1 Crónicas 20 - Dios Iwene

Israel jojodö Amonitas jojodönö tjujuluwina jawa

¹ Imiame baledaja̧ ikenama, la'aka luwedöma ba̧kwelöjatebö ölakwabikwawö labebajitjobe, ja̧danö ölakwabikwawö latjebobö baibenama, David ömöayedö ölakwabikwawa jojodötjö la'aka luwo̧ Joabma ju'wedö David ömöayedö ölakwabikwawa jojodönö öbibö i̧'yinobe, amonitas jojodönö tjujuluwobö. Jobekwö 'ya̧jadö, amonitas jojodö tjitebo ba̧kwemeachibanö ölakwabikwawö tjujuluwinobe, ja̧danö tjitebo inesö comunidad Raba comunidadbe ichibö tjötjösawinobe, jobe tjöbebö ju̧kwadönöbi tjujuluwobö. Jo̧kwaijayonö, ömöayedö jejenö amonitas jojodönö tjölakwabikwawonö, Davidma okobe Jerusalennö ö̧jibinobe. Ja̧danö, Raba comunidad jojodökwö ölakwabikwawö ujuluwinobe Joabma, ja̧danö tjitebo comunidad söbebö loinobe.

² Ja̧danö, ömöayedö jobekwö ölakwabikwawö tjujuluwiökwe, la'aka luwo̧ Davidma Raba comunidadbe i̧'yinobe, ja̧danö amonitas jojodö inesö la'aka tjuluwo̧ ubutjawaka 'döebinobe. Jemi ikenama ja̧ka Davidda uunö tjubutjatinobe, amonita jojodö tjuluwo̧ma Davidda jö̧ba̧lö. Jakama isabenö ömökaka ji̧nobe, nönö tjedenama, treinta cuatro kilo jenanö ömökaka badedö tjöninobe, orotjöbi, nöinö mikwawi̧ inawiyatjöbi otikwakama. Ja̧danö, ju'wibi, comunidad juluwajo̧, nöinö tjitea eminobe, yelösöda.

³ Ja̧danö, okobe deinö Raba comunidad jojodönö iteda ömöayedö batjibanö ujuninobe, ja̧danö 'diinö tjotidobö weinobe. Towi ötebiya löawakakwöbi, picokwöbi, o̧tomo'akwöbi, 'diinö tjotidobö weinobe. Jejenö weinobe Davidma, amonita jojodö tjitebo ba̧kwemeachibanö, tjitebo comunidadkwena ju̧kwadönö. Ja̧danö, amonita jojodönö juluwajo̧, Davidbi, okobe deinö ömöayedö ölakwabikwawa jojodöbi Jerusalenbe tjȩwa̧jinobe.

Filisteo jodötjö ödöbaedönö David ujuluwina jawa

⁴ Ja̧danö, jemi tupakwö yemidanö filisteo jojodökwö tjölakwabikwawinobe, Gezer comunidadtjö. Ja̧danö jobetjö David ömöayo̧ jusatita jojo Sibecay mikwo̧ma, inesö ödöbaedö tjitjimu tupadanö jojo Saf mikwo̧nö kwabö loinobe. Ja̧danö, jobekwö Filisteo jojodö Gezer comunidadnö ju̧kwadönö tjujuluwinobe.

⁵ Ja̧danö yemidanö filisteo jojodökwö tjölakwabikwawinobe. Jair itji̧ Eljanan mikwo̧ma, Gat jojo Goliatmine öjawo̧ Lahmi mikwo̧nö kwabö loinobe. Jo̧ba Goliat öjawo̧bi inesö nöbo̧ ö̧jinobe, ja̧danö jwiinö nööte otokwöte kweatinobe, okwi'o böidanö nööte kweatinobe.

⁶ Ja̧danö yemidanö filisteo jojodökwö tjölakwabikwawinobe, Gat comunidadtjö, ja̧danö jobetjö bakwo̧ inesö nöbo̧, inesö ödöbaedö tjitji̧ tupadanö jojoma jobadökwö ölakwabikwawinobe. Jo̧bama ömamukwenabi, ömasapakwenabi ötö'iya jelemutjö bakwö'a ujuna̧linobe, okobe jwiinö ötö'iyama veintecuatro baibanö.

⁷ Jo̧bama israel jojodönö obö, juluwöködöja jö̧ba̧lö obö yöa̧linobe, ja̧danö jejenö oiökwe, David öpöe Sima itji̧ Jonatan mikwo̧ma, jo̧banö kwabö loinobe.

⁸ Jobadö ödöbaedöma, damötjö jinadö ödöbaedö tji̧tji̧mu tupadanö jojodö tjö̧jinobe Gat comunidadnö, ja̧danö Davidbi, ömöayedöbi, jobadönö kwabawö lotjinobe.