1 Crónicas 29 - Dios Iwene

Davidbi, ju'wedö israel jojodöbi Dios eju jawa tjiyina

¹ Jemi ikenama, la'aka luwo̧ Davidma ju'wedö jobe ko̧ko̧kwadö israel jojodönö yöawinobe: —Chömöledö, chitji̧ Salomonma Dios omudawö ujuninökwe, chö̧jaja̧ ikena Salomonda israel jojodötjö inesö la'aka luwo̧ ö̧jakobetjö̧. Ja̧danö, Dios omudawö ujuninökwe ö̧jijayonö, ina möayo̧ Salomonma, ja̧danö möayo̧obetjö, ina otiwanö ö̧jakwa̧ jawa waisachibö̧kö̧. Ja̧danö, otido jö̧a̧li̧ma, inesö nöobe chömöledö, baikwö yöta̧la: Otidakwejuma, bö̧je jojodö tjö̧jakwejumaökö, Isabenö Jo̧ Dios ejuda otidakwo̧ Salomonma.

² Jo̧kwajabetjö̧, pjatatobö chujuna̧li̧danö, okobe jwiinö o̧do jawa cho̧ko̧ko̧dobö chisakwajabe chömöledö, otiwanö chösödökwe Dios eju otidakobetjö̧. Orotjö otikwa jawa orotjö otidakobetjö̧, oro cho̧ko̧kodajabe. Ja̧danö platatjö otikwa jawa platatjö otidakobetjö̧, plata jawa cho̧ko̧kodajabe. Ja̧danö broncetjö otikwa jawa broncetjö otidakobetjö̧, bronce jawa cho̧ko̧kodajabe. Ja̧danö 'dii jawatjö otikwa jawa 'dii jawatjö otidakobetjö̧, 'dii jawa cho̧ko̧kodajabe. Ja̧danö towi o'obiyatjö otikwa jawa towi o'obiyatjö otidakobetjö̧, towi o'obiya cho̧ko̧kodajabe. Ju'wibi nöinö inawiya jawa onice jawabi, ju'wi mikwawi̧ inawiyabi, ju'wi inawiya jawabi, marmol ötjabi̧ inawiya jawabi 'da̧batö chujunajabe, ja̧ jawatjö otiwanö otidakobetjö.

³ Ja̧danö, jwiinö chösödökwe Dios eju otidobö chösödobetjö̧, ida̧ökö chujunaja̧ jawakwö, ju'wibi okobe jwiinö ötjöda chitea oro jawabi, plata jawabi 'da̧batö chiyobe, chösödökwe Dios eju otikwa jawa baibanö.

⁴ Inesö otiwi̧ Ofir nijitjö emawa oroma, cien mil kilo jenanö chiyobe, ja̧danö otiwi̧ plata jawa, doscientos treinta mil kilo jenanö chiyobe, ja̧tjö Dios eju tjöekwemi pöchö otidakobetjö̧,

⁵ ja̧danö ju'wibi okobe jwiinö orotjöbi, platatjöbi otikwa waisadö otiwanö ja̧tjö tjotidakobetjö. Jobekwö chiyajabe ötjöma chömöledö, ja̧danö ökwödötjö didöda pjabatö kwujuna̧laduwi̧tjö Isabenö Jo̧nö kwiyaduwobö kwösödaduwobeda? —jö̧ba̧lö yöa̧linobe Davidma, jojodönö.

⁶ Yöa̧liawö̧, tjömöledösasokwena luwedöbi, israelsasokwena luwedöbi, milbedö tjuluwedöbi, cienbedö tjuluwedöbi, la'aka luwo̧ wei̧ otidadöbi a̧ja̧kwö tjösödinobe, ja̧danö ju'wedö wetjököwö̧, idöda tjiyobö tjosödobetjö̧, jobadöbi tjiteatjö 'da̧batö tjiyinobe.

⁷ Tjiyina wȩyukwa'yema, baikwö laebobe: Dios eju jawa otikwa baibanö, oro jawatjö ciento sesenta y cinco mil kilo jenanöbi, oro ö̧pibiya diez mil ö̧pibiyabi tjiyinobe, ja̧danö plata jawatjö, tresciento treinta mil kilo jenanö tjiyinobe, ja̧danö bronce jawatjö seiscientos mil kilos jenanö tjiyinobe, ja̧danö 'dii jawatjö tres millones trescientos mil kilos jenanö tjiyinobe.

