1 Crónicas 21 - Dios Iwene

David israel jojodönö tjö̧ba̧jadobö weina jawa

¹ Ja̧danö, Awetjama israel jojodönö suli̧ öwaedobö isakwinobe, ja̧danö wea̧linobe Davidnö, israel jojodötjö ölakwabikwawa jojodönö öba̧ja̧dobö, ömöayedö dokwa ba̧jȩkwadö tjö̧jojobö jö̧ba̧lö.

² Jo̧kwajabetjö̧ la'aka luwo̧ Davidma, ölakwabikwawa jojodötjö la'aka luwo̧ Joabnöbi, ju'wedö ölakwabikwawa luwedönöbi weinobe, —Israel niji̧ ba̧kwȩmeachibanö okobe deinö israel jojodötjö tjölakwabikwawobö juluwadönö ba̧ja̧dö kwekachaduwo. Okobe jwiinö israel niji ba̧kwemeachibanö ba̧ja̧dö kwi̧'yaduwo, u'dakwö Dan comunidatjö, a̧likwö Berseba comunidadbe kwichibaduwenanö kabatö. Ja̧danö, ba̧ja̧dajadö, kwö̧ba̧ja̧duwaja̧ wȩyukwa'ye ichejebö kwiyaduwotjö, chömöayedö ölakwabikwawa jojodö dokwa ba̧jȩkwadö tjö̧jojobö chöwaisakobetjö̧, —jö̧ba̧lö weinobe Davidma.

³ Weökwe, Joabma öpöjödinobe, —La'aka chuluwo̧, jejenö dö̧ba̧jadoko. Isabenö dömöledö israel jojodö tjö̧ba̧jekwachobö jo̧be, ja̧danö kwuluwo̧ Isabenö Jo̧ Dios babe tjö̧ji̧tjö jwiinö bajalekwönönö tjö̧ba̧jekwachinö pjaatobö chösöda. Ja̧danö dokwa ba̧jȩkwadö tjö̧jobejö jö̧ba̧lö kwöwaisitjöböbi, wajwiköbitjöböbi bakwaiobe chuluwo̧, okobe deinö jobadöma ökwö chuluwo̧ ömöayedö tjö̧jobe. Jo̧kwajabetjö̧ tajawedö jojodönö dö̧ba̧jadobö weköbobeda? Dö̧ba̧jaditjö̧ma sulena la'aka chuluwo̧, jobekwö weköbitjö̧ma israel jojodönö wene jwökebena chuluwo̧, —jö̧ba̧lö atadinobe.

⁴ Jo̧kwaijayonö, jejenö öpöjödö atadijayonö, yayonö la'aka luwo̧ Davidma jwaikwöda labinö weinobe Joabnö, jojodönö ö̧ba̧jadobö. Jo̧kwajabetjö̧, weökwe, uluwo̧ ö̧jelö labebö, israel jojodönö ba̧ja̧dö i̧'yinobe, ja̧danö ba̧ja̧dajo̧ Jerusalen comunidadbe ȩwa̧jinobe.

⁵ Ichibajo̧, Joabma la'aka luwo̧ Davidnö yöawinobe ö̧ba̧ja̧daja̧ma, —Israel nijitjö̧ okobe deinö tjölakwabikwawobö juluwadö ömadöma, un millon cien milbedö tjö̧jobe, ja̧danö juda nijitjö cuatro ciento setenta milbedö tjölakwabikwawobö juluwadö tjö̧jobe, —jö̧ba̧lö.

⁶ Jo̧kwaijayonö, jelesokwena jojodönö ö̧ba̧jadinajayonö, Levisaso jojodönöbi, Benjaminsaso jojodönöbi ba̧ja̧dökönö ujunibinobe Joabma, —La'aka luwo̧ David chö̧ba̧jadobö weinama inesö suli̧, —jö̧ba̧lö omukwatinobetjö̧.

