1 Crónicas 27 - Dios Iwene

Israel jojodötjö ölakwabikwawa jojodö tjuluwedö tjimibiya wȩyukwa'ye

¹ Baikwö laebobe la'aka luwo̧ David ömöayedötjö ölakwabikwawa jojodö tjuluwedö tjimibiya wȩyukwa'ye. Jobadötjö ju'wedöma tjömöledösaso luwedö tjö̧jinobe, ja̧danö jobadötjö ju'wedöma milbedö ölakwabikwawa luwedö tjö̧jinobe, ja̧danö ju'wedöma cienbedö ölakwabikwawa luwedö tjö̧jinobe, ja̧danö juwedöma jobadö tjömöayedö luwedö tjö̧jinobe. Jawo̧kwena, ju'wedö israel jojodötjö ölakwabikwawa jojodö tjejubiyanö tjö̧jonö, jobadötjö veinticuatro milbedö teada̧lö tjö̧jobö ji̧nobe. Jo̧kwajabetjö sasokwena jojodö batjibanö 'da̧batö tjujuninobe, ja̧danö sasokwena la'aka luwo̧ imi wȩyukwa'ye, ja̧danö tjiteada̧lakwa̧ jawo̧ wȩyukwa'ye baikwö laebobe:

^2-3 Ajayi jawo̧ teada̧ladötjö la'aka luwo̧ma, Zabdiel itji̧ Jasobeam mikwo̧. Zabdielma Judasaso jojodötjö Perez itji̧ tupadanö jojoinobe. Jasobeam ömöayedö, ajayi jawo̧ teada̧ladö ölakwabikwawadöma, veinticuatro milbedö tjö̧ba̧jekwinobe, ja̧danö okobe deinö ja̧ ja̧wo̧ ölakwabikwawa luwedötjö la'aka luwo̧ ö̧jinobe Jasobeamma.

⁴ Ikena jawo̧ la'aka luwo̧ma, Ahoa itji̧ tupadanö jojo Dodai mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe, ja̧danö jo̧ba yöne ömöayo̧ma, Miclot mikwo̧.

⁵ Ikena jawo̧ la'aka luwo̧ma, ö'weje pjabato̧ Joiada itji̧ Benaia mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

⁶ Jo̧ba Benaiama, David ömöayedö inesö juluwadö treintabedö ötjabawö̧tjö bakwo̧, ja̧danö jobadö treintabedötjö la'aka tjuluwo̧. Ja̧danö Benaia yöne ömöayo̧ma, iteda itji̧ Amisabab mikwo̧.

⁷ Ikena jawo̧ la'aka luwo̧ma, Joab öjawo̧ Asael mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe, ja̧danö ö'wö baibakwa̧ abönö, jobadö tjuluwo̧ ö̧jinobe Asaelma. Ja̧danö, Asael ö'wö baibaja̧ ikenama, Asael itji̧ Zebadiasma ömöayedötjö la'aka luwo̧ baibinobe.

⁸ Ikena jawo̧ la'aka luwo̧ma, Izraita jojo Sama mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

⁹ Ikena jawo̧ la'aka luwo̧ma, Tecoa comunidad jojo Iques itji̧ Ira mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹⁰ Ikena jawo̧ la'aka luwo̧ma, Efrainsaso jojodötjö Pelonita ötjabawö̧tjö bakwo̧, Heles mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹¹ Ikena jawo̧ la'aka luwo̧ma, Husa comunidad jojo Zera itji̧ tupadanö jojo Sibecai mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹² Ikena jawo̧ la'aka luwo̧ma, Benjamin niji comunidad Anatot jojo Abiezer mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹³ Ikena jawo̧ la'aka luwo̧ma, Netofa jojo Zera itji̧ tupadanö jojo Maharai mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹⁴ Ikena jawo̧ la'aka luwo̧ma, Efrain niji comunidad Piraton comunidad jojo Benaia mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe.

¹⁵ Ikena jawo̧ o̧batjö bajaleapo jawo̧ la'aka luwo̧ma, Netofa comunidad jojo Otoniel itji̧ tupadanö jojo Heled mikwo̧. Ja̧ jawo̧ jo̧ba ömöayedö veinticuatro milbedö teada̧lö tjö̧jinobe. Jobekwö laebobe jawo̧kwena ölakwabikwawa jojodötjö luwedö tjimibiya wȩyukwa'yema.

Israel jojodö bakwasokwena jojodö tjuluwedö tjimibiya wȩyukwa'ye

¹⁶ Baikwö laebobe israel jojodötjö bakwasokwena jojodö tjuluwedö tjimibiya wȩyukwa'yema: Tjömöledösaso La'aka luwo̧ Rubensaso Zicri itji̧ Eliezer, Simeonsaso Maaca itji̧ Sefatias

Tjömöledösaso La'aka luwo̧

¹⁷ Levisaso Kemuel itji̧ Hasabias Aaron itji̧mu tupadanö jojodö Sadoc

¹⁸ Judasaso David öpöe Eliu Isacarsaso Micael itji̧ Omri

¹⁹ Zabulonsaso Abdias itji̧ Ismaias Neftalisaso Azriel itji̧ Jerimot

²⁰ Efrainsaso Azazias itji̧ Oseas Manasessaso ja'ö jawo̧ meajobekwö Pedaias itji̧ Joel

²¹ Manasessaso ja'ö Galaad niji ju̧kwadö Zacarias itji̧ Iddo Benjaminsaso Abner itji̧ Jaasiel

²² Dansaso Jeroham itji̧ Azareel Jobekwö laebobe israelsasokwena luwedö tjimibiya wȩyukwa'ye.

