1 Corintios 5 - Dios Iwene

Corintio jojodötjö bakwo̧ sulabenö ja̧bo̧nö Pablo weina wene

¹ Chömöledö, jwiinö suli̧ jawa cha̧ja̧kwobe ökwödönö, ökwödö kwö'da̧deduwitjö bakwo̧ ilekwobökujukwö ja̧i̧ wenema. Jau chömöledö, baikwö cha̧ja̧kwinobe: Ökwödö Jesúsnö ösödadötjö bakwo̧ma iteda abe'do ilekwonö ja̧bö jo̧ jö̧ba̧lö. Jejenö jwiinö sula chömöledö, ja̧danö böjȩ jojodö Diosnö öpöjödadöbi jejenö ja̧böködö, jwiinö sula jö̧ba̧lö.

² Jejenö kwö'da̧deduwitjö baledonö, ökwödöma ina Aaa, otiwadösa jö̧ba̧lö kwomukwataduwobe chömöledö. Aaa, otiwadösa jö̧ba̧lö kwomukwataduwoböma jwia, tabakwö kwubudekwaduwobö jo̧be chömöledö. Ja̧danö, jo̧ba iteda abe'do ilekwonö ja̧bö jo̧nö kwö'da̧deduwitjö 'da̧batö kwujunaduwonö chömöledö.

^3-4 Jau chömöledö, ötjöma kwö'da̧deduwitjö detijayonö, cho̧'wo̧ luwo̧ma ökwödökwö ö̧jobe ichejekwa. Ja̧danö, jejenö ökwödökwö chö̧jobetjö̧, Duluwo̧ Jesús iminö ida̧ökö yötawajabe, jo̧ba ja̧bö ö̧ji̧ma jwiinö sula, kwö'da̧deduwitjö 'da̧batö kwujunaduwonö jo̧banö jö̧ba̧lö. Baikwö wetaduwakwö chömöledö: Ökwödö Jesúsnö ösödadöma ko̧ko̧kwaduwi, ja̧danö cho̧'wo̧ luwo̧bi ökwödökwö ko̧ko̧kwö ö̧jakobe ichejekwa. Ja̧danö, jejenö ko̧ko̧kwajadö, Duluwo̧ Jesús iminö,

⁵ jo̧ba sulabenö ja̧bö jo̧nö kwö'da̧deduwitjö 'da̧batö kwujunaduwonö, bitenö Awetja wainö sulabenö ja̧o jö̧ba̧lö. Ja̧danö, Awetja jo̧ba iteba'onö söbebö loijayonö, o̧'wo̧ luwo̧ma ö̧jibakobe Duluwo̧ Jesús yemidanö ichenama.

⁶ Chömöledö, ökwödö Aaa otiwadösa jö̧ba̧lö kwomukwataduwi̧ma otiwökö, sula. Baikwö wanedö yötawa: Ökwödöma pan otikwa waisadöja. Pan tjotidakwedöma, sule ja'yubeda ye'yeachi̧ jawa anadö, okobe jwiinö pansa'be ye'yeachobö, ¿jö̧tö? Ja'yubeda tjanijayonö, okobe jwiinö 'dukwibö ye'yeachibobe, ¿jö̧tö?

⁷ Ja̧danö, Dios öpöjödinö ja̧awama ye'yeachi̧ jawadanö ji̧ chömöledö. Jo̧kwajabetjö̧, ja̧ ye'yeachi̧ jawadanö ji̧ sulabenö ja̧awama, kwö'da̧deduwitjö 'da̧batö kwujunaduwo chömöledö, pansa'be 'yaya'be, ye'yeachi̧ jawa jwia'bedanö kwö̧jaduwobö. Jau chömöledö, Cristoma obejadanöbo̧ Diosnö iyawa baibanö midawö woinobe, Dios ökwödönö dö̧jibinö ja̧o jö̧ba̧lö. Jejenö midawö woinobetjö̧, ökwödö Jesúsnö ösödadöma isabenö sulabe jwibadöja, pansa'be ye'yeachi̧ jawa jwia'bedanö.

