1 Juan 2 - Dios Iwene

¹ Chö̧ja̧wo̧dö chösödawö̧, böjanö yötawi̧ma, Sulabenö ja̧böma kwö̧jaduwoko, jö̧ba̧lö, yöbawö chiwȩyuda. Jo̧kwaijayonö sulabenö ja̧köbaduwena biya̧ yötawi̧ kwomukwataduwo. Jesucristoma Dios öba a'o jo̧. Jo̧bama jwiinö otiwo̧. Ja̧danö, jo̧bama ökwödönö pjabatö te'ada̧lo̧. Ja̧danö chö̧ja̧wo̧dö, sulabenö ja̧denama Jesucristoma Diosnö aebobe ja̧ sulabenö ja̧daja̧ma söbebö loobö. Ja̧danö, Jesucristoma Diosnö aebiökwe sulabenö ja̧köbaduwi̧ma söbebö loobe.

² Jo̧ba Jesucristoma ökwödö diminö imidawinobe dusula dumusidi̧ma sulabenö ja̧di̧ Diosma söbebö loobö. Ja̧danö chö̧ja̧wo̧dö, ökwödönödamaökö. Okobe deinö böjȩnö ju̧kwadönöda pjabatö imidawinobe Jesúsma, okobe deinö suli̧ ja̧tji̧ma söbebö loobö. Chö̧ja̧wo̧dö, Jesucristoda ökwödönö pjabato̧, suli̧ ja̧denama, Diosnö abebö, ja̧ suli̧ ja̧di̧ma söbebö loobö.

Juan yöawina wene: —Dios wei̧ a̧ja̧kwö dö̧jena jo̧bakwö dötewinö dö̧ji̧ma di̧sekwobe— jö̧ba̧lö

³ Chö̧ja̧wo̧dö ¿dakwö ja̧nö di̧sekwobeda döwaisobö, Isabenö ökwödöma Diosnö waisadösa, jo̧bakwö dötewinö 'ya̧jadösa, jö̧ba̧lö? Biya̧ chö̧ja̧wo̧dö: Dios wei̧ a̧ja̧kwö dö̧jobö jo̧be. Jejenö, jo̧ba wei̧ a̧ja̧kwö dö̧jena döwaisa, Isabenö ökwödöma Diosnö waisadösa, jö̧ba̧lö.

⁴ Chö̧ja̧wo̧dö, bakwo̧, Ötjöma chöwaisökwe Diosnöma, jö̧ba̧lö, yöa̧lijayonö Dios wei̧ a̧ja̧kwökönö ö̧jitjö̧ma jweinöma yöba̧lö̧kö̧. Omönada yöba̧lo̧. Diosnö wajwibo̧. Jo̧bama o̧'wo̧ luwo̧nö Dios iwene, isabenö ji̧ wenema öpöjödo̧.

^5-6 Jo̧kwaijayonö Dios wei̧ a̧ja̧kwo̧ma Diosnö jwiinö ile nibebo̧, ja'yubebi ji̧bökönö. Ja̧danö, ju'wi jawabi yötawa chö̧ja̧wo̧dö. Bakwo̧, Ötjöma Dioskwö dötewinö jo̧sa, jö̧ba̧lo̧ma, otiwanö omukwatö ö̧jobö jo̧be, Cristo ö̧jinadanö. Chö̧ja̧wo̧dö, Cristo ö̧jinadanö dö̧jenama ökwödöda öwawinö döwaisa domajadenö, Jau Dioskwö dötewinö ja̧dösa, jö̧ba̧lö. Chö̧ja̧wo̧dö, Dios wei̧ a̧ja̧kwö kwö̧jaduwo, Cristo ö̧jinadanö, Dioskwö dötewinö.