²³ Ja̧danö, David weinobe, okobe deinö israel jojodötjö ölakwabikwawa jojodönö tjö̧bajadobö, dokwa ba̧jȩkwadö tjö̧jojobö jö̧ba̧lö. Ja̧danö, jobekwö tjö̧ba̧ja̧denama, veinte o̧biya nijakwönönö juna̧ladönö tjö̧ba̧ja̧dinokobe, Isabenö Jo̧ma ajayinö yöbawö ujuninobetjö̧, —Si̧li̧'idö tjö̧ba̧jekwi̧danö, israel jojodöbi tjö̧ba̧jekwachobö pjatatakwo̧sa, —jö̧ba̧lö. Jo̧kwajabetjö̧, veinte o̧biya nijakwönönö juna̧ladönö tjö̧bajadobö weinokobe.

²⁴ Jo̧kwaijayonö, veinte o̧biya möakwönönö juna̧ladönö tjö̧bajadobö sulabenö weinobe Davidma, ja̧danö weökwe, David öpöo Sarvia jitji̧ Joabma jamatö ö̧ba̧jadinobe. Jo̧kwaijayonö, jobekwö sulabenö tjö̧bajadobö weiökwe, Israel jojodönö lȩebinobe Diosma, ja̧danö okobe deinö israel jojodönö ba̧ja̧dö kaatakwawinokobe Joabma. Jo̧kwajabetjö̧ La'aka luwo̧ David ö̧jina wȩyukwa'ye tji̧wȩyudenama, tjö̧ba̧jadina tji̧wȩyudinokobe, —Israel jojodötjö ölakwabikwawadöma benanö ba̧jȩkwadötö, —jö̧ba̧lö.

Ju'wedö David ömöayedö tjimibiya wȩyukwa'ye

²⁵ Ju'wedö la'aka luwo̧ David ömöayedötjö luwedö tjimibiya baikwö laebobe: Adiel itji̧ Azmavet mikwo̧ma, David ejutjö itea mikwawi̧ jawa lödawȩko̧ teada̧lakwawa luwo̧ ö̧jinobe. Uzias itji̧ Jonatan mikwo̧ma, ju'wi David itea lödawejubiya teada̧lakwawa luwo̧ ö̧jinobe. Israel niji ba̧kwemeachibanö, jalemi comunidadtjöbi, pjei̧ comunidadtjöbi, tjöekwemitjöbi, lödawejubiya ujuna̧linobe Davidma, ja̧danö ja̧ ejubiya teada̧lakwawa luwo̧ ö̧jinobe Jonatanma.

²⁶ Quelub itji̧ Ezri mikwo̧ma, David itea kwakwawa batjobiya otidadötjö la'aka luwo̧ ö̧jinobe.

²⁷ Rama comunidad jojo Simei mikwo̧ma, David itea uba batjobiya teada̧lakwawa luwo̧ ö̧jinobe. Sefam comunidad jojo Zabdima uba waji̧ jawabi, ubasobubi teada̧lakwawa luwo̧ ö̧jinobe.

²⁸ Geder comunidad jojo Baal-hanan mikwo̧ma la'aka luwo̧ David itea olivo towibiyabi, sicomoros towibiyabi teada̧lakwawa luwo̧ ö̧jinobe. Joas mikwo̧ma olivo o̧te teada̧lakwawa luwo̧ ö̧jinobe.

²⁹ Saron ba̧ba̧lawemi jojo Sitrai mikwo̧ma, David ajwimu pakayadö Saron nijinö ju̧kwadönö teada̧lakwawa luwo̧ ö̧jinobe. Adlai itji̧ Safat mikwo̧ma, David ajwimu pakayadö wabekijunö ju̧kwadönö teada̧lakwawa luwo̧ ö̧jinobe.

³⁰ Ismaelita jojo Obil mikwo̧ma, David ajwimu kameyodönö teada̧lakwawa luwo̧ ö̧jinobe. Meronot comunidad jojo Jehedias mikwo̧ma, David ajwimu burrodönö teada̧lakwawa luwo̧ ö̧jinobe.

³¹ Agareno jojo Jaziz mikwo̧ma, la'aka luwo̧ David ajwimu obejadönöbi, chivodönöbi teada̧lakwawa luwo̧ ö̧jinobe. Jobekwö laebobe la'aka luwo̧ David itea teada̧lakwawa luwedö tjimibiya wȩyukwa'yema.

Ju'wedö Davidnö pjaatakwawa jojodö

³² David ömöledöso̧, abe'do öjawo̧ Jonatan mikwo̧ma, okwa jawa waisanö omukwato̧ ö̧jinobe, ja̧danö baledi̧ jawa wȩyukwa otido̧ ö̧jinobe, ja̧danö Jonatanma la'aka luwo̧ Davidnö pjaatinobe, waisanö omukwatobö. Hacmonita jojo Jehiel mikwo̧ma, la'aka luwo̧ David itji̧munö ba̧ja̧dakwawa luwo̧ ö̧jinobe.

³³ Ahitofel mikwo̧ma la'aka luwo̧ David waisanö omukwatobö pjabatö lȩbebö yöbawina. Arquita jojo Husai mikwo̧ma, la'aka luwo̧ David yöne ömöledöso̧ ö̧jinobe.

³⁴ Ahitofel ö'wö baibaja̧ ikenama, Benaia itji̧ Joiada mikwo̧bi, Abiatar mikwo̧bi Ahitofel ö̧jinemi la'aka luwo̧ David waisanö omukwatobö pjabatadö batjibinobe. Joab mikwo̧ma, la'aka luwo̧ David ömöayedö ölakwabikwawa jojodötjö la'aka luwo̧ ö̧jinobe.