1 Crónicas 23 - Dios Iwene

Levisaso jojodö tjotidakwa̧ David weina jawa

¹ La'aka luwo̧ David ida̧ökö jwiinö pöe baibenama, iteda itji̧ Salomonnö ujuninobe, israel jojodötjö inesö la'aka luwo̧ baibanö.

² Ja̧danö, okobe deinö israel jojodötjö luwedönöbi, Diostjö jojodötjö ö'weje pjabatadönöbi, ju'wedö tjömöledö Levisaso jojodönöbi o̧ko̧kodinobe Davidma.

³ Ja̧danö, Levisaso jojodötjö ömadö treinta o̧biya möakwönönö juna̧ladönö tjö̧ba̧jadinobe, dokwa ba̧jekwadö tjö̧jojobö jö̧ba̧lö. Ja̧danö ba̧ja̧dajadö, tjö̧ba̧ja̧daja̧ yötjawinobe, —Levisaso jojodötjö ömadöma, treinta y ocho milbedö tjuju̧kwobetö, —jö̧ba̧lö.

⁴ Jobekwö yötjawiökwe, Davidma tjotidakwa̧ weinobe baikwö: —Levisaso jojodötjö, veinticuatro milbedö Isabenö Jo̧ eju otikwa jawa webö tjö̧jakwedö. Ja̧danö ju'wedö seis milbedöma, luwedö tjö̧jakwedö, lȩekwa jawa luwedöbi, ju'wi jawa luwedöbi.

⁵ Ja̧danö ju'wedö cuatro milbedöma, apjudebiya tea̧da̧lakwawa jojodö tjö̧jakwedö. Ja̧danö ju'wedö cuatro milbedöma, lo̧awa jawa tjotidakwedö. Belö ötjöma pjebö lo̧awa jawa chotidijatö, ja̧danö ja̧ lo̧awa jawa pjebö, Isabenö Jo̧nö ösödö lo̧tjakwedö, —jö̧ba̧lö yöawinobe Davidma.

⁶ Ja̧danö, jobekwö yöbawajo̧, wapösokwa batjibanö Levisaso jojodönö 'da̧batö ujuninobe. Bakwaso jojodöma, Levi itji̧ Gerson itji̧mu tupadanö jojodö tjö̧jinobe, ja̧danö jeleso jojodöma, Levi itji̧ Coat itji̧mu tupadanö jojodö tjö̧jinobe, ja̧danö jeleso jojodöma, Levi itji̧ Merari itji̧mu tupadanö jojodö tjö̧jinobe.

Gerson itji̧mu tupadanö jojodötjö luwedö tjimibiya wȩyukwa'ye

⁷ Gerson itji̧mu tupadanö jojodöma dosolatajabedö tjö̧jinobe, Libni itji̧mu tupadanö jojodöbi, Simei itji̧mu tupadanö jojodöbi.

⁸ Ja̧danö Libni itji̧mu tupadanö jojodötjö wamedukwabedöma bidö: Okobe deinö Libni itji̧mu tupadanö jojodötjö la'aka luwo̧ Jehiel mikwo̧bi, Zetam mikwo̧bi, Joel mikwo̧bi.

⁹ Ja̧danö Libnisaso jojo Simei itji̧mu tupadanö jojodötjö wamedukwabedöma bidö: Selomit mikwo̧bi, Jaziel mikwo̧bi, Jaran mikwo̧bi. Jobadö jelemutjö bakwo̧bedöma, Libnisaso jojodötjö jelemutjö bakwasokwena luwedö tjö̧jinobe.

¹⁰ Ja̧danö Gerson itji̧ Simei itji̧mu tupadanö jojodötjö ö'wejemubedö luwedöma bidö: Jahat mikwo̧bi, Zisa mikwo̧bi, Jeus mikwo̧bi, Beria mikwo̧bi.

¹¹ Jobadötjö Jahatma, okobe deinö Simeisaso jojodötjö la'aka luwo̧ ö̧jinobe, ja̧danö ikena jojoma Ziza mikwo̧. Ja̧danö, Jeus mikwo̧bi, Beria mikwo̧bi tjitji̧mu o̧bukwedönöda tjujuna̧linobe, jo̧kwajabetjö̧ jobadö tjitji̧mu tupadanö jojodöma, dosolataja jojodö tjö̧jinokobe, bakwaso jojodödanö tjö̧ba̧jadinawö, Jeus itji̧mu tupadanö jojodönöbi, Beria itji̧mu tupadanö jojodönöbi.

