1 Corintios 9 - Dios Iwene

Ju'wedö Jesús webawedödanö, isabenö Jesús webawo̧sa jö̧ba̧lö Pablo yöawina wene

¹ Chömöledö, ötjö Pabloma ju'wedö tjömöayo̧bö̧kö̧sa, ¿jö̧tö? Ja̧danö, ötjöma Jesús webawo̧ chö̧jobe, ¿jö̧tö? Ja̧danö, Duluwo̧ Jesúsnö chedinobe, ¿jö̧tö? Ja̧danö, ökwödö Corintio jojodöma ötjönötjö Duluwo̧nöma kwösödinaduwobe, ¿jö̧tö?

² Jau chömöledö, ju'wedöma ötjönö: Aaa, Pabloma Jesús webawo̧bö̧kö̧ jö̧ba̧lö tjomukwatijayonö, ökwödöma Dios ömöledö kwö̧jaduwobetjö̧ kwi̧sekwaduwobe Duluwo̧ webawo̧ chö̧ji̧ma. Ja̧danö, ju'wedö wajwitjonö, ökwödöma kwöwaisaduwa, isabenö Pabloma Jesús webawo̧ jö̧ba̧lö.

³ Chömöledö, ju'wedö ötjönö sulabenö yötja̧lobe, Aaa, Pabloma ju'wedö Jesús webawedödanö ichejekwö̧kö̧, jo̧kwajabetjö̧, isabenö Jesús webawo̧bö̧kö̧ena Pabloma jö̧ba̧lö yötja̧lobe. Jejenö yötja̧litjö̧, baikwö chatadobe chömöledö:

⁴ Isabenö ötjöma yöbawö chotidobetjö̧, ja̧ chotidi̧ mikwa kwakwawabi, owawabi chemobö jo̧be, chotidawa mikwa jö̧ba̧lö.

⁵ Ju'wibi yötawa: Ju'wedö Duluwo̧ webawedö, Duluwo̧ Jesús böjȩtjö yöne ö̧ja̧wo̧döbi, Pedrobi, yöbawö kwetjachenama, tji̧lȩkwa̧mukwö kwetjachobe, ¿jö̧tö? Ja̧danö, ötjöbi jejenö ötjökwö kwejacho jö̧ba̧lö Jesúsnö ösöduju chilekwonö chemobö jö̧ta̧litjö̧ma, otiwo jö̧a̧lena chömöledö, sulökena.

⁶ Jau chömöledö, ju'wedö Jesús webawedöma ju'wi jaye otidöködö, tju̧kwa tjukwo jö̧ba̧lö, sule yöbawö tjotidi̧ mikwada tju̧kwa tjukwobe. Ja̧danö, ¿dakwö kwomukwataduwa, ötjöbi, Bernabébi, jejenö yöbawö dotidi̧ mikwa du̧kwa dukwoböma jwienaji̧? Ja̧maökö chömöledö, ökwödöbi yöbawö dotidi̧ mikwa du̧kwa dukwobö jo̧be.

⁷ Baikwö wanedö yötawa chömöledö: Bakwo̧ guardia jojoma, itedada imidokobe ö̧ji̧ jawama, uluwo̧da imidobe, ¿jö̧tö? Ja̧danö, uba batjo otidadöma, tjotidajayutjö uba kwadö, ¿jö̧tö? Ja̧danö, o̧bȩja̧dönö te'ada̧ladöma, o̧bȩja̧dönötjö leche emadö, ¿jö̧tö? Ja̧danö, ökwödöbi yöbawö dotidi̧ mikwa dukwobö jo̧be chömöledö.

⁸ Chömöledö, ja̧ yötawaja̧ma, ¿jojodö tjomukwati̧da yötawaji̧? Dios weina Moisés iwȩyudinabi jejenö laebobe, ¿jö̧tö chömöledö?

⁹ Baikwö laebobe Dios weina Moisés iwȩyudinama chömöledö: Pakayaso̧kwö trigo jawa kwotidenama, pakayaso̧ aapo di̧batökönuwi, trigo jawa kwotidobetjö̧, kwotidonö jo̧babi trigo jawatjö ukwobö jo̧be, jö̧ba̧lö laebobe Dios iwene. ¿Didönö omukwatö jejenö weinada Diosma chömöledö, pa̧ka̧yö̧nöda omukwatö weinaji̧?

¹⁰ Ökwödönö omukwatö jejenö weinobe chömöledö. Jau chömöledö, batjo sobö chawidö otido̧ma, tupakwö wa̧jakwa̧ ukwotö jö̧ba̧lö otido̧. Ja̧danö, batjo jawa wa̧ji̧ 'döbö otido̧ma, otidaja̧tjö ukwotö jö̧ba̧lö otido̧.

¹¹ Ja̧danö, baikwö wanedö yötawa chömöledö: Ökwödönö yöbawö dotidenama, batjo jawa ödebiya lödadödanö dichejekwijatö. Ja̧danö, jejenö kwo̧'wo̧ luwo̧duwi jawa ödebiya dödinobetjö̧, ¿babema ökwödötjö do̧'wo̧li̧ jawa demobö sulenaji̧? Sulökena chömöledö.

