1 Corintios 7 - Dios Iwene

Tji̧lȩkwa̧mu jawa Pablo yöawina wene

¹ Chömöledö, ökwödö Corintio jojodöma ötjönö kwialusöja kwiwȩyudinaduwobe, ötjönö abebö a̧ja̧kwö, ja̧danö babema abebö a̧ja̧kwö kwiwȩyudina jawa chatadocha. Bakwo̧ ilekwonö emökönö ö̧jitjö̧ma, sulökö, otiwena,

² jo̧kwaijayonö tji̧lȩkwa̧muböködökwö sulabenö ja̧tjapji jö̧ba̧lö, ömadöma bakwo̧nökwena tjilekwokwena tjemo, ja̧danö ya̧döma bakwujukwena tjilekwekwena tjemo.

³ Ja̧danö, ilekwonö jo̧ma, ilekwokwö bakobe baiboböma öpöjödoko chömöledö, ilekwojobetjö̧ jobujukwö baibobö jo̧be. Ja̧danö jilekwenö ju̧juma, jilekwekwö bajiboböma jöpöjödoko, jilekweobetjö̧ jo̧bakwö bajibobö jo̧be.

⁴ Jau chömöledö, ilekwonö jo̧ma, itedamaö̧kö̧ iteba'o luwo̧ma, ilekwoda iteba'o luwujuma, jo̧bakwö bakobe bajibo jö̧ba̧lö, ja̧danö jilekwenö ju̧juma, isujudamaökö jiteba'o luwujuma, jilekweda jiteba'o luwo̧ma, jobujukwö bakobe baibo jö̧ba̧lö.

^5-6 Jo̧kwajabetjö̧, kwi̧lȩkwa̧mubedökwö bakobe bakibaduwoböma kwöpöjödaduwa chömöledö. Chömöledö, ökwödötjö ju'wedö tji̧lȩkwa̧munö ju̧kwadöma kwomukwataduwena, jwaikwöda Diosnö abebö chö̧jo jö̧ba̧lö, ö̧tö̧chödanö ja'yubenö lekwe chilekwokwö bakobe babibökönö jwaikwöda Diosnö abeböda chö̧jobö chösöda jö̧ba̧lö kwomukwataduwena. Jejenö ja̧baduwi jö̧ba̧löma wetökö chömöledö, jo̧kwaijayonö jejenö kwösödaduwitjö̧ma, baikwö yötawa. Ökwöbi, kwilekwobi bakobe jejenö ö̧tö̧chödanö bakobe babibökönö Diosnö abebö kwö̧jaduwobö kwösödaduwitjö̧ma, jo̧kwada, kwösödaduwi̧danö ja̧köbena. Jo̧kwaijayonö lekwema kwilekwokwö babibökönö kwö̧jaduwa chömöledö, Awetja sulabenö ja̧köbaduwojobö ja̧iawö̧, sulabenö kwösödaduwi̧danö kwilekwobökujukwö ja̧köbapji jö̧ba̧lö.

⁷ Ötjö chedemi, okobe deinö ötjödanö tji̧lȩkwa̧mu debadö tjö̧jitjö̧ma, chösödo jö̧ta̧lena. Jo̧kwaijayonö Diosma bakwo̧nökwena wainökwena iyo̧ ökwödönöma chömöledö. Ju'wedönö tji̧lȩkwa̧mu deinö emökönö tjö̧jo jö̧ba̧lö iyo̧, ja̧danö ju'wedönö tji̧lȩkwa̧munö emö tjö̧jo jö̧ba̧lö iyo̧ chömöledö.

⁸ Chömöledö, babema ömadö tji̧lȩkwa̧munö wobekwinadönöbi, ya̧dö tji̧lȩkwa̧munö wobekwinadönöbi lȩbebö yötawa. Jobadö ötjödanö tji̧lȩkwa̧munö emökönö tjö̧jitjö̧ma, otiwena.