David sulabenö tjö̧ba̧jadobö weiökwe, Dios lȩebina wene

⁷ Jobekwö israel jojodönö tjö̧ba̧jadobö David weiökwe, jwiinö öpöjödinobe Diosma, ja̧danö öpöjödö lȩebinobe israel jojodönö.

⁸ Baikwö laebobe Dios israel jojodönö lȩebina wenema: Israel jojodönö tjö̧bajadaja̧ ikenama, sulabenö weina omukwatö Diosnö aebinobe Davidma: —Chuluwo̧ Isabenö Jo̧, isabenö jwiinö sulabenö tjö̧ba̧jadobö wetajabe. Sulabenö omukwatö̧kö̧ ja̧nö, kwöpöjödinö sulabenö ja̧tajabe chuluwo̧, jo̧kwajabetjö atebakwö, kwöba a'otjö wene chujuna̧li̧ söbebö loköbobö, —jö̧ba̧lö aebinobe.

⁹ Gad mikwo̧ma, Dios yöawi̧ Davidnö yöbawö ö̧jinobe, ja̧danö Isabenö Jo̧ma iteda yöawi̧ weinobe Gadnö, Davidnö yöawobö, baikwö:

¹⁰ —David ö̧jobekwö 'ya̧nö yökawonö, –Baikwö laebobe Isabenö Jo̧ ökwönö yöawi̧ma, sulabenö ja̧köbinobetjö̧ isabenö lȩtebakwa̧ jo̧be, ja̧danö lȩebakwawa jawa wapötakwa jawa yötawakwö, ökwöda lȩtebakwa̧ omudawö kwujunobö, —jö̧ba̧lö Gadnö weinobe, Davidnö yöawobö.

¹¹ Weökwe, David ö̧jobekwö ichibö, Dios yöawaja̧ yöawinobe Gadma, ja̧danö David omudawö ujunobö yöawinobe: —Baikwö yöawobe Isabenö Jo̧ma: –Ökwöda lȩtebakwa̧ omudawö kwujujunobö jo̧be, bi̧ya lȩtebakwa̧ jawatjö, di̧ya lȩtebakwa̧da?

¹² Wapötakwa o̧biya baledibanö a̧wi̧chi̧ tjöoböö̧kö̧, wamedukwa ja̧wo̧dö baledibanö kwöpöjojodö ökwödönö lubö tjujuluwoböö̧kö̧, wapötakwa möle baledibanö jojodö tjö'wöchobö ötjö Isabenö Jo̧ wetoböö̧kö̧, –jö̧ba̧lö. Ökwöda omukwatö yöbawitjö, ötjönö webinanö ȩwa̧bijö chatadakobetjö̧, —jö̧ba̧lö yöawinobe Gadma.

¹³ Yöawökwe, Davidma Gadnö atadinobe, —Jwiinö cho̧'wo tjo̧acha, isabenö waiya omudawö chujunobö. Jo̧kwaijayonö, Isabenö Jo̧nö chöwaisa, jo̧bama inesö lȩlöjinö edo̧, jö̧ba̧lö. Jo̧kwajabetjö̧ bö̧jȩ jojodö ötjönö lȩtjebobö omudawö chujunökö, Isabenö Jo̧ Diosda wapötakwa möle baledibanö dö'wöchinö ökwödönö lȩebobö omudawö chujuna, jo̧bama inesö lȩlöjinö edo̧ jö̧ba̧lö chöwaisobetjö̧, —jö̧ba̧lö atadinobe Davidma, Gadnö.

¹⁴ Jejenö atadökwe, Isabenö Jo̧ma israel niji ba̧kwemeachibanö jojodö tjö'wöchobö weinobe. Ja̧danö, tjö'wöchi̧tjö̧ israel jojodö setenta milbedö ö'wö batjibinobe.

