1 Juan 4 - Dios Iwene

Juan yöawina wene: —Yöbawadö yötjawi̧ kwa̧ja̧kwaduwena, ö'wiawakwawö kwa̧ja̧kwa̧laduwobö jo̧be — jö̧ba̧lö

¹ Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.

² Ja̧danö ¿dakwö kwöwaisaduwobö, Isabenö ite yöawi̧ma Dios O̧'wo̧ Luwo̧tjö̧ ichobe, jö̧ba̧lö? Biya̧ chömöledö: Baikwö jö̧ba̧lo̧ma, Jesucristoma Dios böjȩkwö weinökwe jojo baibanö ö̧jobö, jö̧ba̧lö, jweinö yöbawo̧, Dios O̧'wo̧ Luwo̧tjö laebi̧ma.

³ Ja̧danö baikwö jö̧ba̧lo̧ma, Jesucristo Dios böjȩkwö weinökökwe jojo baibanö ö̧jobö, jö̧ba̧lö, omöna yöbawo̧. Jo̧ba yöawi̧ma Dios O̧'wo̧ Luwo̧tjö ichokobe. Jo̧ba yöawi̧ma jelo̧ jojo o̧'wo̧ luwo̧tjö ichobe, Cristo öpöjojo o̧'wo̧ luwo̧tjö. Jo̧ba Cristo öpöjojonö yötjawi̧ belö kwa̧ja̧kwinaduwobe, Bakwo̧ jojo ichakobe, Cristo öpöjojo ötjabökwema, jö̧ba̧lö, yötjawi̧ma. Ja̧danö chö̧ja̧wo̧dö, yötawaduwakwö. Ida̧ökö böjȩnö ba̧jekwadö omöna yöbawadö tjö̧jobe, Cristo öpöjojo o̧'wo̧ luwo̧ öibawö̧ma.

⁴ Chi̧tji̧mu, isabenö ökwödöma Dios i̧tji̧mubedöja. Ja̧danö, ökwödökwö dötewinö jo̧ma Diosda. Ja̧danö, Diosma jwiinö juluwo̧. Böjȩnö ju̧kwadötjö Diosnö öpöjödadö tjuluwo̧ Awetjatjö o̧penönö juluwo̧ Diosma. Chi̧tji̧mu, Diosma ökwödönö pjaatobetjö̧ omöna yöbawadö yötjawi̧ma kwöpöjödinaduwobe, Jweinö yöbawöködö, jö̧ba̧lö. Jejenö kwöpöjödaduwobetjö̧ jobadönö kwujuluwinaduwobe.

⁵ Ja̧danö, jobadö omöna yöbawadöma böjȩ jawada ösödadö. Jo̧kwaobetjö̧ yötjawi̧ma böjȩ jawada yötjawobe. Ja̧danö, yötjawi̧ma böjȩ jawaobetjö̧ böjȩnö ju̧kwadötjö Diosnö öpöjödadöma jobadö yötjawi̧ a̧ja̧kwö tjösödobe, yelösöda.

⁶ Jo̧kwaijayonö ökwödö Jesús webawedö yödawi̧ma tjöpöjödobe, böjȩ jawa yödawokobetjö̧. Ökwödöma Dios i̧tji̧mubedösa, ja̧danö, Dios jawada yöbawadösa. Jo̧kwaobetjö̧ Diosnö waisadöma ökwödö yödawi̧ tjösödobe. Isabenö yötawa chö̧ja̧wo̧dö, Diosnö öpöjödadöma böjȩ jawa yötjawi̧ ösödadö. Ja̧danö, Diosnö ösödadöma ökwödö yödawi̧ ösödadö, yödawi̧ma Dios O̧'wo̧ Luwo̧tjö ichobetjö̧. Chö̧ja̧wo̧dö jejenö öwawobe ti o̧'wo̧ luwo̧ öibawö̧ tjö̧jojobö, jö̧ba̧lö. Yödawi̧ tjösöditjö̧ma Dios O̧'wo̧ Luwo̧ öibawö̧. Jo̧kwaijayonö yödawi̧ tjöpöjöditjö̧ma jelo̧ o̧'wo̧ luwo̧ öibawö̧, Cristo öpöjojo o̧'wo̧ luwo̧da.

Juan yöawina wene: —Dios iteda jwiinö ile niebi̧ i̧sebö itji̧nö weinobe— jö̧ba̧lö

⁷ Chösödawö̧, isabenö dö̧ja̧wo̧dökwö ösödabikwawö dö̧jaduwo. Ja̧danö, ösödabikwawö dö̧jobö dujuluma ¿detjö ichobeda? Diostjöda ichobe chö̧ja̧wo̧dö, iteda i̧tji̧munö pjaati̧ma. Ja̧danö, ösödabikwawö dö̧ji̧ma di̧sekwobe, Ökwödöma Dios i̧tji̧mu babibinadösa, jö̧ba̧lö. Ja̧danö, dö̧ja̧wo̧dökwö ösödabikwawö dö̧ji̧ma di̧sekwobe, Diosnö waisadösa, ja̧danö, jo̧bakwö dötewinö 'ya̧dösa, jö̧ba̧lö.