⁹ Jo̧kwaijayonö ilekwo wobekwina isujunö ja̧bökönö ö̧jobö jwiitjö̧ma, ja̧danö jilekwe wobekwinuju iso̧nö ja̧bökönö jö̧jobö jwijitjö̧ma, yemidanö tjemobö jo̧be. Jau chömöledö jejenö tji̧lȩkwa̧munö tjemobö otiwa, sulabenö 'da̧'da̧akwawa tjomukwatapji jö̧ba̧lö.

¹⁰ Ja̧danö, tji̧lȩkwa̧munö ba̧jadönö baikwö weawa yötawa, ötjö weti̧maökö, Duluwo̧ weinada yötawa: Bakwuju jilekwenö kajatiboko.

¹¹ Jo̧kwaijayonö, bakwuju jilekwenö kajatibitjö̧ma, jelo̧nö jemoko. Jelo̧nö emökönö jo̧dawa'ye jö̧jenabi, ajayi jilekwekwö tjejachajenabi. Ja̧danö, bakwo̧ ilekwonö bo̧ma, ilekwonö kaatiboko.

¹² Ja̧danö, Jesúsnö ösödadö tji̧lȩkwa̧mu Jesúsnö öpöjödadönö ba̧jadönö yötawa. Jobadönö Duluwo̧ma yöawinokobe, ja̧danö ötjöma weawa yötawa: Bakwo̧ Jesúsnö ösödo̧ ilekwo Jesúsnö öpöjödujuma ina jo̧bakwö jö̧jobö jösöditjö̧ma jobujunö kaatiboko.

¹³ Ja̧danö bakwuju Jesúsnö ösöduju jilekwe Jesúsnö öpöjödo̧ma ina jobujukwö ö̧jobö ösöditjö̧ma, jo̧banö kajatiboko.

^14-15 Jo̧kwaijayonö, bakwo̧ Jesúsnö öpöjödo̧ma ilekwo Jesúsnö ösödujukwö ja̧kwawa öpöjöditjö̧ma, ja̧danö bakwuju Jesúsnö öpöjödujuma jilekwe Jesúsnö ösödo̧kwö ja̧kwawa jöpöjöditjö̧ma, jo̧kwada, ölakwabikwawö tjö̧japji jö̧ba̧lö 'da̧bachibö tji̧'yena. Jau chömöledö, ölakwabikwawa jwiinö dö̧jobö jwöinobe Diosma. Ja̧danö, Jesúsnö öpöjödadö tji̧lȩkwa̧mu Jesúsnö ösödadökwö tjö̧jobö tjöpöjöditjö̧ma, 'da̧bachibö tji̧'yena. Jo̧kwaijayonö tji̧lȩkwa̧mukwö tjö̧jobö tjösöditjö̧ma, otiwa, jobadönö katjatiboko Jesúsnö ösödadöma. Ja̧danö, bakwuju Jesúsnö ösöduju jilekwema Dios ömöledöso̧danö ichejekwo̧, ja̧danö bakwo̧ Jesúsnö ösödo̧ ilekwoma, Dios ömöledösujudanö ichejekwuju. Jau chömöledö, jejenö jo̧be, jobadö tji̧tji̧mu Diosnö öpöjödadö tji̧tji̧mudanö tjichejekwapji jö̧ba̧lö. Ja̧danö, Dios ömöledödanö tjichejekwobetjö̧, tji̧tji̧munöbi edö ösödo̧ Diosma, chömöledödanöbedö jö̧ba̧lö.

¹⁶ Jau, Jesúsnö ösöduju jilekwe Diosnö öpöjödo̧nö ju̧junö baikwö yötawa: Kwilekwekwö kwö̧jitjö̧ma Diosma ökwönötjö kwilekwenö ö̧jibinö pjaatena chömöledösuju. Ja̧danö, Jesúsnö ösödo̧ ilekwo Jesúsnö öpöjödujunö jo̧nö baikwö yötawa: Kwilekwokwö kwö̧jitjö̧ma Diosma ökwönötjö kwilekwonö jö̧jibinö pjaatena chömöledöso̧.