Juan yöawina wene: —Dios wei̧, Kwö̧ja̧wo̧döduwikwö ösödabikwawö kwö̧jaduwo, jö̧ba̧lö, wei̧ma babebi ökwödönö webö ji̧— jö̧ba̧lö

⁷ Chö̧ja̧wo̧dö chösödawö̧, tupakwö yötawobö jö̧ta̧la ökwödöda ösödabikwawö dö̧ji̧ma. Diosma weobe jejenö dö̧ja̧wo̧dökwö dö̧jobö, ösödabikwawö. Ja̧ Dios wei̧ma ida̧ökö kwa̧ja̧kwinaduwobe. Belö Jesúsnö do̧batö kwemaduwinemitjö baikwö, ja̧ Dios wei̧, Ökwödöda ösödabikwawö kwö̧jaduwo, jö̧ba̧lö, kwa̧ja̧kwinaduwobe.

⁸ Jo̧kwaobetjö̧ ja̧ wei̧ma 'yayi̧ wei̧maökö. Ida̧ökö belö kwa̧ja̧kwinaduwobe. Jo̧kwaijayonö ja̧ wei̧ma babe wei̧danö ji̧. Döpöe Jesucristobi ja̧ wei̧ a̧ja̧kwö ö̧jinobe. Ja̧danö, döpöe Jesucristoma ja̧ wei̧ a̧ja̧kwö ö̧jinobetjö̧ ökwödö babe dö̧jobö i̧sebinobe. Jejenö babe dö̧jobö i̧sebinobetjö̧ yötawaduwakwö biya̧: Ja̧ wei̧ma babebi ökwödönö webö ji̧. Ja̧danö chö̧ja̧wo̧dö, ökwödöma ja̧ wei̧ a̧ja̧kwö kwö̧jaduwobe, kwö̧ja̧wo̧döduwikwö ösödabikwawö. Jejenö ja̧ wei̧ a̧ja̧kwö kwö̧jaduwobetjö̧ ja̧ wei̧ma babe wei̧danö ji̧. Chö̧ja̧wo̧dö, wanedö yötawa: Jejenö, ökwödöma ösödabikwawö kwö̧jaduwena Dios isabenö ji̧ yöawi̧ma dewinö dejatobe yȩa'wo okwatjö öwawinö. Jejenö dewinö dejatobetjö̧ suli̧ wanekwacha'woma tjo̧'omanö söbawö, Dios dewinö idejati̧da öwawobe ja'wotjö. Jejenö jö̧ba̧lö biya̧ wanekwachobe: Ökwödö ajayinö sulabenö omukwatö kwö̧jinaduwatjö tjo̧wi̧ balewö lobö, Dios otiwanö omukwati̧danö ja̧döja.

^9-10 Ja̧danö chö̧ja̧wo̧dö bakwo̧, Ötjöma otiwanö omukwatö 'yo̧sa, Cristokwö dötewinö, dewa'wonö kwebacho̧sa, jö̧ba̧lö, yöba̧lo̧ma Cristotjö ö̧ja̧wo̧dönö ösödö ö̧jobö jo̧be. Jejenö jö̧a̧lijayonö öjawo̧nö sulabenö omukwatö ölabitjö̧ma isabenö ¿dewa'wonö kweachobeji̧? Kwebachö̧kö̧. Yȩa'wo okwada kwebacho̧, suli̧ wanekwacha'wonö. Ja̧danö, jweinöma yöba̧lö̧kö̧, Cristokwö dötewinö 'yo̧sa, jö̧ba̧lö. Isabenö omönada yöba̧lo̧. Cristokwö dötewinö 'yö̧kö̧. Jo̧kwaijayonö jejenömaökö ö̧ja̧wo̧dönö ösödö jo̧ma. Jo̧bama otiwanö omukwatö 'yo̧, Cristokwö dötewinö, dewa'wo okwada kwebachö. Ja̧danö jo̧ba, Cristokwö dötewinö, dewa'wo okwada kwebacho̧ma, jelobekwö omukwatö töbö meoböma jwibo̧.

