1 Crónicas 17 - Dios Iwene

Dios Davidnö yöbawö ujunina jawa, isabenö otiwanö ökwönö pjatatakwo̧sa jö̧ba̧lö

¹ Jemi ikenama, Davidma ida̧ökö wene jwiinö iteda eju otiwejunö ö̧jenama, Davidma omukwatö yöa̧linobe Dios yöawi̧ yöbawo̧ Natan mikwo̧nö: —Natan, ötjöma beju otiweju, cedro towi ötebiyatjö otikwejunö otiwanö chö̧jobe, ¿jö̧tö? Jau, otiwejunö chö̧jobe, jo̧kwaijayonö otiwejunö chö̧jonö, Chuluwo̧ Isabenö Jo̧ iteapjoma otiwejunö jo̧kobe, löwötenöda, sabana'wotjö otikwejunöda jo̧be Chuluwo̧ iteapjoma. Chedemi sula, ötjö otiwejunö chö̧jonö, chuluwo̧ iteapjo sulabejunöda jo̧böma, —jö̧ba̧lö yöa̧linobe Davidma Natannö.

² Yöa̧lökwe, Natanma atadinobe, —Isabenö Jo̧ma ökwökwö ja̧nö pjabato̧ chuluwo̧ David, jo̧kwajabetjö chedemi otiwanö kwomukwati̧danö Dios iteapjo eju kwotido, —jö̧ba̧lö atadinobe.

³ Jo̧kwaijayonö, o̧do otidobö otiwa jö̧ba̧lö Natan omukwatijayonö, i̧yada yö̧teda Diosma iteda yöawi̧ yöawinobe Natannö, Davidnö yöawobö, baikwö:

⁴ —Natan, chömöayo̧ Davidnö yökawobö wetakwö, –Ötjöda cheju otidakwo̧ma ökwödamaökö David.

⁵ Jau David, chömöledö israel jojodönö egipto nijitjö ötibinemi baikwöma, la'akatjöda otiweju 'diejunö chö̧jijökötö, ba̧kwelöjatebö sabana'wotjö otikwejunöda ja̧nö pjolachö jelobetenia kwetachijatö israel jojodökwö.

⁶ Ja̧danö niji bakwemeachibanö israel jojodökwö kwetachonö, ba̧kwelöjatebö israel jojodönö jwebebadönö webiachijatö, chömöledö israel jojodönö tjiteada̧lobö, jö̧tö? Jobadö teada̧ladötjö bakwo̧nöbi wetinaji̧, O̧do cedro ötebiyatjö otikweju kwotido, chö̧jobö jö̧ba̧löma? Wetijökötö David, –jö̧ba̧lö yötawaja̧ Davidnö yökawo, —jö̧ba̧lö yöawinobe Diosma, Natannö.

⁷ Tupakwö yöawinobe Diosma, Natan Davidnö yöawakwa̧ma: —Jo̧kwajabetjö̧, baikwö yökawo chömöayo̧ Davidnö: –David, baikwö yöawobe Isabenö Jo̧ Okobe Jwiinö Juluwo̧ Diosma ökwönö, Ayayinöma mejenö ja̧nö, obejadönö teada̧lö kwö̧jijatö, jö̧tö? Jo̧kwaijayonö jobe mejetjö ökwönö omudawö chemijatö, ja̧danö emajo̧, ökwönö chujunijatö, chömöledö israel jojodötjö inesö la'aka tjuluwo̧ bakibanö.

⁸ Ja̧danö okobe jwiinö kwekachi̧teniama, ökwökwö ja̧nö pjatatijatö, ja̧danö okobe deinö kwöpöjojodönö kwöba a'otjö söbebö lotijatö. Ja̧danö jemi tupakwö isabenö pjatatocha ökwönö, okobe deinö kwimi a̧ja̧kwö tjöwaisobö. Jau David, bö̧jȩtjö inesö juluwadö tji̧mibiya tja̧ja̧kwi̧danö, okobe deinö ökwönöbi tja̧ja̧kwobö ja̧takwo̧sa, -Davidma isabenö juluwo̧tö, -jö̧ba̧lö.

^9-10 Ja̧danö ju'wibi chömöledö israel jojodö otiwanö tjö̧jobö pjatatocha, jobe wene jwiinö tjöpöjojodökwö ölakwabikwawökönö tjö̧jobö. Jau David, ajayinö chömöledö israel jojodönö teada̧ladönö chujuninemitjö baikwöma, kabatökönö tjöpöjojodö labidöma suli̧ waedö tjölakwabikwawinobe, jo̧kwaijayonö tjöpöjojodönö chujuluwakwo̧sa, otiwanö wene jwiinö tjitebonö tjö̧jobö pjatatocha. Ja̧danö jemi tupakwöbi yötawobe ötjö Isabenö Jo̧ ökwönö pjatatakwa̧ma: Ökwö David la'aka luwo̧ kwö̧bemi kwi̧tji̧mu tupadanö jojodöbi la'aka luwedö tjö̧bobö pjatatocha Ötjö Isabenö Jo̧ma.