¹⁵ Ja̧danö, Diosma kwabawö lobo̧ angelnö weinobe Jerusalen comunidadbe i̧'yobö, Jerusalen comunidadnö ju̧kwadönöbi kwabawö loobö. Jo̧kwaijayonö, Jerusalenbe ichibö, jojodö tjö'wöchinö kwabawö loobö ichibenama, Isabenö Jo̧ma lȩlöinö edö, kwabawö lobo̧ angel kaatakwawobö weinobe, —Tjo̧wita, kwabawö lobö kabatakwawi, —jö̧ba̧lö. Ja̧danö jejenö weenama, Isabenö Jo̧ weökwe angelma jebuseo jojo Arauna eju, trigo sula'wo chabö loawejunö ö̧jinobe.

¹⁶ Ja̧danö, Jerusalennö ja̧nö, Davidma möakwö edinobe, ja̧danö Isabenö Jo̧ weökwe angelnö edinobe, mölejebi, bö̧jebi ö'wejenö jo̧nö. Angelma ömamunö kwölöte'o do̧ba̧lö, Jerusalen comunidad wame debatö ö̧jinobe, ja̧danö jobe ö̧ji̧ edö, Davidbi ju'wedö Jerusalen comunidad luwedöbi kamijido̧ epju̧yunö kalukaa̧do̧ 'dubawö, tjo̧'wo tjoachö tjöba nijakwö tjö̧bamatinobe.

¹⁷ Ja̧danö, kwabawö lobo̧ angelnö edajo̧, Davidma Isabenö Jo̧nö aebinobe, —Chuluwo̧ Isabenö Jo̧, ötjödasa jojodönö tjö̧ba̧ja̧dobö webinasa̧, jö̧tö? Ötjödasa sulabenö ja̧binama chuluwo̧, ötjönöda lȩkebobö jo̧be. Jau chuluwo̧, chömöayedö israel jojodöma, sulabenö ja̧böködö obejadödanö ichejekwadö, jobadöma sulabenö ja̧tjinokobe. Ötjödasa sulabenö ja̧binama chuluwo̧ Isabenö Jo̧ Dios, jo̧kwajabetjö̧ atebakwö, ötjönöda, ja̧danö yöne chömöledönöda lȩkebobö, ju'wedö israel jojodönö lȩbebökönö, —jö̧ba̧lö aebinobe Davidma.

¹⁸ Aebökwe, Isabenö Jo̧ weökwe angelma Dios yöawi̧ yöbawo̧ Gadnö weinobe, David ö̧jobekwö 'ya̧nö weobö: —Jebuseo jojo Arauna mikwo̧ trigo sula'wo chabö loawejube nöchö, jobetjö Diosnö iyawöte otidö, kwabö juwö kwiyo Isabenö Jo̧nö, —jö̧ba̧lö.

¹⁹ Ja̧danö jobekwö Isabenö Jo̧ iteda yöawi̧ Gadnötjö yöawökwe, weaja̧danö Davidma Arauna ejube önöchinobe ömöayedökwö.

²⁰ Ja̧ baledonö, Araunama iteda itji̧mu ö'wejemubedökwö trigo sula'wo jawa chabö lobö otidinobe, ja̧danö chabö loemi ja'ötjö, jalachibö ökömakwö edinobe kwabawö lobo̧ angelnö. Ja̧danö jobekwö edö, Arauna itji̧muma dötjibajinobe, ja̧danö tju̧ju̧kwawinobe.

²¹ Ja̧danö David Arauna ejube ichibonö, Araunama Davidnö edinobe. Ja̧danö edajo̧ Araunama chabö loawejutjö labebö, öba nijakwö David öba a'o bȩbachibö ösödinobe, chuluwo̧ja jö̧ba̧lö.

²² Ja̧danö Davidma Araunanö yöa̧linobe: —Kweju chabö loaweju kwiyotjö, jobetjö Isabenö Jo̧nö iyawöte chotidakobetjö̧. Jau, mikwanö, ile seökönö, isabenö mikwawi̧danö kwiyobö wetakwö, ja̧danö jobetjö kwabö juwö chiyocha Isabenö Jo̧nö, jojodö tjö'wöchi̧nö lȩebi̧ma kaatakwawakobetjö̧, —jö̧ba̧lö yöa̧linobe Davidma.