¹¹ Jo̧kwaijayonö öjawo̧nö jwiinö öpöjödo̧ma yȩa'wo okwada kwebacho̧, suli̧ wanekwacha'wonö. Ja̧danö, ja'wonö kwebachö, sulabenö omukwatakwawada waiso̧ yȩa'wo okwada ö̧jobetjö̧, otiwanö omukwatökönö. Jo̧bama öbajale tjewawo̧danö jo̧, Dioskwö, otiwanö omukwatö, dewa'wonö kwebachö 'ya̧kwawama wajwibö. Chö̧ja̧wo̧dö, jo̧ba yȩa'wo okwa kwebachö i̧'yi̧danö kwi̧'yaduwoko. Okwödöma dewa'wo okwada kwi̧'yaduwobö jo̧be, Dioskwö dötewinö, kwö̧ja̧wo̧döduwikwö ösödabikwawö ja̧nö.

Juan yöbawö pjaatina wene

¹² Chö̧ja̧wo̧dö, chi̧tji̧mu ötabiwö̧, ökwödönö yötawa, Sulabenö ja̧köbaduwi̧ma Dios söbebö loinawö̧ja, jö̧ba̧lö. Isabenö chö̧ja̧wo̧dö, Jesús kwumusidaduwi̧ midawö ö'wö baibiökwe Diosma sulabe ja̧köbaduwi̧ma söbebö loinobe.

¹³ Ja̧danö, ökwödöma kwo̧'wo̧ luwo̧duwinö kwöda̧peachaduwobe chö̧ja̧wo̧dö. Ja̧danö, ökwödö da̧peachadönö yötawa, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, ökwödö möayedö tjujuluwi̧danö kwo̧'wo̧ luwo̧duwi okwanö kwujuluwaduwobe chö̧ja̧wo̧dö. Ja̧danö, ökwödö möayedö tjujuluwi̧danö juluwadönö yötawa, Sulabo̧ Awetjanö juluwinadöja, jö̧ba̧lö. Isabenö böjanö wȩyudö yötawa chi̧tji̧mu, Dabe'do Diosnö waisadöja, jö̧ba̧lö.

¹⁴ Ja̧danö böjanö yötawa ökwödö kwo̧'wo̧ luwo̧duwi okwanö da̧peachadönö, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, böjanö yötawa ökwödö möayedö tjujuluwi̧danö kwo̧'wo̧ luwo̧duwi okwanö juluwadönö, Juluwadöja, jö̧ba̧lö. Ja̧danö yötawa, Dios yöawi̧ kwo̧'wo̧ luwo̧duwi okwanö ösödö 'ya̧döja, jö̧ba̧lö, böjanö wȩyudö. Ja̧danö, ökwödö juluwadönö yötawa, Sulabo̧ Awetjanö juluwinadöja, jö̧ba̧lö. Jau chi̧tji̧mu, ökwödönö yöbawö pjabatö chiwȩyuda böjama, tupakwö kwujuluwachibaduwobö.

Juan yöawina wene: —Jojodö sulabenö omukwatö tjö̧ji̧ma 'dö̧ibaji̧ ja̧kwawa— jö̧ba̧lö

¹⁵ Ja̧danö chö̧ja̧wo̧dö, yötawaduwakwö. Böjȩnö ju̧kwadö, Diosnö öpöjödadö sulabenö omukwatö tjö̧jobe edö kwomukwataduwoko, Aaa ötjöbi jejenö chö̧jobö chösöda, jö̧ba̧lö. Ja̧danö, jobadö böjȩ jawa sulabe tjösödi̧ma kwösödaduwoko. Chö̧ja̧wo̧dö, Diosnö öpöjödadö sulabenö omukwatö tjö̧ji̧ tjösödi̧kwö, ja̧danö, Dabe'do Diosnö tjösödi̧kwö pjabacha̧löma jö̧kö̧. Wainö ji̧ chö̧ja̧wo̧dö. Isabenö, sulabenö omukwatö ja̧kwawa ösödadöma Dabe'do Diosnö öpöjödö ja̧dö.