¹¹ Jau David, pöe babibajo̧, kwa'dödökwö bakibanö ö'wö bakibakwo̧ja, jo̧kwaijayonö ökwöda a̧dekwanö kwitji̧mutjö bakwo̧nö chujunocha, israel jojodö inesö la'aka tjuluwo̧ baibanö, ja̧danö otiwanö ujuluwachibanö pjatatocha wene jwiinö la'aka luwo̧ ö̧jobö.

¹² Jo̧bada cheju otidakwo̧ma, ötjö Isabenö Jo̧ cheju baibanöma. Ja̧danö jo̧ba itji̧mu tupadanö jojodötjö chujunocha, ba̧kwelöjatebö israel jojodö la'aka tjuluwedö tjö̧jobö.

¹³ Jo̧ba kwitji̧ma, ötjö chitji̧ ö̧jakobe, ja̧danö jo̧ba abe'do chö̧jakwo̧sa. Ja̧danö, la'akatjöda le'dedö lötökakwo̧ kwitji̧nöma, damötjö ökwötjö ajayinö ji̧na Saulminenö le'dedö lotinadanöma, ba̧kwelöjatebö jo̧banö ile nibebö chö̧jakwo̧sa.

¹⁴ Jau David, jo̧ba kwitji̧nöbi, itji̧mu tupadanö jojodönöbi chujunocha, ba̧kwelöjatebö chöba a'o janö, bakwo̧nökwena israel jojodö la'aka tjuluwo̧ tjö̧jobö, ja̧danö kwitji̧mu tupadanö jojodötjö ba̧kwelöjatebö 'dö̧bibajökönö israel la'aka luwo̧ tjö̧jakwedö, —jö̧ba̧lö yöawinobe Isabenö Jo̧ma Natannö, Davidnö yöawobö.

¹⁵ Ja̧danö, jejenö i̧'wididanö yöawajökwe, Natanma okobe jwiinö yöawaja̧danö yöawinobe Davidnö.

David Diosnö ösödö aebina jawa

¹⁶ Jejenö yöawiökwe, la'aka luwo̧ Davidma Dios iteapjo eju okwa tebachö, Isabenö Jo̧ öba a'o öbamatinobe. Ja̧danö, bamatajo̧, yöa̧linobe, —Chuluwo̧ Isabenö Jo̧ Dios, ötjöma mikwawö̧kö̧sa, ja̧danö chömöledöma mikwawöködö, ida̧ökö pjakataja̧danö pjakatoböma. Isabenö pjakato jö̧ka̧li̧tjö jwiinö bajalekwönönö pjakatajabe ida̧ökö chuluwo̧.

¹⁷ Jo̧kwaijayonö, ida̧ökö nöinö pjakatajayonö, –Ja'yubeda pjatatajabe, –jö̧ba̧lö, tupakwö nöinö pjakatakwa̧ wene yökawajabe. Jau Chuluwo̧ Dios, ötjönö pjakataja̧tjö̧ bajalekwönönö, ina tupakwö lekwe möle ötjö kwömöayo̧ chi̧tji̧mu tupadanö jojodönöbi pjakatakwa̧ wene yökawajabe Chuluwo̧. Isabenö otiwanö pjabato̧ja ötjönö chuluwo̧, bö̧jȩ jojodötjö inesö mikwawo̧ chö̧ji̧danö otiwanö pjakatajabe chuluwo̧ Isabenö Jo̧ Dios.

¹⁸ Ötjönöbi, chi̧tji̧mu tupadanö jojodönöbi otiwanö omukwatö, pjakatakwa̧ wene yöka̧li̧tjö, dakwö chatadakwajö? Isabenö otiwanö pjabato̧ja jö̧ba̧lö yöta̧laja̧tjö bajalekwönönö atadakwawama jwiobe. Jau chuluwo̧ Dios, kwöwaisökwesa ötjö kwömöayo̧nöma, mikwawö̧kö̧ chö̧ji̧ma.

¹⁹ Jo̧kwaijayonö ötjö kwömöayo̧nö pjabatö, ökwöda kwomajadenö kwomukwati̧danö, bi̧ya̧ inesö otiwi̧ma kwotidajabe, ja̧da̧nö döwaisachibobö kwi̧sebajabe.

