1 Crónicas 11 - Dios Iwene

David israel jojodötjö inesö la'aka luwo̧ baibina jawa

¹ Ja̧danö, Saul ö'wö baibaja̧ ikenama, israel jojodöma ko̧ko̧kwö, David ö̧jobekwö tji̧'yinobe, Hebron comunidadbe. Ja̧danö öba a'o ichibajadö yötja̧linobe baikwö: —David, isabenö yö̧ne dömöledöso̧ja, diwe'ijubi, ditebiabi bakwaibedösa, okobe deinö bakwo̧da Israelda i̧tji̧mu tupadanö jojodödobetjö̧.

² Isabenö ökwöda duluwo̧ kwö̧jobö jo̧be David, baikwö yöda̧la: Damötjö Saulmine duluwo̧ ö̧jayibi, ökwöda ökwödötjö ölakwabikwawa jojodönö ökibijatö, döpöjojodönö dujuluwobö. Ja̧danö ökwönöda yöbawö ujuninobe Isabenö Jo̧ma, –Chömöledö israel jojodönö öbibö kwiteada̧lakwo̧ja, ja̧danö chömöledö israel jojodö la'aka tjuluwo̧ kwö̧bakwo̧ja, –jö̧ba̧lö ökwönöda yöbawö ujuninobe. Jo̧kwajabetjö̧ isabenö inesö la'aka duluwo̧ kwö̧jobö jo̧be, —jö̧ba̧lö Davidnö yötja̧linobe.

³ Jo̧kwajabetjö̧, jejenö yöba̧lö, Hebrontjö okobe deinö israel jojodötjö luwedöma, Davidnö o̧te totjebinobe, isabenö biteda okobe deinö israel jojodö la'aka duluwo̧ jö̧ba̧lö. Ja̧danö Isabenö Jo̧ Dios öba a'otjö la'aka luwo̧ Davidbi jojodöbi isabenö otiwanö ja̧bö tjö̧jakwa̧ wene yöbawö tjujuninobe. Jobekwö Isabenö Jo̧ yöawi̧ yöbawo̧ Samuel ajayinö yöawinadanö badekwachinö baledinobe.

David Jerusalen comunidad ujuluwina jawa

⁴ Baikwö laebobe David ajayinö Jerusalen comunidad ujuluwina wenema: Ajayinö israel jojodöböködö tjö̧jinobe Jerusalen comunidadnö, jebuseos ötjabawö̧ma, ja̧danö tjitebo comunidadma, Jebus jö̧ba̧lö ötjabinobe. Jobadö jebuseo jojodöda ajayinö ja̧ nijinö ju̧kwinadöma, ja̧danö Davidma jobadönö ujuluwobö i̧'yinobe.

⁵ Jerusalen comunidadma 'diinö tjöekwobe ji̧nobe, jo̧kwajabetjö̧ jejenö ichiawö̧, jebuseo jojodöma Davidnö obö yötja̧linobe, —La'akatjöda ökwödönö juluwajo̧, ditebo comunidad tekachökakwo̧ja, —jö̧ba̧lö yötja̧linobe Davidnö, otiwanö 'diinö tjöekwobe ja̧dösa jö̧ba̧lö. Jo̧kwaijayonö, jejenö tjomukwatijayonö, Davidma 'diinö tjöbebö tjotidinemi comunidad ujuluwinobe, iteda itebo comunidad baibanö. Ja̧ comunidadma ju'wi imi 'diinö tjöekwobe Sion ötjabobe, ju'wi imi David itebo comunidad jö̧ba̧lö ötjabobe.

⁶ Baikwö laebobe David Jerusalen comunidad ujuluwina jawama: Davidma iteda ömöayedö ölakwabikwawa jojodönö yöawinobe: —Ökwödötjö ajayinö jebuseos jojodönö mebibö juluwo̧ma, ötjö chömöayedö ölakwabikwawa jojodötjö la'aka luwo̧ ö̧jakwo̧, —jö̧ba̧lö yöawinobe. Ja̧danö, jobekwö yöa̧liökwe, David öpöo Sarvia jitji̧ Joab mikwo̧ma abönö meibinobe jebuseo jojodönö, ja̧danö jobekwö David ömöayedö ölakwabikwawa jojodötjö la'aka luwo̧ baibinobe Joabma.

