1 Crónicas 15 - Dios Iwene

Dios iteapjo, wei̧ wȩyukwa öbiya döbölataja a̧ja̧pjo Jerusalenbe tjichejebakwa̧ abönö jawa

¹ Jerusalen comunidad, David itebo comunidad ötjabobe comunidadnö ja̧nö, iteda ejubiya otidinobe Davidma. Ja̧danö, ju'wibi Dios iteapjo wei̧ wȩyukwaba döbölataja a̧ja̧pjo ujunakwemi otidinobe, ja̧danö jobe o̧do sabana'wotjö otikweju otiweju otidinobe, jobe Dios iteapjo ujunakobetjö.

² Jemi ikenama, jobekwö otidajo̧, Davidma yöa̧linobe: —Levisaso jojodöda Dios iteapjo kwetjatobö jö̧ba̧ladö, ju'wedöma kwetjatoko, Levisaso jojodöda. Jau, Isabenö Jo̧ma jobadönöda 'da̧batö ujuninobe, ba̧kwelöjatebö iteda wei̧ jawa otidö tjö̧jobö, ja̧danö iteda iteapjo kwetjatobö. Jo̧kwajabetjö jobadöda Dios iteapjo kwebatö, baikwö tjichejebobö jo̧be, —jö̧ba̧lö.

³ Jemi ikenama, Davidma okobe deinö israel jojodönö jwöinobe, Jerusalen comunidadbe tjichobö, Isabenö Jo̧ iteapjoma, ida̧ökö otidö ujuninemi ichejebö tjujunakobetjö̧.

⁴ Ja̧danö, Diostjö jojodötjö ö'weje pjabatadö Aaron itji̧mu tupadanö jojodötjöbi, ju'wedö levisaso jojodötjöbi tjichobö jwöinawö̧ma bidö:

⁵ Levi itji̧ Coat itji̧mu tupadanö jojodötjö ciento veintebedönö jwöinobe. Jobadö Coat itji̧mu tupdadanö jojodötjö la'aka luwo̧ma, Uriel mikwo̧.

⁶ Levi itji̧ Merari itji̧mu tupadanö jojodötjö, doscientos veintebedönö jwöinobe. Ja̧danö jobadö Merari itji̧mu tupadanö jojodötjö la'aka luwo̧ma, Asaias mikwo̧.

⁷ Levi itji̧ Gerson itji̧mu tupadanö jojodötjö, ciento treintabedönö jwöinobe. Ja̧danö jobadö Gerson itji̧mu tupadanö jojodötjö la'aka luwo̧ma, Joel mikwo̧.

⁸ Levisaso jojodötjö Elizafan itji̧mu tupadanö jojodötjö, doscientosbedönö jwöinobe. Ja̧danö jobadö Elizafan itji̧mu tupadanö jojodötjö la'aka luwo̧ma, Semaias mikwo̧.

⁹ Levisaso jojodötjö Hebron itji̧mu tupadanö jojodötjö, ochentabedönö jwöinobe. Ja̧danö jobadö Hebron itji̧mu tupadanö jojodötjö la'aka luwo̧ma, Eliel mikwo̧

¹⁰ Levisaso jojodötjö Uziel itji̧mu tupadanö jojodötjö, doscientosbedönö jwöinobe. Ja̧danö jobadö Uziel itji̧mu tupadanö jojodötjö la'aka luwo̧ma, Aminadab mikwo̧.

¹¹ Ja̧danö Davidma Diostjö jojodötjö ö'weje pjabatadötjö Sadocnöbi, Abiatarnöbi, ju'wedö jwöinawö tjuluwedö Urielnöbi, Asaiasnöbi, Joelnöbi, Semaiasnöbi, Elielnöbi, Aminadabnöbi jwöinobe, öba a'o tjichibobö.

¹² Ja̧danö, ichibajadönö yöa̧linobe: —Ökwödödaja, Levisaso jojodötjö sasokwena luwedöma. Ja̧danö, ökwödö Levisaso jojodöma, Dios iteapjo kwekataduwakwedöja. Jo̧kwajabetjö̧, jobekwö wene jwiinö kwebatö, baikwö otidö chuninemi ichejebö kwujunaduwakobetjö̧, Dios öba a'o kwusuladuwi̧ dichawö loköbaduwobö jo̧be.

