1 Crónicas 12 - Dios Iwene

Ju'wedö ölakwabikwawa jojodö David ömöayedö batjibina jawa

¹ Cis itji̧ Saul ina la'aka luwo̧ ö̧jayi, Davidnö isakwö ö̧jinobe, Davidnö kwabö loobö. Ja̧danö, jobekwö isakwö ö̧jiökwe, wene jwiinö kweachobö jwiinobe Davidma, ja̧danö ju̧kwawö ö̧jinobe, filisteo jojodö tjitebo comunidad Siclagnö. Ja̧danö, jobe ju̧kwawö ö̧jonö, israel jojodötjö ju'wedöma David ö̧jobekwö tjichibinobe, ömöayedö ölakwabikwawa jojodö batjibanö.

² Jobadötjö ju'wedöma Saul ömöledösaso Benjaminsaso jojodö, ja̧danö jobadö Benjaminsaso jojodöma, 'böawa jawa waisadö juluwadö tjö̧jinobe. Jobadöma otiwanö nayunu 'böawabi, inawiya wökwebö ikwawabi waisadö tjö̧jinobe. Ja̧danö ju'wibi, wajwitjamunöbi, tjöwaisamunöbi otiwanö wökwebö ikwawadö tjö̧jinobe.

³ Jobadö Benjaminsaso jojodötjö la'aka luwo̧ma, Guibea comunidad jojo Semaa itji̧ Ahiezer mikwo̧. Ja̧danö jo̧batjö ikena luwo̧ma, Ahiezer öjawo̧ Joas mikwo̧. Ju'wedö tjömöayedö ölakwabikwawa jojodöma bidö: Azmavet itji̧mu Jeziel mikwo̧bi, Pelet mikwo̧bi. Beraca mikwo̧bi. Anatot comunidad jojo Jehu mikwo̧bi.

⁴ Gabaon comunidad jojo Ismaias mikwo̧bi. Ismaiasma inesö juluwadö treintabedö ötjabawö̧tjö bakwo̧, ja̧danö ju'wibi jobadötjö luwo̧ ö̧jinobe. Gedera comunidad jojodö Jeremias mikwo̧bi, Jahaziel mikwo̧bi, Johanan mikwo̧bi, Jozabad mikwo̧bi.

⁵ Haruf comunidad jojodö Eluzai mikwo̧bi, Jerimot mikwo̧bi, Bealis mikwo̧bi, Semarias mikwo̧bi, Sefatias mikwo̧bi.

⁶ Core itji̧mu tupadanö jojodö Elcana mikwo̧bi, Isias mikwo̧bi, Azareel mikwo̧bi, Joezer mikwo̧bi, Jasobeam mikwo̧bi.

⁷ Gedor comunidad jojo Jeroham itji̧mu Joela mikwo̧bi, Zebadias mikwo̧bi. Jobadö Benjaminsaso jojodöma David ömöayedö batjibanö jo̧banö pjatjatinobe.

Gadsaso jojodötjö David ömöayedö

⁸ Ja̧danö, Gadsaso jojodötjöbi ju'wedöma ajayi tjuluwo̧nö kabatibö, David ömöayedö batjibanö jo̧banö pjatjatinobe. Jobadöma ölakwabikwawa jawa waisadö juluwadö tjö̧jinobe, ja̧danö David ina jojodö deobe 'diinö tjöekwobe ö̧jayi, ö̧jobekwö tji̧'yinobe, ömöayedö batjibanö. Jobadöma tjöekwapinöbi, otokwötenöbi ölakwabikwawa waisadö tjö̧jinobe, ja̧danö didibadödanö labidö tjö̧jinobe, ja̧danö mösa'o ju̧kwadö yamadanö, juluwanö ö'öbakwawadö tjö̧jinobe.

⁹ Jobadö Gadsaso jojodötjö la'aka tjuluwo̧ma Ezer mikwo̧, ja̧danö ömöayedöma bidö: Obadias mikwo̧bi. Eliab mikwo̧bi.

¹⁰ Mismana mikwo̧bi. Jeremias mikwo̧bi.

¹¹ Atai mikwo̧bi. Eliel mikwo̧bi.

¹² Johanan mikwo̧bi. Elzabad mikwo̧bi.

¹³ Jeremias mikwo̧bi. Macbanal mikwo̧bi. Jobadö a̧linösamutjö bakwo̧bedö Gadsaso jojodöma David ömöayedö batjibanö ö̧jobekwö tji̧'yinobe.

