1 Crónicas 24 - Dios Iwene

Aaron itji̧mu tupadanö jojodö tjotidakwa̧ jawa

¹ Ja̧danö, Aaron itji̧mu tupadanö jojodö, Diostjö jojodötjö ö'weje pjabatadönöbi tjömöledösasokwena jojodönö 'da̧batö tjujuninobe, bakwasokwena Dios öba a'otjö otiwanö tjotidakobetjö̧. Aaron itji̧mu ömadöma bidö: Nadab mikwo̧bi, Abiu mikwo̧bi, Eleazar mikwo̧bi, Itamar mikwo̧bi.

² Jo̧kwaijayonö, tji̧tji̧mu ina deayi, tjabe'do ö'wö baibakwa̧ abönö ö'wö batjibinobe Nadabbi, öjawo̧ Abiubi. Jo̧kwajabetjö̧, Aaron itji̧mutjö, sule Eleazarbi, Itamarbi tjitji̧mu tupadanö jojodöbi Diostjö jojodötjö ö'weje pjabatadö tjö̧jobö ji̧nobe.

³ Ja̧danö, Eleazar itji̧ tupadanö jojo Sadoc mikwo̧bi, Itamar itji̧ tupadanö jojo Ahimelec mikwo̧bi pjatjatonö, okobe deinö Aaron itji̧mu tupadanö jojodönö tjömöledösasokwena jojodö batjibanö 'da̧batö ujuninobe Davidma, bakwasokwena tjotido jö̧tja̧lidanö otiwanö tjotidakobetjö̧.

⁴ Eleazar itji̧mu tupadanö jojodötjö luwedöma, Itamar itji̧mu tupadanö jojodötjö luwedö tjö̧ba̧jekwi̧tjö bajalekwönönö ba̧jȩkwadö tjö̧jinobe, jo̧kwajabetjö̧ Eleazar itji̧mu tupadanö jojodötjö, a̧li̧nösa̧mu jelemutjö bakwaso batjibanö 'da̧batö tjujuninobe, ja̧danö Itamar itji̧mu tupadanö jojodötjö, jelemutjö wapösokwa batjibanö 'da̧batö tjujuninobe.

⁵ Jobekwö tjotidawakwena omudawö tjujunenama, Dios öba a'otjö inawiya pjei̧ öwiya jabö ja̧tjinobe, Diosda bakwasokwena jojodö tjotidakwa̧ i̧sȩbakobetjö̧. Jobekwö ja̧tjinobe, jojodöda sulabenö bakweminö edökönö, bakwaso jojodönö jeleso jojodönö tjomukwati̧tjö bajalekwönönö ösödö, tjotidawakwena omudawö tjujunapji jö̧ba̧lö. Isabenö Eleazar itji̧mu tupadanö jojodötjöbi, Itamar itji̧mu tupadanö jojodötjöbi ba̧jȩkwadö otiwanö Dios wei̧ otikwa waisanö otidadö, ja̧danö Dios eju jawa otiwanö otidadö tjö̧jinobe, ja̧danö tjotidawakwena otiwanö bakweminö edö 'da̧batö tjujunakobetjö̧, inawiya jabö tjedinobe, Diosda i̧sȩbonö otiwanö 'dabatö tjujunakobetjö̧.

⁶ Ja̧danö, jobekwö inawiya pjei̧ öwiya jabö tjedenama, Levisaso jojo Natanael itji̧ Semaias mikwo̧ma, secretario ja̧nö, sasokwena luwedö tjimibiyabi, tjotidakwa̧kwenabi i̧wȩyudinobe. Okobe deinö jobe ju̧kwadö tjöba a'o öwawinö i̧wȩyudinobe Semaiasma, la'aka luwo̧ David öba a'otjöbi, Diostjö jojodötjö ö'weje pjabatadö Sadocbi, Abiatar itji̧ Ahimelecbi tjöba a'otjöbi, ju'wedö ö'weje pjabatadötjö sasokwena luwedö tjöba a'otjöbi, ju'wedö Levisaso jojodö tjöba a'otjöbi. Jobekwö Eleazar itji̧mu tupadanö jojodötjö bakwo̧ luwo̧nö, ikenama Itamar itji̧mu tupadanö jojodötjö bakwo̧ luwo̧nö, bakwo̧nökwena omudawö tjujuninobe.

⁷ Ja̧danö, inawiya pjei̧ öwiya jatjenama, baikwö laebinobe. Ajayi omudawö tjujuninökwema Joiarib mikwo̧. Ikena omudawö tjujuninökwema Jedaias mikwo̧.

⁸ Ikena omudawö tjujuninökwema Harim mikwo̧. Ikena omudawö tjujuninökwema Seorim mikwo̧.

⁹ Ikena omudawö tjujuninökwema Malquias mikwo̧. Ikena omudawö tjujuninökwema Mijamin mikwo̧.

¹⁰ Ikena omudawö tjujuninökwema Cos mikwo̧. Ikena omudawö tjujuninökwema Abias mikwo̧.

¹¹ Ikena omudawö tjujuninökwema Jesua mikwo̧. Ikena omudawö tjujuninökwema Secanias mikwo̧.

