1 Crónicas 13 - Dios Iwene

David Dios iteapjo, Dios wei̧ wȩyukwa öbiya döbölataja a̧ja̧pjo Jerusalenbe ichejebobö omukwatina jawa

¹ Davidma israel jojodötjö luwedökwö yöa̧lakwawinobe, milbedö tjuluwedökwöbi, cienbedö tjuluwedökwöbi, ju'wedö luwedökwöbi.

^2-3 Ja̧danö, jobadökwö yöa̧lakwawaja̧ ikenama, okobe deinö israel jojodönö yöa̧linobe, baikwö: —Chömöledö, ökwödö dedemi, Duluwo̧ Isabenö Jo̧ Dios iteapjo, Dios wei̧ wȩyukwa öbiya döbölataja a̧ja̧pjoma bai dö̧jobekwö dichejebobö otiwena. Jobekwö dichejebitjö̧ma, yemidanö otiwanö abebö da̧ja̧kwo jö̧da̧lidanö, Dios öba a'otjö abebö da̧ja̧kwena. Jau chömöledö, Saulmine webö ö̧jayi, jobekwö Dios iteapjo dichejebijökötö, jo̧kwaijayonö chedemi ida̧ökö jobekwö dichejebobö otiwena. Ja̧danö, ökwödö israel jojodöbi, Duluwo̧ Isabenö Jo̧ Diosbi domukwati̧danö kwomukwataduwitjö̧ma, ditebo niji ba̧kwemeachibanö ja̧ dichejebakwa̧ wene yöawakwawa wedo, sasokwena jojodönöbi, tjitebo comunidadkwena ju̧kwadö Diostjö jojodötjö ö'weje pjabatadönöbi, ju'wedö Levisaso jojodönöbi, bakobe ko̧ko̧kwö Dios iteapjo dichejebakobetjö̧, —jö̧ba̧lö yöa̧linobe Davidma.

⁴ Yöa̧liawö̧, okobe deinö israel jojodö ko̧ko̧kwadöma tjösödinobe, —Isabenö Dios iteapjo dichejebobö otiwa, —jö̧ba̧lö.

⁵ Jo̧kwajabetjö̧ Davidma okobe deinö israel jojodönö o̧ko̧kodinobe, Egipto niji ö'öbösödö Sihor owjetjö, u'dakwö Lebo-hamat comunidadbe ichibanö, israel niji ba̧kwemeachibanö ju̧kwadönö o̧ko̧kodinobe, bakobe Dios iteapjo Quiriat-jearim comunidadtjö tjichejebakobetjö̧.

⁶ Jemi ikenama, ko̧ko̧kwajadö, Davidbi, ju'wedö israel jojodöbi Juda niji comunidad Baala, ju'wi imi Quiriat-jearimbe tji̧'yinobe, jobetjö Dios iteapjo isapjo emö tjichejebakobetjö̧. Jo̧ba Diosma, Isabenö Jo̧ Dios, ja̧danö inesö iteakanö ö̧bȩmima, inesö juluwadö angeledö querubines ötjabawö̧ tjöwame Bo̧. Ja̧danö ja̧pjoma, Inesö Isabenö Jo̧ imida laebapjo.

⁷ Japjoma Abinadab mikwo̧ ejunö ji̧nobe, ja̧danö ja̧pjo emajadö, koluka yayakanö tjaninobe, pa̧ka̧yadö tötjobö. Ikenama Uza mikwo̧bi, Ajio mikwo̧bi jwetjeba̧lonö, jobetjö latjebinobe.

⁸ Ja̧danö, Dios iteapjo emö tjȩwa̧jonö, Davidbi, okobe deinö ju'wedö israel jojodöbi tjo̧'wo ösöwachibanö Dios öba a'otjö kwetjachinobe, lo̧böbi, lo̧awa jawa arpabi, lirabi, panderetasbi, cimbalosbi, trompetasbi ökwöinö.

⁹ Jo̧kwaijayonö Quidon mikwo̧ trigo sula'wo chabö loaweju badeibö tjichibenama, pa̧ka̧yadöma töbö metjo jö̧tja̧linobe, jo̧kwaiökwe Uzama Dios iteapjo do̧atinobe, kolukatjö meapji jö̧ba̧lö.

¹⁰ Jejenö Dios iteapjo maoko jö̧a̧lijayonö maiökwe, Isabenö Jo̧ Diosma ödameakwinobe Uzanö, ja̧danö jenada Uzanö lȩbebö kwabö loinobe Diosma. Jejenö lȩebökwe, jenada Dios öba a'otjö ö'wö baibinobe Uzama, Dios iteapjo maajobetjö̧.

¹¹ Ja̧danö, jejenö jobetjö Uzanö Dios lȩebinobetjö̧, Perez Uza jö̧ba̧lö tjimidinobe, Uzanö lȩebinemi jö̧ba̧lö. Ja̧danö ina babebi jejenö ötjabobe. Ja̧danö, jejenö Isabenö Jo̧ Dios Uzanö kwabö loiökwe, ödameakwinobe Davidma.

¹² Ja̧danö ja̧ möle Diosnö yeaibinobe Davidma, —Yetabi, chitebo Jerusalenbe che'ewökako̧sa Dios iteapjoma, —jö̧ba̧lö.

¹³ Jo̧kwajabetjö̧, iteda itebo Jerusalen, David itebo comunidad ötjabobe e'ewinokobe Davidma. Itebobe e'ewökönö, jelobe jobetjö yöneawobe junö tji̧'yinobe, Gat comunidad jojo Obed Edom mikwo̧ ejube. Ja̧danö Obed Edom ejunö ujuninobe Isabenö Jo̧ iteapjoma.

¹⁴ Jobe junajadö, tjȩwa̧jinobe Jerusalenbe, ja̧danö wamedukwa ja̧wo̧dö baledibanö, Gat comunidad jojo Obed Edom ömöledökwö, ejunö ji̧nobe Dios iteapjoma. Ja̧danö, iteda iteapjo Obed Edom ejunö jo̧betjö̧, Isabenö Jo̧ma otiwanö pjaatinobe, Obed Edomnöbi, ömöledönöbi, okobe jwiinö ujuna̧li̧ jawabi.