1 Corintios 4 - Dios Iwene

Cristo webawedönö Pablo yöawina wene

¹ Chömöledö, ötjö Pablonöbi Apolosnöbi baikwö kwomukwataduwo, Cristo ömöayedö jö̧ba̧lö. Jau chömöledö, Cristoma ökwödönö iteda ömöayedönö ujuninobe Dios jawa jojodö ajayinö wajwitjina jawa wene te'ada̧ladö badibanö, ju'wedönö okwa jawa labebö lobö yödawo jö̧ba̧lö.

² Ja̧danö, bakwo̧ iteda ömöayo̧nö te'ada̧lo̧ baibanö ujunitjö̧ma, jwaikwöda uluwo̧ wei̧ ja̧bö ö̧jobö jo̧be, ömöayo̧ma, ¿jö̧tö?

³ Ja̧danö, ötjönö kwomukwataduwi̧bi, ju'wedö tjomukwati̧bi mikwawokobe ötjönöma, otiwanö chuluwo̧ wei̧ chotidojobö, chotidokojobö jö̧ba̧lö kwomukwataduwi̧ma. Ja̧danö, ötjöbi chotidi̧ yötawökö, otiwanö chotidojobö, chotidokojobö jö̧ba̧lö.

⁴ Ötjö chedemi sulabenöma ja̧tökö chömöledö, jo̧kwaijayonö ja̧ chomukwati̧ma mikwawokobe. Jau chömöledö, Diosda ötjönö yöbawo̧ma, jo̧ba wei̧ otiwanö chotidojobö, chotidokojobö jö̧ba̧lö.

⁵ Ja̧danö, Duluwo̧da yöawakwo̧obetjö̧, Duluwo̧ yöawakwa̧ abönöma, ju'wedönö yöbawökönaduwi, Aaa, Duluwo̧ wei̧ otiwanö ja̧badö, sulabenö ja̧badö jö̧ba̧lö. Jau chömöledö, Duluwo̧ ichakwa̧ möle badekwachenama, jo̧bada yöawakobe. Baikwö wanedö yötawa: Okobe jwiinö yȩa'wo okwa jawa Duluwo̧ma idejatakobe, otiwanö öwawinö baibanö, ja̧danö, jojodö tjomajadenö tjomukwati̧ i̧sebakobe Duluwo̧ma. Ja̧danö, iya̧da möleda Diosma jojodönö bakwo̧nökwena yöawakwo̧ otiwanö tjotidinama.

⁶ Chömöledö, biya̧ yötawaja̧ jawama, ökwödönö pjabatö yötawajabe. Ja̧danö, ötjönö Apolosnö wanedö yötawajabe, ökwödönö a̧ja̧kwö, ökwödöbi kwöwaisachibaduwobö Dios iwene laebi̧danö kwomukwataduwobö, ja̧danö bakwo̧nö jelo̧nötjö o̧penönö kwomukwataduwapji jö̧ba̧lö, ja̧danö ju'wedönö kwöpöjödaduwapji jö̧ba̧lö, sulabedö jö̧ba̧lö.

⁷ Jau chömöledö, ökwödöma ju'wedönötjö o̧penönö otiwadöböködöja chömöledö, ju'wedönö kwöpöjödaduwo jö̧ba̧lö. Okobe jwiinö kwujuna̧laduwi̧ma, Diostjöda ichobe, ökwödötjödamaökö, ¿jö̧tö? Ja̧danö, Diosda ökwödönö iyinobetjö̧, ¿tajawedö Aaa, ju'wedönötjö o̧penönö juna̧ladösa jö̧ba̧lö kwomukwataduwobö chömöledö? Jejenö kwomukwataduwoböma jwia chömöledö, Dios iyinada kwujuna̧laduwobetjö̧.

⁸ Chömöledö, wanedö yötawa: Ökwödö Corintio jojodöma kwomukwataduwobe, ida̧ökö okobe jwiinö do̧'wo̧ luwo̧ jawama juna̧ladösa jö̧ba̧lö. Ja̧danö Dios ökwödönö iyobö jö̧a̧li̧ma, ida̧ökö okobe jwiinö juna̧ladösa jö̧ba̧lö kwomukwataduwobe. Ja̧danö, ökwödö ökwödönö yöbawinadöma luwedö badibököjayonö, ida̧ökö la'aka luwedö babibadösa jö̧ba̧lö kwomukwataduwobe chömöledö. Jejenö kwomukwataduwi̧ma, sulabenö omukwatadöja chömöledö. Isabenö la'aka luwedö bakibinaduwatjö̧ma, chösödo jö̧ta̧linena, ökwödöbi ökwödökwö la'aka luwedö badibo jö̧ba̧lö.

⁹ Jau chömöledö, ökwödö Jesús webawedöma la'aka luwedödanö dichejekwökö. Baikwö wanedö yötawa chömöledö: Böjȩ luwedö sulabenö ja̧badönö lȩbebö, jobadönö kwabö lotjobe. Ja̧danö, kwabö lotjakwa̧ abönö, okobe deinö tjöba a'otjö junadö, ju'wedö jobadönö otjo jö̧ba̧lö. Jobadöjayedödanö dichejekwobe ökwödöma chömöledö, Diosma ökwödönö ujuninobe ichejekwa, okobe deinö jojodöbi ángelesdöbi ökwödönö edö otjo jö̧ba̧lö.