²⁰ —Isabenö otiwo̧ja chuluwo̧ Isabenö Jo̧, ökwödanö jo̧ma, bakwo̧bi deobe, ja̧danö jelo̧ ökwödanö jojodö tjösödökwema deobe. Okobe deinö ju'wedö tjösödawö̧nö yötja̧li̧ da̧ja̧kwenama, bakwo̧nöbi ökwödajayo̧nö a̧ja̧kwajidokobe la'akatjöda chuluwo̧, ökwöda inesö otiwo̧ma.

²¹ Ja̧danö ökwö kwömöledö israel jojodöjayedöbi deobe bö̧jetjöma. Okobe deinö tjitebokwena jojodötjö, ökwö omudawö kwujuninawö̧ma, sule israel jojodöda. Jau chuluwo̧ Dios, bö̧jȩ ba̧kwemeachibanö ju̧kwadö usula tjemawijayonö, sule israel jojodöda usula emawö dö̧jiökwe, dö̧jobekwö 'ya̧nö, usula demawi̧tjö̧ ladebinö kwemijatö ja̧danö inesö juluwo̧ kwö̧ji̧ wene i̧sȩbö, ökwödönö otiwanö pjakatijatö, Diosma juluwo̧ jö̧ba̧lö tjöwaisachibanö. Jau chuluwo̧, egipto nijitjö kwömöledönö emajo̧, bemi nijinö ju̧kwinadö tjitebokwena jojodönö a'dewö loköbijatö, ökwödö kwömöledö israel jojodöda bemi nijinö dö̧jobö.

²² Ja̧danö ökwödö israel jojodönö 'da̧batö kwujunijatö, ba̧kwelöjatebö 'dö̧bibajökönö kwömöledö dö̧jobö. Ja̧danö ökwö Isabenö Jo̧da, ökwödö israel jojodö dösödökwe Dios bakibijatö chuluwo̧.

²³ Ja̧danö, babe atebakwö Chuluwo̧ Isabenö Jo̧. Isabenö otiwanö ökwödö israel jojodönö pjakatajabe, ja̧danö otiwanö ötjönöbi chi̧tji̧mu tupadanö jojodönöbi pjakatakwa̧ wene yökawajabe. Jejenö yöbawö kwujunaja̧danö ba̧kwelöjatebö badekwachinö pjakatobö atebakwö chuluwo̧, chi̧tji̧mu tupadanö jojodönö yöka̧laja̧danö pjakatobö atebakwö,

²⁴ Inesö otiwo̧ kwö̧ji̧ wene öwawakobetjö̧. Jau chuluwo̧, jejenö pjakatiawö̧, bö̧jȩ jojodöma ba̧kwelöjatebö ösödö yötja̧lakwedö, –Israel jojodö tjösödökwe Isabenö Jo̧ Okobe Jwiinö Juluwo̧ Diosma, israel jojodö tjuluwo̧ Dios, –jö̧ba̧lö. Ja̧danö pjakatawö̧, chi̧tji̧mu tupadanö jojodöma ba̧kwelöjatebö israel jojodö tjuluwedö ja̧nö kwöba a'o tjö̧jakwedö.

²⁵ —Jau chuluwo̧, jejenö pjakatoböma ateboko jö̧ta̧lajabe, jo̧kwaijayonö ökwö chuluwo̧ Diosma, ida̧ökö pjakatakwa̧ wene yökawajabe, chitji̧mu tupadanö jojodö luwedö tjö̧jakwa̧ wenema. Jo̧kwajabetjö̧, yökawaja̧ a̧ja̧kwö, ötjö kwömöayo̧ma chujuluwachibajabe chuluwo̧, ja̧danö kwöba a'otjö yöka̧laja̧danö, dösölö̧jinö edö pjakatobö atebakwö.

²⁶ Ja̧danö, baikwö yötawakwö chuluwo̧: Ökwö Isabenö Jo̧ma, isabenö Diosja, ja̧danö bi̧ya̧ inesö otiwi̧ma ötjö kwömöayo̧nö yöbawö kwujunajabe.

²⁷ Jau chuluwo̧, isabenö jejenö ötjönöbi chömöledönöbi pjakatobö kwösödajabeta, ba̧kwelöjatebö kwöba a'o israel jojodö tjuluwedö dö̧jakobetjö̧. Jau Chuluwo̧ Isabenö Jo̧, ökwöda ökwödönö pjakatajabe, ja̧danö pjakati̧tjö̧, ötjöbi chi̧tji̧mu tupadanö jojodöbi ba̧kwelöjatebö otiwanö pjakatawö̧ dö̧jakwedösa, —jö̧ba̧lö yöa̧linobe Davidma, Diosnö ösödö.