1 Crónicas 22 - Dios Iwene

¹ Ja̧danö, jobe Arauna chabö loawejutjö kwabö juwö iyajo̧, Davidma yöawinobe: —Isabenö Jo̧ eju 'yayejuma, bemi nijinöda tjotjidakobe, ja̧danö israel jojodö Diosnö tjiyi̧, jwiinö ubinö tjiyi̧ iyawapjoma, benada tjotidakobe, —jö̧ba̧lö.

Dios eju tjotidakwa̧ jawa David otidina jawa

² Jobekwö yöbawajo̧, Davidma weinobe, okobe deinö israel nijinö ju̧kwadö, israel jojodöböködönö tjo̧ko̧kodobö. Ja̧danö, tjo̧ko̧kodajawö̧nö weinobe, Dios eju tjotidakwa̧ inawiya öwiawi̧ löwö tjotidobö, tjotidakwa̧ möle badekwachenama ida̧ökö tjotidakwa̧ jawa tjujuna̧lakobetjö̧.

³ Ju'wibi nöinö 'dii jawa 'da̧batö ujuninobe Davidma, ja̧tjö Dios eju apjudebiya otikwa jawa pöasö'ibiyabi, apjude junawa ökiya jawabi tjotidakobetjö̧. Ju'wibi nöinö bronce jawa 'da̧batö ujuninobe, jwiinö nöinö 'da̧batö ujuninobe, nönö ba̧jadakwawa jwienanö baibanö.

⁴ Ju'wibi nöinö cedro towi o'obiyabi, tjö̧ba̧jadökenanö nöinö 'da̧batö ujuninobe, Dios eju otikwa o'obiya baibanö. Jau, Tiro comunidad jojodöbi, Sidon comunidad jojodöbi nöinö cedro towi o'obiya e'ewö tjiyinobe Davidnö, ja̧danö ja̧tjö nöinö 'da̧batö ujuninobe.

⁵ Jobekwö 'da̧batö ujunina labebö loawama baikwö laebobe: Davidma omukwatö yöa̧linobe, —Isabenö Jo̧ eju otidakwo̧ chitji̧ Salomonma ina möayo̧, ja̧danö möayo̧obetjö, ina otiwanö ö̧jakwa̧ jawa waisachibö̧kö̧. Ja̧danö, Isabenö Jo̧ eju otidakwejuma, inesö otiweju, salöeju, tjitebokwena jojodö otiwanö omukwatö yötja̧lakweju otidobö jo̧be. Jo̧kwajabetjö̧, jobekwö otiwanö otidakobetjö̧, ja̧ otidakwa̧ jawa jamatö chotidakwo̧sa, —jö̧ba̧lö omukwatö yöa̧linobe. Ja̧danö jobekwö omukwatö yöba̧lajo̧, ö'wö baibakwa̧ abönö, nöinö o̧do otikwa jawa 'da̧batö ujuninobe, ja̧tjö Salomon otidakobetjö̧.

David Salomonnö weina jawa

⁶ Jemi ikenama, Davidma iteda itji̧ Salomonnö jwöinobe, ö̧jobekwö ichobö. Ja̧danö, ichajo̧nö weinobe, Isabenö Jo̧ Israel jojodö tjösödökwe Dios eju otidakwa̧ jawa, baikwö:

⁷ —Chitji̧ Salomon, chösödökwe Isabenö Jo̧ Diosnö ösödö, ötjöda eju chotidobö chomukwatijatö, chösödökwenö otiwanö tjomukwatobö jö̧ta̧lobetjö̧.

⁸ Jo̧kwaijayonö, jobekwö chomukwatinajayonö, Isabenö Jo̧ma yöawinobe ötjönö: –David, ökwöma cheju kwotidobö jwibo̧ja. Ökwöma ölakwabikwawa luwo̧ja, ja̧danö israel jojodö tjöpöjojodökwö nöinö ölakwabikwawö, ba̧jȩkwadö tjökwösobö ebawinö ölakwabikwawinaja. Ja̧danö, jobekwö chöba a'otjö ba̧jekwadö jojodö tjökwösobö ebawinö kwölakwabikwawinobetjö̧, ökwöda cheju, ötjönö otiwanö omukwatakwaweju kwotidobö jwibo̧ja.

⁹ Jo̧kwaijayonö, ökwöma kwitji̧nö kwujunala̧kwo̧ja, ö'wö bakibaja̧ ikena la'aka luwo̧ baibakwo̧ma. Ja̧danö, ökwö ölakwabikwawö kwö̧jinadanöma ö̧jökakwo̧ kwitji̧ma. Jo̧banö pjabatö wetocha, israel niji ö'öbötenia ju̧kwadö tjöpöjojodöma, jo̧bakwö ölakwabikwawökönö dösölö̧jinö tjö̧jobö. Jau, kwitji̧ma Salomon imikwakwo̧, wene jwiobe jö̧ba̧lö, ja̧danö jo̧ba webö ö̧jena baledibanö, israel jojodö wene jwiinö ölakwabikwawökönö tjö̧jobö wetocha.

¹⁰ Jo̧ba kwitji̧ Salomonda cheju otidakwo̧ma, ötjönö otiwanö omukwatakwaweju baibanö. Jo̧bama ötjöda chitji̧ ö̧jakwo̧, ja̧danö ötjöma jo̧ba abe'do chö̧jakwo̧sa. Ja̧danö ju'wibi jo̧ba itji̧mu tupadanö jojodönö chujunocha, ba̧kwelöjatebö israel jojodötjö la'aka luwedö tjö̧jakobetjö̧, –jö̧ba̧lö yöawinobe Isabenö Jo̧ma.