⁸ Ja̧danö, wanedö yötawa: Ja̧ Dios ökwödönö dö̧jibinö ja̧ina pjiesta dujunaduwo chömöledö, ja̧danö jejenö dujunenama, damötjö jawama ye'yeachi̧ ji̧ panpja̧ dukwoko. Jau chömöledö, Dios öpöjödinö ja̧awa ye'yeachi̧ jawa ji̧ panpja̧ dukwoko, sulabenö ja̧awa ye'yeachi̧ jawa ji̧ panpja̧ dukwoko. Ju'wida dukwaduwo chömöledö, ye'yeachi̧ jawa jwii̧ panpja̧da, bakwainö otiwi̧ jawa ji̧, isabenö wene ji̧ panpja̧da dukwaduwo chömöledö.

⁹ Chömöledö, belö kwialusöja ökwödönö chiwȩyudenama, ökwödönö wetijatö tji̧lȩkwa̧muböködökwö ja̧badökwö bakobe kwö̧jaduwoko jö̧ba̧lö.

¹⁰ Jejenö 'da̧bachibö kwö̧jaduwo jö̧ba̧lö chiwȩyudenama, Jesúsnö öpöjödadötjö 'da̧bachibö kwö̧jaduwo jö̧ba̧löma yötawijökötö. Jau chömöledö, Jesúsnö öpöjödadötjö tji̧lȩkwa̧muböködökwö ja̧badötjö 'da̧bachibö kwö̧jaduwo jö̧ba̧löma yötawijökötö. Ja̧danö Jesúsnö öpöjödadötjö idöda nöinö tjemotö jö̧ba̧lö isakwadötjö, ja̧danö Jesúsnö öpöjödadötjö naukwabidötjö, ja̧danö Jesúsnö öpöjödadötjö o̧'wo̧ jawa ösödadötjö 'da̧bachibö kwö̧jaduwo jö̧ba̧löma yötawijökötö. Jau chömöledö, ina böjȩnö dö̧jayi jobadö Jesúsnö öpöpödadötjö 'da̧bachibö dö̧jobö jwiobe.

¹¹ Jo̧kwaijayonö, ja̧ chiwȩyudinama, baikwö jö̧ba̧lö chiwȩyudijatö: Jesúsnö ösödadösa jö̧ba̧ladötjö jejenö sulabenö ja̧badötjö 'da̧bachibö kwö̧jaduwo. Jau chömöledö, Jesúsnö ösödadösa jö̧ba̧ladötjö ilekwobökujukwö ja̧bö jo̧tjöbi, ja̧danö Jesúsnö ösödadösa jö̧ba̧ladötjö iteda nöinö emotö jö̧ba̧lö isakwo̧tjöbi, ja̧danö Jesúsnö ösödadösa jö̧ba̧ladötjö o̧'wo̧ jawa ösödö jo̧tjöbi, ja̧danö Jesúsnö ösödadösa jö̧ba̧ladötjö ju'wedönö sulabenö yöba̧lö jo̧tjöbi, ja̧danö Jesúsnö ösödadösa jö̧ba̧ladötjö 'dukwachinö owa̧lö jo̧tjöbi, ja̧danö Jesúsnö ösödadösa jö̧ba̧ladötjö naukwabinö jo̧tjöbi 'da̧bachibö kwö̧jaduwo jö̧ba̧lö chiwȩyudijatö. Jau chömöledö, Jesúsnö ösödadösa jö̧ba̧ladötjö ju'wedö jejenö sulabenö ja̧bö tjö̧jitjö̧ma, jobadötjö 'da̧bachibö kwö̧jaduwo, kwanöbi jobadökwö ba̧nö kwökönö.

^12-13 Jau chömöledö, ötjö Jesúsnö ösödo̧ma, Jesúsnö öpöjödadönö lȩtebökö, Diosda jobadönö lȩbebo̧ chömöledö. Jo̧kwaijayonö, Jesúsnö öpöjödadönö lȩdebököjayonö, ökwödökwö bakobe ko̧ko̧kwadö Jesúsnö ösödadönö lȩdebobö jo̧be. Baikwö laebobe Dios iwene: Sulabenö ja̧bo̧nö kwö'da̧deduwitjö 'da̧batö lobaduwinö, jö̧ba̧lö laebobe.