1 Juan 5 - Dios Iwene

Juan yöawina wene: —Dios i̧tji̧mu babibinadöma Diosnöbi Dios i̧tji̧munöbi ile nibebö ja̧dö— jö̧ba̧lö

¹ Chö̧ja̧wo̧dö, Jesúsnö ösödadöma, Jesúsma Dios weinökwe dö̧jibinö pjabato̧, jö̧ba̧lö, Dios i̧tji̧mu babibinadö. Diosma jobadönö tjo̧'wo̧ luwo̧nö 'yayi̧ ja̧kwawa iyawö̧. Ja̧danö, Dios i̧tji̧muma Diosnö ile nibebö ju̧kwadö. Ja̧danö, Diosnö isabenö ile nibebö tjuju̧kwobetjö̧ Dios ju'wedö tji̧tji̧mu̧nöbi ile nibebö tjö̧jobe.

² Ja̧danö chö̧ja̧wo̧dö ¿dakwö di̧sekwobeda, Isabenö ökwödöma Dios i̧tji̧munö ile nibebö ja̧dösa, jö̧ba̧lö? Biya̧: Diosnö ile nibebö, ja̧danö jo̧ba wei̧ da̧ja̧kwobö jo̧be. Jejenö, Dios wei̧ a̧ja̧kwö ja̧nö di̧sekwobe Diosnöbi, Dios i̧tji̧munöbi ile nibebadösa, jö̧ba̧lö.

³ Ja̧danö chö̧ja̧wo̧dö, Diosnö ile nidebi̧ma di̧sekwobe, Dios wei̧ a̧ja̧kwö ja̧dösa, jö̧ba̧lö. Ja̧danö, Diosnö ile nibebö dö̧jena jo̧ba wei̧ da̧ja̧kwoböma waiyökö chö̧ja̧wo̧dö.

^4-5 Ja̧danö chö̧ja̧wo̧dö döwaisa, böjȩnö ju̧kwadö sulabedö, Diosnö öpöjödadöma tjuju̧kwobe ökwödönö jelobekwö domukwatobö ötjibotö jö̧ba̧lö. Jo̧kwaijayonö ökwödöma jweinö jö̧ba̧ladösa, Jesúsnö ösödadösa, Jesúsma Dios Itji̧, jö̧ba̧lö. Jo̧kwaobetjö̧ ökwödö Dios i̧tji̧mu babibinadöma Dios ujulunö böjȩnö sulabedönö juluwadösa, jobadö wetji̧ a̧ja̧kwökönö. Jau chö̧ja̧wo̧dö, böjȩnö sulabedönö juluwadö ju̧kwadösa, Dios wei̧da a̧ja̧kwö ja̧nö.

Juan yöawina wene: —Jesúsnö böjȩnö ja̧nö baledina ökwödönö i̧sebobe, Jesúsma Dios Itji̧, ja̧danö, Dios weinökwe jojodö tjö̧jibinö pjaatobö— jö̧ba̧lö

⁶ Chö̧ja̧wo̧dö, isabenö döwaisobö jo̧be, Jesús, böjȩnö ichinama, Dios Itji̧, ja̧danö, Dios weinökwe jojodö tjö̧jibinö pjaatobö, jö̧ba̧lö. Ja̧danö, böjȩnö ö̧jena jo̧banö baledinama ökwödönö i̧sebobe, Isabenö Jesúsma Dios Itji̧, Dios weinökwe dö̧jibinö pjaatobö, jö̧ba̧lö. Ja̧danö, Jesús otidawa öjamatakwa̧ abönö Juan Ojwenö Bu̧dato̧ma Jesúsnö ojwenö ubu̧datinobe. Jejenö baledena wajuwanö i̧sebinobe, Jesúsma Dios Itji̧, Dios weinökwe, jö̧ba̧lö. Ja̧danö, ju'wi baledinabi, Jesúsnö ojwenö ubu̧datinadamaökö i̧sebobe, Jesúsma Dios Itji̧, Dios weinökwe, jö̧ba̧lö. Jesúsma iteda otidawa kaatena towisa'otjö ökwösobu ebawinö midawö ö'wöchinobe. Ja̧ baledinabi ökwödönö i̧sebobe, Jesúsma Dios Itji̧, Dios weinökwe dö̧jibinö pjaatobö, jö̧ba̧lö. Chö̧ja̧wo̧dö, isabenö döwaisobö jo̧be, Jesús, böjȩnö ichinama, Dios Itji̧, ja̧danö, Dios weinökwe jojodö tjö̧jibinö pjaatobö, jö̧ba̧lö. Ja̧danö chö̧ja̧wo̧dö, Dios O̧'wo̧ Luwo̧bi bakwainö yöawobe, Jesúsma Dios Itji̧, jojodö tjö̧jibinö pjabato̧, jö̧ba̧lö. Ja̧danö, Dios O̧'wo̧ Luwo̧ma bakwai̧ yöawakwawa yöbawo̧, isabenö ji̧ yöawakwawada.