^17-18 Jau chömöledö, okobe deinö ko̧ko̧kwö tjö̧bajitenia Jesúsnö ösödadönö yöbawiachi̧danö yötawaduwakwö: Okobe deinö Dios ökwödönö bakwo̧nökwena kwö̧jaduwobö iyinadanö kwö̧jaduwo. Ja̧danö Dios ökwönö Jesúsnö kwösödobö jwöinenama, kwötade bajalesado̧ 'wibekwo̧ kwö̧jinatjö̧ma, kwötade bajalesado̧ 'wibekwö̧kö̧ bakibobö isakwökönuwi. Ja̧danö Dios ökwönö jwöinenama, kwötade bajalesado̧ 'wibekwö̧kö̧ kwö̧jinatjö̧ma, kwötade bajalesado̧ 'wibekwö lobökönuwi.

¹⁹ Jau chömöledö, bakwo̧ ötade bajalesado̧ 'wibekwo̧ ö̧jitjö̧böbi, 'wibekwö̧kö̧ ö̧jitjö̧böbi, bakweminö 'ya̧, tjötade bajalesado̧ 'wibekwö loawama mikwawokobetjö̧. Jau chömöledö, Dios wei̧ a̧ja̧kwö ja̧awada mikwawi̧ma, tjötade bajalesado̧ 'wiekwamaökö.

²⁰ Jau chömöledö, 'wibekwö̧kö̧ kwö̧jayi Jesúsnö kwösödobö Dios jwöinatjö̧ma, 'wibekwö̧kö̧ ina kwö̧jo, ja̧danö 'wibekwo̧ kwö̧jayi jwöinatjö̧ma, 'wibekwo̧ ina kwö̧jo.

²¹ Ja̧danö, tjömöayo̧ baibanö tjeminökwe kwö̧jonö Dios ökwönö jwöinatjö̧ma, kwo̧'wo̧ tjo̧acha, ina kwuluwo̧ ömöayo̧ kwö̧joböma sulökö. Ja̧danö kwuluwo̧ ömöayo̧ ina ja̧nö, Diosnö ösödö kwö̧jo. Jo̧kwaijayonö kwuluwo̧ ömöayo̧ kwö̧ji̧tjö lakebobö ji̧tjö̧ma, otiwanö lakebo.

²² Jau chömöledö, bakwo̧ jelo̧ ömöayo̧ Dios jwöinökwema, wamenö uluwo̧ ömöayo̧ ö̧jijayonö, o̧'wo̧ luwo̧nö uluwo̧ wei̧tjö Dios laebinökwedanö ichejekwa. Ja̧danö, jelo̧ ömöayo̧bö̧kö̧ Cristo jwöinökwema, Cristo ömöayo̧ baibanö jo̧.

²³ Jau chömöledö, Diosma mikwanö midö eminobe ichejekwa ökwödönöma jo̧bada ömöayedö badibanö, ¿jö̧tö? Ja̧danö, Diosma ida̧ökö ökwödönö midö eminobetjö̧, jelo̧ ömöayedö bakibaduwanö kwiyawaduwoko chömöledö.

²⁴ Jau chömöledö, ja̧ wame jawa nöinö omukwatökönaduwi, ja̧ wame jawa kwöbalewachaduwo jö̧ba̧lö. Ina ida̧ökö wamenö kwö̧jinaduwi̧danö ja̧nö, Diosnö ösödö kwö̧jaduwo.

²⁵ Ja̧danö tji̧lȩkwa̧munö debadönöbi abebö a̧ja̧kwö kwiwȩyudinaduwobe, tji̧lȩkwa̧munö tjemobö otiwojobö, sulojobö jö̧ba̧lö. Duluwo̧ jobadönö wei̧ma jwita, kwi̧lȩkwa̧munö emaduwi, emökönuwi jö̧ba̧lö. Ja̧danö, jejenö Duluwo̧ wei̧ jwitobetjö̧, ötjö chomukwati̧ yötawaduwakwö. Jau chömöledö, Duluwo̧ma lȩlö̧jinö ötjönö edö pjaatinobe, jweinö yöbawo̧ batibanö. Ja̧danö, jweinö yöbawo̧ chö̧jobetjö̧, biya̧ chomukwati̧ kwösödaduwobö jo̧be.