⁷ Ja̧danö 'diinö tjöekwobe Jerusalen comunidad juluwajo̧, Davidma jobe pjolachö ö̧jinobe itebo baibanö. Jo̧kwajabetjö̧, ja̧ comunidad tjimidinobe, David itebo comunidad jö̧ba̧lö.

⁸ Ja̧danö Davidma nöinö comunidad tjotidobö weinobe, jalobe baibanö. Milo ötjabobetjö jamatö, comunidad tjöekwemi baibanö nöinö tjotidinobe. Ja̧danö David ja̧ otidonö, Joabma ju'wi Jerusalen comunidad jawa 'yayinö baibanö otidinobe ömöayedökwö.

⁹ Ja̧danö ajayitjö bajalekwönönö nöinö ujuluwachibinobe Davidma, Okobe Jwiinö Juluwo̧ Isabenö Jo̧ Dios jo̧banö otiwanö pjaatobetjö̧.

David ömöayedötjö inesö juluwadö tjimibiya wȩyukwa'ye

^10-11 Isabenö Jo̧ma yöbawö ujuninobe, —Davidda Israel jojodötjö inesö la'aka luwo̧ baibakwo̧ma, —jö̧ba̧lö. Ja̧danö, David ömöayedö juluwadöbi, ju'wedö israel niji ba̧kwemeachibanö ju̧kwadöbi otiwanö Davidnö pjatjatinobe, Isabenö Jo̧ yöbawö ujuninadanö badekwachinö, Davidma israel jojodötjö inesö la'aka luwo̧ baibakobetjö̧. Ja̧danö, jobadö David ömöayedö juluwadötjö la'aka luwedö tjimibiya wȩyukwa'yema, baikwö laebobe: Ju'wedötjö bajalekwönönö inesö juluwo̧, inesö juluwadö wamedukwabedö ötjabawö̧tjö la'aka luwo̧ma, hacmonita jojo Jasobeam mikwo̧. Jo̧ba Jasobeamma isabenö ölakwabikwawa jawa juluwo̧ ö̧jinobe, bakwötanö David öpöjojodökwö ölakwabikwawenama, itea otokwötenö trecientos ölakwabikwawadönö kwabawö loinobe.

¹² Ja̧danö ikena jojo, wamedukwabedö inesö juluwadötjö bakwo̧ma, ajohita jojo Dodai itji̧ Eleazar mikwo̧.

¹³ Jo̧bama Davidkwö ö̧jinobe, Filisteo jojodö Pasdamim comunidadtjö tjölakwabikwawobö ko̧ko̧kwajadö, cebada batjosayutjö israel jojodönö metjibenama. Ja̧danö, ju'wedö israel jojodötjö ölakwabikwawa jojodö dötjibajonö,

¹⁴ Eleazarma Davidkwö ja̧nö 'diinö ölakwabikwawö ö̧jinobe, tjöba a'otjö filisteo jojodö dötjibajenanö baibanö. Ja̧danö, jo̧banötjö Isabenö Jo̧ma otiwanö pjaatinobe israel jojodönö, filisteo jojodönö tjujuluwakobetjö̧.

¹⁵ Ju'wi möle, Davidma inawa ötöla, Adulam ötjaböla yöneawa nöawatjö ö̧jenama, jobadö treintabedötjö inesö juluwadö wamedukwabedö ötjabawö̧ma David ö̧jobekwö tji̧'yinobe, jo̧banö pjatjatobö.

¹⁶ Ja̧ möle Davidma 'diinö tjöekwemi Adulam ötölanö ö̧jinobe, ja̧danö filisteo jojodöma Belen comunidadtjö ölakwabikwawadö tju̧ju̧kwemi tjujuna̧linobe.