²³ Yöa̧lökwe, Araunama Davidnö atadinobe, —Chuluwo̧ la'aka luwo̧, okobe jwiinö kwösödi̧ma, mikwa jwiinö emö Diosnö kwiyo. Bidö chajwimu pa̧kayadönö kwemo, jwiinö ubinö iyawa baibanö kwabö juwö kwiyobö, ja̧danö towi ötebiya trigo jawa otikwötebi, pa̧ka̧yadö töawa jawa okwi'ijubi kwemo, imi baibanö kwujuwobö. Jau chuluwo̧, okobe jwiinö bi̧ya jawama, chiyakwö, —jö̧ba̧lö atadinobe Araunama.

²⁴ Jo̧kwaijayonö, atadökwe David yöa̧linobe, —Mikwa jwiinöma chemökö, isabenö mikwawi̧ ba̧jekwachinö midö chemobö chösöda. Jau, ökwöda kwitea 'döbebö chiyökakwo̧sa Isabenö Jo̧nö, ja̧danö mikwa jwiinö chemaja̧ jawama, Chuluwo̧ Isabenö Jo̧ Diosnö chiyökakwo̧sa. Diosnö chiyakwa̧ jwiinö ubinö chiyakwa̧ma, midö chemaja̧ jawada chiyobö chösöda, —jö̧ba̧lö yöa̧linobe Davidma.

²⁵ Ja̧danö yöba̧lajo̧, oro ö̧pibiya nönö imidinobe Araunanö, seiscientios oro ö̧pibiyama. Ja̧danö jobekwö midö, Arauna eju niji midö eminobe Davidma.

²⁶ Ja̧danö, emajo̧, Davidma jobetjö iyawöte otidinobe, ja̧danö Isabenö Jo̧nö jwiinö ubinö iyawabi, jojodö bakobe Dioskwö ösökwö ja̧kwawa jawa iyawabi jobetjö juwö iyinobe. Jejenö iyö, Isabenö Jo̧nö aebinobe, israel jojodönö lȩlöjinö edobö, ja̧danö a̧ebökwe, Isabenö Jo̧ma mölejebetjö ökwöla weinobe iyawötenö meinö, —Akebaja̧ cha̧ja̧kwajabe, —jö̧ba̧lö.

²⁷ Ja̧danö Isabenö Jo̧ma kwabawö lobo̧ angelnö weinobe, ja̧danö weökwe, kwölöte'o anawatjo okwa yutebö aninobe, tjowita, jö̧ba̧lö.

²⁸ Jobekwö baledi̧ edö öwaisachibinobe Davidma, —Isabenö Jo̧ma atebi̧ a̧ja̧kwajabe, —jö̧ba̧lö. Ja̧danö Isabenö Jo̧nö ösödö, jobe Arauna chabö loawejutjö kwabö juwö iyinobe.

²⁹ Ja̧ möle Moises jojodö deobetjö otidineju, Isabenö Jo̧ eju sabana'wotjö otikwejubi, jwiinö ubinö iyawapjobi Jerusalen comunidadnö ji̧nokobe. Ja̧ möle ja̧ Dios eju jawama Diosnö iyawemi möemi Gabaontjö ji̧nobe,

³⁰ jo̧kwaijayonö jobe i̧'yinokobe Davidma, jobetjö Diosnö aebakobetjö̧. Jau, Isabenö Jo̧ ömöayo̧ kwabawö lobo̧ kwölöte'onö do̧ba̧lo̧nö edenama, jwiinö yeaibinobe Davidma, ja̧danö ödöiökwe, Gabaonbe 'yö̧könö, jobe Arauna itea nijitjöda kwabö juwö iyinobe Diosnö.