Coat itji̧mu tupadanö jojodö tjimibiya wȩyukwa'ye

¹² Coat itji̧muma ö'wejemubedö: Amram mikwo̧bi, Izhar mikwo̧bi, Hebron mikwo̧bi, Uziel mikwo̧bi.

¹³ Ja̧danö Amram itji̧mu tupadanö jojodötjö ju'wedöma Aaron mikwo̧bi, Moises mikwo̧bi. Ja̧danö Aaronnöbi, Aaron itji̧mu tupadanö jojodönöbi Dios 'da̧batö ujuninawö̧, inesö 'da̧batö junawa jawa Diosnö ösödakwawa jawa tjotidobö. Jobadönö 'da̧batö ujuninobe, Isabenö Jo̧ öba a'otjö iyawa iyö tjotidobö, ja̧danö Isabenö Jo̧ wei̧ jawa tjotidobö, ja̧danö Isabenö Jo̧ jojodönö pjaatakwa̧ yöawi̧ma, jobadöda ba̧kwelöjatebö ju'wedö israel jojodönö yötjawakobetjö̧.

¹⁴ Ja̧danö Dios inesö ömöayo̧ Moises itji̧mu tupadanö jojodöma, wainö ujuninököwö̧. Jobadöma bakwainö ju'wedö tjömöledö Levisaso jojodödanö tjö̧bajadinawö̧.

¹⁵ Moises itji̧muma, Gerson mikwo̧bi, Eliezer mikwo̧bi.

¹⁶ Ja̧danö Gerson itji̧mu tupadanö jojodötjö, la'aka tjuluwo̧ma Sebuel mikwo̧.

¹⁷ Ja̧danö Moises itji̧ Eliezer mikwo̧ma, itji̧ bakwo̧nöda ujuna̧linobe, Rehabias mikwo̧nö. Jo̧kwaijayonö itji̧ jo̧dawo̧da ö̧jinajayonö, Rehabias itji̧mu tupadanö jojodöma tjö̧ba̧jekwachinobe.

¹⁸ Ja̧danö Coat itji̧ Izhar itji̧mu tupadanö jojodötjö la'aka luwo̧ma, Selomit mikwo̧.

¹⁹ Ja̧danö Coat itji̧ Hebron itji̧mu tupadanö jojodötjö la'aka luwedöma bidö: Jerias mikwo̧ma, la'aka luwo̧ ö̧jinobe, ikena jojoma Amarias mikwo̧, ikena jojo Jahaziel mikwo̧, ikena jojo Jecaman mikwo̧.

²⁰ Coat itji̧ Uziel itji̧mu tupadanö jojodötjö la'aka luwedöma bidö: Micaia mikwo̧ma, la'aka luwo̧ ö̧jinobe, ikena jojoma Isias mikwo̧.

Merari itji̧mu tupadanö jojodö tjimibiya wȩyukwa'ye

²¹ Merari itji̧muma Mahli mikwo̧bi, Musi mikwo̧bi. Ja̧danö Mahli itji̧muma, Eleazar mikwo̧bi, Cis mikwo̧bi.

²² Ja̧danö Eleazar ö'wö baibenama, itji̧mu ömadö deinobe, itji̧mu ya̧dönöda ujuna̧linobe Eleazarma. Ja̧danö, yöne tjömöledö, tjabe'do öjawo̧ Cis itji̧mu jobadönö tjeminobe, tjilekwamu batjibanö.

²³ Ja̧danö Musi itji̧muma wamedukwabedö, Mahli mikwo̧bi, Eder mikwo̧bi, Jerimot mikwo̧bi.

²⁴ Jobekwö laebobe Levi itji̧mu tupadanö jojodö sasokwena luwedö tjimibiya wȩyukwa'yema. Teada̧lönö tji̧wȩyudinobe, Levi itji̧mu ja̧danö ö̧'dö̧dö tji̧tji̧mu tupadanö jojodö tjimibiyama, bidöma bite ömöledösaso jojodö, jö̧ba̧lö. Ja̧danö, jobadönö tjö̧ba̧jadinobe, veinte o̧bia möakwönönö juna̧ladönö, Isabenö Jo̧ eju jawa otidö tjö̧jakobetjö̧.