⁸ Ju'wibi, inawiya nöinö mikwawawa juna̧ladöma, tjiteatjö Isabenö Jo̧ eju lödawȩko̧ teada̧lakwawa luwo̧ Jehielnö tjiyinobe, ja̧tjö Isabenö Jo̧ eju Salomon otiwanö otidakobetjö̧.

⁹ Ja̧danö, jobekwö iyajadö, jojodöma tjo̧'wo ösöwachibanö tjösödinobe, —Öpöjödökönö, otiwanö do̧'wo ösöwachibanö diyajabe Isabenö Jo̧nö, —jö̧ba̧lö. Jau, tjomajadenö tjiyobö ösödö, otiwanö tjiyinobe Isabenö Jo̧nö, ja̧danö jobekwö tjiyiökwe, la'aka luwo̧ Davidbi o̧'wo ösöwachibanö ösödinobe.

David Diosnö aebina jawa

¹⁰ Jemi ikenama, okobe deinö jobe ko̧ko̧kwadö tjöba a'o ja̧nö, Davidma Diosnö ösödö aebinobe: Chuluwo̧, da'dömine Israel ösödinökwe Isabenö Jo̧ Dios, ba̧kwelöjatebö 'dö̧bibajökönö ösödö yöda̧lökweja.

¹¹ Ökwödaja inesö dejatinö juluwo̧ma, ökwödaja inesö kwöpöjojodönö juluwo̧ma, ökwödaja okobe deinö tjuluwo̧ma chuluwo̧. Jau chuluwo̧, okobe deinö mölȩjȩnö ju̧kwadöbi, bö̧jȩnö ju̧kwadöbi ökwöda kwö̧möayedö, ja̧danö okobe jwiinö mölȩjȩnö ji̧bi, bö̧jȩnö ji̧bi ökwöda kwiteaobe chuluwo̧. Ja̧danö ökwöda inesö la'aka luwo̧köbobetjö̧, ökwönö ösödö yöda̧lakwö chuluwo̧.

¹² —Chuluwo̧ Dios, ökwöda inesö la'aka luwo̧ma, jo̧kwajabetjö nöinö tea dujuna̧li̧bi, ju'wedö ökwödönö otiwanö tjomukwati̧bi, ökwötjöda ichobe chuluwo̧. Jau chuluwo̧, ökwöda inesö kwujulunö juluwo̧ja, ja̧danö ökwöda luwedö batjibanö jojodönö juno̧ja, ja̧danö ökwöda jojodö tjujuluwachibanö pjabato̧ja.

¹³ —Jobekwö isabenö jo̧ja chuluwo̧, jo̧kwajabetjö̧ ökwönö ösödö yöba̧ladösa, –Otiwanö pjabato̧ja, ökwö Isabenö Jo̧ma inesö dejatinö juluwo̧ja, –jö̧ba̧lö.

¹⁴ Jo̧kwaijayonö, jobekwö ökwönö ösödö yöda̧lijayonö, ökwönö diyobö jö̧da̧lidanö diyoböma jwibadösa chuluwo̧. Jau chuluwo̧, okobe jwiinö dujuna̧li̧ma, ökwö kwiyina jawada juna̧ladösa chuluwo̧, jo̧kwajabetjö̧ ökwönö diyi̧ma, ökwödöda jawamaökö chuluwo̧, ökwö kwiyina jawada tjebatö diyobö jo̧be.

¹⁵ Jau chuluwo̧, bemi nijinö ja̧nö, kwöba a'otjö jelobetjö ichajadödanö ichekwadösa, da'dödö tjichejekwinadanö ichejekwadösa. Lekwe möle bö̧jȩnö jö̧ködösa, bö̧jȩnö dö̧ji̧ma sule isada̧lidanö ichejekwobe, ja̧danö ö'wö babibökönö lekwe möle dö̧joböma juluwöködösa.

¹⁶ —Jau chuluwo̧, isabenö okobe jwiinö ökwönö diyi̧ma, ökwöda kwiteaobe duluwo̧ Isabenö Jo̧ Dios. Babema ökwöda kweju dotidakwa̧ jawa 'da̧batö dujunajabe duluwo̧, jo̧kwaijayonö ja̧ inesö nöinö 'da̧batö dujunina jawabi ökwöda kwiteaobe chuluwo̧. Ökwönö otiwanö omukwatö dotidobö jö̧da̧lejubi, ökwötjöda ichi̧ chuluwo̧.