²⁶ Baikwö yötawa: Babe möle baledi̧ jawa omukwatö chedemi bakwo̧ babe möle ö̧ji̧danö tupakwöbi ö̧jobö otiwena.

²⁷ Ja̧danö, kwilekwonö kwujuna̧litjö̧ma, jobujunö kabatökönuwi. Ja̧danö, kwilekwo deköbitjö̧ma, kwilekwonö kwemobö isakwökönuwi.

²⁸ Jejenö yöta̧li̧ma, kwilekwonö kwemobö sula, Dios öpöjödi̧ jö̧ba̧lö yöta̧lökö. Ja̧danö, kwilekwonö kwemitjö̧ma, ja̧danö jilekwe debujuma jilekwenö jemitjö̧ma, sulökö, Dios öpöjödökö. Yöta̧laja̧ma baikwö yötawa: Babe baledi̧ jawa baledobetjö̧, tji̧lȩkwa̧munö juna̧ladöma böjȩnö ja̧nö nöinö wene tjujuna̧lakwedö. Ja̧danö jejenö wene baledapji jö̧ba̧lö, kwilekwonö emökönö kwö̧jitjö̧ma otiwena jö̧ba̧lö yötawa.

²⁹ Jau chömöledö, ja̧ yötawaja̧ma baikwö labebö lobö yötawa: Ökwödö böjȩnö dö̧ji̧ma juluwanö 'dö̧ibakobe. Ja̧danö, böjȩnö dö̧ji̧ juluwanö 'dö̧ibakobetjö̧, jwaikwöda böjȩnö dö̧ji̧ jawada omukwatö dö̧joko chömöledö, tupakwö dö̧jakwa̧ omukwatö dö̧jo. Ja̧danö, ömadö tji̧lȩkwa̧munö juna̧ladöma, tji̧lȩkwa̧mu debadödanö ichejekwö jwaikwöda Dios wei̧ ja̧bö tjö̧jo.

³⁰ Ja̧danö budekwadöma, budekwöködödanö ichejekwadö tjö̧jo, böjȩ jawada chubudekwa jö̧ba̧lö. Ja̧danö tjo̧'wo̧ ösöwanö ju̧kwadöma, tjo̧'wo̧ ösöwanö ju̧kwöködödanö tjö̧jo, böjȩ jawada cho̧'wo̧ ösöwanö chö̧ja jö̧ba̧lö. Ja̧danö tea emadöma, tea jwibadödanö ichejekwadö tjö̧jo, mikwa jwii̧ böjȩ jawa jö̧ba̧lö.

³¹ Ja̧danö böjȩ jawa otidadöma, böjȩ jawa otidöködödanö ichejekwadö tjö̧jo, böjȩ jawa chotidi̧ma nöinö mikwawökö jö̧ba̧lö. Jau chömöledö, böjȩbi, okobe jwiinö böjȩ jawabi juluwanö 'dö̧ibakobe, jo̧kwajabetjö̧ jwaikwöda böjȩ jawa omukwatöködö kwö̧jaduwo,

³² ja̧danö böjȩ jawa kwo̧'wo̧ tjo̧kekwaduwoko chömöledö. Ja̧danö, tji̧lȩkwa̧munö juna̧ladönöbi, debadönöbi baikwö yötawa: Bakwo̧ ilekwonö debo̧ma, jwaikwöda Duluwo̧ wei̧ jawada otidobö jo̧be, Duluwo̧ ösödi̧ jawada jwaikwöda ja̧bö ö̧jo jö̧ba̧lö.

³³ Jo̧kwaijayonö ilekwonö juna̧lo̧ma, böjȩ jawabi omukwatobö jo̧be, ilekwo jösödi̧ jawabi ja̧o jö̧ba̧lö.

