1 Juan 3 - Dios Iwene

Juan yöawina wene: —Cristo yemidanö ichena jo̧badanö badibakwedösa— jö̧ba̧lö

¹ Chö̧ja̧wo̧dö, Dabe'do Dios ökwödönö jwiinö ile niebi̧ma domukwataduwo. Yelösöda jwiinö ile niebobe ökwödönö. Ja̧danö, jwiinö ile niebobetjö̧ ökwödönö öabobe, Chi̧tji̧mu, jö̧ba̧lö. Isabenö chö̧ja̧wo̧dö, ökwödöma Dios i̧tji̧musa. Jejenöijayonö böjȩ jawa ösödadöma ökwödönö edö omukwatöködö, Idöma Dios i̧tji̧mu, jö̧ba̧lö. Dios i̧tji̧mu döji̧ma wajwitjobe. Jobadöma Diosnöbi wajwitjobetjö̧ ökwödönö, Idöma Dios i̧tji̧mu, jö̧ba̧lö, tjomukwatokobe.

² Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.

³ Ja̧danö, jejenö omukwatö te'ada̧lö jo̧ma, Isabenö ötjöma Jesucristodanö ichejekwo̧ chö̧jakwo̧sa, jö̧ba̧lö, babe böjȩnö ö̧jayi otiwanö ja̧bö 'yo̧, suli̧tjö dichö loinökwedanö. Isabenö chö̧ja̧wo̧dö, Jesúsnö omukwatö te'ada̧lö jo̧ma böjȩnö ö̧jayi sulabenö ja̧bökönö ja̧kwawa isakwo̧, Jesús böjȩnö ö̧jinadanö.

Juan yöawina wene: —Sulabenö ja̧bö 'yo̧ma Cristokwö dötewinö 'yö̧kö̧— jö̧ba̧lö

⁴ Chö̧ja̧wo̧dö, sulabenö ja̧bö 'yo̧ma Dios weina a̧ja̧kwö̧kö̧. Isabenö, sulabenö ja̧bö ja̧kwawama Dios weina a̧ja̧kwökönö ja̧kwawa.

⁵ Ja̧danö kwöwaisaduwa, Cristoma böjȩkwö ichinobe jojodö tjusula tjumusidi̧, Dios jojodönö lȩebobö tjumusidi̧ma imidawobö, jö̧ba̧lö. Jejenö Cristoma imidawinobe jojodö tjusuli̧ma, Dios söbebö loobö. Jau chö̧ja̧wo̧dö, Cristoma suli̧ jwibo̧obetjö̧ jo̧bada jojodö tjumusidi̧ midawinama.

⁶ Ja̧danö, suli̧ jwibo̧ Cristokwö dötewinö 'yo̧ma sulabenö ja̧bökönö 'yo̧. Jo̧kwaijayonö bakwo̧ Cristonö ösödijayonö sulabenö ja̧bö i̧'yitjö̧ma wajwiena Cristokwö dötewinö ja̧kwawama. Isabenö chö̧ja̧wo̧dö, jo̧ba sulabenö ja̧bö 'yo̧ma o̧'wo̧ luwo̧nö Cristokwö dötewinö i̧'yoböma wajwibo̧. Jo̧bama Cristokwö dötewinö 'yö̧kö̧.

Juan yöawina wene: —Sulabenö ja̧bö 'yo̧ma i̧sekwobe, Awetja öibökwesa— jö̧ba̧lö

⁷ Chi̧tji̧mu, yötawaduwakwö. Isabenö bakwo̧ Dios wei̧ a̧ja̧kwö jo̧ma, sulabenö ja̧bökönö jo̧. Jo̧bama Cristo sulabenö ja̧bökönö ö̧jinadanö sulabenö ja̧bökönö jo̧. Jo̧kwaijayonö ju'wedö jelobekwö omukwatö yötjawobe. Jobadöma ökwödönö sulabenö ja̧köbaduwobö ötjibotö jö̧ba̧lö yötjawobe. Chö̧ja̧wo̧dö, jobadö yötjawi̧ma kwa̧ja̧kwaduwoko. Jobadö jelobekwö omukwatö yötjawi̧ a̧ja̧kwökönö otiwanö ja̧bö kwi̧'yaduwo chö̧ja̧wo̧dö.