²⁵ Jau, Israel la'aka luwo̧ Davidma baikwö yöa̧linobe: —Isabenö Jo̧ Israel jojodö tjösödökwe Diosma, wene jwiinö ölakwabikwawökönö dö̧jobö iyajabe, ja̧danö bemi tupakwö ba̧kwelöjatebö Jerusalen comunidadnö ö̧jakwo̧ Isabenö Jo̧ma.

²⁶ Jo̧kwajabetjö̧, bemi tupakwö Levisaso jojodöma Dios eju sabana'wotjö otikweju kwetjatobö jwiakobe, ja̧danö jo̧banö ösödakwawa jawa kwetjatobö jwiakobe, ejuma bakwenada ja̧kobetjö̧, —jö̧ba̧lö.

²⁷ Jobekwö yöba̧lö, Levisaso jojodötjö sasokwena jojodö Jerusalentjö tjotidawakwena omudawö weinobe, ja̧danö weaja̧danö otidö tjö̧jakobetjö̧, okobe deinö ömadötjö veinte o̧biya möakwönönö juna̧ladö tjimibiya tji̧wȩyudinobe.

²⁸ Jobadö Levisaso jojodönö weawama baikwö laebobe: Aaron itji̧mu tupadanö jojodöma Diostjö jojodötjö ö'weje pjabatadö tjö̧jinobe, ja̧danö Isabenö Jo̧ ejutjö otidö tjö̧jonö, ju'wedö Levisaso jojodöma jobadönö pjatjatobö ji̧nobe. Ju'wibi Dios eju ȩkijubi, ö'öböseju ȩkijubi teada̧ladö tjö̧jinobe, ja̧danö Diosnö ösödakwawa jawa dichawa jojodö tjö̧jinobe. Ja̧bi, okobe jwiinö ju'wi Dios eju otikwa otidadö tjö̧jinobe Levisaso jojodöma.

²⁹ 'Da̧batö junawa pan, Dios eju okwa i̧sȩkwöte mesasöte wame junawa panbi otidadö tjö̧jinobe, ja̧danö harinaso̧pja̧ otiwapja̧, Diosnö iyawapja̧ teada̧ladö tjö̧jinobe, ja̧danö ye'yeachi̧ jawa jwii̧ pan otidadö tjö̧jinobe. Jobadöda ja̧ otikwa jawa ba̧jadadö, ja̧danö wiwodadö, ja̧danö balö otidadö tjö̧jinobe, ja̧ 'ye'yeachi̧ jawa jwii̧ panma.

³⁰ Ju'wibi, yȩayikwena, ja̧danö yi̧benakwena Isabenö Jo̧ öba a'o ichibö, lo̧awa lo̧tjobö ji̧nobe, —Otiwanö pjabato̧ja, otiwo̧ja, —jö̧ba̧lö.

³¹ Ja̧danö otikwökö mölekwenabi, yö̧te jawo̧ yabayo̧ jawa ba'ali mölebi, ju'wi ba'ali mölebi jwiinö ubinö iyawa Isabenö Jo̧nö ösödö tjiyenama, jobadö Levisaso jojodö pjatjatobö ji̧nobe. Ba̧kwelöjatebö ajayinö omudawö tjujuninadanö, Levisaso jojodötjö ju'wedöma Isabenö Jo̧ öba a'o ötidö tjö̧jobö ji̧nobe, jobadönö weawa laebi̧danö.

³² Jo̧kwajabetjö̧, jobekwö weawa laebi̧danö, Aaron itji̧mu tupadanö jojodö Diostjö jojodötjö ö'weje pjabatadö jwebebö tjö̧jonö, tjömöledö Levisaso jojodöma Dios eju sabana'wotjö otikwejubi, 'yayejubi teada̧lö tjö̧jobe, ja̧danö teada̧lönö otiwanö otidö tjö̧jobe, Isabenö Jo̧ ejutjö tjotido jö̧tja̧lidanö.