¹² Ju'wedö ökwödönö Dios iwene yöbawadönö jejenö pjakataduwobe tju̧kwa kwakwawa iyö chömöledö. Ja̧danö, jobadönö pjakataduwobö ji̧tjö̧ma, ¿ökwödö ajayinö ökwödönö yöbawinadönö ötjönöbi, Bernabénöbi kwiyaduwoböma jwienaji̧? Isabenö ökwödönö kwiyaduwobö jo̧be chömöledö, ajayinö ökwödönö yödawinobetjö̧. Jau chömöledö, ökwödötjö du̧kwa adebobö ji̧nobe, ökwödönö yöbawö dotidinobetjö̧. Jo̧kwaijayonö, jejenö adebobö ji̧najayonö, la'akatjöda adebijökötö chömöledö. Jau chömöledö, Aaa, jojodötjö kwakwawa adebitjö̧ma, adebi̧ma tjöekwi̧danö jȩna, Cristo jawa otiwa jawa wene tjösödökena jö̧ba̧lö domukwatijatö. Ja̧danö, tjöekwi̧ dujunapji jö̧ba̧lö, do̧'wo̧ 'dibachibö adebijökötö la'akatjöda chömöledö.

¹³ Jau chömöledö, kwöwaisaduwa, Dios weinejutjö otidadöma, Dios weinejutjö tju̧kwa kwakwawa emadö, ¿jö̧tö? Ja̧danö, ajikwakwawedönö kwabö juwö Diosnö iyö otidadöma, jobadö ajikwakwawedö tjitebiyatjö kwadö, ¿jö̧tö?

¹⁴ Ja̧danö, Duluwo̧ma baikwö weinobe: Otiwa jawa wene yöbawö otidadöma, yöbawö tjotidi̧ mikwa tju̧kwa tjukwo jö̧ba̧lö.

¹⁵ Jo̧kwaijayonö, jejenö ji̧jayonö, la'akatjöda chotidi̧ mikwa chemo jö̧ta̧linama chemijökötö chömöledö. Ja̧danö, kwiyaduwotjö jö̧ba̧löma chiwȩyudökö babema chömöledö. Jau chömöledö, jwiinö chösödobe yötawawö̧nötjö chu̧kwa emökönö chö̧ji̧ma. Ja̧danö, jwiinö chöpöjödobe ökwödönö ateboböma, la'akatjöda jejenö abebö̧kö̧sa jö̧ba̧lö. Ja̧danö, ja̧ yötawawö̧nötjö chu̧kwa emökönö chö̧ji̧ omukwatö, Aaa, otiwanö otido̧sa yöta̧lobö jo̧be.

¹⁶ Yöbawö chö̧ji̧ omukwatö, Aaa, otiwanö yöbawö chö̧jobe jö̧ba̧lö yöta̧loböma jwia chömöledö. Baikwö yötawa: Yöbawö chö̧ji̧ma, Chuluwo̧ ötjönö weitjö̧, yöbawö chö̧jobe, ötjö chomukwati̧maökö. Ja̧danö, chuluwo̧ yöbawi jö̧ba̧lö weinobetjö̧, yötawökötjö̧ma jwiinö sulena ötjönöma chömöledö.

¹⁷ Jau chömöledö, ötjöda otiwanö omukwatö yöbawö chö̧jitjö̧ma, Aaa, Dios, kwimidotjö jö̧ba̧lö atebo jö̧ta̧lena. Jo̧kwaijayonö, ötjöda omukwatö yötawokobe chömöledö, Diosda ötjönö weinobe, ju'wedönö yökawo jö̧ba̧lö. Ja̧danö, chuluwo̧ wei̧da ja̧bö chö̧jobetjö̧, chotido jö̧ta̧li̧da chotidobe chömöledö.

¹⁸ Ja̧danö, chotidi̧ mikwa tjimidi̧ma ¿diya̧da chömöledö? Baikwö yötawa: Jwiinö chösödobe mikwa jwiinö otiwa jawa wene yötawobö chömöledö. Ja̧danö, ökwödö yötawawö̧nötjö chemo jö̧ta̧li̧ jawa emökönö chö̧jobö jwiinö chösödobe. Ja̧danö, jejenö ja̧bö chö̧jobö jwiinö chösödobetjö̧, ja̧ emökönö chö̧ji̧da ötjönö tjimidi̧danö ji̧ma ichejekwa chömöledö.

¹⁹ Jau chömöledö, ötjöma ju'wedö tjömöayo̧bö̧kö̧sa ötjöma, ötjönö wetjo jö̧ba̧lö. Jo̧kwaijayonö, tjö̧möayo̧bö̧kö̧ chö̧jijayonö, okobe deinö tjömöayo̧danö batibanö ja̧tajabe chömöledö, ba̧jekwadönö tjö̧jibobö pjabatö.

