1 Crónicas 5 - Dios Iwene

Ruben itji̧mu tupadanö jojodö

¹ Israel itji̧ abönö pöema, Ruben mikwo̧. Ja̧danö, itji̧ abönö pöe ö̧jinobetjö̧, Israel itji̧mu tupadanö jojodö tjimibiya wȩyukwa'yenö, jo̧ba imida abönö laebo jö̧a̧linobe. Jo̧kwaijayonö, Rubenma sulabenö iteda abe'do ilekwokwö ö̧jinobe, taba lö̧ji̧ saminö, jo̧kwajabetjö̧ abönö pöe emo jö̧a̧linama, iteda öjawo̧ Jose itji̧munö baledinobe. Jo̧kwajabetjö̧, Rubenda abönö pöe ö̧jinajayonö, jo̧ba imi abönö laebokobe, Israel itji̧mu tupadanö jojodö tjimibiya wȩyukwa'yenö.

² Abönö pöe jawa Judanö baledinobedanö ichejekwena, Judasasoda jelesotjö bajalekwönönö juluwaso baibinobetjö̧, ja̧danö israel jojodötjö inesö la'aka luwo̧ma, Judasaso jojodaobetjö̧. Jo̧kwaijayonö, Israel itji̧ abönö pöe jawama, Judanö baledinokobe, Josenöda baledinobe abönö pöe jawama.

³ Baikwö laebobe Israel itji̧ abönö pöe Ruben itji̧mu tupadanö jojodö tjimibiya wȩyukwa'yema. Ruben itji̧muma bidö: Hanoc mikwo̧bi, Falu mikwo̧bi, Hezron mikwo̧bi, Carmi mikwo̧bi.

⁴ Ja̧danö Rubensaso jojo Joel mikwo̧ itji̧mu tupadanö jojodö tjimibiya wȩyukwa'ye baikwö laebobe: Joel itji̧ma Semaias mikwo̧, ja̧danö Semaias itji̧ma Gog mikwo̧, ja̧danö Gog itji̧ma Simei mikwo̧,

⁵ ja̧danö Simei itji̧ma Micaia mikwo̧, ja̧danö Micaia itji̧ma Reaia mikwo̧, ja̧danö Reaia itji̧ma Baal mikwo̧,

⁶ ja̧danö Baal itji̧ma Beera mikwo̧. Ja̧danö, Beerama rubensaso jojodötjö la'aka luwo̧ ö̧jinobe, jo̧kwaijayonö Asiria la'aka luwo̧ Tiglat-pileser israel jojodönö ujuluwenama, Beeranö juluwajo̧, öbibö ȩwa̧jinobe.

⁷ Ja̧danö ju'wedö Beera ömöledö Rubensaso jojodötjö luwedö tjimibiya wȩyukwa'yema baikwö laebobe: Jeiel mikwo̧bi, Zacarias mikwo̧bi,

⁸ Bela mikwo̧bi. Ja̧danö Belatjö ajayinö ji̧nadö tjimibiya wȩyukwa'yema baikwö laebobe. Belama Azaz mikwo̧ itji̧, ja̧danö Azazma Sema mikwo̧ itji̧, ja̧danö Semama Joel mikwo̧ itji̧. Rubensaso jojodöma Aroer nijinö tjö̧jinobe, ja̧danö tjitebo nijima, u'dakwöchobe Nebo comunidadbebi, Baal-meon comunidabebi ichibanö jalinobe.

⁹ Rubensaso jojodöma isabenö ba̧jȩkwadö tja̧jwi̧mu ajikwakwawedönö tjujuna̧linobe, jo̧kwajabetjö tjiteboma jawo̧ laeobekwö jojodö deobe ichibanö jalinobe, Eufrates ojwe ö'öbö jojodö deobema.

¹⁰ Israel jojodötjö inesö la'aka luwo̧ Saul mikwo̧ webö ö̧jonö, Rubensaso jojodöma agarenos jojodökwö tjölakwabikwawinobe, ja̧danö jobadönö tjujuluwinobe. Jemi ikenama juluwajadö, Rubensaso jojodöma agarenos jojodö tjö̧jinemi tjö̧jinobe, Galaad nijitjö jawo̧ laebobekwöma.

