1 Corintios 6 - Dios Iwene

Ökwödötjö wene jȩnama, Jesúsnö öpöjödadönö kwujunaduwoko ökwödö jawa lȩekwa yöbawadö batjibanö jö̧ba̧lö Pablo yöawina wene

¹ Chömöledö, ökwödötjö bakwo̧ iteda ömöledöso̧ Jesúsnö ösödo̧kwö wene ujuna̧lakwawenama, Diosnö öpöjödadötjö lȩekwa jojodö tjöba a'otjö ja̧nöma yötjawoko. Jau chömöledö, jobadöma Dios ömöledöda tjöba a'otjö ja̧nö yötjawobö jo̧be chömöledö, Dios ömöledöda pjabatö lȩekwa yötjawobö.

² Kwöwaisaduwa chömöledö, 'dö̧ibaji̧ möle baledakwa̧ma. Ökwödö Dios ömöledöda lȩekwa jojodö baibanö böjȩ ju̧kwadönö yödawakwedösa, ja̧tji̧ma otiwojobö sulojobö jö̧ba̧lö, ¿jö̧tö? Ja̧danö ökwödö Jesúsnö ösödadöda 'dö̧ibaji̧ möle böjȩ jojodönö lȩekwa yödawakwedö kwö̧jaduwobetjö̧, babe jo̧kwada jawa lȩekwa kwöwaisaduwena chömöledö.

³ Ja̧danö, kwöwaisaduwa chömöledö, ökwödö Dios ömöledöda 'dö̧ibaji̧ möle ángelesdönö yödawakobe, ángelesdö ja̧tji̧ma otiwojobö sulojobö jö̧ba̧lö, ¿jö̧tö? Ja̧danö, ángelesdö ja̧tji̧ otiwojobö sulojobö jö̧ba̧lö yödawakwedö dö̧jobetjö̧, babe böjȩnö dö̧ji̧ jawa lȩekwabi yödawobö jo̧be chömöledö.

⁴ Jo̧kwajabetjö̧, Jesúsnö ösödadökwö ju'wedö Jesúsnö ösödadökwö wene tjujuna̧lakwawenama, Diosnö öpöjödadönö kwujunaduwoko, ökwödö jawa lȩekwa jojodö batjibanö. Diosnö öpöjödadöma ökwödötjö wainö ju̧kwadö chömöledö.

⁵ Jau chömöledö, jejenö ja̧köbaduwi̧ omukwatö, kwötabakwaduwo chömöledö. Ökwödö Jesúsnö ösödadötjö, ¿bakwo̧bi waiso̧ ö̧jokobeji̧, Jesúsnö ösödadökwö ju'wedö Jesúsnö ösödadökwö wene lȩekwa yöawo jö̧ba̧löma?

⁶ Ö̧jena chömöledö, jo̧kwaijayonö jo̧ba Jesúsnö ösödo̧ öba a'otjö yöbawökönö, Diosnö öpöjödadötjö lȩekwa jojodö tjöba a'otjö ja̧nö yökawaduwobe ökwödö Jesúsnö ösödadöma, jobadö Diosnö öpöjödadöda lȩekwa yötjawo jö̧ba̧lö.

⁷ Jau chömöledö, Jesúsnö öpöjödadötjö lȩekwa jojodö tjöba a'otjö ja̧nö ökwödö Jesúsnö ösödadö jawa wene yökawaduwenama, kwi̧sebaduwobe, waekwadöja jö̧ba̧lö, Dios ömöledö ja̧bö tjö̧jo jö̧tja̧li̧danö ja̧bö kwö̧jaduwokobetjö̧. Jau chömöledö, kwömöledöso̧ Jesúsnö ösödo̧ ökwönö sulabenö ja̧ijayonö, jo̧kwada jö̧ba̧lö kwo̧'wo̧ 'dibachibö Jesúsnö öpöjödadötjö lȩekwa jojodönö yöbawökönö kwö̧jitjö̧ma, babe ja̧köbi̧tjö o̧penönö otiwo jö̧a̧lena. Ja̧danö, ökwönötjö önaukwijayonö, jo̧kwada jö̧ba̧lö kwo̧'wo̧ 'dibachibö Jesúsnö öpöjödadötjö lȩekwa jojodönö yöbawökönö kwö̧jitjö̧ma, babe ja̧köbaduwi̧tjö o̧penönö otiwo jö̧a̧lena.

⁸ Jejenö otiwo jö̧a̧lena chömöledö, jo̧kwaijayonö, ökwödöma ju'wedönö sulabenö ja̧köbaduwobe, ja̧danö ju'wedönötjö kwönaukwaduwobe. Jau chömöledö, kwömöledö Jesúsnö ösödadönöbi jejenö sulabenö ja̧badöja.

⁹ Kwöwaisaduwa chömöledö, Diosma sulabedönö weökakobe, jo̧bakwö ja̧nö luwedö baibanö yötjawobö. Jau chömöledö, isabenö yötawaduwakwö, sulabenö alewö ja̧badöbi, ja̧danö o̧'wo̧ jawa ösödadöbi, ja̧danö tji̧lȩkwa̧muböködökwö ja̧badöbi, ja̧danö ömadö ömadökwö ja̧badöbi,

¹⁰ ja̧danö naukwabidöbi, ja̧danö idöda tjemotö jö̧ba̧lö isakwadöbi, ja̧danö 'dukwachinö owa̧ladöbi, ja̧danö ju'wedönö sulabenö yöba̧ladöbi, ja̧danö tjönaukwotö jö̧ba̧lö omöna yöba̧ladöma Dioskwö ja̧nö luwedö batjibökakwedö chömöledö.

