1 Crónicas 19 - Dios Iwene

David amonitas jojodönö ujuluwina jawa

¹ Jemi ikena, ju'wi möle amonitas jojodötjö inesö la'aka luwo̧ Najas mikwo̧ma ö'wö baibinobe, ja̧danö jo̧ba ö̧binemi, itji̧ Janun mikwo̧ma amonitas jojodötjö la'aka tjuluwo̧ baibanö ö̧binobe.

² Ja̧danö, jejenö balediökwe, Davidma omukwatinobe, —Janun abe'do Najasma isabenö otiwanö chömöledöso̧danö ja̧nö, dösölöjinö pjaatinobe ötjönö, jo̧kwajabetjö̧ balekwa mikwa jo̧ba itji̧ Janunnö dösölö̧jinö pjatato, —jö̧ba̧lö. Jejenö omukwatö, Davidma ömöayedönö weinobe, Janun o̧'wo ösöwachibobö yöbawadönö, —Israel niji̧ la'aka luwo̧ Davidma ömöledöso̧ kwabe'donö omukwatö o̧'wo tjo̧achobe, —jö̧ba̧lö yötjawobö. Jo̧kwaijayonö, weawö̧, Janun o̧'wo ösöwachibanö pjatjatobö amonitas tjitebonö tjichibenama, wene baibinobe, baikwö:

³ David ömöayedö tjichibiawö̧, Janun ömöayedötjö luwedöma Janunnö yötja̧linobe, —Kwedemi kwabe'donö ösödö, sule jo̧banö otiwanö omukwati̧ i̧sebotö jö̧ba̧lö weinenaji̧ Davidma? Ja̧maökö duluwo̧, dedemi ökwödönö suli̧ tjöwaedotö jö̧ba̧lö ditebobe tjichajena, ditebo comunidad otiwanö edö, ökwödönö tjujuluwakwa̧ tjöwaisachibobö, —jö̧ba̧lö yötja̧linobe Janunnö.

⁴ Jejenö yötja̧liökwe, yötja̧li̧ ösödinobe Janunma, jo̧kwajabetjö̧ David ömöayedönö do̧batö, taba lö̧jinö ja̧inobe jobadönö. Jobadönö do̧batajo̧, tjaasa'ye jwobö loinobe, ja̧danö tjökamiji̧do̧ ja'ö tjoto'o wamenö 'wibö loinobe, tjoto'o öwawinö kwetjachobö. Ja̧danö, jejenö taba lö̧jinö ja̧ajawö̧, tjȩwa̧jobö weinobe.

⁵ Jejenö ja̧iawö̧, jwiinö tabakwö ja̧nö tjȩwa̧jinobe David ömöayedöma. Ja̧danö, Davidma a̧ja̧kwinobe baledaja̧ wenema, jo̧kwajabetjö̧ ömöayedönö yöbawadönö weinobe, yötjawobö: —Juluwanöma Jerusalenbe kwȩwa̧jaduwoko, ja'yubenö ditebo comunidad Jericonö kwiteada̧laduwo, kwaasa'yeduwi yemidanö pokwenanö baibanö. Ikenama taba jwiinö baikwö kwȩwa̧jaduwo, —jö̧ba̧lö weinobe la'aka luwo̧ Davidma.

⁶ Amonitas jojodöma tjöwaisachibinobe, —Ayö, ömöayedönö sulabenö ja̧diökwe, Davidma jwiinö ökwödönö öpöjödachibajabe, ökwödönö lȩbebö ölakwabikwawö ichakobe, —jö̧ba̧lö. Jejenö omukwatö, tjitea baladatjö treinta y cuatro mil kilo jenanö plata jawa wetjinobe, ju'wedö pjatjatakwedö ölakwabikwawa jojodönö tjimidobö. Siria jojodötjö luwedönö, Aram-naharaim la'aka luwo̧nöbi, Aram-maaca la'aka luwo̧nöbi, Soba la'aka luwo̧nöbi tjimidinobe, tjömöayedö ölakwabikwawa jojodö öbibö tjichobö.

⁷ Jobadötjö treinta y dos mil kolukiyabi, kolukiyanö ölakwabikwawadöbi ichö pjatjatobö tjimidinobe, ja̧danö ju'wibi Maaca comunidad la'aka luwo̧nöbi tjimidinobe, ömöayedö ölakwabikwawa jojodönö öbibö pjaatobö. Jobekwö tjimidajawö̧, Amonitas jojodö tjitebobe tji̧'yinobe, ja̧danö Medeba comunidad badeibö tjabakwemi tjujuninobe. Ja̧danö ju'wibi Amonitas jojodötjö la'aka luwo̧ Janunma iteda ömöayedönöbi o̧ko̧ko̧dinobe, ja̧danö jobadöbi tjölakwabikwawobö tjo̧ko̧kokwinobe.

⁸ Ja̧ wene a̧ja̧kwinobe Davidma, ja̧danö a̧ja̧kwajo̧, Joabnö weinobe, okobe deinö Joab ömöayedö ölakwabikwawa jojodö juluwadönö öbibö, jobadönö tjölakwabikwawobö.