¹⁶ Ja̧danö ¿taji tji̧sekwobeda böjȩ jawa sulabenö tjösödi̧ma? Biya̧ chö̧ja̧wo̧dö: Jojodö tjiteba'o sulabe wei̧ tjösödi̧ma. Ja̧danö, ju'wibi. Böjȩ jawa edö, ju'wi jawabi, ju'wi jawabi, Chujuna̧lo, jö̧ba̧lö. Ja̧danö ju'wi jawabi, böjȩ jawa sulabe tjösödi̧ tji̧sebi̧ma biya̧: Baikwö jö̧ba̧lo̧, Editjö, luwo̧sa. Ötjöma jojodö tjuluwo̧sa, ja̧danö teabi, kwakwawabi, baladabi juna̧lo̧sa, jö̧ba̧lö, yelösöda jo̧bama böjȩ jawa sulabe tjösödi̧ma i̧sebo̧. Chö̧ja̧wo̧dö, jejenö böjȩ jawa ösödö tjö̧ji̧ma Dabe'do Diostjö ichokobe. Jojodötjö, Diosnö öpöjödadötjöda ichobe, ja̧ böjȩ jawa tjösödi̧ma.

¹⁷ Ja̧danö chö̧ja̧wo̧dö, jobadö Diosnö öpöjödadö sulabenö omukwatö tjö̧ji̧ma 'dö̧ibaji̧ ja̧kwawada. Ba̧kwȩlö̧jatebö ja̧kwawamaökö jejenö sulabenö omukwatö tjö̧ji̧ma. Jo̧kwaijayonö Dios wei̧ a̧ja̧kwö tjö̧ji̧ma ba̧kwȩlö̧jatebö ja̧kwawa, 'dö̧ibajökönö. Ja̧danö, Dios wei̧ a̧ja̧kwö ja̧döma ba̧kwȩlö̧jatebö tjö̧jakwedö.

Juan yöawina wene: —Cristo öpöjojodö ida̧ökö tjö̧jobetjö̧ döwaisobö jo̧be, 'dö̧jibaji̧ möle ida̧ökö baibajabe— jö̧ba̧lö

¹⁸ Chö̧ja̧wo̧dö chösödawö̧, chi̧tji̧mu ötabiwö̧ ökwödönö yötawa. Ida̧ökö 'dö̧ibaji̧ möle baiba. Ja̧danö, belö ja̧ möle yötjawi̧ kwa̧ja̧kwinaduwobe, 'dö̧jibaji̧ möle baibena jojo, Cristo öpöjojo ötjabökwema ichakobe, jö̧ba̧lö. Chö̧ja̧wo̧dö yötawaduwakwö. Ida̧ökö, ba̧jekwadö Cristo öpöjojodöma tjö̧jobe. Jobadönö edö döwaisa, Ida̧ökö 'dö̧jibaji̧ möle baiba, jö̧ba̧lö.

¹⁹ Ja̧danö, jobadö Cristo öpöjojodöma ajayi ökwödökwö ba̧nö Dios iwene a̧ja̧kwiabinadö. Jo̧kwaijayonö ökwödö Cristonö domukwati̧danö bakwainö omukwatöködö. Ja̧danö, jelobekwö tjomukwatobetjö̧ ökwödötjö 'da̧bachibö labebö kwebachadö. Chö̧ja̧wo̧dö ökwödödanö bakwainö Cristonö ösödö tjomukwatitjö̧ma ina ökwödökwö tjö̧jena. Jo̧kwaijayonö dö̧jelöma latjebinobetjö̧ döwaisachibijatö, Aaa, jobadöma isabenö ökwödödanö omukwatöködö Jesucristonöma, jö̧ba̧lö. Jesucristotjöma dö̧ja̧wo̧döböködö, jö̧ba̧lö, döwaisachibijatö.

