⁵ jo̧kwaijayonö Duluwo̧ yöawi̧ma ba̧kwȩlöjateböda ja̧kobe, jö̧ba̧lö laebobe. Ja̧danö chömöledö, ja̧ ba̧kwȩlö̧jatebö ji̧ Duluwo̧ yöawi̧ma, otiwa jawa wene kwa̧ja̧kwinaduwa wene. Jau chömöledö, ja̧ wene ösödö Diosda i̧tji̧mu baibanö kwöbötjachinaduwobe. Jo̧kwajabetjö̧, bakwo̧da i̧tji̧mu ja̧nö, jwaikwöda kwömöledönö ösödabikwawö ja̧nö kwö̧jaduwo.