1 Crónicas 16 - Dios Iwene

¹ Ja̧danö, Jerusalen comunidadbe ichibajadö, Dios iteapjo tetjatinobe, ja̧danö David otidina sabana'wotjo otikweju okwa tjujuninobe. Jemi ikenama Dios öba a'otjö, jwiinö ubinö iyawa kwabö juwö tjiyinobe Diosnö, ja̧danö ju'wi Dioskwö ösökwö ja̧kwawa iyawabi kwabö juwö iyö tjukwinobe.

² Jemi ikenama, iyawa jawa kabatajadö, Davidma jojodö tjöba a'o ja̧nö, Isabenö Jo̧nö aebinobe, Israel jojodönö pjaatobö.

³ Ja̧danö ju'wibi, okobe deinö jobe ju̧kwadö Israel jojodönö ömadönöbi, ya̧dönöbi bakwo̧nökwena kwakwawa iyabinobe, pansapja̧ bakwapja̧bi, itebiyabi, ubatjö dalö isa'o baibanö tjotidinabi iyinobe, tjukwobö.

⁴ Ja̧danö, Isabenö Jo̧ iteapjo Jerusalen comunidadnö junajo̧, Davidma Levisaso jojodötjö ju'wedönö 'da̧batö ujuninobe, Isabenö Jo̧ iteapjo öba a'o jawa tjotidobö, tjo̧'wo ösöwachibanö Isabenö Jo̧nö ösödö yötja̧loböbi, —Otiwanö pjabato̧ja, Otiwo̧ja Duluwo̧, —jö̧ba̧lö Isabenö Jo̧nö tjösödoböbi. Jobekwö 'da̧batö ujuninawö̧ma bidö:

⁵ Asaf mikwo̧ ju'wedö ja̧ jawa otidadö tjuluwo̧ ö̧jinobe, ja̧danö Asafma cimbalos jawa pjeawa jojo ö̧jinobe. Ikena luwo̧ma Zacarias mikwo̧, ja̧danö jo̧ba ikenabedöma, Jeiel mikwo̧bi, Semiramot mikwo̧bi, Jehiel mikwo̧bi, Matatias mikwo̧bi, Eliab mikwo̧bi, Benaia mikwo̧bi, Obed edom mikwo̧bi, jelo̧ Jeiel mikwo̧bi. Jobadöma arpa jawabi, lira jawabi pjeawa jojodö tjö̧jinobe.

⁶ Ja̧danö Diostjö jojodötjö ö'weje pjabatadö Benaia mikwo̧bi, Jahaziel mikwo̧bi, Dios iteapjo wei̧ wȩyukwaba döbölataja a̧ja̧pjo öba a'o ja̧nö, ba̧kwelöjatebö trompeta pjubö tjö̧jinobe.

David Diosnö ösödö lo̧awa weina jawa

⁷ Ja̧danö, ja̧ möle Isabenö Jo̧nö ösödakwawa jawa lo̧awa wȩyudajo̧, Asafnöbi, ju'wedö ömöledönöbi weinobe Davidma, Isabenö Jo̧nö ösödö lo̧tjobö. Ja̧ lo̧awama baikwö laebobe:

⁸ Isabenö Jo̧nö dösödaduwo, —Duluwo̧ Isabenö Jo̧, otiwanö pjabato̧ja, —jö̧ba̧lö. Tjitebokwena jojodönö yödawaduwo, Isabenö Jo̧ otiwanö pjaataja̧ jawama.

⁹ Isabenö Jo̧nö lo̧daduwo, —Otiwo̧ja, —jö̧ba̧lö lo̧daduwonö. Iteda ujulu i̧sȩbina, jojodö edajitjökö jawa i̧sȩbinama yödawaduwo.

¹⁰ Isabenö Jo̧ ömöledö dö̧jobetjö̧, do̧'wo ösöwachibanö yöda̧laduwo, —Otiwanö Isabenö Jo̧ ömöledösa, —jö̧ba̧lö. Okobe deinö Isabenö Jo̧nö isakwö ösödadöma, do̧'wo ösöwachibanö dö̧jaduwo.