¹⁴ Jobadö Gadsaso jojodöma isabenö ölakwabikwawa jawa luwedö tjö̧jinobe, ja̧danö isabenö juluwadö tjö̧jinobe. Jobadötjö baikwönönö juluwo̧ma, cienbedö tjujuluwi̧danö juluwo̧ ö̧jinobe, ja̧danö ju'wedötjö bajalekwönönö juluwo̧ma milbedö tjujuluwi̧danö juluwo̧ ö̧jinobe.

¹⁵ Jobadö tjujulu tji̧sȩbina wene baikwö laebobe: Bakwötanö o̧ba ajayi jawo̧nö, Jordan ojwe okwatibayi, jobadöma ojwe pjetjibinobe, ja̧danö okobe deinö jobe ju̧kwadö tjöpöjojodönö a'dewö lotjinobe, jawo̧ laebobekwö ju̧kwadönöbi, jawo̧ meajobekwö ju̧kwadönöbi.

Ju'wedöbi David ömöayedö batjibina jawa

¹⁶ David 'diinö tjöekwobe ina ö̧jayi, ju'wedö Benjaminsaso jojodöbi, Judasaso jojodöbi David ö̧jobekwö tjichinobe, ömöayedö batjibanö.

¹⁷ Jobekwö ö̧jobekwö tjichiökwe, jobadönö edö laebinobe Davidma, ja̧danö jobadönö yöa̧linobe: —Ökwödöma chömöledö ja̧nö, ötjönö pjakataduwotö jö̧ba̧lö kwichaduwitjö̧ma, otiwa, ökwödönö chösödakwo̧sa, ja̧danö isabenö dömöledö ja̧nö, wene jwiinö dö̧jakwedösa. Jo̧kwaijayonö, sulabenö ja̧tinököjayonö, ötjönö suli̧ kwöwaedaduwotö jö̧ba̧lö, chöpöjojodönö iyö loköbaduwobö kwichaduwitjö̧ma, da'dödö tjösödinökwe Diosnö ateba, sulabenö kwomukwataduwi̧ edö, ökwödönö lȩebobö, —jö̧ba̧lö yöa̧linobe.

¹⁸ Jobekwö yöa̧liökwe, Dios O̧'wo Luwo̧ma treintabedötjö luwo̧ Amasai mikwo̧kwö ichibinobe, ja̧danö Dios O̧'wo Luwo̧ weonö yöa̧linobe: —Duluwo̧ Isai itji̧ David, ökwödöma ökwöda kwömöledösa, isabenö ökwönö pjadatobö jö̧ba̧ladösa. Jau David kwuluwo̧ Diosma isabenö ökwökwö pjabatö jo̧, jo̧kwajabetjö ökwönöbi, okobe deinö ökwönö pjabatadönöbi Dios pjaatobö dösöda, —jö̧ba̧lö atadinobe Amasaima. Ja̧danö, jobekwö yöa̧liökwe, ösödinobe Davidma, ja̧danö jo̧bakwö batjibobö weinobe, ja̧danö jobadönö ujuninobe, iteda ömöayedö ölakwabikwawa jojodötjö luwedö batjibanö.

Manasessaso jojodöbi David ömöayedö batjibina jawa

¹⁹ Ja̧danö Manasessaso jojodötjö ju'wedöbi Davidkwö babibö, ömöayedö ölakwabikwawa jojodö batjibinobe. Filisteo jojodöma Saulkwö tjölakwabikwawobö kwetjachinobe, ja̧danö Davidma tjömöledöso̧ janö, jobadönö pjaatobö kweachinobe, ja̧danö jobadökwö kweachonö, Manasessaso jojodötjö ju'wedöma Saul ömöayedötjö 'da̧bachibö, Davidkwö batjibinobe. Ja̧ David filisteo jojodökwö kweachina jawa baikwö laebobe: Davidma ajayinö filisteo jojodökwö kweachinajayonö, Saulkwö ölakwabikwawinokobe Davidma, filisteo jojodötjö luwedöma David ȩwa̧jobö wetjinobetjö̧. Filisteo luwedöma yötja̧lakwawinobe idödada: —Davidma dömöledöso̧ ja̧nö ökwödökwö kweachijayonö, labi. Dedemi ajayi uluwo̧kwö baibotö jö̧ba̧lö, dölakwabikwawemi ja'ötjö ökwödönö iyö loena, jo̧kwajabetjö̧ ölakwabikwawökönö ȩwa̧jobö wedo, —jö̧ba̧lö ȩwa̧jobö wetjinobe.