Gad itji̧mu tupadanö jojodö

¹¹ Gadsaso jojodöma, Rubensaso jojodö tjitebo ö'öbönö tjö̧jinobe, Basan nijinö. Ja̧danö, tjitebo nijima, jawo̧ laebobekwö Salca comunidadbe ichibanö jalinobe.

¹² Jobadö Gadsaso jojodötjö la'aka luwo̧ma, Joel mikwo̧, ja̧danö ikena luwo̧ma, Safan mikwo̧. Ja̧danö ju'wedö luwedöma Jaanai mikwo̧bi, Safat mikwo̧bi.

¹³ Ja̧danö ju'wedö Gadsaso jojodötjö, jelemutjö dosolataja tjö̧jinobe, ja̧danö sasokwena luwedö tjimibiyama baikwö laebobe: Micael mikwo̧bi, Mesulam mikwo̧bi, Seba mikwo̧bi, Jorai mikwo̧bi, Jacan mikwo̧bi, Zia mikwo̧bi, Heber mikwo̧bi.

¹⁴ Okobe deinö jobadö luwedöma, Abihail mikwo̧ itji̧mu tupadanö jojodö. Ja̧danö Abihailma Huri mikwo̧ itji̧inobe, ja̧danö Hurima Jaroa mikwo̧ itji̧inobe, ja̧danö Jaroama Galaad mikwo̧ itji̧inobe, ja̧danö Galaadma Micael mikwo̧ itji̧inobe, ja̧danö Micaelma Jahdo mikwo̧ itji̧inobe, ja̧danö Jahdoma Buz mikwo̧ itji̧inobe.

¹⁵ Ja̧danö jobadösaso jojodötjö tjuluwo̧ma, Ahi mikwo̧. Ja̧danö Ahima Abdiel mikwo̧ itji̧inobe, ja̧danö Abdielma Guni mikwo̧ itji̧inobe.

¹⁶ Gadsaso jojodö tjitebo nijima, Galaad niji comunidadtenianöbi, Basan niji comunidadtenianöbi tjö̧jinobe, ja̧danö ju'wibi Saron niji meje'ye ba̧kwemeachibanö tjajwi̧munö ajikwö tjö̧jinobe.

¹⁷ Jobekwö laebobe Gadsaso jojodö tjimibiya wȩyukwa'yema, ja̧danö ja̧ wȩyukwa'yema, Juda niji inesö la'aka luwo̧ Jotam mikwo̧ webö ö̧jena, ja̧danö Israel niji inesö la'aka luwo̧ Jeroboan mikwo̧ webö ö̧jena tji̧wȩyudinobe.

Israel jojodötjö Jordan ojwetjö jawo̧ laebobekwö ju̧kwadö tjö̧jina jawa

¹⁸ Rubensaso jojodöbi, Gadsaso jojodöbi, Manasessaso jojodötjö ja'öbi Jordan ojwetjö jawo̧ laebobekwö tjö̧jinobe, ja̧danö jobadötjö ölakwabikwawa jojodöma, cuarenta y cuatro milbedö ölakwabikwawadö tjö̧jinobe. Jobadö ölakwabikwawa jojodöma, ölakwabikwawa jawa juluwadö tjö̧jinobe, ja̧danö tjöekwapibiyabi, kwölöte'ijubi, 'böpöbiyabi kwetjatinobe.

¹⁹ Jobadöma agarenos jojodökwöbi, jetureos jojodökwöbi, nafiseos jojodökwöbi, nodabitas jojodökwöbi tjölakwabikwawinobe,

²⁰ ja̧danö jobadökwö tjölakwabikwawenama, Diosnö atjebinobe, —Duluwo̧ Dios, juluwanö pjakatobö adebakwö, —jö̧ba̧lö. Jobekwö tjo̧'wo wana̧lö atjebiökwe, atjebi̧ a̧ja̧kwinobe Diosma, ja̧danö otiwanö pjaatinobe. Jo̧kwajabetjö̧, jobekwö pjaatiawö̧, jwiinö tjujuluwinobe agarenos jojodönöbi, agarenos jojodönö pjabatadönöbi.