¹¹ Isabenö Jo̧nö do̧'wo wa̧na̧lö dö̧jaduwo, —Duluwo̧ma isabenö juluwo̧, —jö̧ba̧lö. Ba̧kwelöjatebö Isabenö Jo̧ öba a'o dö̧jobö disakwaduwo.

¹² Do̧'wo jwibibökönö, inesö otiwa jawa otidina domukwatibaduwo. Iteda ujulu i̧sȩbö, döpöjojodönö lȩebina jawa domukwatibaduwo.

¹³ Jobekwö omukwatö Isabenö Jo̧nö dösödaduwo ökwödö Israel jojodö, Jacob itji̧mu tupadanö jojodö, iteda ömöledö badibanö Dios omudawö ujuninawö̧ma.

¹⁴ Jo̧ba Isabenö Jo̧ma, ökwödö israel jojodö dösödökwe Dios, ja̧danö bö̧jȩ ba̧kwemeachibanö webö jo̧ma, jo̧bada.

¹⁵ Isabenö Jo̧ma la'akatjöda iteda yöbawö ujunina wenema o̧'wo jwibibö̧kö̧, inesö lekwe mölȩ baibanö, tjö'dö̧dö̧ tjö̧'dö̧dö̧nö ba̧kwȩlöjatebö 'dö̧bibajökönö 'yatjebijayonö, tja'dödönö yöbawö ujunina wene ba̧kwelöjatebö omukwato̧ Isabenö Jo̧ma.

¹⁶ Jau chömöledö, Isabenö Jo̧ma da'dömine Abrahamnö yöbawö ujuninobe, ja̧danö itji̧ Isaacnöbi yemidanö yöbawö ujuninobe.

¹⁷ Da'dömine Jacobnöbi yemidanö 'diinö junö yöbawö ujuninobe, 'dö̧bibajökö ji̧ yöbawö junawa baibanö, ökwödö israel jojodönö,

¹⁸ —Kwiteboduwi baibanö Canaan niji chiyaduwakwawö̧ja, Canaan niji omudawadö bakibaduwanö, —jö̧ba̧lö.

¹⁹ Jobekwö yöbawö ujunenama, o̧bukwedöda tjö̧jinobe ökwödö israel jojodö da'dödöma, o̧bukwedöda jelobetjö ichajadö Canaannö tjö̧jenama, jobekwö yöbawö ujuninawö̧.

²⁰ Ja̧ möle a̧dekwanö tjitebo jwibadö ja̧nö, ju'wedö tjitebobebi, ju'wedö tjitebobebi kwebachö tjö̧jinobe, jelo̧ la'aka luwo̧ yöbawö ö̧jobekwöbi, jelo̧ yöbawö ö̧jobekwöbi.

²¹ Jo̧kwaijayonö, ju'wedö tjitebonö kwebachö tjö̧jinajayonö, jobe ju̧kwadö usula tjemawinö ja̧tjoböma weinokobe, la'aka luwedönö lȩbebö weinobe,

²² —Ötjöda chömöledö batjibanö omudawö chujuninawö̧nö sulabenö ja̧bökönaduwi, ötjöda yötawi̧ yöbawadönö suli̧ waedökönaduwi, —jö̧ba̧lö lȩbebö weinobe la'aka luwedönö.

²³ Bö̧jȩ ba̧kwemeachibanö ju̧kwadö Isabenö Jo̧nö ösödö lo̧daduwo. Mölekwena otiwanö pjaataja̧ wene yödawaduwo, —Isabenö Jo̧ma dö̧jibinö pjabato̧, —jö̧ba̧lö.

²⁴ Tjitebokwena jojodönö yödawaduwo, —Isabenö Jo̧ma dejatinö juluwo̧, —jö̧ba̧lö. Okobe deinö tjitebokwena jojodönö yödawaduwo, iteda ujulunö jojodö edajitjökö jawa i̧sȩbinama.

²⁵ Isabenö juluwo̧, duluwo̧ Isabenö Jo̧ Diosma. Isabenö mikwawo̧, —Juluwo̧ja, —jö̧ba̧lö jo̧banö dösödobö. Jau, okobe deinö ju'wedö tjösödawö̧tjö bajalekwönönö, yebabinö omukwatö dösödo jö̧da̧lökwema Isabenö Jo̧ Diosda.