²⁰ Ja̧danö, itebo comunidad Siclagbe ȩwa̧jenama, Manasessaso jojodötjö bidöma Davidkwö babibö ömöayedö batjibinobe: Adnas mikwo̧bi. Jozabad mikwo̧bi. Jediaiel mikwo̧bi. Micael mikwo̧bi. Jozabad mikwo̧bi. Eliú mikwo̧bi. Ziletai mikwo̧bi. Okobe deinö jobadöma, bakwonökwena ajayinö Manasessaso ölakwabikwawa jojodötjö milbedö tjuluwedö tjö̧jinobe.

²¹ Jobadöma isabenö ölakwabikwawa luwedö, ja̧danö jwiinö juluwadö tjö̧jinobe, ja̧danö David 'dölanö ölakwabikwawa jojodönö luenama, jobadöbi jo̧banö pjabatö öpöjojodönö lutjinobe.

²² Mölekwena ju'wedöbi, ju'wedöbi Davidkwö babibö, ömöayedö batjibinobe. Isabenö ba̧jȩkwadö Davidkwö batjibinobe, ömöayedö ölakwabikwawa jojodöma ba̧jȩkwaso, Dios ömöayedö ölakwabikwawaso ba̧jȩkwi̧danö tjö̧ba̧jȩkwenanö.

Hebron comunidadbe ju'wedö ichibö David ömöayedö batjibina jawa

²³ Ja̧danö, David Hebron comunidadnö ö̧jenama, israel jojodötjö ju'wedöbi ichibö, David ömöayedö batjibinobe. Isabenö Jo̧ma ajayinö yöbawö ujuninobe, —Davidma Israel jojodötjö inesö la'aka luwo̧ baibakwo̧, —jö̧ba̧lö, ja̧danö Dios yöawinadanö badekwachinö ja̧tjotö jö̧ba̧lö, David ömöayedö batjibanö tjichinobe, Saul ö̧jinemi Davidda inesö la'aka luwo̧ baibakobetjö̧. Jobadö David ömöayedö batjibanö ichibinadöma bidö:

²⁴ Judasaso jojodötjö, seis mil ochocientos ölakwabikwawadö, otokwötebi, tjöekwapibi kwebatadö David ömöayedö batjibinobe.

²⁵ Simeonsaso jojodötjö siete mil cienbedö ölakwabikwawadö juluwadö David ömöayedö batjibinobe.

²⁶ Levisaso jojodötjö cuatro mil seiscientosbedö ölakwabikwawadöma David ömöayedö batjibinobe.

²⁷ Jobadötjö ju'wedöma bidö: Aaron itji̧mu tupadanö jojodötjö la'aka luwo̧ Joiada mikwo̧bi, ömöayedö tres mil setecientosbedöbi.

²⁸ Ja̧danö ölakwabikwawa jawa juluwo̧ Sadoc mikwo̧bi, yöne ömöledö veintidosbedö tjömöledösasotjö luwedöbi.

²⁹ Saul ömöledösaso Benjaminsaso jojodötjö, tres milbedö ölakwabikwawadöma David ömöayedö batjibinobe. Ja̧ möle abönö, Benjaminsaso jojodötjö ju'wedökwena David ömöayedö tjö̧jinajayonö, ba̧jȩkwadö Benjaminsaso jojodöma tjömöledöso̧ Saul yöne ömöledö tjömöayedöda tjö̧jinobe.

³⁰ Efrainsaso jojodötjö veinte mil ochocientos ölakwabikwawa juluwadöma David ömöayedö batjibinobe. Okobe deinö jobadöma, bakwo̧nökwenö tjömöledö otiwanö tjomukwatawö̧ tjö̧jinobe.

³¹ Manasessaso jojodö Jordan ojwetjö jawo̧ meajobekwö ju̧kwadö tjömöledötjö dieciocho milbedönö 'da̧batö tjujuninobe, David ömöayedö batjibanö. Ja̧danö, jobadönö 'da̧batö junajadö, jobadönö wetjinobe, David ö̧jobekwö 'ya̧nö, inesö la'aka luwo̧ baibanö pjatjatakobetjö̧.