¹⁷ Ja̧danö, ju'wi möle Davidma itebo Belen omukwatö yöa̧linobe, —Belen ojwese'do ojwiyowe, isabenö je'do comunidad apjude ö'öböse'dotjö chowobö jö̧ta̧la, bakwo̧ je'dotjö ojwiyo wabö iyitjö̧ma, chösödena, —jö̧ba̧lö yöa̧linobe.

¹⁸ Ja̧danö, jejenö yöa̧liawö̧, jobadö wamedukwa juluwadöma, filisteo jojodö tju̧ju̧kwemi tebachö, je'dotjö ojwiyo watjinobe, ja̧danö ichejebö, Davidnö tjiyinobe, owobö. Jo̧kwaijayonö jejenö tjiyökwe, owinokobe Davidma, Isabenö Jo̧nö iyawa baibanö nijinö sa̧bö yöa̧linobe,

¹⁹ —Chuluwo̧ Dios öba a'otjö, isabenö ötjöma bobu ojwiyo la'akatjöda chowobö jwibo̧sa, chowitjö̧ma bidö chömöayedö tjökwösobu chowobedanö ichejekwobetjö̧. Jau, jobadöma isabenö inesö labobe tebachö, debö tji̧'yo jö̧tja̧lajabeta, —jö̧ba̧lö owinokobe Davidma. Jobekwö laebobe jobadö wamedukwa yebabökönö tjujulu tji̧sȩbina wenema.

Ju'wedö treintabedö inesö juluwadö tjimibiya wȩyukwa'ye

²⁰ Ja̧danö David ömöayedö inesö juluwadötjö jelo̧ma, Joab öjawo̧ Abisai mikwo̧. Jo̧ba Abisaima, inesö treintabedö ötjabawö̧ tjuluwo̧ ö̧jinobe. Jo̧bama bakwöta möle öpöjojodönö ölakwabikwawö, otokwötenö trescientosbedönö kwabawö loinobe. Jo̧kwajabetjö̧, ajayinö tjimi labebajadönö tja̧ja̧kwi̧danö Abisainöbi tja̧ja̧kwinobe.

²¹ Jo̧bama Treintabedö ötjabawötjö bajalekwönönö jojodö tja̧ja̧kwökwe, ja̧danö jo̧bama tjuluwo̧ ö̧jinobe. Jo̧kwaijayonö inesö juluwadö wamedukwabedö ötjabawö̧tjö ji̧nö̧kö̧ Abisaima.

²² Ja̧danö, inesö juluwadötjö jelo̧, Cabsel comunidad jojo Joyada itji̧ Benaias mikwo̧. Jo̧babi, nöinö ujulu i̧sȩbinobe. Jo̧bama Moab niji jojodötjö inesö juluwadö, didibadanö juluwadö du̧ju̧tajanö ujuluwinobe. Ju'wibi, ju'wi möle tiyuwena, ojwiyo o̧bidanö nieve jawa mölejebetjö tjoduwenama, laju nöaju okwa a̧jibö, jobe jo̧ didibanö kwabö loinobe.

²³ Ja̧danö ju'wibi jwiinö nöbo̧ egipcio jojodötjö juluwo̧nö ujuluwinobe, dötölataja metro ja'ö möbo̧nö. Jo̧ba egipcio jojoma, otokwöte okwi'odanö nööte kwebatö ölakwabikwawinobe, ja̧danö Benaiasma sule ösö̧'ada kweatinobe, jo̧kwaijayonö egipcio jojokwö ölakwabikwawö, otokwöte emibö kwabö loinobe, iteda otokwötenö.

²⁴ Jobekwö Joyada itji̧ Benaiasma ujulu i̧sȩbinobe, ja̧danö jo̧banöbi okobe deinö tja̧ja̧kwinobe, abönö wamedukwa juluwadönö tja̧ja̧kwidanö.