¹³ Jau chömöledö, ajayinö Dios iteapjo baikwö dichejebobö jö̧da̧linenama, ökwödö Levisaso jojodöma kwekatinaduwokobe, ja̧danö jobekwö sulabenö kwedatiökwe, duluwo̧ Isabenö Jo̧ Diosma ödameakwinobe ökwödönö, ja̧danö ökwödönö lȩebinobe. Jau, Dios weina, otiwanö iteapjo kweatakwawa jawa weina otiwanö da̧ja̧kwinokobetjö̧, ökwödönö ödameakwinobe, —jö̧ba̧lö weinobe Davidma Levisaso jojodötjö luwedönö.

¹⁴ Weawö̧, Diostjö jojodötjö ö'weje pjabatadöbi, ju'wedö Levisaso jojodöbi Dios öba a'otjö tjusula dichawö loawa jawa ja̧tjinobe, Isabenö Jo̧ Israel jojodö tjuluwo̧ Dios iteapjo otiwanö wene jwiinö Jerusalen comunidadbe tje'ewakobetjö̧.

¹⁵ Jemi ikenama, Isabenö Jo̧ ajayinö Moisesnö weinadanö, Levisaso jojodöma towi ö̧'iyanö kwetjatinobe Dios iteapjoma, tjöböbe'onö.

¹⁶ Ju'wibi Davidma Levisaso jojodötjö luwedönö weinobe, tjömöledö levisaso jojodötjö lo̧awa jawa otidadönö 'da̧batö tjujunobö. Jobekwö 'da̧batö tjujunobö weinobe, Dios iteapjo tjichejebonö, lo̧awa jawa arpabi, lirabi, cimbalosbi pjebö, labinö tjo̧'wo ösöwachibanö lo̧tjakobetjö̧.

¹⁷ Ja̧danö, jobekwö weawö̧, Levisaso jojodöma Joel itji̧ Heman mikwo̧nö omudawö tjujuninobe, ja̧ lo̧awa jawa öbibö lo̧bebo̧ baibanö. Ja̧danö Hemankwö, ju'wedö ömöledö levisaso jojodönöbi omudawö tjujuninobe, yöne pjabatadö batjibanö, bidö: Berequias itji̧ Asaf mikwo̧nöbi, Merarisaso jojo Cusaias itji̧ Etan mikwo̧nöbi.

¹⁸ Ja̧danö jobadönö pjabatadö batjibanö omudawö tjujuninawö̧ma, bidö: Zacarias mikwo̧bi, Jaaziel mikwo̧bi, Semiramot mikwo̧bi, Jehiel mikwo̧bi, Uni mikwo̧bi, Eliab mikwo̧bi, Benaia mikwo̧bi, Maaseias mikwo̧bi, Matatias mikwo̧bi, Elifelehu mikwo̧bi, Micnias mikwo̧bi, Dios eju apjude teada̧ladö Obed-edom mikwo̧bi, Jeiel mikwo̧bi.

¹⁹ Ja̧danö omudawö tjujuninawö̧ bakwo̧nökwena tjotidawakwena baikwö laebobe: Lo̧awa luwedö Heman mikwo̧bi, Asaf mikwo̧bi, Etan mikwo̧bi omudawö tjujuninawö̧, broncetjö otikwa cimbalos jawa pjetjobö.

²⁰ Ja̧danö Zacarias mikwo̧bi, Aziel mikwo̧bi, Semiramot mikwo̧bi, Jehiel mikwo̧bi, Uni mikwo̧bi, Eliab mikwo̧bi, Maaseias mikwo̧bi, Benaia mikwo̧bi omudawö tjujuninawö̧, arpa jawa pjetjobö.

²¹ Ja̧danö Matatias mikwo̧bi, Elifelehu mikwo̧bi, Micnias mikwo̧bi, Obed-edom mikwo̧bi, Jeiel mikwo̧bi Azazias mikwo̧bi omudawö tjujuninawö̧, liras jawa pjetjobö.