¹⁰ Jau chömöledö, Cristo ömöledödobetjö̧, wajwibadödanö dichejekwa. Jejenö dichejekwonö, ökwödö Cristo ömöledö ja̧nö, Aaa, waisadösa jö̧ba̧lö kwomukwataduwobe. Ja̧danö, dujulu jwibadödanö dichejekwijayonö, ökwödöma Aaa juluwadösa jö̧ba̧lö kwomukwataduwobe. Ja̧danö, ju'wedö ökwödönö Aaa, jobadö Corintio jojodöma otiwadö jö̧ba̧lö tjomukwatonö, ökwödönö sulabedö jö̧ba̧lö tjomukwatobe.

¹¹ Chömöledö, ökwödö Jesús webawedöma babebi ina a̧wi̧chi̧ tjöbö dö̧jobe, ja̧danö o̧ti̧tjö tjöbö usula demawobe. Ja̧danö, kamijido̧ sulabado̧ kȩachado̧ 'dubawadö dö̧jobe, ja̧danö jojodö kwakwatjawö̧ dö̧jobe usula emawö. Ja̧danö, jelobebi, jelobebi kwebachö dö̧jobe,

¹² ja̧danö dömamijunö labinö otidö dö̧jobe. Ju'wedö ökwödönö öpöjödö suli̧ tjöwaedotö jö̧ba̧lö yötja̧lenama, otiwanö Diosnö adebobe, jobadönö pjaatobö. Ja̧danö, usula demawinö ja̧tjenama, do̧'wo̧ 'dibachibö dö̧jobe.

¹³ Ökwödönö sulabenö yötja̧lenama, otiwanö dösölö̧jinö yöba̧lö datadobe. Jau chömöledö, okobe deinö tjöpöjödawö̧ dö̧jobe ökwödöma. Ja̧danö babebi okobe deinö tjöpöjöda'wo sula'wodanö dichejekwa ökwödöma.

¹⁴ Biya̧ sulabenö kwomukwataduwi̧ chiwȩyudaja̧ma, tabatjö kwo̧'wo̧ tjo̧acho jö̧ba̧löma chiwȩyudökö chömöledö, ökwödönö jwebebö chiwȩyudajabe chömöledö. Jau chömöledö, ökwödöma chösödawö̧ chi̧tji̧mudanöbedöja chömöledö, jo̧kwajabetjö̧ ökwödönö pjatato jö̧ba̧lö ba̧ja̧dö chiwȩyudajabe chömöledö.

¹⁵ Jau chömöledö, ökwödönö ba̧ja̧dadöma ba̧jekwadö tjö̧jena, wanedö yötawa, ba̧jekwadö diez mil jenanö ba̧ja̧dadö ökwödö Cristonö ösödadönö Dios iwene tjöba̧ja̧dena, jo̧kwaijayonö jobadötjö kwabe'dodanöbo̧ma ötjödasa chömöledö. Jau chömöledö, ötjö Pabloda ajayinö otiwa jawa wene ökwödönö yötawinobetjö̧, kwabe'dodanö chichejekwa chömöledö.

¹⁶ Ja̧danö, kwabe'dodanö chichejekwobetjö̧ wetaduwakwö, ötjö ja̧bö chö̧ji̧danö ökwödöbi ja̧bö kwö̧jaduwo jö̧ba̧lö.

¹⁷ Ja̧danö, jejenö ötjö ja̧bö chö̧ji̧danö ja̧bö kwö̧jaduwo jö̧ba̧lö, chitji̧danöbo̧ chösödökwe Timoteonö wetajabe ökwödönö pjaatobö chömöledö. Jau chömöledö, bakobe Jesúsnö ösödö dö̧jobetjö̧, ötjöda chitji̧danö ichejekwobe Timoteoma, ja̧danö jo̧bama jwaikwöda Duluwo̧ wei̧ ja̧bö jo̧. Jo̧bama ökwödönö pjaatakobe, Cristonö ösödö chö̧ji̧ kwomukwatibaduwobö. Jau chömöledö, okobe deinö ko̧ko̧kwö tjö̧bajitenia Cristonö ösödadönö yötawenama, bakweminö Cristonö ösödö ja̧kwawa yötawobe. Ja̧ chöba̧ja̧di̧ jawa kwomukwatibaduwobö pjaatakwo̧ Timoteoma.

¹⁸ Ökwödötjö ju'wedöma, Aaa, ökwödöma juluwadödobetjö̧, Pabloma baikwö ichökö jö̧ba̧lö kwomukwataduwobe.

^19-20 Jo̧kwaijayonö, Duluwo̧ weitjö̧ma, juluwanö jobe chichibakobe chömöledö. Ja̧danö, jobe chichibenama, chöwaisachibakobe jobadö juluwadösa jö̧ba̧ladönöma. Baikwö yötawa: Dios ömöayedö dö̧ji̧ mikwawi̧ma sule daanö yödawi̧maökö, okwa jawada, Dios ujuludaobe. Ja̧danö, jobadöma isabenö yötja̧li̧danö Dios ömöayedö juluwadö tjö̧jitjö̧ma, Dios ujulu tjujuna̧lena. Ja̧danö, jobe ichibö jobadönö chöwaisachibena, isabenö tjujuluwojobö, omöna yötja̧lojobö jö̧ba̧lö chömöledö.

²¹ Ja̧danö, ökwödönö edö chichenama, ¿dakwö chichobö kwösödaduwa chömöledö, labinö ökwödönö kwakwabödanö chichoböö̧kö̧, dösölö̧jinö ökwödönö ösödö chichoböö̧kö̧? Lȩtebi̧ kwa̧ja̧kwaduwitjö̧ma dösölö̧jinö ösödanö chichena, jo̧kwaijayonö kwa̧ja̧kwaduwökötjö̧ma kwakwabödanö jwebebö chichocha chömöledö.