⁷ Jo̧kwaobetjö̧ chö̧ja̧wo̧dö, Jesúsnö baledina, wa̧pötakwa jawa baledinama ökwödönö i̧sebobe, Jesúsma Dios Itji̧, ja̧danö Dios weinökwe, dö̧jibinö pjaatobö, jö̧ba̧lö. Ja̧ wa̧pötakwa jawa baledinama biya̧:

⁸ Jo̧banö ojwenö ubu̧datina, ja̧danö towisa'otjö ökwösobu ebawinö ö'wöchina, ja̧danö Dios O̧'wo̧ Luwo̧ jo̧banö yöawina. Ja̧ baledinama ökwödönö bakwainö i̧sebobe, Jesucristoma Dios Itji̧, jojodö tjö̧jibinö pjaatobö weinökwe, jö̧ba̧lö.

⁹ Wanedö yötawa chö̧ja̧wo̧dö: Ökwödöma bakwo̧ jojo edina yöawobe a̧ja̧kwö jö̧da̧lobe, Jau jweinö yöa̧la, jö̧ba̧lö. Ja̧danö chö̧ja̧wo̧dö, yötawaduwakwö. Dios yöawi̧ma jojodö yötjawemitjö o̧penönö jwei̧. Jo̧kwaobetjö̧ jojodö yötjawi̧ a̧ja̧kwö dösöditjö̧ma Dios yöawi̧ a̧ja̧kwö jwiinö dösödobö jo̧be, Diosma jweinöda yöbawo̧, jö̧ba̧lö. Jau chö̧ja̧wo̧dö, jojodö yötjawemitjö o̧penönö jweinö yöawobe Diosma. Ja̧danö, Dios yöawinama biya̧: Jesúsma ötjö chitji̧, jojodö tjö̧jibinö pjaatobö wetinökwe, jö̧ba̧lö. Ja̧ yöawinama dösödo chö̧ja̧wo̧dö.

Juan yöawina wene: —Jesúsnö ösödadö tjöwaisobe, Do̧'wo̧ luwo̧ okwanö ba̧kwȩlö̧jatebö dö̧jakwedösa— jö̧ba̧lö

¹⁰ Ja̧danö chö̧ja̧wo̧dö, Jesúsnö ösödo̧, Jesúsma Dios Itji̧, jojodö tjö̧jibinö pjaatobö weinökwe, jö̧ba̧lo̧ma öwaisobe o̧'wo̧ luwo̧nö, Diosma jweinö yöawinobe Itji̧nöma, jö̧ba̧lö. Jo̧kwaijayonö Dios yöawi̧ öpöjödo̧ma, Diosma omöna yöbawo̧, jö̧ba̧lö, yöa̧lobe, Dios iteda Itji̧nö yöawina öpöjödobetjö̧.

^11-12 Ja̧danö chö̧ja̧wo̧dö, Dios ökwödönö yöawinama baikwö laebobe: Ötjö chitji̧nö ösödadöma, Diosma Itji̧nö weinobe jojodö tjö̧jibinö pjaatobö, jö̧ba̧lö, tjo̧'wo̧ luwo̧nö ba̧kwȩlö̧jatebö tjuju̧kwakwedö. Jo̧kwaijayonö Chitji̧nö öpöjödadöma ba̧kwȩlö̧jatebö tjuju̧kwökakwedö. Chö̧ja̧wo̧dö, Diosma jweinöda yöbawo̧obetjö̧ jo̧ba yöawina, iteda Itji̧nö yöawinama dösödaduwo, Jweinö yöawinobe, jö̧ba̧lö.

¹³ Ja̧danö chö̧ja̧wo̧dö, ökwödönö chöwaisa. Ökwödöma Jesúsnö ösödadöja, Jesúsma Dios Itji̧, inesö jo̧, jö̧ba̧lö. Ja̧danö, ökwödönö yöbawö chiwȩyudaduwakwö kwomajadeduwinö isabenö kwöwaisaduwobö, Ökwödöma ba̧kwȩlö̧jatebö duju̧kwakwedösa, jö̧ba̧lö. Isabenö chö̧ja̧wo̧dö, Jesúsnö kwösödaduwobetjö̧ ba̧kwȩlö̧jatebö kwö̧jaduwakobe.