²¹ Ja̧danö, agarenos jojodönö juluwajadö, tjiteaja̧ 'dötjebinobe Rubensaso jojodöbi, Gadsaso jojodöbi, Manasessaso jojodöbi. 'Dötjebina jawa baikwö laebobe: Cincuenta milbedö camellodönö 'dötjebinobe, ja̧danö doscientos cincuenta milbedö obejadönö 'dötjebinobe, ja̧danö dos milbedö buludönö 'dötjebinobe. Ju'wibi, agarenos jojodötjö cien milbedö jojodönö do̧tja̧tinobe, tjömöayedö batjibanö.

²² Tjölakwabikwawonö, Diosda israel jojodönö pjabatö ölakwabikwawinobe, jo̧kwajabetjö̧ agareno jojodötjö ba̧jȩkwadö ölakwabikwawö ö'wö batjibinobe. Ja̧danö, jobadönö juluwajadö, tjiteboinemi nijinö tjö̧jinobe Rubensaso jojodöbi, Gadsaso jojodöbi, Manasessaso jojodöbi. Lekwe möle jobe tjö̧jinobe, Asiria jojodö israel jojodönö tjujuluwenanö baibanö, ja̧danö ja̧ möle tjitebotjö latjebinobe Asiria jojodöma.

²³ Manasessaso jojodötjö jawo̧ laebobekwö ju̧kwadöma ba̧jȩkwaso baibanö tjö̧jinobe, jo̧kwajabetjö̧ jalobe tjö̧jinobe, Basan nijitjö, u'dakwöchobe bajalenö Baal-hermon comunidadbebi, Senir comunidadbebi, Hermon mösa'obebi ichibanö.

²⁴ Ja̧danö jobadö Manasessaso jojodötjö, sasokwena luwedö tjimibiya wȩyukwa'yema baikwö laebobe: Efer mikwo̧bi, Isi mikwo̧bi, Eliel mikwo̧bi, Azriel mikwo̧bi, Jeremias mikwo̧bi, Hodovias mikwo̧be, Jahdiel mikwo̧bi. Jobadö tja'dödökwena ömöledötjö luwedö ja̧nö, ölakwabikwawa juluwadö tjö̧jinobe, ja̧danö okobe deinö tjöwaisinawö̧, —Juluwadötö, —jö̧ba̧lö.

²⁵ Jo̧kwaijayonö, tja'dödö tjösödinökwe Diosnö tjösödo jö̧tja̧linajayonö, Rubensaso jojodöbi, Gadsaso jojodöbi, Manasessaso ja'ö jojodöbi tjösödinokobe Diosnö otiwanöma. Diosnö ösödökönö, ju'wedö tjösödawö̧, ajayinö Dios söbebö loinawö̧ tjitebokwena jojodö tjösödawö̧nöda sulabenö tjösödinobe.

²⁶ Jo̧kwaiökwe, jobadönö lȩebinobe Israel jojodö tjösödökwe Diosma, ja̧danö Asiria la'aka luwo̧ Pul mikwo̧nö, ju'wi imi Tiglat-pileser mikwo̧nö weinobe, tjitebobe ichö, ölakwabikwawö ujuluwobö, ja̧danö juluwajo̧, jobadö Rubensaso jojodönöbi, Gadsaso jojodönöbi, Manasessaso ja'ö jojodönöbi öbibö emobö. Ja̧danö, jobekwö weiawö̧, asiria jojodöma jobadönö latjebinobe tjitebotjö̧, ja̧danö jobadönö öbibö tjujuninobe Halah comunidadnöbi, Habor comunidadnöbi, Hara comunidadnöbi, Gozan ojwe ö'öbö nijinöbi tjö̧jobö. Ja̧danö, jobekwö tjujuniawö̧, babe mölebi baibanö, ina tjitebotjö labebinadö jobe ju̧kwadö, Rubensaso jojodöbi, Gadsaso jojodöbi, Manasessaso ja'ö jojodöbi.