²⁵ Jo̧kwaijayonö ju'wedö treintabedö ötjabawö̧tjö bajalekwönönö okobe deinö tja̧ja̧kwökwe ö̧jijayonö, inesö juluwadö wamedukwabedö ötjabiwö̧tjö ji̧nö̧kö̧ Benaiasma. Ja̧danö, jo̧ba Benaias mikwo̧nö ujuninobe Davidma, ömöayedö la'aka luwo̧ Davidnö tjöbeba̧lö teada̧ladö tjuluwo̧ baibanö.

²⁶ Ja̧danö David ömöayedötjö ju'wedö inesö juluwadö ötjabawö̧ tjmibiya baikwö laebobe: Joab öjawo̧ Asael mikwo̧bi. Belen jojo Dodo itji̧ Eljanan mikwo̧bi.

²⁷ Jarodita jojo Sama mikwo̧bi. Pelonita jojo Heles mikwo̧bi.

²⁸ Tecoita jojo Iques itji̧ Ira mikwo̧bi. Anatotita jojo Abiezer mikwo̧bi.

²⁹ Jusatita jojo Sibecai mikwo̧bi. Ajojita jojo Ilay mikwo̧bi.

³⁰ Netofatita jojo Maray mikwo̧bi. Netofatita jojo Bana itji̧ Jeled mikwo̧bi.

³¹ Benjamin niji Guibea comunidad jojo Ribay itji̧ Itay mikwo̧bi. Piratonita jojo Benaias mikwo̧bi.

³² Gaas mikwödö niji jojo Hurai mikwo̧bi. Arbatita jojo Abi Albon mikwo̧bi.

³³ Bajurinita jojo Azmavet mikwo̧bi. Salbonita jojo Elijaba mikwo̧bi.

³⁴ Gizon niji jojo Jasen itji̧mubi. Ararita jojo Sage itji̧ Jonatan mikwo̧bi.

³⁵ Ararita jojo Sarar itji̧ Ahian mikwo̧bi. Ur itji̧ Elifal mikwo̧bi.

³⁶ Mequeratita jojo Hefer mikwo̧bi. Pelonita jojo Ahias mikwo̧bi.

³⁷ Carmel comunidad jojo Jezro mikwo̧bi. Ezbai itji̧ Naray mikwo̧bi.

³⁸ Natan öjawo̧ Joel mikwo̧bi. Hagri itji̧ Mibar mikwo̧bi.

³⁹ Amonita jojo Selec mikwo̧bi. Sarvia jitji̧ Joab ömöayo̧, ölakwabikwawa jawa kwebato̧ berotita jojo Najaray mikwo̧bi.

⁴⁰ Itrita jojo Ira mikwo̧bi. Itrita jojo Gareb mikwo̧bi.

⁴¹ Hitita jojo Urias mikwo̧bi. Ahlai itji̧ Zabad mikwo̧bi.

⁴² Siza itji̧ Adina mikwo̧bi. Adinama, Rubensaso jojodötjö la'aka luwo̧ ö̧jinobe, ja̧danö ömöayedö jo̧bakwö ölakwabikwawa jojodö treintabedönö öbibö ö̧jinobe.

⁴³ Maaca itji̧ Hanan mikwo̧bi. Mitnita jojo Josafat mikwo̧bi.

⁴⁴ Astarot comunidad jojo Uzias mikwo̧bi. Aroer comunidad jojo Jotam itji̧mu Sama mikwo̧bi, Jehiel mikwo̧bi.

⁴⁵ Tiz comunidad jojo Simri itji̧ Jediael mikwo̧bi. Jediael öjawo̧ Joha mikwo̧bi.

⁴⁶ Mahava comunidad jojo Eliel mikwo̧bi. Elnaam itji̧mu Jerebai mikwo̧bi, Josavia mikwo̧bi. Moab niji jojo Itma mikwo̧bi.

⁴⁷ Eliel mikwo̧bi. Obed mikwo̧bi. Soba comunidad jojo Jaasiel mikwo̧bi. Jobekwö laebobe David ömöayedötjö inesö juluwadö tjimibiya wȩyukwa'yema.