^14-15 Jo̧kwaobetjö̧ chö̧ja̧wo̧dö, ökwödö Jesúsnö ösödadöma ba̧kwȩlö̧jatebö jo̧bakwö dö̧jakobetjö̧ Diosnö yebabökönö abebadösa. Jau, Diosnö yebabökönö abebadösa, Dios ösödi̧danö adebena ökwödönö a̧ja̧kwo̧, jö̧ba̧lö. Chö̧ja̧wo̧dö, isabenö jejenö döwaisa, Diosma jo̧banö adebi̧ a̧ja̧kwo̧, jö̧ba̧lö. Jau chö̧ja̧wo̧dö, döwaisa, Dios ösödi̧danö adebena ökwödönö pjabato̧, adebi̧ma baledobö.

¹⁶ Jau chö̧ja̧wo̧dö, Diosma ökwödö adebi̧ isabenö a̧ja̧kwö pjabato̧, jo̧ba ösödi̧danö adebena. Ja̧danö, ökwödönö yötawobö jö̧ta̧la̧duwakwö Diosnö adebi̧ dö̧ja̧wo̧dönö, sulabenö omukwatö ja̧dönöma. Chö̧ja̧wo̧dö, bakwo̧ Cristotjö döjawo̧ sulabenö omukwatö ja̧obe dedenama Diosnö adebobö jo̧be jo̧banöma. Isabenö, adebobö jo̧be chö̧ja̧wo̧dö, Diosma jo̧banö pjaatobö yemidanö o̧'wo̧ luwo̧nö otiwanö ö̧jobö, 'yabayo̧danö. Ja̧danö chö̧ja̧wo̧dö, yöta̧laduwakwö. Jo̧ba döjawo̧, Diosnö adebo pjaatobö jö̧ta̧lökwema, Diosnö öpöjödö kabatibö̧kö̧. Jo̧bama Diostjö 'da̧bachibö̧kö̧, sulabenö omukwatö i̧'yijayonö. Jo̧kwaijayonö chö̧ja̧wo̧dö, döwaisa, ju'wedöma tjö̧jobe Diosnö jwiinö öpöjödö, jo̧batjö 'da̧bachibö 'ya̧dö. Bakwo̧, jejenö Diosnö öpöjödö kabatibö 'yo̧ma jwiinö sulabenö ja̧bo̧. Ja̧danö, jwiinö sulabenö ja̧obetjö̧ o̧'wo̧ luwo̧ okwanö wobinada jo̧, Diostjö 'da̧bachibö. Jo̧banöma Diosnö adebobö jwiobe chö̧ja̧wo̧dö.

¹⁷ Isabenö okobe jwiinö suli̧ma Dios wei̧ a̧ja̧kwökönö ji̧. Jo̧kwaijayonö bakwo̧, suli̧ ja̧ijayonö Diosnö kabatibö̧kö̧ma o̧'wo̧ luwonö wobinadanö wobö̧kö̧. Isabenö, jo̧banö Diosnö adebobö jo̧be chö̧ja̧wo̧dö. Jo̧kwaijayonö Diosnö öpöjödö kabatibö 'yo̧ma jwiinö sulabenö ja̧bö jo̧, o̧'wo̧ luwo̧nö wobinada. Chö̧ja̧wo̧dö, jo̧banöma Diosnö adeboko.

Juan yöawina wene: —Jesúsma Dios i̧tji̧munö tjöbeba̧lö te'ada̧lo̧ Awetjatjö— jö̧ba̧lö

¹⁸ Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

¹⁹ Ja̧danö chö̧ja̧wo̧dö döwaisa, Ökwödöma Dios i̧tji̧mu babibinadösa, jö̧ba̧lö. Ja̧danö, böjȩnö ju̧kwadö Jesúsnö öpöjödadöma Dios i̧tji̧muböködö. Jobadöma sulabo̧ Awetja sulabenö ja̧tjobö öibawö̧, jo̧ba i̧tji̧mubedö.

²⁰ Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

²¹ Chösödawö̧, chi̧tji̧mu ötabiwö̧, yötawaduwakwö, Bakwo̧da, jö̧ba̧lö. Diosnö ösödöda kwuju̧kwaduwo. O̧'wo̧ jawa, tjo̧'wo̧ tjöwana̧li̧ tjotidinama kwösödaduwoko. Diosnöda ösödö kwuju̧kwaduwo chö̧ja̧wo̧dö. Tjo̧wi̧, biya̧da yöbawö chiwȩyuda.