¹² Ikena omudawö tjujuninökwema Eliasib mikwo̧. Ikena omudawö tjujuninökwema Jaquim mikwo̧.

¹³ Ikena omudawö tjujuninökwema Hupa mikwo̧. Ikena omudawö tjujuninökwema Jesebeab mikwo̧.

¹⁴ Ikena omudawö tjujuninökwema Bilga mikwo̧. Ikena omudawö tjujuninökwema Imer mikwo̧.

¹⁵ Ikena omudawö tjujuninökwema Hezir mikwo̧. Ikena omudawö tjujuninökwema Afises mikwo̧.

¹⁶ Ikena omudawö tjujuninökwema Petaias mikwo̧. Ikena omudawö tjujuninökwema Hezequiel mikwo̧.

¹⁷ Ikena omudawö tjujuninökwema Jaquin mikwo̧. Ikena omudawö tjujuninökwema Gamul mikwo̧.

¹⁸ Ikena omudawö tjujuninökwema Delaia mikwo̧. Ikena omudawö tjujuninökwema Maazias mikwo̧. Jobekwö Eleazar itji̧mu tupadanö jojodönöbi, Itamar itji̧mu tupadanö jojodönöbi inawiya jabö 'da̧batö tjujuninobe, veinticuatrosaso jojodö batjibanö, bakwasokwena Dios ejutjö tjotidakobetjö̧.

¹⁹ Ja̧danö, jobekwö 'da̧batö tjujuninawö̧, Aaron itji̧mu tupadanö jojodötjö bakwasokwena tjotido jö̧tja̧li̧danö Isabenö Jo̧ ejutjö tjotidinobe, bakwasokwena tjotidobö weawa laebi̧danö. Isabenö Jo̧ Israel jojodö tjuluwo̧ Diosma tja'dömine Aaronnö weinobe, Aaronbi, itji̧mu tupadanö jojodöbi iteda ejutjö tjotidakwa̧ma, ja̧danö weökwe itji̧mu tjotidakwa̧ i̧wȩyudinobe Aaronma. Ja̧danö, ja̧ weawa otiwanö a̧ja̧kwö tjö̧jinobe bakwasokwena jojodöma.

Ju'wedö Levisaso jojodötjö luwedö tjimibiya wȩyukwa'ye

²⁰ Ju'wedö Levisaso jojodö tjuluwedö tjimibiya baikwö laebobe: Amram itji̧ Sebuel itji̧mu tupadanö jojodötjö la'aka luwo̧ma Jehedias mikwo̧.

²¹ Rehabias itji̧mu tupadanö jojodötjö la'aka luwo̧ma, Isias mikwo̧.

²² Izhar itji̧ Selomit itji̧mu tupadanö jojodötjö luwo̧ma Jahat mikwo̧.

²³ Hebron itji̧mu tupadanö jojodötjö la'aka luwo̧ma Jerias mikwo̧, ikena luwo̧ma Amarias mikwo̧, ikena luwo̧ma Jahaziel mikwo̧, ikena luwo̧ma Jecaman mikwo̧.

²⁴ Uziel itji̧ Micaia mikwo̧ itji̧mu tupadanö jojodötjö luwo̧ma, Samir mikwo̧.

²⁵ Ja̧danö Micaia öjawo̧ Isias mikwo̧ itji̧mu tupadanö jojodötjö luwo̧ma, Zacarias mikwo̧.

^26-27 Merari itji̧muma Mahli mikwo̧bi, Musi mikwo̧bi. Ja̧danö itji̧mu tupadanö jojo Jaazias itji̧mu tupadanö jojodötjö la'aka luwo̧ma, Beno mikwo̧. Ja̧danö Benokwö ju'wedö luwedöma Soham mikwo̧bi, Zacur mikwo̧bi, Ibri mikwo̧bi.

²⁸ Mahli itji̧ Eleazar mikwo̧ma, itji̧mu ömadö deinobe.

²⁹ Eleazar öjawo̧ Cis itji̧mu tupadanö jojodötjö luwo̧ma Jerameel mikwo̧.

³⁰ Musi itji̧mu tupadanö jojodötjö luwedöma, Mahli mikwo̧bi, Eder mikwo̧bi, Jerimot mikwo̧bi. Jobekwö laebobe Levi itji̧mu tupadanö jojodö, sasokwena luwedö tjimibiyama.

³¹ Ja̧danö, Aaron itji̧mu tupadanö jojodö tjotidawakwena 'da̧batö tjujuninadanö, ju'wedö Levisaso jojodöbi tjotidawakwena 'da̧batö tjujuninobe. Jobadöbi la'aka luwo̧ David öba a'otjöbi, ö'weje pjabatadö Sadocbi, Ahimelecbi tjöba a'otjöbi, ju'wedö ö'weje pjabatadötjö luwedö tjöba a'otjöbi, ju'wedö Levisaso jojodötjö luwedö tjöba a'otjöbi inawiya jabö tjedinobe, tjotidakwa̧kwena Dios i̧sȩbakobetjö̧. Wainökwena edökönö, bakweminö abönö pöe itji̧mu tupadanö jojodöbi, öjawo̧ itji̧mu tupadanö jojodöbi jobe ju'wedö tjöba a'otjö inawiya jabö tjedinobe.