1 Juan 1 - Dios Iwene

Juan yöawina wene: —Jesucristo, Dios Iwene Jo̧, jö̧ba̧lö, ötjabökwekwö kwedachinobetjö̧ jo̧banö jweinö yöbawadösa— jö̧ba̧lö

^1-2 Chömöledö, Jesústjö chö̧ja̧wo̧dö dokwa. Ötjö Juan ökwödönö chiwȩyuda. Ja̧danö, ökwödönö yöbawö chiwȩyuda, Dios Iwene Jo̧, jö̧ba̧lö, ötjabökwenö, do̧'wo̧ luwo̧nö ba̧kwȩlö̧jatebö dö̧jobö pjabato̧nöma. Chö̧ja̧wo̧dö, jo̧ba Dios Iwene Jo̧, jö̧ba̧lö, ötjabökwema Jesucristoda. Ja̧danö, jo̧bama la'akatjöda ji̧na, böjȩ ina Dios otidapjii. Ja̧danö, Diosma jo̧banö böjȩkwö ichobö weinobe jojo babibö öbötjachobö. Ja̧danö, jojo babibö bötjachajo̧ma böjȩnö ju̧kwadökwö ö̧jinobe. Chö̧ja̧wo̧dö ökwödöma, ötjö, ju'wedö chömöledöbi jo̧bakwö kwebachiadijatö böjȩnö. Ja̧danö, jo̧ba yöawobe a̧ja̧kwiadijatö. Döbajalenöbi ediadijatö jo̧banöma. Chö̧ja̧wo̧dö, jo̧bakwö ja̧nö ö̧ji̧ma eda̧liadijatö. Dömamunöbi mabiadijatö jo̧banö, Dios weinökwenöma. Chö̧ja̧wo̧dö, jo̧bakwö dö̧jinobetjö̧ jweinö yöbawadösa jo̧banöma. Ja̧danö, ökwödönö kwöwaisaduwobö yödawobe, Jo̧ba dedinökwe Jesucristoma Dioskwö la'akatjöda ji̧nabi, bemi tupakwö ba̧kwȩlö̧jatebö ö̧jakwo̧bi, jö̧ba̧lö.

Juan yöawina wene: —Jesúskwö dö̧jina kwöwaisaduwobö yötawa, kwomajadeduwinö ökwödökwöbi, Dabe'do Dioskwöbi bakobe dötekwö kwö̧jaduwakobetjö̧— jö̧ba̧lö

³ Chö̧ja̧wo̧dö, ökwödö dedina, da̧ja̧kwina kwöwaisaduwobö böjanö yöbawö chiwȩyuda. Ja̧ yötawi̧ma a̧ja̧kwö kwösödaduwobö yötawa chö̧ja̧wo̧dö, kwomajadeduwinö ökwödökwö bakobe dötekwö kwö̧jaduwakobetjö̧. Ja̧danö, ökwödökwödamaökö chö̧ja̧wo̧dö. Ökwödö Jesúsnö ösödadöma Dabe'do Dioskwöbi, Itji̧ Jesucristokwöbi domajadenö bakobe dötekwö ja̧dösa. Chö̧ja̧wo̧dö, böjanö yötawi̧ kwösödaduwobö yöbawö chiwȩyuda, kwomajadeduwinö bakobe ökwödökwöbi, Dabe'do Dioskwöbi, Itji̧ Jesucristokwöbi dötekwö kwö̧jaduwakobetjö̧.

⁴ Jau chö̧ja̧wo̧dö, böja kwialusöja ökwödönö yöbawö chiwȩyuda dedina, da̧ja̧kwina a̧ja̧kwö kwösödaduwobö. Jejenö ökwödöma domajadenö bakobe dötekwö ja̧dösa. Ja̧danö, jejenö ja̧nö jwiinö do̧'wo̧ ösöwanö ja̧dösa. Chö̧ja̧wo̧dö, jejenö dö̧jobö yöbawö chiwȩyuda.

Juan yöawina wene: —Dios suli̧ jwibo̧obetjö̧ jo̧bakwö domajadenö bakobe dötekwö dö̧ji̧ma sulabenö ja̧bökönö dö̧ji̧— jö̧ba̧lö

⁵ Ja̧danö chö̧ja̧wo̧dö, Jesucristo yöawi̧ da̧ja̧kwinama ökwödönö yötawa, biya̧: Diosma dewinöda jo̧. Ja̧danö, yȩi̧ma jwiobe Dioskwöma. Ja'yubebi jwiobe. Jejenö jö̧ba̧löma, Diosma jwiinö otiwo̧, ja̧danö suli̧bi jwibo̧, jö̧ba̧lö. Ja̧ma Jesucristo yöawi̧ da̧ja̧kwinama ökwödönö yötawa böjanö.