²⁰ Ja̧danö, judío jojodökwö chotidenama, judío jojodö ja̧tji̧danö ja̧tobe, jobadönö tjö̧jibanö pjatato jö̧ba̧lö. Ja̧danö Dios weina Moisés iwȩyudina ja̧tjo jö̧ba̧ladökwö chö̧jenama, jobadökwö Moisés iwȩyudina ja̧bö chö̧jobe. Jau chömöledö, ötjöma Moisés iwȩyudina ja̧to jö̧ta̧lököjayonö jobadönö tjö̧jibanö pjabatö, jobadökwö Moisés iwȩyudina ja̧bö chö̧jobe.

²¹ Ja̧danö, judío jojodöböködökwö chotidenama, judío jojodöböködödanö ja̧tobe, ja̧danö jobadökwö Moisés iwȩyudina ja̧bökönö chö̧jobe, jobadönö tjö̧jibanö pjabatö. Aaa, chömöledö, ja̧ Moisés iwȩyudina ja̧bökönö chö̧jobe jö̧ta̧laja̧ma, Dios wei̧ ja̧bökönö chö̧jobe jö̧ba̧lö jö̧ta̧lökötö, Cristo wei̧ ja̧bö chö̧jobetjö̧.

²² Ja̧danö, tjo̧'wo̧ luwo̧nö me'dawadökwö chö̧jenama, cho̧'wo̧ luwo̧nö me'dawo̧danö ja̧tobe, jobadönö tjö̧jibanö pjabatö. Jau chömöledö, okobe deinö jojodökwö chö̧jenama, jobadödanö ja̧tobe, jobadönö tjö̧jibanö pjabatö. Okobe jwiinö ja̧to jö̧ta̧li̧ ja̧tobö chisakwobe chömöledö, jobadötjö ju'wedö tjö̧jibo jö̧ba̧lö.

²³ Jau chömöledö, okobe jwiinö ja̧bö chö̧ji̧ yötawaja̧ma, okobe deinö otiwa jawa wene tja̧ja̧kwo jö̧ba̧lö ja̧bö chö̧jobe. Ja̧danö jobadö otiwa jawa wene a̧ja̧kwö ösödadö otiwa jawa tjemakwa̧ma, ötjöbi jobadökwö ja̧ jawa chemo jö̧ba̧lö, ja̧bö chö̧jobe chömöledö.

²⁴ Chömöledö, baikwö wanedö yötawa, carrera ö'öbakwawadönö wanedö yötawa: Carrera ö'öbakwawadöma, ba̧jekwadö ö'ötjakwawobe, abönö ichibo̧ jawa tjemo jö̧ba̧lö, ¿jö̧tö? Jau chömöledö, abönö ichibo̧da emijayonö, okobe deinö ö'ötjakwawobe. Ja̧danö, kwo̧'wo̧ luwo̧ jawa baikwö wanedö yötawa: Jo̧ba abönö ichibo̧ ö'öakwawi̧danö ö'öbakwawaduwi, Dios ökwödönö iyakwa̧ kwemaduwo jö̧ba̧lö.

²⁵ Jau chömöledö, okobe deinö böjȩ alewakwawa alewadöma, otiwanö alewadö batjibo jö̧ba̧lö jwaikwöda pjaati̧ jawada ja̧tjobö isakwadö, tjösödi̧ jawa ja̧bökönö, ¿jö̧tö? Jejenö ja̧badö jobadöma, tupakwö tjalewenama, abönö tjichibobö, ¿jö̧tö? Jau chömöledö, abönö ichibo̧ ubutjawaka pjolowachakwaka tjemo jö̧ba̧lö, jejenö ja̧badö, ¿jö̧tö? Jo̧kwaijayonö, wanedö yötawa do̧'wo̧ luwo̧ jawama: Ökwödöma otiwaka, pjolowachököka Dios iyakwaka demo jö̧ba̧lö, ö'öbakwawadösa chömöledö.

²⁶ Baikwö wanedö yötawa ötjö ja̧bö chö̧ji̧ma chömöledö: Chö̧ji̧ma, jelobebi, jelobebi ö'öbakwawö chö̧jokobe chömöledö, jweinö chichibo jö̧ba̧lö, ö'öbakwawö chö̧jobe ichejekwa, Dios iyakwa̧ chemo jö̧ba̧lö chömöledö. Ja̧danö, 'do'dobakwawadönö baikwö wanedö yötawa: Ötjöma 'do'dobakwawo̧danö chichejekwa, ja̧danö 'do'dobö chö̧ji̧ma, jwa̧lȩ'epjoda 'do'dochakwawökö, chöpöjojonöda 'do'dochakwawobe, jo̧banö chujuluwo jö̧ba̧lö, wanedö yötawa chömöledö.

²⁷ Jau chömöledö, wanedö yötawa: Chiteba'o kwakwabö chöba̧ja̧dobedanö ichejekwa, jwaikwöda chösödi̧danö chiteba'o ja̧o jö̧ba̧lö. Jau chömöledö, jejenö ja̧bö chö̧jobe, ju'wedönö yötawaja̧ ikena, ötjöda waekwo̧ batibapji jö̧ba̧lö.