²⁶ Isabenö mikwawöködö ju'wedö tjösödawö̧ma, sule o̧'wo jawadatjobetjö̧. Jo̧kwaijayonö dösödökwe Isabenö Jo̧ma, mölȩjȩ otidina, isabenö mikwawo̧ jo̧bama.

²⁷ Isabenö dejatinö juluwo̧, ja̧danö isabenö la'aka luwo̧bo̧ dösödökwe Isabenö Jo̧ma, iteda ö̧jelö inesö juluwi̧ i̧sȩbo̧, ja̧danö tjo̧'wo ösöwachibanö pjabato̧.

²⁸ Isabenö Jo̧ ujulu yökawaduwo ö̧kwödö tjitebokwena jojodöma, —Isabenö Jo̧ma dejatinö juluwo̧, —jö̧ba̧lö, jweinö yökawaduwo.

²⁹ Isabenö mikwawo̧ Isabenö Jo̧ Diosma, —Juluwo̧ja, —jö̧ba̧lö jo̧banö dösödobö. Jo̧kwajabetjö̧, —Juluwo̧ja, —jö̧ba̧lö, kwiyaduwakwa̧ ichejebö, öba a'o kwichibaduwo, dewinö dejato̧, suli̧tjö 'da̧bachibö jo̧ Isabenö Jo̧nö bȩbachibö kwösödaduwo.

³⁰ Jau, bö̧jȩ ba̧kwemeachibanö ju̧kwadö jo̧ba öba a'o yebabinö tjö̧bawö tjö̧jobö jo̧be, isabenö juluwo̧obetjö. Jau chömöledö, Isabenö Jo̧ Diosda bö̧jȩ 'diinö ujuninobetjö̧, 'diinö jo̧be bö̧jȩma, jelobekwö pjolachibökönö. Isabenö jobanö yebabinö domukwatobö jo̧be.

³¹ Mölȩjȩnö ju̧kwadöbi, bö̧jȩnö ju̧kwadöbi okobe deinö do̧'wo ösöwachibanö dö̧jaduwo. Do̧'wo ösöwachibanö tjitebokwena jojodönö yödawaduwo, —Isabenö Jo̧ma webö jo̧, —jö̧ba̧lö.

³² Jwaibalawabi, okobe deinö jwaibalawanö ju̧kwadöbi Isabenö Jo̧nö ösödö jwötjeba̧lo. Mejebi, okobe jwiinö mejenö ji̧bi o̧'wo ösöwachibanö ö̧jobö jo̧be.

³³ Tebonö ji̧ towibiyabi o̧'wo ösöwachibanö Isabenö Jo̧ öba a'otjö lo̧obö jo̧be. Jau, Isabenö Jo̧ma okobe deinö bö̧jȩnö ju̧kwadönö lȩekwa yöbawö ichakobe, jo̧kwajabetjö̧ okobe jwiinöbi, okobe deinöbi do̧'wo ösöwachibanö dö̧jobö jo̧be.

^34-35 Isabenö otiwo̧ duluwo̧ Isabenö Jo̧ma, isabenö otiwanö dö̧jibinö pjabato̧, ja̧danö ile nieba̧wö̧nö kabatibökönö, jwaikwöda ile nibebö jo̧. Jo̧kwajabetjö Isabenö Jo̧nö ösödö, —Otiwanö pjabato̧ja, —yöda̧lakwawaduwo chömöledö. Ja̧danö wene döbaledenama, jo̧banö adebaduwo, —Dö̧ji̧binö pjabato̧ Dios, dö̧jibinö pjakatobö adebakwö, tjitebokwena jojodö tjö̧'da̧de pjelekwachadö dö̧jelö, ökwödönö kwo̧ko̧ko̧dobö, ja̧danö ko̧ko̧dajo̧ ditebobe tjekatobö adebakwö. Jau duluwo̧, jobekwö pjakatobö adebakwö, pjakatajawö̧ do̧'wo ösöwachibanö ökwönö dösödakobetjö̧, –Isabenö Jo̧ma otiwanö dö̧jibinö pjaatajabe, –jö̧ba̧lö ökwönö dösödakobetjö̧, —jö̧ba̧lö Isabenö Jo̧nö adebaduwo.