¹⁷ Chöwaisa chuluwo̧ Dios, ökwöma domajadenö domukwati̧ edö isakwo̧ja, isabenö otiwanö jweinö domukwatojobö jö̧ba̧lö. Ja̧danö, otiwanö omukwatö, otiwanö ja̧do jö̧da̧lidanö ja̧bö dö̧jenama, kwo̧'wo ösöwachibanö edo̧ja chuluwo̧. Ja̧danö chuluwo̧, baikwö yöta̧lakwö: Isabenö chomajadenö otiwanö omukwatö, a̧'dȩlökönö okobe jwiinö bi̧ya 'da̧batö chujunaja̧ jawa ökwönö chiyajabe ötjö Davidma. Ja̧danö ju'wibi, bidö kwöba a'o ju̧kwadö kwömöledö israel jojodö ökwönö tjiyobe chedajabe, a̧'dȩlökönö tjo̧'wo ösöwachibanö ökwönö tjiyaja̧jama.

¹⁸ —Chuluwo̧ Isabenö Jo̧, da'dödö Abrahambi, Isaacbi, Israelbi tjösödinökwe Dios, baikwö atebakwö: Kwömöledö israel jojodönö pjakatobö atebakwö, ba̧kwelöjatebö weköbi̧ a̧ja̧kwö tjö̧jobö tjösödakobetjö̧, ja̧danö ba̧kwelöjatebö balewachökönö, ökwönö ösödö tjö̧jakobetjö̧.

¹⁹ Ja̧danö chitji̧ Salomonnö pjakatobö ateba, jwaikwöda okobe jwiinö omajadenö ökwö weköbi̧ a̧ja̧kwö ö̧jakobetjö̧, ja̧bö dö̧jobö weköbi̧bi, ju'wi weköbi̧bi. Ja̧danö ju'wibi, jo̧banö pjakatobö atebakwö, kweju otiwanö otidakobetjö̧. Jau chuluwo̧, bi̧ya kweju otidakwa̧ jawa 'da̧batö chujunajabe, ja̧danö badekwachinö kweju otiwanö otidö kaatenanö baibanö, otiwanö jo̧banö pjakatobö atebakwö, —jö̧ba̧lö aebinobe Davidma.

²⁰ Jemi ikenama, jobekwö Diosnö abebajo̧, okobe deinö jobe ko̧ko̧kwadönö yöa̧linobe Davidma: —Chömöledö Israel jojodö, kwuluwo̧duwi Isabenö Jo̧ Diosnö kwösödaduwo, –Otiwo̧ja, —jö̧ba̧lö. Ja̧danö, jobekwö yöa̧liawö̧, okobe deinö jobe Dios öba a'o ko̧ko̧kwadöma, tja'dödö tjösödinökwe Isabenö Jo̧ Diosnö tjösödinobe, ja̧danö bȩbachibö, tjösödökwe Isabenö Jo̧ öba a'otjöbi, la'aka luwo̧ David öba a'otjöbi tju̧yu̧kijunö tjöjamatinobe.

Salomonnö la'aka luwo̧ baibanö tjujunina jawa

²¹ Jemi ikena möle, kwabö juwö tjiyinobe Isabenö Jo̧nö, ba̧jȩkwadö ajikwawedönö. Pakayadö ömadönö, milbedönöbi, ju'wedö o̧tewadö milbedönöbi, obejadö milbedönöbi ichejebö kwabö juwö, jwiinö ubinö iyawa baibanö tjiyinobe. Ja̧danö ju'wibi, nöinö owawa iyawabi, Dioskwö ösökwö ja̧kwawa iyawabi ichejebö tjiyinobe, ja̧tjö okobe deinö jobe ko̧ko̧kwadö israel jojodöma otiwanö Dios öba a'otjö ba'ali tjukwobö ba̧jȩkwachinö.