⁶ Chö̧ja̧wo̧dö, Diosma jejenö jo̧obetjö̧, Suli̧ jwibo̧, jö̧ba̧lö ¿dakwö dö̧ji̧da jo̧bakwö domajadenö bakobe dötekwö dö̧ji̧ma? Biya̧ chö̧ja̧wo̧dö: Dioskwö domajadenö bakobe dötekwö dö̧ji̧ma sulabenö ja̧bökönö dö̧ji̧. Jau chö̧ja̧wo̧dö, Diosma suli̧ jwibo̧obetjö̧ jo̧bakwö domajadenö bakobe dötekwö dö̧ji̧ma sulabenö ja̧bökönö dö̧ji̧. Ökwödötjö bakwo̧, Ötjöma dewinö jo̧ Dioskwö chomajadenö bakobe dötekwö jo̧sa, jö̧ba̧lö, yöa̧lijayonö sulabenö ja̧bö ö̧jitjö̧ma ¿jweinö yöba̧lo̧ji̧? Jweinö yöba̧lö̧kö̧, omönada yöba̧lo̧. Isabenö, jo̧bama omajadenö Dioskwö bakobe dötekwö ö̧jitjö̧ma otiwanö ja̧bö ö̧jena. Jo̧bama omajadenö Dioskwö bakobe dötekwö jö̧kö̧. Yȩa'wo okwada kwebachö jo̧, Dios iwene, isabenö ji̧ wenema öpöjödö.

⁷ Jo̧kwaijayonö ökwödötjö bakwo̧ otiwanö ja̧bö, dewinö jo̧ Dios omukwati̧danö omukwatö jo̧ma, dewa'wo okwa kwebachö jo̧, Dios ö̧jobema. Jejenö kwebacho̧ma isabenö omajadenö Dioskwö bakobe dötekwö jo̧, Dios iwene, isabenö ji̧ wene ösödö. Ja̧danö, jejenö ja̧nö jo̧ba dewa'wo okwa kwebacho̧ma Cristotjö ö̧ja̧wo̧dönö ile nibebö ö̧jobe. Ja̧danö, jo̧bama Dios öba a'otjö okobe jwiinö suli̧tjö dichö loinökwe, Dios Itji̧ Jesús ökwösobu ebawinö imidawinobetjö̧. Chö̧ja̧wo̧dö, ökwödöma jejenö kwi̧'yaduwobö jo̧be, kwomajadeduwinö Dioskwöbi, kwö̧ja̧wo̧dökwöbi bakobe dötekwö ja̧nö.

Juan yöawina wene: —Sulabenö ja̧köbaduwena Diosnö yöbawö akebaduwo— jö̧ba̧lö

⁸ Chö̧ja̧wo̧dö, ökwödöma okobe deinö sulabenö ja̧bö ja̧dösa ¿jö̧tö? Bakwo̧, Ötjöma sulabenö ja̧bö̧kö̧sa, jö̧ba̧lö, yöa̧litjö̧ma ¿jweinö omukwatö yöba̧lo̧ji̧? Jelobekwö omukwato̧. Isabenö chö̧ja̧wo̧dö, jo̧bama iteda omukwati̧da öibökwe. Ja̧danö, jo̧bama o̧'wo̧ luwo̧ okwanö Dios iwene, isabenö ji̧ wenema öpöjödobe. Isabenö chö̧ja̧wo̧dö, jo̧ba, Sulabenö ja̧bö̧kö̧sa, jö̧ba̧lö, yöba̧lo̧ma iteda omukwati̧da omukwatobetjö̧ Dios isabenö ji̧ yöawi̧ma öpöjödo̧.

⁹ Jo̧kwaijayonö bakwo̧, Ötjöma sulabenö ja̧tajabe, jö̧ba̧lö, yöba̧lo̧ma jweinö omukwato̧. Ja̧danö, jo̧bama sulabenö ja̧ena Diosnö yöbawö lobo̧, Dios, sulabenö ja̧tajabe, jö̧ba̧lö. Jejenö Diosnö sulabenö ja̧aja̧ yöbawö loiökwe Diosma ja̧ sulabenö ja̧aja̧ma söbebö loobe. Jejenö yöbawö loobetjö̧ jo̧bama Dios öba a'otjö suli̧tjö dichö lobawo̧da jo̧. Chö̧ja̧wo̧dö, Diosma jejenö yöbawö ujuninobe, Bakwo̧ sulabenö ja̧aja̧ yöbawö loena ja̧ sulabenö ja̧aja̧ söbebö lotocha, jö̧ba̧lö. Ja̧danö, Diosma yöbawö ujuni̧danö ja̧bo̧ ¿jö̧tö? Jau chö̧ja̧wo̧dö. Diosma jweinö yöba̧lo̧. Jejenöobetjö̧ döwaisa jo̧banö yöbawö lodena sulabenö ja̧di̧ma söbebö loobe. Jejenö ökwödöma sulabenö ja̧di̧tjö dichö loawö̧da babibadösa. Jo̧kwaobetjö̧ chö̧ja̧wo̧dö, sulabenö ja̧köbaduwena Diosnö yöbawö loköbaduwo.

Juan yöawina wene: —Suli̧ ja̧dena ökwödönö pjabato̧ ö̧jobe— jö̧ba̧lö

¹⁰ Chö̧ja̧wo̧dö, Dios iwenetjö baikwö laebobe, Okobe deinö jojodöma sulabenö ja̧badö, jö̧ba̧lö. Ja̧danö döwaisa, Diosma omöna yöba̧lökö, jö̧ba̧lö. Diosma jö̧a̧linobe, Okobe deinö jojodöma sulabenö ja̧badö ¿jö̧tö? Jo̧kwaobetjö̧ ökwödötjö bakwo̧, Ötjöma sulabenö ja̧bö̧kö̧sa, jö̧ba̧lö, yöba̧lo̧ma, o̧'wo̧ luwo̧ okwanö Diosnö sulabenö omukwatobe, Diosma omöna yöba̧lo̧, jö̧ba̧lö. Ja̧danö, jo̧bama Dios iwenebi öpöjödö sulabenö omukwatobe.