⁸ Jau, sulabenö ja̧bökönö 'yo̧ma Dios wei̧ a̧ja̧kwö i̧'yobe. Jo̧kwaijayonö sulabenö ja̧bö 'yo̧ma Awetjada öibökwe, Awetjakwöda dötewinö 'yo̧. Isabenö chömöledö döwaisa, ajayitjöda babe baibanö Awetjama sulabenö ja̧böda jo̧, jö̧ba̧lö. Jo̧kwaobetjö̧ sulabenö ja̧bö 'yo̧ma ¿tikwö i̧'yobeda? Awetjakwöda dötewinö 'yo̧, Awetja sulabenö ja̧i̧danö ja̧bö. Ja̧danö chö̧ja̧wo̧dö, Dios Itji̧ma böjȩkwö ichinobe Awetjanö ujuluwobö, jo̧ba jojodönö sulabenö ja̧tjobö öibi̧ma juluwokobö.

⁹ Chö̧ja̧wo̧dö, Dios Itji̧ babibo̧nöma Dios 'yayi̧ ja̧kwawa iyinökwe. Jo̧bama o̧'wo̧ luwo̧nö balekwo̧, 'yabayo̧da ö̧jökwe, omajade okwanö Dios omukwati̧danö omukwatinö. Ja̧danö, Dioskwö dötewinö 'ya̧nö jo̧ba 'yabayo̧ ö̧ji̧danö jo̧ma suli̧ jawa ja̧okobe.

¹⁰ Jejenö ja̧nö, öwawinö i̧sekwobe, Ötjöma Dios öibökwesa, Dioskwö dötewinö chi̧'yinö, jö̧ba̧lö. Jo̧kwaijayonö suli̧ jawa ja̧bö 'yo̧ma ju'wi i̧sekwobe, Ötjöma Awetja öibökwesa, jö̧ba̧lö. Ja̧danö chö̧ja̧wo̧dö, yötawaduwakwö. Cristotjö ö̧ja̧wo̧dönö ösödökönö jo̧ma i̧sekwobe, Ötjöma Awetjakwö dötewinö chi̧'yinö öibökwesa, jö̧ba̧lö. Jo̧ba ö̧ja̧wo̧dönö öpöjödo̧ma Diosma öibökökwe. Chö̧ja̧wo̧dö isabenö, bakwo̧ ö̧ji̧ma i̧sekwobe, Dios öibökwesakö̧, Awetja öibökwesakö̧, jö̧ba̧lö.

Juan yöawina wene: —Dö̧ja̧wo̧dökwö ösödabikwawö dö̧jenama do̧'wo̧ luwo̧nö balekwedösa, ja̧danö 'yabayedösa, jö̧ba̧lö, di̧sekwobe— jö̧ba̧lö

¹¹ Ja̧danö chö̧ja̧wo̧dö, ida̧ökö kwa̧ja̧kwinaduwobe, Ökwödö Jesúsnö ösödadöma kwö̧ja̧wo̧dökwö ösödabikwawö kwö̧jaduwo, jö̧ba̧lö. Cristonö ajayinö do̧batö kweminaduwemitjö baikwö ja̧ wei̧ma kwa̧ja̧kwinaduwobe. Chömöledö, ja̧ wei̧ a̧ja̧kwö dö̧jaduwo, dö̧ja̧wo̧dökwö ösödabikwawö.

¹² Damötjö ji̧na Caín iteda öjawo̧nö o̧'wo̧ sulinö edinadanö kwedaduwoko chö̧ja̧wo̧dö. Jo̧ba öjawo̧nö kwabö lobinama Awetjakwö dötewinö 'yi̧na. Ja̧danö, abebö cha̧ja̧kwaduwakwö. ¿Tajawedö kwabö loinada Caínma öjawo̧nöma? Biya̧ chö̧ja̧wo̧dö: Caínma sulabenö ja̧bö ö̧jinobe, Dios wei̧ma a̧ja̧kwökönö. Ja̧danö, Caín öjawo̧ma otiwanö, Dios wei̧ a̧ja̧kwö ö̧jiökwe o̧'wo̧ sulinö edö kwabö loinobe Caínma öjawo̧nöma.