²² Ja̧danö, ja̧ möle Isabenö Jo̧ öba a'o ba'ali junö, tjo̧'wo ösöwachibanö kwanöbi, owöbi ba'ali tjujuninobe. Jemi ikenama, yemidanö David itji̧ Salomonnö tji̧sȩbinobe, —Isabenö bite Salomonda israel la'aka luwo̧ yabayo̧ ö̧jakwo̧, —jö̧ba̧lö. Jobe Isabenö Jo̧ öba a'otjö, o̧te totjebinobe Salomon uunö, —Biteda la'aka luwo̧ baibanö dujunökwe, —jö̧ba̧lö. Ja̧danö ju'wibi Sadoc mikwo̧ uunöbi o̧te totjebinobe, —Bite Sadocda inesö Diostjö jojodötjö ö'weje pjabato̧, —jö̧ba̧lö.

²³ Ja̧danö, inesö la'aka luwo̧ baibanö 'da̧batö tjujuniökwe, abe'do David ö̧binemi öbamatinobe Salomonma, Isabenö Jo̧ ömöledö israel jojodötjö inesö la'aka luwo̧ ö̧bakanö. Ja̧danö, la'aka luwo̧ babibajo̧, okobe jwiinö webö ö̧ji̧ otiwanö laebi̧nö ö̧jinobe, ja̧danö okobe deinö israel jojodöma otiwanö Salomon wei̧ a̧ja̧kwö tjö̧jinobe.

²⁴ Ja̧danö, okobe deinö David ömöayedötjö la'aka luwedöbi, ölakwabikwawa juluwadöbi, ju'wedö David itji̧mubi Salomonnö yöbawö tjujuninobe, —Isabenö kwömöayedö ja̧nö, kabatibökönö weköbi̧ a̧ja̧kwö dö̧jakwedösa, —jö̧ba̧lö.

²⁵ Ja̧danö, Isabenö Jo̧ otiwanö pjaatinobe Salomonnö. Otiwanö kabebö ujuninobe Salomonnö, okobe deinö israel jojodö otiwanö jo̧banö tjomukwatakobetjö̧, ja̧danö okobe deinö jo̧batjö ajayinö ji̧nadö la'aka luwedötjö bajalekwönönö, otiwanö Salomonnö tjomukwatobö pjaatinobe, jwaikwöda —Isabenö otiwanö domukwato jö̧da̧lökwe Salomonma, okobe deinö wei̧ a̧ja̧kwö dö̧jo, —jö̧ba̧lö omukwatö tjö̧jenanö.

La'aka luwo̧ David ö'wö baibina jawa

²⁶ Isai itji̧ Davidma okobe deinö israel jojodötjö la'aka luwo̧ ö̧jinobe.

²⁷ Jelemutjö dötölataja o̧biya baledibanö, Hebron comunidadnö ja̧nö webö ö̧jinobe Davidma, ja̧danö treinta y tres o̧biya baledibanö Jerusalennö ja̧nö webö ö̧jinobe. Jobekwö Hebrontjöbi, Jerusalentjöbi cuarenta o̧biya baledibanö, israel la'aka luwo̧ ö̧jinobe Davidma.

²⁸ Ja̧danö, lekwe möle otiwanö ö̧jinobe Davidma, iteabi nöinö ujuna̧linobe, ja̧danö ju'wibi jojodö otiwanö tjomukwatökwe ö̧jinobe. Jemi ikenama, jwiinö pöe babibajo̧, bajalianö ö'wö baibinobe Davidma. Ja̧danö, israel jojodötjö la'aka luwo̧ David ö̧jinemi, itji̧ Salomonma inesö la'aka luwo̧ baibinobe.

²⁹ Ja̧danö, okobe jwiinö David ja̧bö ö̧jina wenema, jele'yebiyanö laebobe, ajayi ja̧bö ö̧jinatjö ö'wö baibenanö baibanö. Ja̧ David ö̧jina tji̧wȩyudinama, Dios yöawi̧ yöbawina Samuel i̧wȩyudina'yenöbi, Dios yöawi̧ yöbawo̧ Natan i̧wȩyudina'yenöbi, Dios yöawi̧ yöbawina Gad i̧wȩyudina'yenöbi laebobe.

³⁰ Jobadöma David ö̧jina wene tji̧wȩyudinobe, Israel jojodötjö la'aka luwo̧ ja̧nö webö ö̧jina jawabi, ujulu i̧sȩbina jawabi, jo̧banö baledina jawabi, israel jojodönö baledina jawabi, ju'wedö tjitebo jojodönö baledina jawabi.