³⁶ Isabenö Jo̧ ökwödö israel jojodö dösödökwe Diosma ba̧kwelöjatebö jo̧, ajayitjödabi, 'dö̧bibajökönöbi ba̧kwelöjatebö jo̧. Jo̧banö dösödaduwo chömöledö, —Otiwo̧ja duluwo̧, —jö̧ba̧lö, Levisaso jojodö lo̧tjobö weinobe Davidma. Ja̧danö lo̧tjaja̧ a̧ja̧kwajadö, okobe deinö jobe ju̧kwadö israel jojodöma ösödö yötja̧linobe, —Otiwa, Amen, —jö̧ba̧lö, ja̧danö Isabenö Jo̧nö tjösödinobe.

Jerusalentjöbi, Gabaontjöbi tjotidawakwena David weina jawa

³⁷ Ja̧danö, Davidma weinobe, Levisaso jojo Asafnöbi, ju'wedö ömöledönöbi ba̧kwelöjatebö Isabenö Jo̧ iteapjo öba a'o lo̧bö tjö̧jobö, otidineju sabana'wotjö otikwejunö, mölekwena tjotido jö̧tja̧lidanö tjotidakobetjö̧.

³⁸ Ja̧danö jobadökwö, Obed-edom mikwo̧nöbi, ju'wedö ömöledö sesenta y ochobedönö 'da̧batö ujuninobe, Asafkwö ja̧nö pjatjatobö. Ja̧danö, ju'wibi Jedutun itji̧ Obed-edom mikwo̧nöbi, Hosa mikwo̧nöbi 'da̧batö ujuninobe, apjude teada̧lakwawa jojodö batjibanö.

³⁹ Isabenö Jo̧ iteapjo ida̧ökö Jerusalen comunidadnö ji̧najayonö, Isabenö Jo̧ eju, Moises sabana'wotjö otidinejuma ina ju'wi comunidad, Gabaon comunidadnö ji̧nobe. Jo̧kwajabetjö̧ jobadö Jerusalennö ja̧nö tjotidonö, Davidma Diostjö jojodötjö ö'weje pjabato̧ Sadoc mikwo̧nö weinobe, ömöledö ö'weje pjabatadökwö, Isabenö Jo̧nö ösödakwawemi Gabaon comunidadnö ja̧nö, Isabenö Jo̧ ejutjö otidö tjö̧jobö.

⁴⁰ Ja̧danö, jobe ja̧nö, yȩayikwenabi, yi̧benakwenabi jwiinö ubinö iyawa jobe japjo iyawapjotjö kwabö juwö tjiyinobe, Isabenö Jo̧ weina wȩyukwa'ye, Israel jojodö ja̧bö tjö̧jobö weina'ye laebi̧danö.

⁴¹ Ju'wibi, Davidma Levisaso jojodö Heman mikwo̧nöbi, Jedutun mikwo̧nöbi, ju'wedö tjömöledönöbi 'da̧batö ujuninobe, Isabenö Jo̧nö ösödö, —Otiwanö pjabato̧ja, —jö̧ba̧lö lo̧bö tjö̧jobö. Isabenö Jo̧ma ile niebawönö kabatibökönö, 'dö̧bibajökönö ba̧kwelöjatebö ile nibebo̧ ö̧jobetjö̧, jobekwö ösödö lo̧tjobö ujuninobe.

⁴² Ja̧danö, jobekwö ujunajawö̧, Hemanbi, Jedutunbi Diosnö lo̧bö ösödakwawa jawa cimbalo jawabi pjebö, ja̧danö trompeta jawabi pjubö tjö̧jinobe. Ja̧danö, ju'wibi Jedutun itji̧munö 'da̧batö ujuninobe, Dios eju apjude teada̧lakwawa jojodö batjibanö.

⁴³ Jobekwö Dios eju jawabi, Dios iteapjo jawabi weinobe Davidma. Ikenama ja̧ jawa kabatajo̧, iteda ejube ȩwa̧jinobe Davidma, iteda yö̧ne ömöledönö Dios pjaatobö aebakobetjö̧.