²⁰ Ja̧danö chö̧ja̧wo̧dö, ökwödöma Dios isabenö ji̧ iwene waisadöja. Jau chö̧ja̧wo̧dö, Jwiinö Otiwo̧ Cristoma Dios O̧'wo̧ Luwo̧nö ökwödö kwo̧'wo̧ luwo̧duwinö tebachibö ö̧jobö weinobe. Ja̧danö, Dios O̧'wo̧ Luwo̧ma ökwödö kwo̧'wo̧ luwo̧duwinö ö̧jobetjö̧ Dios isabenö ji̧ iwene waisadöja.

²¹ Ja̧danö chö̧ja̧wo̧dö, ökwödönö chöwaisa, Isabenö ji̧ yöawi̧ waisadöja, jö̧ba̧lö. Chomukwatokobe ökwödönö, Jelobekwö omukwatadö, jö̧ba̧lö. Ja̧danö, Dios isabenö ji̧ iwenema wajwibadö, jö̧ba̧lö, chomukwatokobe. Chö̧ja̧wo̧dö ökwödönö chöwaisa, Isabenö ji̧ yöawi̧ waisadöja, jö̧ba̧lö. Ja̧danö kwöwaisaduwobe, Omöna yöbawadö yötjawi̧ma isabenö ji̧ yöawakwawamaökö, jö̧ba̧lö. Ja̧danö chö̧ja̧wo̧dö kwöwaisaduwobe, Omöna yöawakwawama Dios isabenö ji̧ iwenetjö ichokobe, jö̧ba̧lö.

Juan yöawina wene: —Ajayinö isabenö ji̧ yötjawi̧ kwa̧ja̧kwinaduwada ösödö kwi̧'yaduwo, omöna yöbawadö yötjawi̧ a̧ja̧kwökönö— jö̧ba̧lö

²² Ja̧danö chömöledö, yötawaduwakwö. Bakwo̧, Jesúsma Dios weinökökwe dö̧jibinö pjabatö, jö̧ba̧lö, yöbawo̧ma omöna yöbawo̧. Jo̧ba jojoma belö yötjawinökwe, Cristo öpöjojo ötjabökwe, jö̧ba̧lö. Ja̧danö, jo̧ba jojoma yelösöda omöna yöbawo̧, Jesucristoma Dios Itji̧bö̧kö̧, ja̧danö Diosma Jesucristo Abe'dobö̧kö̧, jö̧ba̧lö.

²³ Chömöledö jejenö omukwato̧ma, Jesús Dios Itji̧bö̧kö̧, jö̧ba̧lö, Dioskwö dötewinö 'yö̧kö̧. Jo̧kwaijayonö Jesúsnö ösödo̧ma, Jesúsma Dios Itji̧, dö̧jibinö imidawobö weinökwe, jö̧ba̧lö, Dioskwö dötewinö 'yo̧.

²⁴ Chö̧ja̧wo̧dö, kwomukwatuduwoko jobadö jelobekwö omukwatadö tjomukwati̧danö, Jesúsma Dios Itji̧bö̧kö̧, jö̧ba̧lö. Ökwödöma ajayinö isabenö ji̧ yötjawi̧ kwa̧ja̧kwinaduwada kwo̧'wo̧ luwo̧duwinö ösödö kwi̧'yaduwobö jo̧be chö̧ja̧wo̧dö, Jesúsnö do̧batö kwemaduwena yötjawinama. Ja̧danö, ja̧ isabenö ji̧ yötjawi̧ ösödö kwi̧'yaduwena Dioskwöbi Itji̧ Jesúskwöbi dötewinö kwi̧'yaduwobe.

