1 Corintios 8 - Dios Iwene

O̧'wo̧ jawa iyawa kwakwawa Pablo yöawina wene

¹ Ja̧danö, ju'wedö tjösödawö̧ o̧'wo̧ jawa iyawa kwakwawa yötawa. Isabenö, ökwödötjö ju'wedö yökawaduwi̧danö, ökwödöma isabenö wene jawa waisadösa chömöledö. Ja̧danö, baikwö yötawa: Nöinö döwaisi̧ma, Aaa, waisadösa jö̧ba̧lö domukwatobö ja̧obe ichejekwa, jo̧kwaijayonö dömöledö Jesúsnö ösödadönö tjo̧'wo̧ luwo̧nö tjöda̧peachobö pjaatokobe. Jo̧kwaijayonö dömöledö Jesúsnö ösödadönö ösödabikwawö dö̧jitjö̧ma, jobadönö döda̧pedena.

² Jau chömöledö, Aaa, waisadösa jö̧ba̧lö omukwatadöma, isabenö tjöwaiso jö̧tja̧li̧ma wajwibadö chömöledö.

³ Jo̧kwaijayonö Diosnö ösödo̧ma, Dios öwaisökwe ö̧jobe jo̧bama.

⁴ Ja̧danö, baikwö yötawa ju'wedö tjösödawö̧ o̧'wo̧ jawa iyawa kwakwawa jawama, ja̧ kwakwawa dukwojobö dukwokojobö jö̧ba̧lö. Ökwödöma döwaisobe, o̧'wo̧ jawama, Diosbö̧kö̧ jö̧ba̧lö. Ja̧danö, Diosma bakwo̧da, jelo̧ma deobe jö̧ba̧lö döwaisobe chömöledö.

⁵ Jau chömöledö, ju'wedö tjomukwatobe, Aaa, duluwedö Diosbedö ba̧jekwadö tjö̧jobe mölejȩbebi, böjȩnöbi jö̧ba̧lö. Ja̧danö, jejenö jojodö tjösödawö̧ ba̧jekwadö tjö̧jobe.

⁶ Jo̧kwaijayonö ökwödö Jesúsnö ösödadöma Duluwo̧ Diosma bakwo̧da, Abe'do Diosda. Jo̧bada okobe jwiinöbi, okobe deinöbi otidina, ja̧danö jo̧ba ösödi̧danö dö̧jo jö̧ba̧lö döjobe. Ja̧danö, Duluwo̧ Jesucristoma bakwo̧da. Jo̧banötjö okobe jwiinö otidinobe Diosma, ja̧danö jo̧ba Jesucristotjöda isabenö ja̧kwawa dujuna̧lobe.

^7-8 Jau chömöledö, döwaisa, jojodö tjösödawö̧ o̧'wo̧ jawa iyawa kwakwawama sulökö, o̧'wo̧ jawama Diosbö̧kö̧obetjö̧. Ja̧danö, Dios ökwödönö otiwanö edo jö̧ba̧lö ja'yubebi mikwawokobe kwakwawama jö̧ba̧lö döwaisobe. Ja̧danö, kwakwawama pjabatöbi pjaatokobe, ja̧danö suli̧ waedöbi suli̧ waedokobe do̧'wo̧ luwo̧ jawama jö̧ba̧lö döwaisobe. Jo̧kwaijayonö, jejenö ökwödö döwaisijayonö, ju'wedö Jesúsnö ösödadöma ina ja̧ wene wajwibadö chömöledö. Jobadöma Jesúsnö tjösödakwa̧ abönö, Aaa, bite o̧'wo̧ jawama Diosbo̧ jö̧ba̧lö tjomukwatinobe. Ja̧danö, jejenö la'akatjöda tjomukwatinobetjö̧, babebi ja̧ kwakwawa tjukwobö öpöjödadö, biya̧ o̧'wo̧ jawa iyawa kwakwawa dukwitjö̧ma, o̧'wo̧ jawa dösödena ichejekwa jö̧ba̧lö. Jau chömöledö, tjo̧'wo̧ luwo̧nö ina tjöda̧peachokobetjö̧, tjomajadenö Aaa, dukwitjö̧ma suli̧ waedena jö̧ba̧lö omukwatadö.

⁹ Jau chömöledö, kwöwaisaduwa, wene jwiinö okobe jwiinö kwukwaduwena jö̧ba̧lö. Jo̧kwaijayonö, jejenö kwöwaisaduwijayonö, te'ada̧lönö omukwatö kwö̧jaduwo, ju'wedö Jesúsnö ösödadönö ina tjo̧'wo̧ luwo̧nö da̧peachöködönö suli̧ kwöwaedaduwapji jö̧ba̧lö, ja̧danö sulabenö ja̧tjobö ja̧köbaduwapji jö̧ba̧lö.

¹⁰ Jau chömöledö, baikwö yötawa: Bakwo̧ ina o̧'wo̧ luwo̧nö da̧peachö̧kö̧ma, ökwönö edena waiso̧nö. O̧'wo̧ jawa ösödakwawejutjö ja̧ iyawa kwakwawa kwukwobema edena. Ja̧danö, jo̧ba iteda omajadenö chukwoko, Dios öpöjödi̧, jö̧ba̧lö omukwatijayonö, kwukwobe edö jo̧babi ukwena.

¹¹ Ja̧danö, jejenö ökwöma, Aaa, waiso̧sa jö̧ba̧lö kwukwobetjö̧, kwöwaisi̧ma kwöjawo̧ Jesúsnö ösödo̧nö suli̧ waedena ichejekwa chömöledö, Dios öpöjödi̧, jö̧ba̧lö, ukwobö ja̧köbobetjö̧. Jau chömöledö, jo̧banö ösödö Cristoma midawö woinajayonö, ökwöma, Aaa, waiso̧sa jö̧ba̧lö omukwatö kwukwobetjö̧, jo̧banö suli̧ kwöwaedena.

¹² Ja̧danö, jejenö tjo̧'wo̧ luwo̧nö da̧peachöködönö suli̧ kwöwaedaduwobetjö̧, ja̧danö tjomajadenö, Aaa, biya̧ma suli̧ jawa jö̧ba̧lö tjomukwati̧ jawa ja̧tjobö ja̧köbaduwobetjö̧, Cristonö suli̧ kwöwaedaduwobedanö ichejekwa chömöledö, Dios öpöjödi̧ jawa ja̧bö.

¹³ Jejenöobetjö̧, baikwö yötawaduwakwö chömöledö: Jejenö chu̧kwa kwakwawama chöjawo̧nö töbö meobö ja̧ena jö̧ba̧lö chomukwatitjö̧ma, ja'yubebi itebiya chukwökena wotenanö baibanö, chöjawo̧nö meobö ja̧tapji jö̧ba̧lö.