⁸ Chö̧ja̧wo̧dö, Diosma jojodönö ile nibeböda jo̧. Jo̧kwaobetjö̧ Diosnö waisadö, jo̧bakwö dötewinö 'ya̧döma, Diosma jojodönö ile nibeböda jo̧, jö̧ba̧lö, tjö̧ja̧wo̧dökwö ösödabikwawö ju̧kwadö. Jo̧kwaijayonö bakwo̧, ö̧ja̧wo̧dönö ösödökönö jo̧ma Diosnö wajwibo̧. ¿Dakwö öwaisena Diosnö ö̧ja̧wo̧dönö ösödökönö ö̧jitjö̧ma? Diosnö öwaisitjö̧ma, Diosma jojodönö ile nibeböda jo̧, jö̧ba̧lö, ö̧ja̧wo̧dönö ösödö ö̧jena.

⁹ Ja̧danö chö̧ja̧wo̧dö, Diosma ¿dakwö i̧sebinada jojodönö jwiinö ile niebi̧ma? Bejenö i̧sebinobe: Iteda itji̧nö, iteakwo̧nöda weinobe böjȩkwö ichö ö'wö baibobö. Ja̧danö, Dios Itji̧ma ökwödö dusula dumusidi̧ midawö ö'wö baibinobe ökwödö do̧'wo̧ luwo̧ okwa ö'wö babiböködö, ba̧kwȩlö̧jatebö ja̧dö badibobö.

¹⁰ Chö̧ja̧wo̧dö, Diosma ökwödönö jwiinö ile niebobetjö̧ iteda itji̧nö weinobe ökwödönö dusula dumusidi̧ imidawobö. Jau chö̧ja̧wo̧dö, jejenö Diosma i̧sebinobe inesö ile niekwama. Jejenö Diosma jojodö ile nitjebi̧tjö o̧penönö ile niebi̧ i̧sebinobe. Jau chö̧ja̧wo̧dö, Diosda inesö ile niebi̧ i̧sebo̧ma.

¹¹ Ja̧danö, Diosma jejenö ökwödönö jwiinö ile niebinobetjö̧ ökwödöbi dö̧ja̧wo̧dönö ile nibebö dö̧jobö jo̧be.

¹² Chö̧ja̧wo̧dö, Diosma edawö̧kö̧. Bakwo̧bi deobe Diosnö edo̧ma. Edawö̧kö̧jayonö ökwödöma dö̧ja̧wo̧dönö ile nibebö dö̧jenama di̧sekwobe, Diosnöma edö ja̧dösa, jö̧ba̧lö. Jau chö̧ja̧wo̧dö, Dioskwö ja̧nö, jo̧banö edö dö̧jobedanö jo̧be, jo̧ba ile nibebö ö̧ji̧danö dö̧jobetjö̧. Ja̧danö chö̧ja̧wo̧dö, dö̧ja̧wo̧dönö ile nibebö dö̧jena Diosma ökwödökwö dötewinö i̧'yobe. Jejenö Dioskwö 'ya̧nö ökwödö do̧'wo̧ luwo̧nö pjabatö öibobe Diosma, dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, Diosma jejenö ösödo̧, jo̧ba ökwödönö ile niebi̧danö ökwödöma dö̧ja̧wo̧dönö ile nibebö dö̧jobö.

Juan yöawina wene: —Dios O̧'wo̧ Luwo̧ma ökwödönö wajuwanö döwaisachibanö yöbawö pjabato̧— jö̧ba̧lö

¹³ Chö̧ja̧wo̧dö, isabenö döwaisa, Dioskwö dötewinö ju̧kwadösa, ja̧danö Diosma ökwödökwö dötewinö jo̧, jö̧ba̧lö. Ja̧ma ¿dakwö döwaisobeda chömöledö? Dios O̧'wo̧ Luwo̧, Dios ökwödönö iyinökwema ökwödönö wajuwanö döwaisachibanö yöawobe. Jo̧bama do̧'wo̧ luwo̧nö pjabatö, Ökwödöma Dioskwö dötewinö 'ya̧döja, jö̧ba̧lö, yöawobe. Ja̧danö, Diosma ökwödökwö dötewinö jo̧, jö̧ba̧lö, pjabatö yöawobe Dios O̧'wo̧ Luwo̧ma ökwödönöma, do̧'wo̧ luwo̧nö.

¹⁴ Ja̧danö chö̧ja̧wo̧dö ju'wi jawabi, Dioskwö dötewinö 'ya̧dösa, jö̧ba̧lö, döwaisoböma. Ökwödö Jesucristonö edinadöma dedina yöbawadösa, Dabe'do Diosma iteda Itji̧nö weinobe böjȩnö ju̧kwadönö tjö̧jibinö pjabatö, jö̧ba̧lö.