²⁵ Ja̧danö jejenö, böjȩnö ja̧nö Dioskwö dötewinö di̧'yi̧ma di̧sekwobe, Dioskwö ba̧kwȩlö̧jatebö ja̧dösa, jö̧ba̧lö. Chö̧ja̧wo̧dö, jejenö Diosma ökwödönö yöbawö ujuninobe, Ötjökwö ba̧kwȩlö̧jatebö kwö̧jaduwakobe, jö̧ba̧lö. Ja̧danö böjȩnö ja̧nö, Dioskwö dötewinö di̧'yi̧ma ja̧ Dios yöbawö ujunina i̧sekwö dö̧jobe, Ökwödöma isabenö Dioskwö ba̧kwȩlö̧jatebö ja̧dösa, jö̧ba̧lö.

²⁶ Chö̧ja̧wo̧dö, böja kwialusöjanö yötawi̧ma ökwödönö pjabatö yötawa, jelobekwö omukwatö yöbawadönö kwöwaisaduwobö, ökwödö kwö̧jaduwelöma labebö kwebachadönöma. Jobadöma ökwödönö tjöba̧ja̧dobö jö̧ba̧ladö, jobadö tjomukwati̧danö kwomukwataduwobö.

²⁷ Jo̧kwaijayonö jelo̧ ökwödönö ba̧ja̧do̧ma ö̧jobe, Dios O̧'wo̧ Luwo̧, Cristo kwo̧'wo̧ luwo̧duwinö ö̧jobö iyinökwema. Ja̧danö, jo̧ba öba̧ja̧di̧ma jwiinö isabenö ji̧ yöawakwawa. Omönama jwiobe yelösöda jo̧ba Dios O̧'wo̧ Luwo̧ öba̧ja̧di̧ma. Jo̧kwaobetjö̧ jelobekwö omukwatö yöbawadö ökwödönö tjöba̧ja̧dobö jwiobe chö̧ja̧wo̧dö. Ja̧danö yötawaduwakwö, Dios O̧'wo̧ Luwo̧ öba̧ja̧di̧ma, biya̧: Cristokwö dötewinö kwi̧'yaduwo, chö̧ja̧wo̧dö.

Juan yöawina wene: —Jwaikwöda Cristokwö dötewinö kwi̧'yaduwo yemidanö ichena jo̧banö edö tabakwökönö kwö̧jaduwakobetjö̧— jö̧ba̧lö

²⁸ Jo̧kwaobetjö chi̧tji̧mu chösödawö̧, ökwödönö yemidanö yötawa. Jwaikwöda tupakwö kwi̧'yaduwo Cristokwö dötewinö. Jejenö kwi̧'yaduwo, Cristo yemidanö ichenama yöka̧laduwakobetjö̧, Chuluwo̧ ökwökwö dötewinö 'ya̧dösa, jö̧ba̧lö. Jejenö Cristokwö dötewinö kwi̧'yaduwobetjö̧ ju'winö jo̧banö kwedaduwena taba jwiinö kwedaduwakwedöja, yemidanö böjȩkwö ichenama.

²⁹ Chö̧ja̧wo̧dö kwöwaisaduwa, Cristoma jweinöda omukwato̧, jö̧ba̧lö. Jo̧kwaobetjö̧ Cristo jweinö omukwati̧danö jweinö omukwatö ja̧döma tji̧sekwobe, Ökwödöma Dios i̧tji̧musa, jö̧ba̧lö. Jau chö̧ja̧wo̧dö, Dios i̧tji̧muma Cristo jweinö omukwati̧danö jweinö omukwatö ja̧dö. Jo̧kwaobetjö̧ jejenö kwö̧jaduwo chö̧ja̧wo̧dö, Dios i̧tji̧mu tjö̧jobö ji̧ma, jweinö omukwatö, ja̧danö Cristokwö dötewinö 'ya̧nö. Jejenö kwö̧jaduwobetjö̧ taba jwiinö kwedaduwakwedöja Cristonö, yemidanö ichenama.