¹¹ —Ja̧danö chitji̧, Isabenö Jo̧ yöawinadanö badekwachobö chösöda. Ökwökwö ja̧nö pjaatobö chösöda, ja̧danö kwösödökwe Isabenö Jo̧ Dios eju otiwanö kwotidobö chösöda.

¹² Inesö chösödi̧ma bi̧ya chitji̧, otiwanö waisanö omukwato̧ bakibanö pjaatobö chösöda, otiwi̧ma suli̧tjö böjö omukwato̧ bakibanö. Jobekwö pjaatobö chösöda, Israel jojodö la'aka tjuluwo̧ bakibanö ujunenama, otiwanö kwösödökwe Isabenö Jo̧ Dios wei̧ a̧ja̧kwö kwö̧jakobetjö̧.

¹³ Ja̧danö chitji̧, jobekwö otiwanö teada̧lönö Isabenö Jo̧ wei̧, Moises i̧wȩyudobö weina, ja̧bö dö̧jobö wei̧bi, ju'wi wei̧bi a̧ja̧kwö kwö̧jitjö̧ma, kwö̧ji̧ma isabenö waekwökönö otiwanö kwö̧jakwo̧ja. Isabenö kwujuluwachibanö, yebabökönö kwö̧jo chitji̧. –Dakwö ja̧takwajö, –jö̧ba̧lö omukwatökönö, yebabökönö kwö̧jo chitji̧.

¹⁴ —Ja̧danö o̧do kwotidakwa̧ jawa, baikwö yötawakwö: Ida̧ökö nöinö chotidajabe, o̧do kwotidobö badekwachenama, o̧do otikwa jawa kwujuna̧lakobetjö̧. Oro jawatjö, tres millon cuatrocientos mil kilo jenanö 'da̧batö chujunajabe, ja̧danö plata jawatjö, treinta y cuatro millon kilo jenanö 'da̧batö chujunajabe. Ja̧danö 'dii jawatjöbi, bronce jawatjöbi, tjö̧ba̧jadökenanö baibanö nöinö 'dabatö chujunanabe. Ju'wibi, towi o'obiyabi, inawiya öwiawi̧bi ko̧ko̧dö 'da̧batö chujunajabe, o̧do tjöekwemibiyabi, apjudebiyabi otikwa jawa kwujuna̧lakobetjö̧. Jau chitji̧, ida̧ökö nöinö ja̧ jawa 'da̧batö chujunajabe, jo̧kwaijayonö chedemi ina jwiena, jo̧kwajabetjö̧ ja̧tjö bajalekwönönö ökwöbi 'da̧batö kwujunobö jȩna.

¹⁵ Ja̧danö otikwa jawadamaökö chitji̧, ju'wibi kwömöayedötjö ba̧jȩkwadö tjuju̧kwobe, inawiya öwiawi̧ löwö otikwa waisadöbi, inawiyatjö o̧do otikwa waisadöbi, towi o'obiyatjö otikwa waisadöbi, ju'wi jawa otikwa waisadöbi.

¹⁶ Ja̧danö ju'wibi kwömöayedötjö tjuju̧kwobe, orotjöbi, platatjöbi, broncetjöbi, 'dii jawatjöbi otikwa waisadöma. Jo̧kwajabetjö̧, baikwö wetakwö chitji̧: La'aka luwo̧ bakibenama, juluwanö a̧la̧ibö kwotido, ja̧danö Isabenö Jo̧nö ateba, ökwökwö ja̧nö pjaatobö, —jö̧ba̧lö yöa̧linobe Davidma, itji̧ Salomonnö.

¹⁷ Jobekwö itji̧ Salomonnö webajo̧, ju'wedö israel jojodötjö luwedönöbi weinobe Davidma, jobadöbi Salomonnö pjatjatakobetjö̧. Baikwö weinobe:

¹⁸ —Chömöledö, kwuluwo̧duwi Isabenö Jo̧ Diosma isabenö ökwödökwö ja̧nö pjabato̧, jö̧tö? Ja̧danö isabenö döpöjojodö, ditebo ö'öbötenia ju̧kwadötjö dö̧jibanö otiwanö pjaatinobe, jobadökwö wene jwiinö dö̧jakobetjö̧, jö̧tö? Jau chömöledö, bemi niji ju̧kwadö döpöjojodönö chujuluwobö iyinobe, ja̧danö jobekwö chujuluwobö iyinobetjö̧, okobe deinö ajayinö bemi nijinö ji̧nadö döpöjojodöbinadöma, ida̧ökö Isabenö Jo̧ ömöayedö, ja̧danö Isabenö Jo̧ ömöledö israel jojodö tjö̧möayedö tju̧ju̧kwobe. Jau, isabenö otiwanö ökwödökwö ja̧nö pjabato̧ Isabenö Jo̧ma chömöledö,

¹⁹ jo̧kwajabetjö̧ baikwö wetaduwakwö: Kwomajadeduwinöbi, kwo̧'woduwinöbi 'diinö omudawö kwujunaduwo, –Isabenö dösödökwe Isabenö Jo̧ Diosnö disakwakwedösa, wei̧ a̧ja̧kwö dö̧jakobetjö̧, –jö̧ba̧lö. Ja̧danö, chitji̧ Salomonkwö Isabenö Jo̧ Dios eju kwotidaduwo, Isabenö Jo̧nö otiwanö omukwatakwaweju baibanö. Jobekwö kwotidaduwo, Isabenö Jo̧ iteapjo, wei̧ wȩyukwaba öbiya döbölataja a̧ja̧pjobi, Diosnö ösödakwawa jawa dȩja̧piyabi ichejebö, jeju Isabenö Jo̧nö otiwanö omukwatakwaweju okwa kwujunaduwakobetjö̧, —jö̧ba̧lö weinobe Davidma, ju'wedö israel jojodötjö luwedönö.