²² Ja̧danö Levisaso jojodötjö luwo̧ Quenanias mikwo̧ma, otiwanö lo̧awa öbibö lo̧ebakwawa waiso̧ ö̧jinobe, jo̧kwajabetjö̧ Quenaniasnö omudawö tjujuninobe, lo̧badönö öbibö lo̧ebobö.

²³ Ja̧danö Berequias mikwo̧bi, Elcana mikwo̧bi omudawö tjujuninawö̧, Dios iteapjo teada̧lakwawa jojodö batjibanö.

²⁴ Ja̧danö Diostjö jojodötjö ö'weje pjabatadö Sebanias mikwo̧bi, Josafat mikwo̧bi, Natanael mikwo̧bi, Amasai mikwo̧bi, Zacarias mikwo̧bi, Eliezer mikwo̧bi omudawö tjujuninawö̧, Dios iteapjo abönö kwebachö, trompeta jawa pjutjobö. Ja̧danö Obed-edom mikwo̧bi, Jehias mikwo̧bi omudawö tjujuninawö̧, jobadöbi Dios iteapjo teada̧lakwawa jojodö batjibanö.

Dios iteapjo Jerusalen comunidadbe tjichejebina jawa

²⁵ Jemi ikenama, Davidbi, israel jojodö tjuluwedöbi, ölakwabikwawa jojodötjö la'aka luwedöbi Obed-edom ejube tji̧'yinobe, Isabenö Jo̧ iteapjo, wei̧ wȩyukwa öbiya döbölataja a̧ja̧pjo jobetjö tjichejebakobetjö̧. Ja̧danö, ichibajadö, jwiinö tjo̧'wo ösöwachibanö, Jerusalen comunidadbe kwetjatinobe.

²⁶ Ja̧danö, Levisaso jojodö Isabenö Jo̧ iteapjo kwetjatonö, Dios otiwanö pjaatobetjö̧, Diosnö ösödö pakayadö ömadö jelemutjö du̧ju̧tajanöbi, obejadö ömadö jelemutjö du̧ju̧tajanöbi kwabö juwö tjiyinobe.

²⁷ Okobe deinö Levisaso jojodötjö Dios iteapjo kwebatadöbi, lo̧awa jojodöbi, lo̧awa öbibö lo̧bebo̧ Quenanias mikwo̧bi otiwa̧do̧ linotjö otikwa̧do̧ ödöa̧do̧ 'dubawö kwetjachinobe, ja̧danö Davidbi jobadö Levisaso jojodö 'dutjawi̧danö linotjö otikwa̧do̧ 'duawinobe, ja̧danö ju'wibi omuko jawa linotjö otikwa̧do̧ 'duawinobe.

²⁸ Ja̧danö okobe deinö israel jojodö Isabenö Jo̧ iteapjo wei̧ wȩyukwaba döbölataja a̧ja̧pjo kwetjatonö, tjo̧'wo ösöwachibanö jwötjeba̧li̧ ökwöinobe, ja̧danö trompeta jawabi, ju'wi pjuawa jawabi, cimbalos jawabi, arpa jawabi, lira jawabi, labinö lo̧awa jawa ökwöinö tjo̧'wo ösöwachibanö tjichejebinobe Jerusalen comunidadbe.

²⁹ Ja̧danö, Isabenö Jo̧ iteapjo, wei̧ wȩyukwaba döbölataja a̧ja̧pjo ichejebö, David itebo comunidad Jerusalen comunidadbe tetjatenama, baikwö baledinobe. Ajayi luwo̧bina Saul itjiju Mical mikwujuma, ventanasa'dotjö nijakwö jedinobe jilekwe Davidnö. Ja̧danö jilekwe la'aka luwo̧ David o̧'wo ösöwachibanö döobe edö, jomajadönö sulabenö jomukwatinobe jilekwe Davidnö, —Chilekwe Davidma mikwawö̧kö̧, la'aka luwo̧ kweacho jö̧a̧li̧danöma kwebachö̧kö̧, —jö̧ba̧lö.