¹³ Ja̧danö chö̧ja̧wo̧dö, babe ökwödönöbi jejenö baledobe. Böjȩnö ju̧kwadötjö Cristonö öpöjödadöma, Caín öjawo̧nö o̧'wo̧ sulinö edinadanö ökwödönö tjo̧'wo̧ sulinö edö tjölabobe. Jo̧kwaobetjö̧ ökwödönö jejenö tjölabena kwöbajaleduwi jalaka baibanö kwedaduwoko jobadönöma ¿Tajawedö jwiinö tjölabobeda ökwödönö? jö̧ba̧lö. Isabenö, böjȩnö ju̧kwadötjö Cristonö öpöjödadöma Caín öjawo̧nö o̧'wo̧ sulinö edö ölabinadanö ökwödönö tjo̧'wo̧ sulinö edö tjölabobe.

¹⁴ Ja̧danö chömöledö, Cristotjö dö̧ja̧wo̧dökwö ösödabikwawö dö̧jenama di̧sekwobe, Do̧'wo̧ luwo̧nö balekwedö, 'yabayedöda dö̧jobe, jö̧ba̧lö. Jo̧kwaijayonö Cristotjö ö̧ja̧wo̧dönö ösödökönö, o̧'wo̧ sulinö edo̧ma ina o̧'wo̧ luwo̧nö wobinadanö ö̧jobe.

¹⁵ Ja̧danö, Diosma öjawo̧nö o̧'wo̧ sulinö edo̧nöma jojonö kwabö lobo̧danö, bakwainö, edobe. Ja̧danö döwaisa chömöledö, jojonö kwabö lobo̧ma Dios 'yayi̧ ja̧kwawa iyi̧ma jwibo̧ o̧'wo̧ luwo̧nö, ba̧kwȩlö̧jatebö ja̧kwawama, jö̧ba̧lö. Isabenö ökwödö, do̧'wo̧ luwo̧nö 'yabayedöma dö̧ja̧wo̧dökwö ösödabikwawö duju̧kwobö jo̧be.

Juan yöawina wene: —Dö̧ja̧wo̧dönö ile nibebö dö̧jobö jo̧be Jesús ökwödönö ile nibebö ö̧jinadanö— jö̧ba̧lö

¹⁶ Ja̧danö chö̧ja̧wo̧dö, dö̧ja̧wo̧dönö ile nibebö dö̧ji̧ma ¿dakwö ja̧bö dö̧jobeda? ¿Ti i̧sebinada döwaisachibanö, Ja̧da ile nibebö ja̧kwawa, jö̧ba̧lö? Jesúsda chö̧ja̧wo̧dö. Jesúsma ökwödönö ile nibebö, ökwödö diminö dusula dumusidi̧ midawö ö'wö baibinobe. Chö̧ja̧wo̧dö, ökwödöma Jesús ile nibebö ö̧jinadanö, okobe jwiinö iyö, ökwödöbi dö̧ja̧wo̧dönö pjabatö, ile nibebö dö̧jobö jo̧be, debö di̧'yitjö̧bi.

¹⁷ Jau chö̧ja̧wo̧dö. Dö̧ja̧wo̧dönö ile nibebö pjadatobö jo̧be. Ja̧danö, böjȩnö ö̧jobö jawa juna̧lo̧ma öjawo̧ jwibo̧nö lȩlö̧jino edobö jo̧be, jo̧banö pjabatö iyö. Jo̧ba juna̧lo̧ma öjawo̧ jwibo̧nö pjaatökötjö̧ma Diosnö ösödökena. Öjawo̧ jwibo̧nö pjaatokobetjö̧ wajuwanö i̧sekwobe, Dios ile niebinadanö ile nibebökösa, jö̧ba̧lö. Ja̧danö, jejenö pjaatokobetjö̧ Diosnöbi öpöjödobe ichejekwa, Dios jojodönö ile niebi̧danö jojodönö ile nibebö ö̧jokobetjö̧.