¹¹ Ökwödötjö ju'wedöma jejenöbedö kwö̧jinaduwobe ajayinöma chömöledö, jo̧kwaijayonö Duluwo̧ Jesucristo midawö woinobetjö̧, Dios O̧'wo̧ Luwo̧ma kwusuladuwi̧ dichö loinobe, ja̧danö Dios ömöledö bakibaduwanö ökwödönö 'da̧batö ujuninobe, ja̧danö sulabe jwibadö bakibaduwanö ja̧inobe.

Kwi̧lȩkwa̧muböködökwö sulabenö ja̧bökönaduwi jö̧ba̧lö Pablo weina wene

¹² Ju'wedö Jesúsnö ösödadöma yötja̧lena, Aaa, okobe jwiinö ja̧tobö jö̧ta̧li̧ma wene jwiinö ja̧tena jö̧ba̧lö yötja̧lena. Jau, jejenö jo̧be chömöledö, jo̧kwaijayonö jejenö ja̧dobö jö̧da̧li̧ma ökwödönö pjaatökena. Ja̧danö, okobe jwiinö ja̧tobö chösödi̧ma wene jwiinö ja̧tobö ji̧jayonö, ja̧tökena, chösödi̧ma ja'yubebi chuluwo̧danö baibapji jö̧ba̧lö.

^13-14 Ja̧danö ju'wedö yötja̧lena, Aaa, kwakwawama dukwobö jo̧be, ja̧danö dukwa'woma, kwakwawa'woda jo̧be jö̧ba̧lö. Jau chömöledö, jejenö jo̧be, ja̧danö kwakwawabi, dukwa'wobi söbebö loakwo̧ Diosma. Jo̧kwaijayonö diteba'oma söbebö loökakwo̧ Diosma chömöledö. Duluwo̧ Jesús iteba'o woawatjö tjeachajinö ja̧inadanö, ökwödö diteba'obi woawatjö tjeachajinö ja̧akwo̧ Diosma iteda ujulunö. Ja̧danö, jejenöobetjö̧, omukwatökönaduwi, Aaa, putasujunö ja̧titjö̧ma chiteba'o jawadaobetjö̧ sulökena jö̧ba̧lö. Jau chömöledö, diteba'oma putabedönö ja̧do jö̧ba̧lö jö̧ka'o, Duluwo̧ ösödi̧danö ja̧do jö̧ba̧lö ja̧'o chömöledö, ja̧danö Duluwo̧ma diteba'o ite'ada̧lobe.

¹⁵ Kwöwaisaduwa chömöledö, ökwödö Cristonö ösödadöma, kwiteba'oduwi Cristo iteba'o jawa baiba'o jö̧ba̧lö, ¿jö̧tö? Jo̧kwajabetjö̧, ötjö Jesúsnö ösödo̧ma, chiteba'oma Cristo iteba'o jawaobe, ¿jö̧tö? ¿Dakwö kwomukwataduwa chömöledö, ötjöma Cristo iteba'o jawa, putasuju jiteba'o baibanö ja̧tobö otiwenaji̧ chömöledö? Ja̧maökö.

¹⁶ Kwöwaisaduwa chömöledö, bakwo̧ putasujunö ja̧bö bakobe baibitjö̧ma, jobujukwö bakwa'o baibanö jo̧ jö̧ba̧lö kwöwaisaduwobe, ¿jö̧tö? Dios iwenema öwaetjöda ja̧ wene yöawobe chömöledö, baikwö laebobe Dios iwene: Du̧ju̧taja tjö̧jijayonö, bakobe babibö bakwa'oda batjibakwedö, jö̧ba̧lö laebobe.

¹⁷ Ja̧danö, ju'wibi yötawaduwakwö: Duluwo̧kwö bakobe babibadöma, jo̧bakwö tjo̧'wo̧ luwo̧ bakwo̧da babibadö.

¹⁸ Jau chömöledö, kwi̧lȩkwa̧muböködökwö ja'yubebi ja̧bökönaduwi. Ju'wi sulabenö ja̧di̧ma, diteba'o suli̧ waedökö ji̧, jo̧kwaijayonö ilekwobökujukwö ja̧bo̧ma, iteda iteba'o suli̧ öwaedobe.

¹⁹ Jau chömöledö, kwöwaisaduwa, kwiteba'oduwima Dios O̧'wo̧ Luwo̧ eju baibina'o, ja̧danö jo̧ba Dios ökwödönö iyinökwema ökwödökwö jo̧. Jau chömöledö, ökwödöma kwö̧jaduwi̧ luwedöböködöja, Diosda kwö̧jaduwi̧ Luwo̧ma chömöledö,

²⁰ jo̧bada mikwanö midö ökwödönö eminobetjö̧. Ja̧danö, jejenö ökwödönö midö eminobetjö̧, kwiteba'oduwinö Dios ösödi̧danö ja̧bö kwösödaduwonö.