⁹ Ja̧danö, amonitas tjitebo comunidad Rababe tjichibenama, amonitas jojodöma labebö, tjölakwabikwawöbo tjöjamatinobe, comunidad apjude badeibö. Jo̧kwaijayonö, jobadöma apjude badeibö tjölakwabikwawöbö tjö̧jonö, la'aka luwedö jelobetjö ichajadöma, israel jojodö tjökömanö mejenö tjiteada̧linobe tjömöayedökwö, tjölakwabikwawobö.

¹⁰ Jejenö balediökwe, Joabma öwaisachibinobe, —Ayö, amonitas jojodökwö dölakwabikwawonö, bakobe dökömakwö ju̧kwadö siria jojodönöbi dölakwabikwawobö ja̧kobe, —jö̧ba̧lö. Jo̧kwajabetjö̧ israel jojodötjö inesö juluwadönö omudawö ujuninobe, jo̧bakwö ja̧nö, siria jojodökwö tjölakwabikwawobö,

¹¹ ja̧danö ju'wedönö öjawo̧ Abisai ömöayedö ja̧nö, amonitas jojodönö tjölakwabikwawobö ujuninobe.

¹² Ja̧danö, jejenö 'da̧batö junajo̧, Abisainö yöa̧linobe, —Dölakwabikwawonö, siria jojodö tjujuluwitjö̧ma, ökwödönö pjabatö kwichaduwo dujuluwobö, ja̧danö amonitas jojodökwö kwölakwabikwawonö tjujuluwitjö̧ma, ökwödöma pjabatö dichakobe.

¹³ Dujuluwachibanö ja̧nö dölakwabikwawo, ditebo jojodönöbi, duluwo̧ Dios itebo israel comunidadteniabi, tjöbeba̧lö dö̧jakobetjö̧. Ja̧danö, Isabenö Jo̧nö ateba, iteda ösödö omukwati̧danö baledobö weakobetjö̧.

¹⁴ Jejenö yöba̧lajo̧, Joabma ömöayedönö öibinobe siria jojodö tjö̧jobekwö, ja̧danö jobadönö mebibö tjölakwabikwawinobe. Jejenö ölakwabikwawö, Joabma siria jojodönö ujuluwinobe, ja̧danö ujuluwiawö̧, öba a'otjö dötjibajinobe.

¹⁵ Ja̧danö, dötjibajobe edö, amonitas jojodöbi Joab öjawo̧ Abisai öba a'otjö dötjibajinobe, ja̧danö döbibajö, comunidad okwa tetjachinobe. Jemi ikenama Joabma Jerusalenbe ȩwa̧jinobe.

David siria jojodönö ujuluwina jawa

¹⁶ Ja̧danö, siria niji la'aka luwedöma tjedinobe, —Ayö, israel jojodöma dömöayedö ölakwabikwawa jojodö wedinawö̧nö tjujuluwajabetija, —jö̧ba̧lö. Jo̧kwajabetjö̧, yöbawadönö webö, Eufrates mikwödötjö bakwachödö ju̧kwadö siria ölakwabikwawa jojodönö ko̧ko̧dö tjichejebinobe, israel jojodönö tjujuluwobö. Ja̧danö, Siria la'aka luwo̧ Hadad Ezer ömöayedö ölakwabikwawa jojodötjö la'aka luwo̧ Sobacma, tjo̧ko̧kodajawönö öbibö i̧'yinobe.

¹⁷ Jejenö balediökwe, Davidma ja̧ yötjawi̧ wene a̧ja̧kwinobe. Jo̧kwajabetjö̧, Davidma okobe deinö israel jojodötjö ölakwabikwawa jojodönö ko̧ko̧dö, Jordan mikwödö pebibö tjö̧jobekwö i̧'yinobe. Ichibajo̧, ömöayedö ölakwabikwawa jojodönö ö'wiyanö tjö̧jamatobö weinobe, otiwanö siria jojodökwö tjölakwabikwawobö. Ja̧danö, Davidma jobekwö ömöayedö tjölakwabikwawakwa̧ jawa weiawö̧, Siria jojodöma jo̧bakwö tjölakwabikwawinobe.

¹⁸ Jo̧kwaijayonö Davidma jobadönö ujuluwinobe, ja̧danö David öba a'otjö dötjibajinobe. David ömöayedö ölakwabikwawa jojodöma ba̧jekwadö siria jojodönö kwabawö lotjinobe, kolukiyanö kwebachadönö, siete milbedö kolukiyanö ölakwabikwawadönö kwabö lotjinobe, ja̧danö ju'wedö siria ölakwabikwawa jojodönö cuarenta milbedönö kwabawö lotjinobe, ja̧danö ju'wibi ölakwabikwawa luwo̧ Sobac mikwo̧nöbi jobetjö kwabö lotjinobe.

¹⁹ Jejenö balediawö̧, siria niji la'aka luwedö, ajayinö Hadad Ezer mikwo̧ ömöayedöbinadöma tjedinobe, israel jojodöma ökwödönö tjujuluwajabe jö̧ba̧lö. Jo̧kwajabetjö̧ tjo̧wita jö̧ba̧lö, israelkwö ölakwabikwawa katjatakwawakwa̧ wene yöbawö tjujuninobe Davidnö, kwömöayedö badibakwedösa jö̧ba̧lö. Ja̧danö, jemi tupakwö amonita jojodönö pjatjatinokobe siria jojodöma, israel jojodönö yetjabobetjö̧.