¹⁵ Jo̧kwaobetjö̧ Jesúsnö ösödadöma, Jesúsma Dios Itji̧, jö̧ba̧lö, Dioskwö dötewinö 'ya̧dö. Ja̧danö, Diosma jobadö Jesúsnö ösödadökwö dötewinö 'yo̧.

¹⁶ Chö̧ja̧wo̧dö Diosma ökwödökwö dötewinö i̧'yobetjö̧, ja̧danö jo̧bakwö dötewinö di̧'yobetjö̧ isabenö döwaisachibijatö, Diosma jwiinö ile niebobe ökwödönöma, jö̧ba̧lö. Jejenö waisö jo̧banö do̧'wo̧ wana̧lö di̧'yobe, Diosma isabenö ökwödönöma jwiinö ile nibebo̧, jö̧ba̧lö. Chömöledö, Diosma ile nibeböda jo̧. Ja̧danö bakwo̧, ö̧ja̧wo̧dökwö ile nibebö jo̧ma Dioskwö dötewinö 'yo̧. Ja̧danö, Diosma jo̧bakwö dötewinö 'yo̧, ö̧ja̧wo̧dönö ile nibebö 'yo̧kwö.

¹⁷ Ja̧danö, chö̧ja̧wo̧dö ökwödöma Dioskwö bakobe dötewinö 'ya̧dösa. Ja̧danö, Diosma ökwödökwö dötewinö 'yo̧. Jejenö 'ya̧nö Diosma ökwödö do̧'wo̧ luwo̧ okwanö öibobe dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, jejenö dö̧jenama Dios ökwödö dö̧jobö ösödi̧danö dö̧jobe, jo̧ba ile niebi̧ma i̧sebö. Ja̧danö, jejenö dö̧jobetjö̧, Dioskwö dötewinö 'ya̧nö, ja̧danö dö̧ja̧wo̧dökwö ösödabikwawö ju'wi möle, jojodönö lȩekwa yöawakwa̧ möle omukwatö yebaböködösa. Chö̧ja̧wo̧dö, ökwödöma Jesús Dioskwö dötewinö ö̧ji̧danö böjȩnö ja̧nö Dioskwö dötewinö di̧'yobetjö̧ ja̧ lȩekwa yöawakwa̧ möle omukwatö yebaböködösa, Isabenö Dios öba a'o otiwanö dichibakwedösa, jö̧ba̧lö.

¹⁸ Chö̧ja̧wo̧dö, jejenö Dioskwö bakobe dötewinö 'ya̧nö, jo̧ba ösödi̧danö dö̧ja̧wo̧dökwö ösödabikwawö dö̧jobetjö̧ Dios ile niebi̧ma waisadösa. Jejenö waisö Dios lȩekwa yöawakwa̧ möle omukwatö yebaböködösa. Jo̧kwaijayonö bakwo̧ Dioskwö dötewinö 'yö̧kö̧, ja̧danö ö̧ja̧wo̧dönö ösödökönö jo̧ma ina wajwibo̧ Dios ile niebi̧ma. Ina Dios jo̧ba ö̧jobö ösödi̧ma wajwibo̧. Jo̧bama Dios ile niebi̧ öwaisokobetjö̧ ina Dios lȩekwa yöawakwa̧ möle omukwatö yelösöda yebabo̧, Lȩebakwo̧sa, jö̧ba̧lö.

¹⁹ Ja̧danö chö̧ja̧wo̧dö, Diosma ökwödönö ajayitjöda ile niebinobetjö̧ jo̧banöbi dö̧ja̧wo̧dönöbi ile nibebö dö̧jobö jo̧be.

²⁰ Jo̧kwaobetjö̧ Diosnö ösödo̧sa, jö̧ba̧lö, yöba̧lo̧ma, Jesústjö öjawo̧nö ösödö jo̧. Öjawo̧nö ösödökönö jo̧ma, Diosnö ösödo̧sa jö̧ba̧lö, yöa̧litjö̧ma omöna yöa̧lena. Öjawo̧nö, edökwenö ösödökötjö̧ma ¿dakwö ösödobeda Diosnö, edökökwenö? Wajuwanö i̧sebobe, Jo̧bama öjawo̧nö ösödökönö ö̧jobetjö̧, Diosnöbi ösödö̧kö̧, jö̧ba̧lö.

²¹ Chö̧ja̧wo̧dö, Dios wei̧ma biya̧: Ötjönö ösödö ju̧kwadöma tjö̧ja̧wo̧dökwö ösödabikwawö tjö̧jobö jo̧be. Jo̧kwaobetjö̧ chömöledö, ökwödöma dö̧ja̧wo̧dökwö ösödabikwawö dö̧jaduwo.