¹⁸ Chö̧ja̧wo̧dö chösödawö̧, sule yöba̧lödama yöda̧laduwoko, Dios ile niebi̧danö dö̧ja̧wo̧dönö ile nibebö dö̧jaduwo, jö̧ba̧löma. Yöba̧lödama yöda̧laduwoko, i̧seböbi di̧sebaduwo, dö̧ja̧wo̧dönö pjabatö do̧'wo̧ luwo̧nö isabenö lȩlö̧jino edö.

Juan yöawina wene: —Dö̧ja̧wo̧dökwö ösödabikwawö dö̧jena Dios isabenö ji̧ yöawi̧ a̧ja̧kwö ju̧kwadösa— jö̧ba̧lö.

^19-20 Chö̧ja̧wo̧dö ¿dakwö döwaisobö jobeda, Ökwödöma Dios isabenö ji̧ yöawi̧ a̧ja̧kwö ja̧dösa, jö̧ba̧lö? Biya̧da chö̧ja̧wo̧dö: Dö̧ja̧wo̧dökwö ösödabikwawö dö̧jobetjö̧ döwaisa, Dios isabenö ji̧ yöawi̧ a̧ja̧kwö ja̧dösa, jö̧ba̧lö. Ja̧danö, dö̧ja̧wo̧dökwö ösödabikwawö dö̧jenama domajade okwanö döwaisa, Dios öba a'otjö otiwanö dö̧jobe, jö̧ba̧lö. Jo̧kwaijayonö dö̧ja̧wo̧dökwö ösödabikwawö dö̧jökötjö̧ma domajade okwanö döwaisena, Sula, Dios wei̧ a̧ja̧kwökönö dö̧jobe, jö̧ba̧lö. Ja̧danö ökwödödamaökö, Diosbi öwaisa, okobe jwiinö waiso̧obetjö̧. Diosma isabenö domajade okwa döwaisi̧tjö o̧penönö waiso̧. Jo̧kwaobetjö̧ dö̧ja̧wo̧dönö ösödabikwawö dö̧jaduwo, yöba̧lödamaökö, i̧seböbi, jobadönö pjabatö. Jejenö ja̧nö isabenö döwaisobe, Dios öba a'otjö otiwanö ja̧dösa, iteda wei̧ a̧ja̧kwö dö̧jobetjö̧, jö̧ba̧lö.

²¹ Ja̧danö chö̧ja̧wo̧dö chösödawö̧, otiwanö omukwatö dö̧jena, dö̧ja̧wo̧dökwö ösödabikwawö, domajade okwanö döwaisa, Ökwödöma Dios isabenö ji̧ yöawi̧ a̧ja̧kwö ja̧dösa, jö̧ba̧lö. Jejenö waisö dö̧jobetjö̧ Diosnö adebena yebabökönö adebobö jo̧be.

²² Ja̧danö chö̧ja̧wo̧dö, Dios wei̧ a̧ja̧kwö, jo̧ba ösödi̧danö ja̧bö dö̧jobetjö̧, jo̧banö adebena ökwödönö iyobe.

²³ Ja̧danö, Dios wei̧ma dötölataja jawa. Abönö jawa biya̧: Jesucristonö dösödobö weobe, Jesucristoma Dios Itji̧, jwiinö inesö jo̧, jö̧ba̧lö. Ikenama jawa, Dios wei̧ma biya̧: Ökwödöda ösödabikwawö dö̧jobö weobe.

²⁴ Ja̧ Dios dötölataja jawa wei̧ a̧ja̧kwo̧ma Dioskwö dötewinö 'yo̧. Ja̧danö, Diosma jo̧bakwö ö̧jobe. Ja̧danö chö̧ja̧wo̧dö, Dios O̧'wo̧ Luwo̧, do̧'wo̧ luwo̧ okwanö ö̧jobö Dios weinökwema döwaisachibanö pjabato̧, Diosma ökwödökwö jo̧, jö̧ba̧lö. Jau chö̧ja̧wo̧dö, Diosma iteda wei̧ a̧ja̧kwadökwö jo̧, jo̧bakwö dötewinö 'ya̧dökwö.