³² Isacarsaso jojodö tjuluwedötjö, doscientosbedö luwedöma baledi̧ jawa edö waisanö omukwatadö tjö̧jinobe. Jobadöma baledi̧ jawa edö, israel jojodö otiwanö ja̧tjakwa̧ tjöwaisinobe, ja̧danö tjömöledönö öbibö, jobadöbi waisanö omukwatö Davidnö pjatjatinobe.

³³ Zabulonsasotjö cincuenta milbedö ölakwabikwawa waisadö Davidnö pjatjatinobe. Jobadöma okobe jwiinö tjitea ölakwabikwawa jawa tjujuna̧linobe, ja̧danö ja̧ jawanö waisanö tjölakwabikwawobö tjöwaisinobe. Jobadöma dötölatajanö omukwatökönö, jwaikwöda otiwanö pjatjatinobe Davidnö.

³⁴ Neftalisaso jojodötjö, ölakwabikwawa jawa luwedö milbedö Davidnö pjatjatinobe. Jobadöma tjömöayedö ölakwabikwawa jojodö otokwötebi, tjöekwapibi kwebatadö treinta y siete milbedö tjuluwedö tjö̧jinobe, ja̧danö tjö̧möayedönö öbibö, jobadöbi Davidnö pjatjatinobe.

³⁵ Dansaso jojodötjö veintiocho mil seiscientos ölakwabikwawadö, tjölakwabikwawobö waisadöbi Davidnö pjatjatinobe.

³⁶ Asersaso jojodötjö cuarenta milbedö ölakwabikwawa jojodö, ida̧ökö ölakwabikwawa jawa waisachibinadöbi Davidnö pjatjatinobe.

³⁷ Jordan ojwe bakwachödö ju̧kwadö, Rubensaso jojodötjöbi, Gadsaso jojodötjöbi, Manasessaso ja'ö jojodötjöbi, ciento y veinte milbedö ölakwabikwawa jojodö, okobe jwiinö tjitea ölakwabikwawa jawa juna̧ladöbi Davidnö pjatjatinobe.

³⁸ Okobe deinö jobadöma ölakwabikwawa juluwadö tjö̧jinobe, ja̧danö ida̧ökö otiwanö tjöpöjojodö tjöba a'o ja̧kwawa waisadö tjö̧jinobe, otiwanö tjöpöjojodönö tjujuluwakobetjö̧. Okobe deinö jobadöma, bakwainö otiwanö omukwatö, Hebron comunidadbe tji̧'yinobe, Davidnö okobe deinö israel jojodötjö inesö la'aka luwo̧ baibanö tjujunakobetjö̧. Jobadöbi, ju'wedö tjömöledöbi bakwainö tjomukwatinobe, —Isabenö Davidda inesö la'aka duluwo̧ baibanö dujuno jö̧da̧lökwema, —jö̧ba̧lö.

^39-40 Davidnö inesö la'aka duluwo̧ baibanö dujuno jö̧ba̧lö, israel jojodö sasokwena jojodöma otiwanö tjukwakwa̧ jawa otidö wetjinobe, David ö̧jobekwö. Ödö ju̧kwadö Isacarsaso jojodöbi, Zabulonsaso jojodöbi, Neftalisaso jojodöbi kwakwawa jawa otidajadö, buludö tjoma'anöbi, kameyodö tjoma'anöbi, kabayudö tjoma'anöbi, pakayadö tjoma'anöbi wanö, ja̧ kwakwawa tje'ewinobe David ö̧jobekwö, harisaso̧pjabi, higotjö dalö isa'wo baibanö tjotidinabi, uba köködakwawa ochijubi, ubasobu o̧'dobubi, olivo waji̧ o̧tebi. Ja̧danö tja̧jwi̧mu ajikwedö pakayadönöbi, obejadönöbi, chivodönöbi tje'ewinobe, ba'ali junö tjukwobö. Ja̧danö, jobekwö tjömöledö otiwanö pjatjatiawö̧, David ömöayedö batjibanö ichajadöma wapötakwa möle baledibanö, David inesö la'aka luwo̧ baibanö junawa ba'ali kwanöbi, owöbi tjö̧jinobe. Ja̧danö, Israel niji ba̧kwemeachibanö tjo̧'wo ösöwachibanö tjö̧jinobe, —Davidma otiwanö inesö la'aka duluwo̧ baibajabe, —jö̧ba̧lö.