³⁴ Ja̧danö, ilekwonö juna̧lo̧ma, dötölatajanö omukwato̧ ichejekwa, Duluwo̧ ösödi̧ jawabi, ilekwo jösödi̧ jawabi ja̧bö ö̧jo jö̧ba̧lö. Isuju jilekwenö wobekwinujubi, jilekwenö ina emökujubi ja̧danö. Jilekwe deobetjö̧, jwaikwöda Duluwo̧ wei̧ jawada jomukwatobö jo̧be. Ja̧danö, jo̧'wo̧ luwo̧ jawabi, jiteba'o jawabi, jwaikwöda Duluwo̧ wei̧ jawa otiduju bajibanö jö̧jobö jo̧be jilekwe debujuma. Jo̧kwaijayonö, jilekwenö juna̧lujuma, böjȩ jawabi omukwatuju, jilekwe ösödi̧bi ja̧jo jö̧ba̧lö.

³⁵ Chömöledö, ja̧ tji̧lȩkwa̧munö juna̧ladönöbi, debadönöbi yötawaja̧ma, weawadanöma yötawökö, kwilekwonö, ja̧danö kwilekwenö emökönuwi jö̧ba̧löma. Sule ökwödönö pjatato jö̧ba̧lö yötawaduwakwö chömöledö, otiwa jawa ja̧bö kwö̧jaduwo jö̧ba̧lö, ja̧danö jwaikwöda Duluwo̧ wei̧ jawa ja̧bö kwö̧jaduwo jö̧ba̧lö.

³⁶ Ja̧danö, tji̧lȩkwa̧munö debadönö, tupakwö tjemakwawö̧nö yöbawö juninadönö yötawa. Bakwo̧ Aaa, tupakwö bisunö chemocha jö̧ba̧lö yöbawö juninama, jwaikwöda Duluwo̧ wei̧ ja̧bö ö̧jo jö̧ba̧lö, ilekwonö emokobö omukwatena. Jo̧banö baikwö yötawa: Omajadenö omukwati̧danö ja̧obö jo̧be. Aaa, chemakwuju jö̧ta̧lokonö chemökötjö̧ma, jobujunö sulabenö ja̧tena jö̧ba̧lö omukwatitjö̧ma, ilekwo bajibanö emobö jo̧be. Ja̧danö, jobujukwö bakobe baibo jö̧ba̧lö, nöinö jobujunö emobö ösöditjö̧ma, wene jwia, jobujunö emobö jo̧be ilekwo bajibanö. Jejenö emoböma öpöjödö̧kö̧ Diosma chömöledö.

³⁷ Jo̧kwaijayonö ju'wedöma wetjökökwe, jo̧bada iteda omajadenö ösödi̧danö, chilekwonö chemoko jö̧ba̧lö omajadenö omukwatitjö̧ma, otiwanö jobujunö emökena.

³⁸ Ja̧danö, baikwö yötawa: Bakwo̧ bisunö tupakwö chemocha chilekwo bajibanö jö̧ba̧lö yöbawö ujuninokonö ilekwo bajibanö emitjö̧ma, otiwa jawa ja̧bo̧. Ja̧danö, ilekwonö emökönö jo̧ma, o̧penönö otiwa jawa ja̧bo̧.

³⁹ Jau chömöledö, bakwuju jilekwenö bu̧juma, jilekwe ina ö̧jayi, jo̧bakwöda jö̧jobö jo̧be. Jo̧kwaijayonö, jilekwe woitjö̧ma, jelo̧nö jemena. Ja̧danö, Jesúsnö öpöjödo̧nö jemoko, Jesúsnö ösödo̧nöda jemobö jo̧be. Jau chömöledö, jelo̧nö jemobö jösöditjö̧ma, wene jwia.

⁴⁰ Jo̧kwaijayonö, chedemi jilekwenö emökönö jö̧jitjö̧ma, ja̧tjö o̧penönö jo̧'wo̧ ösöwanö jö̧jena jobujuma, jilekwenö emökönö. Jobekwö ötjö chomukwati̧ma yötawajabe chömöledö, ja̧danö chedemi Dios O̧'wo̧ Luwo̧bi jejenö omukwato̧ ötjö chomukwati̧danö.