1 Crónicas 10 - Dios Iwene

Saul ö'wö baibina wene

¹ La'aka luwo̧ Saul ö'wö baibina wene baikwö laebobe: Filisteo jojodöma israel jojodönö mebibö tjölakwabikwawinobe, ja̧danö israel jojodönö tjujuluwinobe. Tjujuluwiawö̧, filisteo jojodö tjöba a'otjö dötjibajinobe israel jojodöma, ja̧danö israel jojodötjö ba̧jekwadö tjölakwabikwawelö Gilboa mösa'otjö ö'wö batjibinobe.

² Ja̧danö israel jojodönö lubö, Saul i̧tji̧mukwö ölakwabikwawobe tjichibinobe, ja̧danö filisteo jojodöma Saul itji̧munö Jonatan mikwo̧nöbi, Abinadab mikwo̧nöbi, Malquisua mikwo̧nöbi jobetjö kwabö lotjinobe.

³ Ja̧danö Saul ö̧jobekwö yö̧ne ichibö labinö ölakwabikwawö tjö̧jinobe, ja̧danö 'böawa jojodöma Saulnö 'bötjinobe, inia tjöinö.

⁴ Jejenö jamatekwajo̧, Saulma ömöayo̧ ölakwabikwawa jawa kwebato̧nö weinobe, —Kwölöte'o do̧batö, kwabö lobitjö, idö Diosnö öpöjödadö tjötade bajalesa̧do̧ 'wibekwöködö ötjönö, ina ya̧ba̧lo̧nö do̧tjatapji jö̧ba̧lö, ja̧danö do̧batajadö, ötjönö tibatö alewö otjapji, —jö̧ba̧lö. Weökwe, ömöayo̧ma öpöjödinobe, uluwo̧nö kwabö loobö yeabobetjö̧, jo̧kwajabetjö̧ jejenö öpöjödiökwe Saulma iteda kwölöte'o nijinö dobö junö, tibatakwawö lobö, nijinö meinobe.

⁵ Ja̧danö, jejenö ja̧iökwe, —Chuluwo̧ Saulma ö'wö baibajabe, —jö̧ba̧lö, Saul ömöayo̧bi itea kwölöte'onö tibatakwawö loinobe, uluwo̧ tibatakwawö loaja̧danö.

⁶ Jobekwö laebobe Saul ö'wö baibina wene. Bakwöta möle Saulbi, itji̧mu wamedukwabi bakobe ö'wö batjibinobe, Saul la'aka luwo̧ ö̧ji̧ bakobe 'dö̧bibajinö.

⁷ Ju'wedö israel jojodö wabekonö ju̧kwadöma israel jojodötjö ölakwabikwawa jojodö filisteo jojodö tjöba a'otjö dötjibajobe tjedinobe, ja̧danö Saulbi, itji̧mubi ö'wö batjibaja̧ wene tjöwaisachibinobe. Jobekwö waisachibajadö, jobadöbi tjitebo comunidadbiyatjö labebö dötjibajinobe, ja̧danö filisteo jojodöma ichibö, ajayi tjö̧jinemi comunidadnö tjö̧jinobe.

⁸ Ja̧danö, tjölakwabikwawaja̧ ikena möle, filisteo jojodöma ichö, kwabö lotjinawö̧ tjitea emö kwetjachinobe, ja̧danö Saul iteba'obi, itji̧mu tjiteba'ijubi tjöbadekwajinobe jobe Guilboa mösa'onö.

⁹ Badekwajadö, Saul itea ölakwabikwawa jawa tjeminobe, ja̧danö uu bulatö tjeminobe. Ikenama, tjitebo ba̧kwemeachibanö yöbawadö kwebachö tjujuluwaja̧ wene yötjawobö wetjinobe, o̧'wo jawa tjösödawö̧nö ösödakwawejunö ju̧kwadönöbi, ju'wedö tjitebo ba̧kwemeachibanö jojodönöbi.

¹⁰ Ja̧danö Saul itea ölakwabikwawa jawama, o̧'wo jawa tjösödawö̧nö ösödakwaweju okwa tjödinobe, —Dösödawö̧ma Saulnö tjujuluwajabe, —jö̧ba̧lö. Ja̧danö Saul uuma, tjösödökwe Dagon ötjabökwe ösödakwawejunö akwatö tjöninobe, tjujuluwaja̧ wene i̧sȩbö.

¹¹ Jobekwö filisteo jojodö Saul iteba'o sulabenö ja̧tjiawö̧, Galaad niji comunidad Jabes jojodöma a̧ja̧kwö tjöpöjödinobe, —Duluwo̧ Saulnö sulabenö obadötö, —jö̧ba̧lö.

¹² Ja̧danö, öpöjödö, jobe ömadötjö juluwadö yebaböködöma, a̧la̧ibö Saul iteba'obi, i̧tji̧mu tjteba'ijubi isakwö tji̧'yinobe. Ikenama, emajadö, e'ewö tjȩwa̧jinobe Jabesbe. Ja̧danö Jabes comunidadbe ichibajadö Jabes comunidadnö jo̧wi tamarisco towi teebe tjo̧tji̧nobe tjiwe'ijuma. Ja̧danö o̧tjajadö, tjuluwo̧ woina budekwö, jelemutjö̧ dötölataja möle tju̧kwa̧ ö̧töchö tjö̧jinobe.

^13-14 Saul jobekwö ö'wö baibina, —Tajawedö ö'wö baibinajö, —jö̧ba̧lö labebö loawama baikwö laebobe: Otiwanö Isabenö Jo̧ wei̧ a̧ja̧kwö ö̧jo jö̧a̧linajayonö, Saulma a̧ja̧kwökönö sulabenö ja̧inobe. Ju'wibi, Isabenö Jo̧ Diosnöda abebö a̧ja̧kwo jö̧a̧linajayonö, filisteo jojodökwö ölakwabikwawakwa̧ jawa öwaisachibobö jö̧a̧lenama, Diosnö abebökönö, ö'wö babibajadökwö yöba̧lujunöda abebö a̧ja̧kwinobe, sulabenö. Ja̧danö, jobekwö sulabenö ja̧iökwe, ö'wö baibobö weinobe Isabenö Jo̧ma, ja̧danö Saul la'aka luwo̧ ö̧jinemi, balekwo̧ Isai itji̧ David mikwo̧nö ujuninobe, Davidda Israel jojodötjö inesö la'aka luwo̧ ö̧jakobetjö̧.